Read Hmong Njua 1 Vaajntxwv 18 Bible Online

1 Vaajntxwv 18 - Hmong Njua bible

1 Vaajntxwv 18

¹Tau ib ntus tom qaab nuav, yog xyoo peb kws ntuj qhua teb nkig ntawd, tug TSWV has rua Eliyas has tas, “Koj ca le moog cuag Vaajntxwv Ahaj, kuv yuav tso naag lug.”

²Yog le ntawd, Eliyas txhaj moog lawm. Thaus ntawd muaj kev tshaib nqhes nyob huv lub xeev Xamalis,

³Vaajntxwv Ahaj txhaj hu kuas Aunpadiyas tug kws saib lub loog moog cuag nwg. (Aunpadiyas yog ib tug kws fwm tug TSWV heev.

⁴Thaus Yexenpees nteg tug TSWV cov cevlug tua povtseg, Aunpadiyas tau coj cov cev Vaajtswv lug ntawd ib puas leej moog zais rua huv ob lub qhov tsua, ib paab tsib caug leej, nwg xaa zaub mov hab dlej moog rua puab noj hab haus.)

⁵Ahaj has rua Aunpadiyas has tas, “Wb ca le tawm moog saib txhua lub qhovdlej txhawv hab txhua lub haav thoob plawg huv lub tebchaws nuav saib puas pum muaj zaub nyob qhov twg txaus peb tej neeg hab tej neeg luav noj, txhaj cawm tau tej tsaj ntawd. Peb tej tsaj txhaj yuav tsi tuag tshaib.”

⁶Ces obtug txawm pum zoo muab lub tebchaws faib lawv le obtug nyam, ces obtug nyag moog nyag rua ib txujkev lawm.

⁷Thaus Aunpadiyas taabtom taug kev moog, nwg txawm ntsib Eliyas. Nwg tseem ncu tau Eliyas, nwg txhaj nyo hau ntshis hawm hab nug has tas, “Koj puas yog Eliyas?”

⁸Eliyas teb has tas, “Kuv yog Eliyas.” Koj ca le rov qaab moog hab qha rua koj tug tswv kws yog Vaajntxwv has tas, “Kuv nyob ntawm nuav.”

⁹Aunpadiyas teb has tas, “Kuv tau ua txhum dlaabtsi, koj txhaj yuav muab kuv cob rua Ahaj txhais teg? Kuv ntshai nyob tsaam nwg muab kuv tua povtseg?

¹⁰Kuv thov coglug ntawm tug TSWV kws yog koj tug Vaajtswv kws muaj sa nyob has tas, vaajntxwv tub khaiv tuabneeg moog nrhav koj rua txhua lub tebchaws thoob plawg huv nplajteb nuav lawm. Yog tug nom kws kaav lub tebchaws twg has tas, tsi pum koj nyob huv nwg lub tebchaws, ces Ahaj yuav kuas tug kws kaav lub tebchaws ntawd tsaa teg twv has tas, nwg yeej tsi pum koj nyob qhov twg le.

¹¹Nwgnuav koj tsua xaav le caag, koj txhaj kuas kuv moog qha rua nwg has tas koj nyob ntawm nuav?

¹²Nyob tsaam thaus kuv taabtom moog lawm, tug TSWV tug Ntsujplig lug coj koj moog rua qhov chaw kws tsi muaj tuabneeg paub lawm ne? Ces thaus kuv moog qha rua Ahaj has tas koj nyob ntawm nuav, tabsis nwg tsuas tuaj nrhav tsi tau koj, ces thaus ntawd nwg yuav muab kuv tua povtseg xwb. Koj ncu ntsoov has tas, kuv yeej yog tug kws ibtxwm pehawm tug TSWV thaus kuv tseem yog mivnyuas yau lug lawm.

¹³Koj puas nov zaaj kws Yexenpees nteg tug TSWV cov cevlug tua povtseg, kuv coj tau ib puas leej moog zais rua huv ob lub qhov tsua, ib paab twg tsib caug leej, kuv xaa zaub mov hab dlej moog rua puab noj hab haus?

¹⁴Yog le ntawd, koj yuav ua le caag khaiv kuv moog qha rua vaajntxwv has tas koj nyob ntawm nuav? Nwg yeej yuav muab kuv tua povtseg xwb!”

¹⁵Eliyas teb has tas, “Kuv thov coglug rua tug TSWV kws muaj fwjchim luj kawg nkaus, tug kws kuv naj nub ua nwg teg num has tas, nub nua kuv yuav moog kuas tshwm ntsej tshwm muag rua Vaajntxwv Ahaj pum ntaag!”

¹⁶Yog le ntawd, Aunpadiyas txhaj moog cuag Vaajntxwv Ahaj hab qha zaaj nuav rua nwg, ces Ahaj txawm moog cuag Eliyas.

¹⁷Thaus Ahaj pum dlheev Eliyas, Ahaj has tas, “Tub yog koj ntaag, koj yog tug kws ua rua cov Yixalayees tau kev nyuaj sab ntxhuv plawv kawg le!”

¹⁸Eliyas teb has tas, “Kuv tsi yog tug kws ua kuas cov Yixalayees tau kev nyuaj sab ntxhuv plawv. Tub yog koj hab koj txiv ntaag, rua qhov meb tsi noog tug TSWV tej lug saamfwm, hab meb pheej moog pe tej mlom Npa-aas ntaag.

¹⁹Nwgnuav koj ca le moog hu cov Yixalayees tuaj cuag kuv rua sau lub Roob Kalemees nuav. Coj plaub puas tsib caug leej kws cev Npa-aas lug hab plaub puas leej kws cev tug mlom quaspuj Aselas lug kws yog nam Vaajntxwv Yexenpees ua tug pub kev noj haus rua puab, kuas tuaj rua ntawm nuav huv tuabsi.”

²⁰Yog le ntawd, Ahaj txhaj hu cov Yixalayees hab cov cev Npa-aas lug tuaj sis sau ua ke rua sau lub Roob Kalemees.

²¹Eliyas txaav zog moog sawv rua ntawm cov pejxeem hab has tas, “Mej tseem yuav ua tuabneeg muaj ob lub sab moog txug thaus twg? Yog has tas tug TSWV yog Vaajtswv tag, suavdlawg ca le pehawm nwg; tabsis yog has tas Npa-aas yog vaajtswv, ces suavdlawg ca le pe Npa-aas los mas!” Tabsis cov pejxeem tsi teb ib lus le.

²²Eliyas txawm has tas, “Cov kws cev tug TSWV lug tsuas tshuav kuv tuab leeg lawm xwb, tabsis cov kws cev Npa-aas lug muaj plaub puas tsib caug leej dlag.

²³Ca le caab ob tug txiv nyuj lug; muab ib tug rua cov cev Npa-aas lug, muab tug nyuj ntawd tua txav ua tej thooj hab coj moog tso rua sau pawg tawg, tabsis tsi xob zig suavtawg rua le. Kuv maam muab dlua ib tug txiv nyuj tua hab ua ib yaam le puab ua ntawd.

²⁴Ces kuas cov cev Npa-aas lug thov puab tug vaajtswv, hab kuv yuav thov kuv tug Vaajtswv. Yog tug twg tso suavtawg lug kub, tug ntawd txhaj yog Vaajtswv tag.” Cov pejxeem txhaj qw has tas, peb pum zoo ua le koj has ko ntaag.

²⁵Ces Eliyas has rua cov cev Npa-aas lug tas, “Mej yog cov coob, ca mej xub moog xaiv tug txiv nyuj hab coj moog tua ua ntej. Tabsis tsi xob zig suavtawg rua cov tawg le, thov mej tug vaajtswv kuas nwg tso suavtawg lug kub nkaus xwb.”

²⁶Puab txawm muab tug txiv nyuj kws puab caab tuaj ntawd tua hab thov puab tug Npa-aas moog txug thaus taav su. Puab qw has tas, “Npa-aas, thov teb peb lauj!” Hab puab dlha moog dlha lug ncig lub thaaj kws puab ua ntawd. Tabsis tsi muaj ib lub suab dlaabtsi teb puab le.

²⁷Ces thaus taav su, Eliyas has lug twm puab tas: “Thov kuas nrov mivntsiv hab maj! Nwg yog vaajtswv, tej zag nwg tseem xaav lwm yaam lossis nwg tseem taabkaum lossis nwg tseem taug kev moog rua lwm qhov lossis nwg tseem tsaug zug lawm, mas mej yuavtsum tsaa kuas nwg sawv!”

²⁸Yog le ntawd, cov cev Npa-aas lug txhaj qw nrov tshaaj qhov qub, puab muab ntaaj muab rag hlais puab lub cev ua ntshaav nrug lab vog, lawv le kevcai kws puab ibtxwm ua lug lawm.

²⁹Puab qw ua nqaaj ua nqug moog txug thaus nub qaij; tabsis tsi muaj leejtwg teb, hab tsi nov suab dlaabtsi le.

³⁰Ces Eliyas txawm has rua cov pejxeem has tas, “Mej txaav lug ze kuv.” Puab txawm txaav lug sawv vij Eliyas. Eliyas txawm muab tug TSWV lub thaaj kws tub qaug taag lawm khu rov rua.

³¹Nwg muab kaum ob lub pobzeb lug, ib lub rua ib xeem lawv le Yakhauj kaum ob leeg tub ntawd tej npe, Yakhauj yog tug kws tug TSWV tis dlua ib lub npe hu ua Yixalayees.

³²Eliyas muab cov pobzeb ntawd txhim ua ib lub thaaj ua qhov chaw pehawm tug TSWV. Nwg khawb ib tug kwj ncig lub thaaj ntawd, kuas ntim tau le ob thoob dlej.

³³Ces nwg muab tawg moog tso rua sau lub thaaj, muab tug txiv nyuj tua txav ua tej thooj hab coj moog tso rua sau cov tawg. Nwg txawm has tas, “Ca le coj plaub lub hub moog ntim dlej kuas puv nkaus rua hab nqaa lug laub rua sau cov khoom fij hab cov tawg nuav.” Puab txawm ua lawv le nwg has ntawd.

³⁴Eliyas has tas, “Rov nqaa dlej lug laub ntxiv dlua.” Puab rov ua dlua le nwg has. Nwg rov has tas, “Rov nqaa dlej lug laub ntxiv dlua.” Ces puab rov qaab ua dlua ib zag hab.

³⁵Cov dlej ndlwg sau lub thaaj lug puv nkaus tug kwj kws khawb ncig lub thaaj.

³⁶Ces thaus nub qaij kws txug lub caij fij khoom, Eliyas txhaj txaav zog lug rua ntawm lub thaaj hab thov Vaajtswv has tas, “Tug TSWV kws yog Anplahaas, Ixaj hab Yakhauj tug Vaajtswv, nub nua thov koj ca le ua kuas suavdlawg pum has tas, koj yog cov Yixalayees tug Vaajtswv hab kuv yog koj tug tubkhai hab tej kws kuv ua nuav yog koj kuas kuv ua.

³⁷Thov teb kuv lauj tug TSWV, thov teb kuv, kuas cov tuabneeg nuav txhaj paub has tas koj yog tug TSWV, tug Vaajtswv kws taabtom coj puab rov lug cuag koj.”

³⁸Tug TSWV txawm tso suavtawg lug kub cov khoom fij, cov tawg, cov pobzeb, cov aav hab cov dlej huv tug kwj taag huv tuabsi lawm.

³⁹Thaus cov pejxeem pum le ntawd, puab txawm qhau cev hlo rua huv aav hab qw nrov nrov has tas, “Tug TSWV txhaj yog Vaajtswv; tug TSWV tuab leeg xwb txhaj yog Vaajtswv tag.”

⁴⁰Eliyas has tas, “Mej ca le nteg cov xwbfwb cev Npa-aas lug nuav; tsi xob pub ib tug dlim le!” Cov pejxeem nteg tau puab txhua tug, hab Eliyas coj puab moog tua povtseg taag rua nraag tug Dlej Kisoos lawm.

⁴¹Eliyas has rua Vaajntxwv Ahaj has tas, “Koj ca le moog hab noj mov taamsim nuav. Kuv nov suab naag tub lug yuav txug.”

⁴²Thaus Ahaj moog noj mov lawm, Eliyas txawm nce moog rua sau ncov Roob Kalemees, nwg txhus caug ndlua rua huv aav hab khoov ua ntsejmuag ti nkaus rua ntawm nwg ob lub hauvcaug.

⁴³Eliyas has rua nwg tug tubkhai has tas, “Taamsim nuav koj ca le moog saib tom havtxwv saib.” Tug tubkhai txawm moog saib hab rov lug has tas, “Kuv tsi pum dlaabtsi le.” Eliyas kuas nwg moog saib xyaa zag.

⁴⁴Zag xyaa nwg rov lug hab has tas, “Kuv pum ib tauv fuab miv miv luaj lub xibteg sawv huv havtxwv tuaj xwb.” Eliyas has rua nwg tug tubkhai has tas, “Koj ca le moog has rua Vaajntxwv Ahaj, kuas nwg kawgkag nce rua huv nwg lub tsheb neeg, hab moog tsev ua ntej naag lug taav nwg kev.”

⁴⁵Ces tuab plag ntshis xwb, fuab tsaus nti ib tog tuaj puv nkaus sau nruab ntug, cua pib ntsawj hab tuamtsaam naag nrov nroo ntwg sau ntuj lug. Ahaj txhaj nce rua huv nwg lub tsheb neeg hab rov qaab moog rua huv lub nroog Yexelees lawm.

⁴⁶Tug TSWV lub fwjchim lug kaav nkaus Eliyas; nwg qaws hlo tsho khi nkaus rua sau dluav hab dlha ceev heev fuas kag Ahaj ntej moog txug ndlua huv Yexelees.