Read Hmong Njua 1 Vaajntxwv 14 Bible Online

1 Vaajntxwv 14 - Hmong Njua bible

1 Vaajntxwv 14

¹Thaus lub sijhawm kws vaajntxwv Yelaunpau-aas tug tub Anpiyas mob nyaav heev lawm.

²Yelaunpau-aas has rua nwg tug quaspuj tas, “Koj ca le tu cev kuas tsi xob muaj leejtwg paub koj, hab moog rua peg lub nroog Silaus kws yog tug cev Vaajtswv lug Ahiyas nyob. Nwg yog tug kws thaus u has tas, kuv yuav tau ua vaajntxwv kaav tebchaws Yixalayees.

³Koj nqaa kaum lub ncuav, ib cov ncuav fuam hab ib laamfwj zib ntaab moog rua nwg. Nug nwg saib yuav muaj dlaabtsi tshwmsim rua wb tug tub, ces nwg yuav qha rua koj.”

⁴Yog le ntawd, nwg txhaj moog cuag Ahiyas rua peg lub nroog Silaus, thaus kws Ahiyas tub laug heev hab qhovmuag tsi pum kev lawm.

⁵Tug TSWV has rua Ahiyas has tas, “Yelaunpau-aas tug quaspuj taabtom sawv kev tuaj cuag koj, nug txug nwg tug tub, vim nwg tug tub mob nyaav heev. Koj teb le nuav rua nwg.” Thaus Yelaunpau-aas tug quaspuj tuaj txug ndlua, nwg ua txuj ua le nwg tsi yog Yelaunpau-aas tug quaspuj.

⁶Tabsis thaus Ahiyas nov nwg tuaj txug ntawm paws rooj, Ahiyas txawm hu has tas, “Lug tsev, kuv tub paub koj lawm, koj yog Yelaunpau-aas tug quaspuj. Vim le caag koj ua txuj ua le kws koj yog lwm tug? Kuv muaj xuv tsi zoo yuav qha rua koj paub.

⁷Ca le rov qaab moog qha rua Yelaunpau-aas has tas, tug TSWV kws yog cov Yixalayees tug Vaajtswv has le nuav: ‘Nyob huv tsaav tuabneeg Yixalayees mas kuv yeej xaiv koj hab tsaa koj lug ua tug kaav kuv tsaav tuabneeg Yixalayees.

⁸Kuv tub tshem lub tebchaws ntawm Daviv cov xeebntxwv lug hab muab cob rua koj lawm. Tabsis koj tsi ua koj lub neej zoo le kuv tug tubkhai Daviv tug kws fwm kuv, noog kuv lug hab ua lawv le tej kws kuv kuas nwg ua.

⁹Koj tseem ua txhum luj tshaaj cov tuabneeg kws ua nom kaav ua ntej koj lawm hab. Koj tso kuv tseg moog puab mlom hab nchuav tej mlom tooj lug pe ua rua kuv chim.

¹⁰Vim le nuav, kuv yuav tso sub tawg sub ntshaa lug rua koj tsev tuabneeg, hab kuv yuav muab cov txivneej kws yog koj caajceg tua kuas tuag taag, kuv yuav ua rua cov laug hab cov hluas ib yaam nkaus. Kuv yuav muab koj tsev tuabneeg ua kuas tu noob nrho. Luas yuav tuaj muab puab cheb moog povtseg ib yaam le cheb tej plauv tshauv.

¹¹Koj tsev tuabneeg txhua tug kws tuag rua huv nroog, dlev yuav tuaj muab noj kuas taag huv tuabsi, hab txhua tug kws tuag rua tom tej taj nraag los dlaav npoj yuav lug muab noj kuas taag. Kuv kws yog tug TSWV, yog tug kws has tej lug nuav ntaag.’ ”

¹²Ahiyas has rua Yelaunpau-aas tug quaspuj has tas, “Koj ca le rov qaab moog tsev taamsim nuav. Thaus koj moog txug ndlua huv lub nroog, koj tug tub yuav tu sav nrho.

¹³Cov Yixalayees yuav tuaj quaj nyav nwg hab muab nwg coj moog log. Yelaunpau-aas tsev tuabneeg, tsuas yog nwg tug tub tuab leeg txhaj le muab log muaj ntxaa. Rua qhov tug TSWV kws yog cov Yixalayees tug Vaajtswv, txaus sab rua nwg nkaus xwb.

¹⁴Tug TSWV yuav tsaa dlua ib tug vaajntxwv lug kaav tsaav tuabneeg Yixalayees, nwg yuav muab Yelaunpau-aas tsev tuabneeg tua kuas tuag tu noob nrho.

¹⁵Tug TSWV yuav rau txim rua cov Yixalayees, hab puab yuav tshee ndluas txag ib yaam le tej lojkov kws nyob huv haav dlej. Nwg yuav muab cov Yixalayees ntab tawm huv lub tebchaws zoo tshaaj plawg kws nwg muab rua puab cov yawmkoob moog, hab nwg yuav muab puab lawv kuas tsiv dlhau plawg tug Dlej Efalates moog rua saab tim u, vim puab tau puab tej mlom quaspuj Aselas lug pe ua rua tug TSWV chim heev.

¹⁶Vim Yelaunpau-aas tau ua txhum hab nwg coj cov Yixalayees moog ua kev txhum, tug TSWV txhaj muab cov Yixalayees tso povtseg lawm.”

¹⁷Ces Yelaunpau-aas tug quaspuj txawm rov qaab lug rua huv lub nroog Tilexas. Thaus nwg lug txug ndlua huv tsev, nwg tug tub tu sav nrho.

¹⁸Cov Yixalayees txhaj tuaj quaj nyav hab muab nwg coj moog log lawv le tug TSWV tau has rua nwg tug tubkhai Ahiyas kws yog tug cev Vaajtswv lug lawm.

¹⁹Dlua le lwm yaam kws Vaajntxwv Yelaunpau-aas ua taag lug, nwg tej kev ntaus rog hab tej kev tswjfwm, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²⁰Yelaunpau-aas ua vaajntxwv kaav tebchaws Yixalayees tau neeg nkaum xyoo. Nwg tuag hab luas coj nwg moog log, hab nwg tug tub Nadas ua vaajntxwv hloov nwg chaw.

²¹Thaus Xalumoos tug tub Lehaunpau-aas ua vaajntxwv kaav tebchaws Yudas, nwg noobnyoog muaj plaub caug ib xyoos, nwg ua vaajntxwv tau kaum xyaa xyoo nyob huv lub nroog Yeluxalees kws tug TSWV xaiv huv tebchaws Yixalayees lug ua qhov chaw rua suavdlawg tuaj pehawm tug TSWV. Lehaunpau-aas nam hu ua Na-amas hab yog tuabneeg Amoos.

²²Cov Yudas tau ua txhum ntau yaam rua tug TSWV hab ua rua nwg chim heev tshaaj le thaus u puab cov yawmkoob tau ua lug lawm.

²³Puab ua tej chaw teev dlaab, txhus ncej zeb hab puab mlom Aselas rua puab pe sau tej ncov roob hab huv tej qaab ntoos.

²⁴Tsi taag le ntawd xwb, tseem muaj cov txivneej hab cov quaspuj kws pheej moog ua namndlav hab txivndlav huv tej tsev teev dlaab ntawd. Cov Yudas tau ua tej kev phem kev qas le cov tuabneeg thaus u kws tug TSWV muab ntab tawm huv lub tebchaws moog ua ntej cov Yixalayees lug nyob.

²⁵Thaus Lehaunpau-aas ua vaajntxwv tau tsib xyoos lawm, Vaajntxwv Sisas kws kaav tebchaws Iziv txawm tuaj tua lub nroog Yeluxalees.

²⁶Nwg coj taagnrho tej khoom muaj nqes kws muab tso rua huv lub Tuamtsev hab huv lub loog, hab tej thaiv nav ntaaj kws Xalumoos muab kub nchuav ua huv tuabsi moog lawm.

²⁷Vaajntxwv Lehaunpau-aas maam le nchuav dlua ib cov thaiv nav ntaaj tooj lug hloov cov ntawd chaw, hab muab rua cov tub faajxwm kws zuv tej roojvaag tau siv.

²⁸Txhua zag kws vaajntxwv moog huv lub Tuamtsev, cov tub faajxwm yeej nqaa rawv cov thaiv nav ntaaj tooj ntawd nrug nwg moog hab coj rov lug ca rua huv cov tub faajxwm tej chaw.

²⁹Dlua le lwm yaam kws Vaajntxwv Lehaunpau-aas ua taag lug, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

³⁰Lehaunpau-aas hab Yelaunpau-aas obtug ib tug pheej ua rog rua ib tug taag obtug simneej le.

³¹Lehaunpau-aas tuag hab luas muab nwg coj moog log rua ntawm cov vaajntxwv lub toj ntxaas huv Daviv lub nroog (nwg nam hu ua Na-amas hab yog tuabneeg Amoos), hab nwg tug tub Anpiyas ua vaajntxwv hloov nwg chaw.