Read Hmong Njua 1 Vaajntxwv 17 Bible Online

1 Vaajntxwv 17 - Hmong Njua bible

1 Vaajntxwv 17

¹Muaj ib tug cev Vaajtswv lug hu ua Eliyas nyob huv lub nroog Tisenpes huv lub cheebtsaam Nkile-as, nwg has rua Vaajntxwv Ahaj has tas, “Kuv tuav tug TSWV kws yog cov Yixalayees tug Vaajtswv kws muaj sa nyob, tug kws kuv naj nub ua nwg teg num lub npe has rua koj tas, ob lossis peb xyoos tom ntej nuav yuav tsi muaj ib ncos lwg lossis ib pluav naag lug le, moog txug thaus kuv has kuas muaj txhaj le yuav rov muaj.”

²Ces tug TSWV has rua Eliyas has tas,

³“Koj ca le tawm ntawm qhov chaw nuav moog rua saab nubtuaj, moog nkaum ze rua ntawm tug Dlej Khelis kws nyob ntawm tug Dlej Yauladees saab nubtuaj.

⁴Koj yuav tau tug dlej ntawd haus, hab kuv tub has kuas uab laag nqaa mov lug rua koj noj nyob qhov ntawd lawm.”

⁵Eliyas txhaj ua lawv le tug TSWV has. Nwg txawm moog nyob ntawm tug Dlej Khelis.

⁶Nwg haus tug Dlej ntawd hab uab laag pheej nqaa mov hab nqaj lug rua nwg noj txhua taagkig hab txhua mo.

⁷Tabsis tsi ntev tom qaab ntawd, tug dlej kuj qhuav taag vim tsi muaj naag lug.

⁸Ces tug TSWV has rua Eliyas has tas,

⁹“Koj ca le sawv kev moog rua peg lub nroog Xalefas kws nyob ze lub nroog Xidoos, hab moog nyob qhov ntawd, kuv tub has rua ib tug puj ntsuag kws nyob huv lub nroog ntawd kuas nwg pub zaub pub mov rua koj noj lawm.”

¹⁰Yog le ntawd, Eliyas txhaj moog rua peg lub nroog Xalefas. Thaus nwg moog txug ntawm lub roojvaag nroog, nwg pum ib tug puj ntsuag taabtom tuaj khaws tawg. Eliyas txawm has rua tug puj ntsuag ntawm has tas, “Thov koj cug mivntsiv dlej tuaj pub rua kuv haus.”

¹¹Thaus tug puj ntsuag taabtom rov moog nqaa dlej, Eliyas txawm hu has tas, “Thov nqaa mivntsiv mov tuaj pub kuv noj hab.”

¹²Nwg teb has tas, “Kuv thov coglug rua tug TSWV kws yog koj tug Vaajtswv kws muaj sa nyob has tas, kuv tsi muaj mov lawm. Kuv tsuas tshuav ib nyuas taus moov nplej nyob huv taig hab ib qhov nyuas roj txiv ntoo nyob huv qaab hub lawm xwb. Kuv tuaj khaws tawg coj moog rauv ua qhov nyuas moov nplej ntawd rua kuv hab kuv tug tub noj. Pluag mov nuav yog pluag mov kawg, ces wb tog tuag lawm xwb.”

¹³Eliyas txawm has rua tug puj ntsuag ntawd has tas, “Koj tsi xob txhawj, ca le moog ua koj pluag mo, tabsis xub ua ib qho miv miv nqaa tuaj rua kuv noj tsaiv, koj maam le rov moog muab qhov seem ua rua koj hab koj tug tub noj.

¹⁴Vim tug TSWV kws yog cov Yixalayees tug Vaajtswv has le nuav: ‘Cov moov nplej huv lub taig yuav tsi paub taag hab cov roj huv lub hub yuav tsi paub qhuav ua ntej kws tug TSWV tso naag lug.’ ”

¹⁵Tug puj ntsuag ntawd txhaj moog ua lawv le Eliyas has rua nwg, puab txhaj muaj mov txaus noj ntau nub.

¹⁶Lawv le tug TSWV tau coglug tseg rua Eliyas lawm has tas, “Cov moov nplej huv lub taig yuav tsi paub taag, hab cov roj huv lub hub yuav tsi paub qhuav.”

¹⁷Tsi ntev tom qaab nuav, muaj ib nub tug puj ntsuag ntawd tug tub txawm mob; nwg mob nyaav heev zuj zug, ces nwg txawm tuag lawm.

¹⁸Tug puj ntsuag ntawd has rua Eliyas has tas, “Koj tub yog Vaajtswv tug tuabneeg, ua le caag koj txhaj ua le nuav rua kuv? Koj tuaj ntawm nuav, yog koj tuaj ua kuas Vaajtswv ncu txug kuv tej kev txhum kws kuv tau ua taag lug lawm, kuas kuv tug tub tuag xwb los?”

¹⁹Eliyas has tas, “Ca le puag koj tug tub lug rua kuv.” Eliyas tsaws hlo tug mivtub ntawm leej nam xubndlag, puag moog rua sau chaav kws Eliyas nyob, hab muab tug tub ntawd tso pw rua sau Eliyas lub txaaj.

²⁰Ces Eliyas tsaa ncauj thov Vaajtswv has tas, “Tug TSWV kws yog kuv tug Vaajtswv, vim le caag koj ua rua tug puj ntsuag nuav tau kev txomnyem ua luaj nuav? Nwg yog tug kws muaj lub sab dlawb pub zaub pub mov rua kuv noj, vim le caag koj ua rua nwg tug tub tuag lawm?”

²¹Ces Eliyas txawm qhau cev hlo pw tsuam tug tub ntawd lub cev peb zag, hab thov Vaajtswv has tas, “Tug TSWV kws yog kuv tug Vaajtswv, thov koj rau sav rau paa rua tug tub nuav kuas rov muaj sa lauj!”

²²Tug TSWV teb Eliyas tej lug thov; ces tug tub ntawd txawm ua paa hab rov muaj sa lawm.

²³Eliyas txhaj puag tug tub ntawd nqeg lug rua txheej tsev huv qaab nuav, muab rua leej nam hab has rua nwg tas, “Koj saib, koj tug tub rov muaj sa lawm.”

²⁴Tug puj ntsuag ntawd teb has tas, “Nwgnuav kuv paub lawm has tas koj yog Vaajtswv tug tuabneeg hab yog tug cev Vaajtswv lug tag.”