Read Hmong Njua 1 Vaajntxwv 19 Bible Online

1 Vaajntxwv 19 - Hmong Njua bible

1 Vaajntxwv 19

¹Vaajntxwv Ahaj pav txhua yaam kws Eliyas ua, hab zaaj kws Eliyas tua cov xwbfwb cev Npa-aas lug ntawd rua Yexenpees kws yog nam vaajntxwv noog.

²Yexenpees txawm tso tuabneeg moog has rua Eliyas has tas, “Pigkig thaus txug lub caij nuav, yog kuv tsi tau ua rua koj ib yaam le koj ua rua cov xwbfwb cev Npa-aas lug, thov tej vaajtswv ca le muab kuv tua kuas tuag.”

³Eliyas ntshai heev, nwg txhaj nrhav kev tsiv nkaum; nwg coj nwg tug tubkhai moog rua nraag lub nroog Npesenpas kws nyob huv lub xeev Yudas. Eliyas muab nwg tug tubkhai tso tseg rua nraag,

⁴Eliyas moog ib nub ke rua tom roob mojsaab qhua. Nwg moog nkaum tshaav rua huv qaab ib tsob ntoo hab nwg xaav tuag lawm xwb. Nwg txhaj thov Vaajtswv has tas, “Tug TSWV, txaus kuv lawm lauj. Ca le rhu kuv txujsa moog; kuv tuag yuav zoo dlua!”

⁵Nwg txawm qhau cev hlo pw huv qaab ntoo hab tsaug zug hlas lawm. Ces taamsim ntawd txawm muaj ib tug timtswv ceebtsheej lug tuav nkaus nwg hab has tas, “Eliyas, koj ca le sawv lug noj mov.”

⁶Eliyas tsim dlheev lug xaam ncig leeg, nwg pum ib lub ncuav hab ib hub dlej nyob ze ntawm nwg taubhau, nwg txawm muab lug noj hab haus taag, nwg rov qhau cev pw dlua lawm hab.

⁷Ces tug TSWV tug timtswv rov lug tsaa Eliyas dlua zag ob has tas, “Eliyas, koj ca le sawv lug hab noj mov, nyob tsaam koj tsi muaj zug taug kev.”

⁸Eliyas sawv lug noj mov hab haus dlej. Cov mov ntawd ua rua nwg muaj zug taug kev tau plaub caug nub moog txug rua tom Roob Xinais kws yog Vaajtswv lub Roob Dlawbhuv.

⁹Eliyas nkaag moog pw ib mos huv lub qhov tsua. Ces tug TSWV txawm lug has rua Eliyas has tas, “Eliyas, koj tuaj ua dlaabtsi ntawm nuav?”

¹⁰Eliyas teb has tas, “Tug TSWV kws yog Vaajtswv tug kws muaj fwjchim luj kawg nkaus, kuv ibtxwm ua koj teg num. Tabsis cov Yixalayees tsi coj lawv le tej lug kws puab tau cog tseg rua koj, puab muab koj tej thaaj rhuav hab muab koj cov cevlug tua povtseg taag lawm. Tsuas tshuav kuv tuab leeg xwb los puab tseem nrhav kuv tua povtseg hab!”

¹¹Tug TSWV teb Eliyas has tas, “Koj ca le tawm moog sawv sau ncov roob taabmeeg kuv.” Tug TSWV txawm hlaa lug moog hab ua cua dlaaj cua dlub ntsawj tej pov roob tawg pleb zum zawg hab tej pobzeb tawg dlawb vog, tabsis tug TSWV tsi nyob huv cov cua ntawd. Tom qaab cua tu lawm, txawm muaj aav qeeg, tabsis tug TSWV tsi nyob huv qhov kws aav qeeg ntawd hab.

¹²Tom qaab aav qeeg taag txawm muaj suavtawg, tabsis tug TSWV tsi nyob huv cov suavtawg ntawd le hab. Ces thaus cov suavtawg dlhau lawm, txawm muaj ib lub suab has yau yau tuaj.

¹³Thaus Eliyas nov lub suab ntawd, nwg txawm muab nwg lub tsho lug npug nwg ntsejmuag hab tawm moog sawv ntawm rooj tsuas. Muaj ib lub suab has rua Eliyas has tas, “Eliyas, koj tuaj ua dlaabtsi ntawm nuav?”

¹⁴Eliyas teb has tas, “Tug TSWV kws yog Vaajtswv tug kws muaj fwjchim luj kawg nkaus, kuv ibtxwm ua koj teg num. Tabsis cov Yixalayees tsi coj lawv le tej lug kws puab tau cog tseg rua koj, puab muab koj tej thaaj rhuav, hab muab koj cov cevlug tua povtseg taag lawm. Tsuas tshuav kuv tuab leeg xwb los puab tseem nrhav kuv tua povtseg hab!”

¹⁵Tug TSWV has tas, “Koj ca le rov qaab moog rua peg tebchaws mojsaab qhua kws ze lub nroog Damaxes, moog rua huv lub nroog hab muab roj laub rua Haxayees taubhau tsaa nwg ua cov Xilias tug vaajntxwv;

¹⁶muab roj laub rua sau Nimesis tug tub Yehus taubhau, tsaa nwg ua vaajntxwv kaav lub tebchaws Yixalayees, hab muab roj laub rua sau Safas kws yog tuabneeg Anpees Mehaulas tug tub Elisas taubhau, tsaa nwg ua tug cev kuv lug hloov koj chaw.

¹⁷Yog leejtwg tsiv dlim tsi raug Haxayees tua tuag, tug ntawd yuav raug Yehus tua tuag, hab yog leejtwg tsiv dlim tsi raug Yehus tua tuag, tug ntawd yuav raug Elisas tua tuag.

¹⁸Tabsis kuv tseem tseg xyaa txheeb leej nyob huv lub tebchaws Yixalayees nuav, puab yog cov kws muaj lub sab npuab kuv, puab tsi tau txhus caug pe Npa-aas hab nwj nwg cov mlom le.”

¹⁹Eliyas moog ntsib Elisas thaus nwg tseem taabtom tsaav khais laij teb; muaj kaum ib nkawm txiv nyuj laij ua nwg ntej, nwg yog tug kws tsaav khais rua nkawm kawg tom qaab. Eliyas hle hlo nwg lub tsho luj hab muab rua Elisas naav.

²⁰Elisas txawm tso plhuav nwg ob tug nyuj tseg, moog caum Eliyas qaab hab has tas, “Thov ca kuv moog nwj kuv nam kuv txiv ncaim obtug tsaiv, kuv maam le nrug koj moog.” Eliyas teb has tas, “Tau los mas, koj ca le moog, kuv tsi txwv koj le.”

²¹Elisas txawm muab nwg ob tug txiv nyuj tua, hab muab tug quabtwg lug ua tawg rauv hau cov nqaj. Elisas muab cov nqaj faib rua suavdlawg noj. Ces Elisas txawm nrug Eliyas moog hab ua tug paab Eliyas lawm.