Read Hmong Njua 1 Vaajntxwv 16 Bible Online

1 Vaajntxwv 16 - Hmong Njua bible

1 Vaajntxwv 16

¹Tug TSWV has rua Yehus kws yog tug cev Vaajtswv lug kws yog Hananis tug tub, kuas moog has rua Npasas has le nuav:

²“Koj yeej tsi tseemceeb dlaabtsi, tabsis kuv tsaa koj ua tug thawjcoj coj kuv tsaav tuabneeg Yixalayees. Koj ua txhum ib yaam le Yelaunpau-aas ua, hab koj coj kuv tsaav tuabneeg moog ua txhum, ua rua kuv chim heev,

³yog le ntawd, kuv yuav ua rua koj tsev tuabneeg kuas puamtsuaj, ib yaam le kuv ua rua Yelaunpau-aas tsev tuabneeg hab.

⁴Koj tsev tuabneeg tug twg kws tuag rua huv nroog, dlev yuav tuaj muab noj kuas taag huv tuabsi, hab txhua tug twg kws tuag rua tom tej taj nraag los dlaav npoj yuav lug muab noj kuas taag.”

⁵Dlua le lwm yaam kws Npasas ua taag lug, hab nwg lub peevxwm, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

⁶Npasas tuag hab luas muab nwg coj moog log rua huv lub nroog Tilexas, hab nwg tug tub Elas ua vaajntxwv hloov nwg chaw.

⁷Tug TSWV muab tej lug kws foom tsi zoo nuav rua Yehus kws yog tug cev Vaajtswv lug coj moog has rua Npasas hab nwg tsev tuabneeg, tub yog vim tej kws nwg ua txhum rua tug TSWV. Qhov kws nwg ua rua tug TSWV chim, tsi yog vim tej kev phem kev qas kws nwg ua lawv le Vaajntxwv Yelaunpau-aas ua taag lug xwb, tabsis yog qhov kws nwg muab Yelaunpau-aas tsev tuabneeg tua tuag tu noob nrho lawm.

⁸Thaus Vaajntxwv Axas ua vaajntxwv kaav lub tebchaws Yudas tau neeg nkaum rau xyoo lawm, Npasas tug tub Elas maam le ua vaajntxwv kaav lub tebchaws Yixalayees, hab nwg nyob huv lub nroog Tilexas kaav tau ob xyoos.

⁹Ximelis kws yog Elas ib tug thawj saib ib nraab ntawm vaajntxwv cov tsheb neeg tau ntxeev sab rua vaajntxwv. Muaj ib nub Elas moog haus cawv huv Alexas tsev huv lub nroog Tilexas. Alexas yog tug kws saib lub loog.

¹⁰Ximelis txawm nkaag moog muab Elas ntaus tuag rua huv lub tsev ntawd, hab nwg ua vaajntxwv hloov Elas chaw. Thaus ntawd Axas tub ua vaajntxwv kaav tebchaws Yudas tau neeg nkaum xyaa xyoo lawm.

¹¹Tom qaab kws Ximelis lug ua vaajntxwv tau tsi ntev, nwg muab Npasas tsev tuabneeg tua tuag tu noob nrho. Txhua tug txivneej kws yog Npasas kwvtij hab phoojywg, Ximelis muab tua taag huv tuabsi.

¹²Qhov kws Ximelis muab Npasas tsev tuabneeg tua tuag taagnrho, yog lawv le tej lug kws tug TSWV kuas Yehus kws yog tug cev Vaajtswv lug moog has rua Npasas ntaag.

¹³Qhov kws Npasas hab nwg tug tub Elas tau ua rua tug TSWV kws yog cov Yixalayees tug Vaajtswv chim, mas yog obtug pheej moog pe dlaab pe mlom hab coj cov Yixalayees moog ua txhum.

¹⁴Dlua le lwm yaam kws Elas ua taag lug, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

¹⁵Thaus Axas ua vaajntxwv kaav lub tebchaws Yudas tau neeg nkaum xyaa xyoo lawm, Ximelis maam le ua vaajntxwv kaav lub tebchaws Yixalayees, nwg nyob huv lub nroog Tilexas kaav cov Yixalayees tau xyaa nub. Thaus ntawd cov tubrog Yixalayees tseem taabtom moog puav tua cov Filitees lub nroog Nkinpethoos,

¹⁶Ces thaus puab nov dlheev has tas, Ximelis ntxeev sab rua vaajntxwv hab muab vaajntxwv tua tuag lawm, taamsim ntawd puab ca le muab Aumelis kws yog puab tug thawj tubrog tsaa ua cov Yixalayees tug vaajntxwv.

¹⁷Aumelis hab nwg cov tubrog ca le tso lub nroog Nkinpethoos tseg hab moog puav tua lub nroog Tilexas.

¹⁸Thaus Ximelis pum has tas, lub nroog Tilexas poob lawm, nwg txawm moog rua huv chaav tsev huv plawv lub loog, tis suavtawg hlawv lub loog, ces nwg txhaj tuag rua huv lawm.

¹⁹Tej xwm nuav tshwmsim, tub yog vim nwg ua txhum rua tug TSWV, hab coj cov Yixalayees moog ua txhum, ib yaam le nwg yawmkoob Yelaunpau-aas ua.

²⁰Dlua le lwm yaam kws Ximelis ua taag lug, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²¹Thaus ntawd cov Yixalayees faib ua ob paab lawm: ib paab xaav tsaa Nkinas tug tub Tinpenis ua vaajntxwv, tabsis ib paab txaus sab rua Aumelis xwb.

²²Ces thaus kawg, paab kws txaus sab tuaj Aumelis tog yeej; puab txhaj muab Tinpenis tua tuag. Aumelis txhaj tau ua vaajntxwv.

²³Yog le ntawd, thaus Axas ua vaajntxwv kaav lub tebchaws Yudas tau peb caug ib xyoos lawm, Aumelis maam le ua vaajntxwv kaav lub tebchaws Yixalayees, hab nwg kaav tau kaum ob xyoos. Thawj rau lub xyoos nwg nyob huv lub nroog Tilexas kaav.

²⁴Nwg muab rau txheeb dlaim nyaj moog yuav tau lub laaj roob Xamalis ntawm ib tug txivneej hu ua Semelis. Ces Aumelis txawm moog txhim khu lub laaj roob ntawd, ua tau ib lub nroog rua sau, hab tis npe rua lub nroog ntawd hu ua Xamalis, lawv le Semelis lub npe kws yog tug qub tswv lub laaj roob ntawd.

²⁵Aumelis tseem ua txhum rua tug TSWV luj tshaaj cov vaajntxwv kws xub nyob ua ntej nwg lawm hab.

²⁶Nwg ua rua tug TSWV kws yog cov Yixalayees tug Vaajtswv chim heev, vim nwg tau coj cov Yixalayees moog ua txhum hab moog pe dlaab pe mlom ib yaam le thaus u Yelaunpau-aas tau ua lawm.

²⁷Dlua le lwm yaam kws Aumelis ua taag lug, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²⁸Aumelis tuag hab luas coj nwg moog log rua huv lub nroog Xamalis, hab nwg tug tub Ahaj ua vaajntxwv hloov nwg chaw.

²⁹Thaus kws Axas ua vaajntxwv kaav lub tebchaws Yudas tau peb caug yim xyoo lawm, Aumelis tug tub Ahaj maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau neeg nkaum ob xyoos.

³⁰Nwg ua txhum rua tug TSWV heev tshaaj cov vaajntxwv thaus u ua lawm hab.

³¹Tej kev txhum kws nwg ua le Vaajntxwv Yelaunpau-aas ua, tseem tsi txaus nwg sab hab; tsi taag le ntawd xwb, nwg moog yuav Vaajntxwv Enpa-aas tug ntxhais Yexenpees lug ua quaspuj hab moog pe tug mlom Npa-aas.

³²Nwg ua tau ib lub tsev teev Npa-aas rua huv lub nroog Xamalis, hab ua tau ib lub thaaj rua nwg, hab muab teeb rua huv lub tsev kws nwg ua teev tug mlom Npa-aas ntawd.

³³Nwg tseem puab tau ib tug mlom quaspuj Aselas lug rua suavdlawg pe. Nwg ua rua tug TSWV kws yog cov Yixalayees tug Vaajtswv chim rua nwg tshaaj cov Yixalayees cov vaajntxwv txhua tug kws tau ua taag lug lawm hab.

³⁴Thaus nwg tseem ua vaajntxwv, Hi-ees kws nyob huv Npethees txhaj tuaj khu lub nroog Yelikaus. Ces Hi-ees tug tub hlub kws hu ua Anpilaas tuag thaus nwg pib khu lub nroog Yelikaus, hab nwg tug tub ntxawg kws hu ua Xenkus tuag rua thaus nwg ua cov roojvaag, lawv le tug TSWV tau has tseg rua Noos tug tub Yausuas lawm.