Read Hmong Njua 1 Vaajntxwv 21 Bible Online

1 Vaajntxwv 21 - Hmong Njua bible

1 Vaajntxwv 21

¹Muaj ib tug txivneej npe hu ua Nanpaus, nwg muaj ib lub vaaj txiv maab nyob huv lub nroog Yexelees ze rua ntawm Vaajntxwv Ahaj lub loog.

²Muaj ib nub Ahaj has rua Nanpaus has tas, “Muab koj lub vaaj txiv maab rua kuv; rua qhov nyob ze ntawm kuv lub loog, kuv xaav tau thaaj aav ntawd lug ua vaaj zaub. Kuv maam muab dlua ib lub vaaj txiv maab zoo dlua lub nuav rua koj lossis yog koj tsi nyam le kuv has nuav, kuv yuav them nyaj kuas txaus tug nqe rua koj.”

³Nanpaus teb has tas, “Lub vaaj nuav yog kuv cov yawmkoob tej qubtxeeg qubteg kws puab tseg rua kuv. Tug TSWV yeej tsi pub kuas kuv muab lub vaaj nuav muag rua koj le!”

⁴Ahaj rov moog tsev lawm, nwg nyuaj sab hab chim heev rua Nanpaus tej lug kws nwg has ntawd. Nwg txawm moog pw rua sau nwg lub txaaj, tig xubndlag rua tim phaab ntsaa hab tsi kaam sawv lug noj mov le.

⁵Yexenpees kws yog Ahaj tug quaspuj txawm moog cuag Ahaj hab nug has tas, “Vim le caag koj yuav nyuaj sab ua luaj tsi noj mov le?”

⁶Ahaj teb has tas, “Vim kuv moog thov yuav Nanpaus lub vaaj txiv maab lossis yog nwg kaam nua kuv muab dlua ib lub vaaj pauv nwg lub ntawd. Tabsis nwg has rua kuv tas, ‘Koj yuav tsi tau lub vaaj nuav!’ ”

⁷Yexenpees nug has tas, “Koj yog vaajntxwv los tsi yog maj? Ca le sawv lug noj mov hab tsi xob nyuaj sab. Kuv maam le moog ua kuas tau Nanpaus lub vaaj txiv maab lug ua koj tug!”

⁸Ces Yexenpees txhaj sau tau ib tsaab ntawv, suam Ahaj lub npe rua tsaab ntawv ntawd hab muab Ahaj lub homthawj nas rua. Nwg muab tsaab ntawv ntawd xaa moog rua Ahaj cov numtswv hab cov thawjcoj huv lub nroog Yexelees.

⁹Tsaab ntawv ntawd has le nuav: “Ca le tshaajtawm teem ib nub ua kevcai yoo mov, hu cov pejxeem tuaj sis sau ua ke, hab kuas Nanpaus tuaj nyob ntawm lub chaw tseemceeb.

¹⁰Mej moog coj ob tug tuabneeg dlaag tuaj ab lam Nanpaus has tas, nwg tau foom Vaajtswv hab vaajntxwv. Ces mej ca le coj nwg tawm moog rua nrau ntug nroog hab muab pobzeb ntaus kuas nwg tuag rua nrau.”

¹¹Cov numtswv hab cov thawjcoj huv lub nroog Yexelees txawm ua lawv le Yexenpees tej lug saamfwm ntawd.

¹²Puab txhaj tshaajtawm muab ib nub lug ua kevcai yoo mov, hu taagnrho cov pejxeem tuaj txoos ua ke, hab caw Nanpaus moog nyob ntawm lub chaw tseemceeb.

¹³Ces ob tug tuabneeg dlaag ntawm lug sawv ntawm Nanpaus xubndlag ab lam nwg taabmeeg cov pejxeem has tas, Nanpaus tau foom Vaajtswv hab vaajntxwv. Yog le ntawd puab txhaj coj Nanpaus moog rua nrau ntug nroog hab muab pobzeb ntaus nwg tuag lawm.

¹⁴Ces puab tso tuabneeg moog has rua Yexenpees has le nuav: “Peb tub muab pobzeb ntaus Nanpaus tuag lawm.”

¹⁵Thaus Yexenpees nov xuv has tas, Nanpaus tuag lawm, nwg txawm moog has rua Ahaj has tas, “Nanpaus tuag lawm lauj. Nwgnuav koj ca le moog txeeb lub vaaj txiv maab kws nwg tsi kaam muag rua koj ntawd.”

¹⁶Taamsim ntawd Ahaj txawm moog txeeb kag lub vaaj txiv maab lug ua nwg tug.

¹⁷Tug TSWV has rua Eliyas kws yog tug cev Vaajtswv lug huv lub nroog Tisenpes has tas,

¹⁸“Koj ca le moog cuag Vaajntxwv Ahaj huv lub nroog Xamalis. Koj yuav moog ntsib nwg huv Nanpaus lub vaaj txiv maab, nwg taabtom moog txeeb lub vaaj ntawd lug ua nwg tug.

¹⁹Koj moog qha rua nwg has tas, kuv kws yog tug TSWV has le nuav rua nwg, ‘Koj tub muab tug tswv vaaj tua povtseg lawm, koj tseem yuav txeeb nwg lub vaaj ua koj tug hab los?’ Koj qha rua nwg has tas, tej lug nuav yog kuv has. ‘Ntawm qhov chaw kws dlev yaim Nanpaus cov ntshaav, mas dlev yuav yaim koj cov ntshaav qhov ntawd hab.’ ”

²⁰Thaus Ahaj pum dlheev Eliyas, Ahaj hu has tas, “Kuv tug yeebncuab, koj tuaj ntsib kuv los?” Eliyas teb has tas, “Yog, kuv tuaj ntsib koj. Koj tau muab taagnrho koj lub cev muag moog ua txhum taabmeeg tug TSWV.

²¹“Yog le ntawd, tug TSWV has rua koj has tas, ‘Kuv yuav tso sub tawg sub ntshaa lug rua koj. Kuv yuav sau zog koj hab koj tsev tuabneeg txhua tug txivneej laug hab hluas, kuas taag dlu lug.

²²Koj tsev tuabneeg yuav zoo ib yaam le Vaajntxwv Yelaunpau-aas kws yog Nenpas tug tub tsev tuabneeg hab ntaag. Koj ua rua kuv chim, vim koj coj cov Yixalayees moog ua txhum.’

²³Hab tug TSWV has txug Yexenpees le nuav, dlev yuav noj nwg lub cev huv lub nroog Yexelees.

²⁴Koj tej kwvtij kws tuag rua huv nroog, dlev yuav muab dlua noj, hab yog leejtwg tuag rua tom tej taj nraag, dlaav npoj yuav lug muab noj kuas taag.”

²⁵(Yeej tsi tau muaj leejtwg yuav zoo sab hlo muab nwg lub cev muag moog ua txhum taabmeeg tug TSWV le Ahaj qaug Yexenpees kws yog nwg tug quaspuj tej lug haub ntxag le.

²⁶Nwg tau ua tej kev txhum kws txaajmuag kawg, vim nwg moog pe mlom ib yaam le cov Amoos. Cov tuabneeg Amoos tub raug tug TSWV muab ntab tawm huv lub tebchaws thaus cov Yixalayees taabtom lug txeeb nyob lawm.)

²⁷Thaus Ahaj nov tej lug kws Eliyas has nuav, Ahaj txawm dlua rhe nwg lub tsho ua nta tseg, hab muab kag ntaub tsaaj lug npua. Nwg yoo mov, naav rawv cev rig tsho ntaub tsaaj ntawd pw, hab moog moog lug lug ua ntsejmuag mluag mlob hab nyuaj sab kawg le.

²⁸Tug TSWV has rua Eliyas kws yog Vaajtswv tug cevlug has tas,

²⁹“Koj puas pum Ahaj txu fwjchim taabmeeg kuv? Rua qhov nwg txu fwjchim le nuav, kuv yuav tsi tso sub tawg sub ntshaa lug rua nwg tam, tabsis thaus txug nwg tug tub tam, kuv yuav tso sub tawg sub ntshaa lug rua Ahaj tsev tuabneeg.”