Read Hmong Njua 1 Vaajntxwv 2 Bible Online

1 Vaajntxwv 2 - Hmong Njua bible

1 Vaajntxwv 2

¹Thaus Daviv yuav tuag, nwg hu nwg tug tub Xalumoos lug ntuag hab cob num rua Xalumoos zag kawg has tas,

²“Tub txug lub sijhawm kws kuv yuav tso lub nplajteb nuav tseg lawm. Koj ca le ua sab tawv qhawv,

³ua lawv le tug TSWV kws yog koj tug Vaajtswv kuas koj ua. Hab coj lawv le nwg tej kevcai hab tej lug saamfwm kws muab sau tseg rua huv Mauxes Phoo Kevcai, koj txhaj yuav vaammeej, tsi has koj ua dlaabtsi lossis koj yuav moog qhov twg.

⁴Tug TSWV yuav ua lawv le tej lug kws nwg cog tseg rua kuv has tas, ‘Yog koj cov tubki ua tuabneeg ncaaj nceeg hab coj lawv le kuv tej lug qha kawg sab kawg ntsws kawg plaab kawg plawv mas koj caajceg yuav tsi tu tug tuabneeg kws nyob sau cov Yixalayees lub zwmtxwv ib zag le.’

⁵“Dlua le ntawd ntxiv, koj tub yeej paub lawm has tas Yau-am tau ua le caag rua kuv. Nwg tau tua cov Yixalayees ob tug thawj tubrog, Neles tug tub Aneles hab Yethes tug tub Amaxas. Koj ncu ntsoov has tas, nwg tua obtug povtseg thaus lub tebchaws muaj kev thaajyeeb pauj tej tuabneeg kws obtug tua thaus lub tebchaws tseem ua tsuv ua rog. Nwg tua cov tuabneeg kws tsi muaj txim, mas nwgnuav kuv txhaj tau ris lub txim kws nwg ua ntawd, hab raug kev txomnyem ntsuav le nuav.

⁶Koj yeej paub has tas, koj yuavtsum ua le caag rua nwg lawm; koj tsi xob pub nwg tuag suv sab so le.

⁷“Koj yuavtsum ua sab dlawb sab zoo rua Npaxilais tug kws yog tuabneeg Nkile-as cov tub hab saib puab, rua qhov puab tau ua zoo heev rua kuv thaus kws kuv tsiv moog nkaum koj tug tijlaug Axaloos.

⁸“Nub kws kuv moog huv lub nroog Mahana-ees, Nkelas tug tub Sime-is kws yog xeem Npeenyamees kws nyob huv lub nroog Npahulees tau tsawm foom kuv phem kawg le, tabsis thaus nwg tuaj tog kuv tom tug Dlej Yauladees, kuv tau tuav tug TSWV lub npe coglug rua nwg has tas, kuv yuav tsi tua nwg povtseg.

⁹Tabsis nwgnuav, koj tsi xob ca nwg dlim dlawb dlim dlo. Koj yog tuabneeg txawj ntse, koj yeej paub has tas tsimnyog koj yuav ua le caag rua nwg lawm, koj ca le muab nwg tua povtseg.”

¹⁰Daviv tuag hab luas coj nwg moog log rua huv Daviv lub nroog.

¹¹Daviv ua vaajntxwv kaav lub tebchaws Yixalayees tau plaub caug xyoo, nwg nyob huv lub nroog Henploos kaav tau xyaa xyoo, hab nyob huv lub nroog Yeluxalees kaav tau peb caug peb xyoo.

¹²Xalumoos ua vaajntxwv hloov nwg txiv Daviv chaw, hab nwg muaj fwjchim luj kaav lub tebchaws nyob ruaj khov.

¹³Ces Adauniyas kws yog Hankis tug tub, moog cuag Npasenpas kws yog Xalumoos nam. Npasenpas nug has tas, “Puas yog koj tuaj ncaaj tuaj nceeg?” Adauniyas teb has tas, “Kuv yeej tuaj ncaaj tuaj nceeg,”

¹⁴hab nwg has ntxiv tas, “Kuv muaj lu puav lug xaav nug koj.” Npasenpas teb has tas, “Koj xaav nug dlaabtsi?”

¹⁵Adauniyas teb has tas, “Koj yeej paub has tas, kuv yuavtsum tau ua vaajntxwv hab txhua tug tuabneeg Yixalayees yeej pum zoo ca kuv ua. Tabsis muaj tej yaam txawv heev tshwm tuaj has tas kuv tug kwv tau ua vaajntxwv lawm, rua qhov yog tug TSWV pum zoo.

¹⁶Mas nwgnuav kuv xaav yuav ib yaam ntawm koj; thov koj muab rua kuv.” Npasenpas nug has tas, “Yog dlaabtsi?”

¹⁷Adauniyas teb has tas. “Koj ca le moog thov Xalumoos kuas nwg muab Anpisas kws yog tug hluas nkauj Sunees rua kuv yuav ua quaspuj, rua qhov kuv paub has tas, Xalumoos yuav ua le koj has.”

¹⁸Npasenpas teb has tas, “Ua le ntawd, kuv maam moog paab koj thov vaajntxwv.”

¹⁹Yog le ntawd, Npasenpas txhaj moog cuag vaajntxwv, hab coj Adauniyas cov lug moog has rua Xalumoos. Vaajntxwv sawv lug has lug zoo sab tog txais nwg nam, hab nyo ntshis hawm nwg nam. Xalumoos txawm moog nyob sau nwg lub zwmtxwv hab nwg muab ib lub rooj lug rua nwg nam nyob ntawm nwg saab xis.

²⁰Npasenpas has tas, “Kuv muaj mivntsiv lug tseemceeb xaav has rua koj; thov koj teb rua kuv.” Xalumoos teb has tas, “Nam, koj yuav has dlaabtsi? Kuv yeej yuav noog koj has.”

²¹Npasenpas has tas, “Koj ca le muab Anpisas rua koj tug tijlaug Adauniyas yuav ua quaspuj.”

²²Vaajntxwv nug has tas, “Vim le caag koj tuaj thov kuas kuv muab Anpisas rua Adauniyas yuav? Koj ca le thov kuas kuv muab hlo kuv lub meejmom vaajntxwv rua nwg huv tuabsi! Rua qhov nwg yog kuv tug tijlaug, tug povthawj Anpiyathas hab Yau-am los tub tuaj nwg tog lawm hab!”

²³Ces Xalumoos txhaj tuav tug TSWV lub npe coglug has tas, “Yog kuv tsi muab Adauniyas tua povtseg pauj qhov kws nwg thov nuav, ces thov Vaajtswv muab kuv tua povtseg!

²⁴Tug TSWV yog tug tsaa kuv muaj meejmom lug nyob sau kuv txiv lub zwmtxwv; Vaajtswv tau ua lawv le nwg tej lug cog tseg hab muab lub tebchaws nuav rua kuv hab kuv cov xeebntxwv kaav. Kuv thov coglug rua tug TSWV kws muaj txujsa nyob has tas, Adauniyas yuavtsum tuag nub nua.”

²⁵Yog le ntawd, Vaajntxwv Xalumoos txhaj kuas Npenayas moog muab Adauniyas tua tuag lawm.

²⁶Vaajntxwv Xalumoos has rua tug povthawj Anpiyathas has tas, “Koj ca le rov qaab moog nyob huv koj lub nroog Anathaus kws yog koj lub zog. Koj yeej tsimnyog tuag lawm, tabsis kuv yuav tsi tua koj kuas tuag taamsim nuav. Vim thaus koj nrug kuv txiv Daviv nyob, koj tau ua tug saib lub Phijxaab kws ntim Vaajtswv tej lug cog tseg, hab koj tau nrug kuv txiv tiv tej kev nyuaj sab ntxhuv plawv lug lawm.”

²⁷Ces Xalumoos muab Anpiyathas rhu tawm tsi pub ua povthawj ua tug TSWV teg num ntxiv lawm, hab yeej muaj tseeb lawv le tej lug kws tug TSWV tau has txug Elis hab nwg cov xeebntxwv huv lub nroog Silaus lawm.

²⁸Thaus Yau-am nov dlheev has tas, muaj tej xwm nuav lawm, (nwg yog tug kws tuaj Adauniyas tog, tabsis nwg tsi tuaj Axaloos tog.) Nwg txawm tsiv moog rua tom tug TSWV lub Tsevntaub, hab moog tuav ob tug kub sau lub thaaj.

²⁹Muaj tuabneeg moog qha rua Vaajntxwv Xalumoos has tas, “Yau-am tsiv moog rua tom tug TSWV lub Tsevntaub hab moog sawv ntawm lub thaaj lawm.” Xalumoos txhaj has rua Yehauyadas tug tub Npenayas has tas, “Koj ca le moog muab Yau-am tua povtseg.”

³⁰Npenayas txhaj moog rua ntawm tug TSWV lub Tsevntaub hab has rua Yau-am has tas, “Vaajntxwv has kuas koj ca le tawm lug!” Yau-am teb has tas, “Kuv tsi lug! Kuv yuav tuag rua ntawm nuav xwb.” Npenayas txhaj rov lug pav Yau-am tej lug rua vaajntxwv noog.

³¹Xalumoos has tas, “Kawgkag moog ua le nwg has ntaag; muab nwg tua hab muab log kag xwb, kuas kuv lossis Daviv cov xeebntxwv txhaj tsi tau ris lub txim kws Yau-am tua cov tuabneeg tsi muaj txim ntawd ntxiv lawm.

³²Tug TSWV yuav rau txim rua Yau-am, vim tej kev tua tuabneeg kws nwg txhobtxwm tua tsi pub kuv txiv Daviv paub. Yau-am tau muab Neles tug tub Aneles kws yog cov Yixalayees tug thawj tubrog hab Yethes tug tub Amaxes kws yog cov Yudas tug thawj tubrog kws ncaaj nceeg hab tsimtxaj tshaaj nwg tua povtseg.

³³Lub txim tua tuabneeg ntawd txhaj poob lug rua Yau-am hab nwg cov xeebntxwv moog ibtxhis le. Tabsis tug TSWV yuav tsaa Daviv cov xeebntxwv lug nyob sau Daviv lub zwmtxwv moog le.”

³⁴Yog le ntawd, Npenayas txhaj moog rua tom tug TSWV lub Tsevntaub, hab muab Yau-am tua tuag lawm, hab muab nwg log rua huv nwg lug tsev kws nyob tom ntug nroog.

³⁵Vaajntxwv txhaj tsaa Npenayas kws yog cov Yudas tug thawj tubrog hloov Yau-am chaw, hab muab tug povthawj Xadaus hloov Anpiyathas chaw.

³⁶Vaajntxwv has moog rua Sime-is has tas, “Koj ca le ua ib lub tsev rua huv lub nroog Yeluxalees nuav rua koj nyob. Koj nyob huv tsev hab tsi xob tawm huv lub nroog moog qhov twg le.

³⁷Yog koj tseem tawm hab hlaa tug dlej Kiloos moog rua saab tid, mas koj yeej yuav raug tua tuag xwb, hab koj cov ntshaav yuav rov lug ywg koj taubhau.”

³⁸Sime-is teb has tas, “Ua le ntawd los mas vaajntxwv, kuv yuav ua lawv le koj has ntaag.” Yog le ntawd, nwg txhaj nyob huv lub nroog Yeluxalees tau ntev heev.

³⁹Tau peb xyoos tom qaab nuav, Sime-is ob tug tubqhe tsiv moog cuag Ma-akas tug tub Akhises kws ua vaajntxwv kaav lub nroog Nkas. Thaus Sime-is nov has tas, obtug nyob huv lub nroog Nkas,

⁴⁰nwg txawm muab eeb pem rua nwg tug neeg luav hab caij moog cuag Vaajntxwv Akhises huv lub nroog Nkas, moog nrhav nwg ob tug tubqhe. Nwg nrhav tau obtug hab coj obtug rov lug tsev.

⁴¹Thaus Xalumoos nov txug tej kws Sime-is tau ua ntawd,

⁴²nwg txhaj has moog rua Sime-is has tas, “Kuv puas tau tuav tug TSWV lub npe coglug rua koj has tas, tsi pub koj tawm huv lub nroog Yeluxalees nuav moog rua saab nrau le. Hab kuv tub ceebtoom rua koj has tas, yog koj tawm huv nuav moog, koj yuav raug tua tuag. Koj tub yeej los zoo sab le ntawd hab koj has tas, koj yuav noog kuv lug nua ne?

⁴³Yog le caag koj yuav rhuav koj tej lug cog tseg hab tsi noog kuv tej lug saamfwm le?

⁴⁴Koj yeej paub txhua yaam kws koj tau ua txhum rua kuv txiv lawm. Tug TSWV yuav rau txim rua koj vim lub txim ntawd.

⁴⁵Tabsis nwg yuav foom koob moov rua kuv hab nwg yuav ua kuas Daviv lub tebchaws nyob ruaj khov moog ibtxhis le.”

⁴⁶Ces Vaajntxwv txhaj kuas Npenayas moog muab Sime-is tua povtseg lawm. Txij thaus ntawd lug, Xalumoos kev tswjfwm txhaj nyob thaajyeeb lug le lawm.