Read Hmong Njua 1 Vaajntxwv 20 Bible Online

1 Vaajntxwv 20 - Hmong Njua bible

1 Vaajntxwv 20

¹Cov Xilias tug Vaajntxwv Npeehadas hu taagnrho nwg cov tubrog tuaj ua ke, hab tseem muaj peb caug ob tug vaajntxwv muab puab tej neeg hab tej tsheb neeg tuaj paab nwg. Nwg txhaj sawv kev tuaj moog vij lub nroog Xamalis hab tua lub nroog ntawd.

²Nwg tso tuabneeg moog has rua cov Yixalayees tug Vaajntxwv Ahaj huv lub nroog tas, “Vaajntxwv Npeehadas has le nuav tas,

³‘Koj tej nyaj tej kub yog kuv le, koj cov quaspuj hab cov mivnyuas kws zoo nkauj zoo nraug puavleej yog kuv le hab.’ ”

⁴Ahaj teb has tas, “Mej moog has rua kuv tug tswv kws yog Vaajntxwv Npeehadas has tas, kuv yeej zoo sab muab rua nwg, kuv hab txhua yaam kws kuv muaj puavleej yog nwg tug huv tuabsi.”

⁵Npeehadas rov tso tuabneeg coj nwg tej lug moog has rua Ahaj dlua ntxiv le nuav, “Kuv rov tso xuv tuaj rua koj, koj ca le xaa koj tej nyaj tej kub, koj cov quaspuj hab koj cov mivnyuas tuaj rua kuv.

⁶Tabsis pigkig lub sijhawm nuav, kuv yuav tso kuv cov numtswv tuaj tshawb huv koj lub loog hab huv koj cov numtswv tej tsev, hab txhua yaam kws zoo, puab yuav nqaa moog kuas taag.”

⁷Vaajntxwv Ahaj hu taagnrho nwg cov thawjcoj huv nwg lub tebchaws tuaj hab has rua puab tas, “Thov mej nrug nov, tug tuabneeg nuav nwg xaav tuaj nrhav kev kub ntxhuv rua peb xwb. Nwg tso xuv tuaj rua kuv has tas, nwg yuav yuav kuv cov quaspuj, kuv cov mivnyuas hab kuv tej nyaj tej kub. Txawm le ntawd los kuv yeej txaus sab muab rua nwg.”

⁸Cov thawjcoj ntawd teb has tas, “Tsi xob noog nwg has; hab tsi xob muab rua nwg hlo le.”

⁹Yog le ntawd, Ahaj txhaj teb rua Npeehadas cov tuabneeg xaa xuv has tas, “Mej moog has rua vaajntxwv kws yog kuv tug tswv has tas, nwg thawj tsaab xuv mas kuv txaus sab muab ntaag, tabsis tsaab ob nuav, kuv tsi txaus sab muab le nwg has ntawd.” Cov xaa xuv coj tej lug ntawd rov moog has rua Npeehadas hab puab rov coj dlua lwm tsaab xuv ntawm

¹⁰Npeehadas tuaj has tas, “Kuv yuav coj tubrog coob heev tuaj rhuav koj lub nroog nuav, hab koj tej nyuas thwvcib kws tawg ua moov, tub tsi txaus kuv cov tuabneeg ib leeg nqaa ib taus moog. Yog tsi muaj le kuv has nuav, ces thov kuas tej vaajtswv muab kuv tua kuas tuag!”

¹¹Vaajntxwv Ahaj teb has tas, “Mej rov moog has rua Vaajntxwv Npeehadas has tas, tug kws yog tubrog tag, nwg yeej tsi tso cuabyeej ua rog tseg ua ntej nwg tua yeej rog, tabsis thaus yeej rog lawm, nwg maam tso tseg.”

¹²Thaus Npeehadas tau txais Ahaj tej lug teb nuav, nwg tseem taabtom nrug cov numtswv kws tuaj nwg tog haus cawv huv puab tej tsevntaub. Nwg txhaj has kuas nwg cov tubrog ca le npaaj moog sis tua, yog le ntawd, puab txhaj npaaj moog tua lub nroog ntawd.

¹³Taamsim ntawd, txawm muaj ib tug cev Vaajtswv lug tuaj cuag Vaajntxwv Ahaj hab has rua nwg tas, “Tug TSWV has tas, koj puas pum paab tubrog coob coob ntawd? Nub nua kuv yuav pub kuas koj tua yeej puab, koj txhaj yuav paub has tas, kuv yog tug TSWV tag.”

¹⁴Ahaj nug has tas, “Leejtwg yuav ua tug thawjcoj peb moog tua?” Tug cev Vaajtswv lug teb has tas, “Tug TSWV has tas, yog cov tswv xeev tej tubrog hluas yuav ua tej nuav ntaag.” Vaajntxwv rov nug has tas, “Leejtwg yuav ua tug thawjcoj peb tag?” Tug cev Vaajtswv lug teb has tas, “Koj yog tug coj ntaag!”

¹⁵Yog le ntawd, Vaajntxwv txhaj txhij tau ob puas peb caug ob leeg tubrog hluas ntawm cov thawj tubrog kws saib tej cheebtsaam tuaj txoos ua ke. Nwg txhij tau xyaa txheeb leej tubrog Yixalayees tuaj ntxiv.

¹⁶Puab txawm tawm moog sis tua thaus taav su. Ces Npeehadas hab peb caug ob tug vaajntxwv kws tuaj nwg tog tseem taabtom haus cawv huv tej tsevntaub.

¹⁷Cov tubrog hluas tawm moog ua ntej. Ces cov tubrog kws Npeehadas tso moog tshuajxwm dlha rov lug qha rua nwg has tas, “Muaj ib paab tubrog taabtom tawm huv lub nroog Xamalis tuaj lawm.”

¹⁸Npeehadas has tas, “Txawm yog puab tuaj nrug peb sis tua lossis tuaj nrug peb cog kev phoojywg los xij, mej ca le muab puab nteg kag caab lug.”

¹⁹Cov tubrog hluas txawm ua cov ntaus thawjcoj puab kev moog, ces cov tubrog Yixalayees maam le lawv qaab,

²⁰hab txhua tug yeebncuab kws puab pum, puab muab tua tuag taag huv tuabsi. Cov Xilias swb hab tsiv tawm, cov tubrog Yixalayees caum qaab tua, tabsis Npeehadas caij neeg nrug cov tubrog kws caij neeg tsiv dlim lawm.

²¹Vaajntxwv Ahaj moog rua tom taj nraag, moog puav nteg cov neeg, cov tsheb neeg hab muab cov tubrog Xilias tua tuag taag rua tod.

²²Ces tug cev Vaajtswv lug rov moog has rua Vaajntxwv Ahaj has tas, “Koj ca le rov qaab moog txhij tubrog kuas coob ntxiv hab yuavtsum ceevfaaj npaaj kuas zoo, rua qhov lwm xyoo txug lub caij ntuj naag, cov Xilias tug vaajntxwv yuav rov tuaj tua mej dlua.”

²³Vaajntxwv Npeehadas cov numtswv has rua nwg has tas, “Cov Yixalayees tej vaajtswv yog tej vaajtswv kws nyob sau roob xwb, tub yog vim le ntawd cov Yixalayees txhaj tua yeej peb. Tabsis yog peb moog tua puab nraag taj nraag, peb yuav tua yeej puab xwb.

²⁴Nwgnuav ca le tshem peb caug ob tug vaajntxwv ntawd tawm ntawm puab lub luag num hab coj puab moog nrug cov thawj tubrog tom taj nraag nyob.

²⁵Txhij tubrog ntxiv kuas coob npaum le cov kws thaus u koj coj moog tuag taag lawm; npaaj neeg hab tsheb neeg kuas ntau ib yaam le cov qub, peb yuav moog tua cov Yixalayees nyob tom taj nraag, mas zag nuav peb yuav tua yeej puab xwb.” Vaajntxwv Npeehadas txawm pum zoo ua lawv le puab has ntawd.

²⁶Ces thaus kws txug ndlua lub caij ntuj naag, Npeehadas txawm txhij nwg cov tubrog hab nwg nrug puab tuaj tua cov Yixalayees tom lub nroog Afekas.

²⁷Cov Yixalayees txhij tubrog hab npaaj cuabyeej; puab faib ua ob paab moog tsuam yeej nyob sis ncaag zog cov Xilias. Cov Xilias nyob puv nkaus rua tom taj nraag, tabsis cov Yixalayees tsuas zoo le ob paab nyuas tshis kws tsawg tsawg xwb.

²⁸Ces tug cev Vaajtswv lug txawm moog cuag Vaajntxwv Ahaj hab has rua nwg has tas, “Tug TSWV has rua koj has tas, vim cov Xilias has tas, kuv yog tug Vaajtswv kws nyob sau tej roob xwb, kuv tsi yog tug Vaajtswv kws nyob nraag taj nraag, yog le ntawd, kuv yuav pub kuas koj tua yeej puab cov tubrog kws coob heev ntawd, koj hab koj cov tuabneeg txhaj yuav paub has tas, kuv yog tug TSWV tag!”

²⁹Cov Xilias hab cov Yixalayees tsuam yeej nyob sis ncaag, ib paab nyob ib saab tau xyaa nub. Ces nub xyaa puab txawm pib sis tua, nub ntawd cov Yixalayees tua cov Xilias tuag ib puas txheeb leej.

³⁰Cov seem tuag kws tsiv moog cawm sav rua huv lub nroog Afekas los tug ntsaa yeej kws thaiv lub nrog tseem qaug lug ntaus puab tuag lawm neeg nkaum xyaa txheeb leej hab. Npeehadas tsiv moog rua huv lub nroog, hab nwg moog nkaum rua huv ib chaav tsev.

³¹Npeehadas cov numtswv tuaj cuag nwg hab has rua nwg tas, “Peb nov has tas, cov Yixalayees cov vaajntxwv muaj lub sab taabncuab heev. Thov tso cai rua peb muab tej rig tsho ntaub tsaaj rua peb paav dluav hab muab hlaab rig peb taubhau, moog cuag cov Yixalayees tug vaajntxwv, tej zag nwg yuav tseg koj txujsa.”

³²Yog le ntawd, puab txhaj muab tej ntaub tsaaj lug paav dluav hab muab hlaab rig taubhau, ces puab txawm moog cuag Ahaj hab has tas, “Koj tug tubkhai Npeehadas thov kuas koj tseg nwg txujsa nyob.” Ahaj teb has tas, “Nwg tseem muaj sa nyob hab los? Zoo lawm lauj! Nwg zoo le kuv ib tug kwvtij hab ntaag.”

³³Npeehadas cov numtswv tog ntsoov saib Ahaj puas has tej lug zoo, hab thaus Ahaj has tas, “Tug kwvtij”, puab txawm khaws nkaus lu lug ntawd hab has tas, “Yog le koj has, Npeehadas yeej yog koj ib tug kwvtij tag!” Ahaj has tas, “Mej ca le moog coj Npeehadas tuaj cuag kuv.” Thaus Npeehadas tuaj txug, Ahaj txawm caw nwg moog nrug Ahaj caij tsheb neeg ua ke.

³⁴Npeehadas has rua Ahaj has tas, “Kuv yuav muab lub nroog kws thaus u kuv txiv txeeb tau ntawm koj txiv lug rov qaab rua koj, hab yuav muab rua koj ua ib qhov chaw rua koj ua laag ua luam nyob huv lub nroog Damaxes, ib yaam le kuv txiv tuaj ua nyob huv lub nroog Xamalis.” Ahaj teb has tas, “Vim tej lug cog tseg nuav, kuv yuav tso koj moog.” Ces Ahaj obtug txhaj coglug hab Ahaj txawm tso Npeehadas moog lawm.

³⁵Tug TSWV tau has rua ib tug cev Vaajtswv lug kws nyob huv paab cevlug kuas moog has rua ib tug cev Vaajtswv lug muab nwg ntaus, tabsis tug cev Vaajtswv lug ntawd tsi kaam ntaus,

³⁶Yog le ntawd, nwg txhaj has rua tug cev Vaajtswv lug ntawd has tas, “Vim koj tsi noog tug TSWV lug mas thaus koj ncaim kuv moog, tsuv ntxhuav yuav tum koj.” Ces thaus nwg ncaim moog lawm, ib tug tsuv ntxhuav txawm ca le tum nwg lawm tag.

³⁷Ces tug cev Vaajtswv lug nuav txhaj moog cuag dlua lwm tug txivneej hab has rua nwg has tas, “Koj ca le ntaus kuv.” Tug txivneej ntawd txhaj ntaus nwg; mas tug txivneej ntawd siv zug ntaus tug cev Vaajtswv lug ntawd, ua rua nwg raug mob saab kawg le.

³⁸Tug cev Vaajtswv lug ntawd txhaj muab ntaub lug qhwv nwg lub ntsejmuag, ua txuj ua cuav moog sawv tom kev, tog cov Yixalayees tug vaajntxwv taug kev tuaj.

³⁹Thaus vaajntxwv taug kev tuaj ncaaj, tug cev Vaajtswv lug ntawd hu has tas, “Vaajntxwv, thaus kuv taabtom sis tua huv tshaav rog, muaj ib tug tubrog nteg tau ib tug yeebncuab lug rua kuv tuav, hab nwg has rua kuv has tas, ‘Koj zuv tug tuabneeg nuav kuas zoo; yog koj ca nwg dlim, mas yuav tau muab koj txujsa pauj nwg txuj lossis koj yuav tau them peb txheeb dlaim nyaj.’

⁴⁰Tabsis kuv muaj num ntau heev, mas tug tuabneeg ntawd txawm ca le tsiv lawm.” Vaajntxwv teb has tas, “Koj yuav raug txim xwb, rua qhov koj yeej leeg koj le ntawd lawm.”

⁴¹Tug cev Vaajtswv lug muab cov khaub dluag kws qhwv nwg ntsejmuag dlua rhe povtseg, ces taamsim ntawd vaajntxwv paub has tas, nwg yog ib tug huv paab kws cev Vaajtswv lug ntaag.

⁴²Tug cev Vaajtswv lug ntawd has rua vaajntxwv has tas, “Tug TSWV has tas, ‘Vim koj muab tug tuabneeg kws kuv muab cob rua koj tua povtseg tso lawm, mas yuav muab koj txujsa pauj nwg txuj, hab koj cov tubrog yuav raug nwg cov tubrog kws tsiv dlim lawm tua kuas tuag taag huv tuabsi.’ ”

⁴³Ces Vaajntxwv txawm rov moog tsev rua huv lub nroog Xamalis lawm, mas nwg txhawj hab nyuaj sab kawg le.