Read Hmong Njua 1 Vaajntxwv 22 Bible Online

1 Vaajntxwv 22 - Hmong Njua bible

1 Vaajntxwv 22

¹Cov Yixalayees hab cov Xilias tseg tsi ua rog, puab nyob muaj kev thaajyeeb lug tau ob xyoos,

²tabsis xyoo peb, cov Yudas tug Vaajntxwv Yehausafas tuaj saib cov Yixalayees tug Vaajntxwv Ahaj.

³Ahaj nug nwg cov numtswv has tas, “Vim le caag peb yuav nyob dlawb xwb, tsi npaaj moog txeeb kuas tau lub nroog Lamaus huv lub cheebtsaam Nkile-as ntawd cov Xilias tug vaajntxwv lug? Lub nroog ntawd yog peb le los sav!”

⁴Hab Ahaj nug Yehausafas has tas, “Koj puas kaam nrug kuv moog tua lub nroog Lamaus?” Yehausafas teb has tas, “Thaus twg koj moog ces kuv yeej nrug koj moog xwb. Kuv cov tubrog moog kutaw hab cov tubrog caij neeg los yeej zoo sab moog huv tuabsi.

⁵Tabsis peb yuavtsum xub nug tug TSWV tsaiv.”

⁶Yog le ntawd, Ahaj txhaj hu cov cev Vaajtswv lug kwvyees le plaub puas leej tuaj, hab nug puab has tas, “Puas tsimnyog kuv moog tua lub nroog Lamaus los tsi tsimnyog moog?” Puab teb has tas, “Koj ca le moog tua lub nroog ntawd, tug TSWV yuav pub kuas koj tua yeej xwb.”

⁷Tabsis Yehausafas nug has tas, “Puas tshuav dlua lwm tug cev Vaajtswv lug kws tseem yuav paab tau peb moog nug tug TSWV hab?”

⁸Ahaj teb has tas, “Tseem tshuav dlua ib tug, nwg yog Imelas tug tub Mikayas. Tabsis kuv ntxub nwg heev, vim nwg yeej ibtxwm tsi cev tej lug zoo rua kuv ib zag le; tsuas yog pheej cev tej zaaj lug phem rua kuv xwb.” Yehausafas teb has tas, “Koj tseg tsi xob has le ko.”

⁹Ces Ahaj txhaj hu nwg ib tug numtswv lug hab has rua nwg has tas, “Koj moog coj Mikayas tuaj taamsim nuav.”

¹⁰Ob tug vaajntxwv ntawd, yeej naav rawv tej rig tsho vaajntxwv, nyob sau obtug ob lub zwmtxwv kws nyob ntawm lub tshaav nplej saab nrau lub roojvaag Xamalis, cov cevlug txhua tug puavleej tuaj nyob cev Vaajtswv lug ntawm obtug xubndlag.

¹¹Cov cevlug ntawd muaj ib tug hu ua Xedekiyas, nwg yog Khena-anas tug tub, nwg muab hlau lug ua tau ibtxwm kub, hab nwg has rua Ahaj has tas, “Tug TSWV has tas, ‘Koj yuav siv txwm kub nuav moog tawmtsaam cov Xilias hab tua yeej puab taagnrho huv tuabsi.’ ”

¹²Cov cevlug txhua tug puavleej has ib yaam has tas, “Koj ca le moog tua lub nroog Lamaus. Koj yuav moog tua yeej xwb. Tug TSWV yuav paab kuas koj yeej.”

¹³Thaus lub sijhawm ntawd tug nom kws moog tog Mikayas tuaj ntawd has rua Mikayas has tas, “Taagnrho cov cev Vaajtswv lug puavleej has tas, vaajntxwv yuav moog tua yeej, yog le ntawd, koj yuavtsum has tej lug zoo ib yaam le puab has hab.”

¹⁴Tabsis Mikayas teb has tas, “Tug TSWV yog tug muaj sa nyob, kuv thov coglug has tas, kuv yuav has lawv le tej lug kws nwg qha rua kuv has xwb.”

¹⁵Thaus Mikayas moog nyob taabmeeg Vaajntxwv Ahaj lawm, vaajntxwv nug nwg has tas, “Mikayas, puas tsimnyog Vaajntxwv Yehausafas hab kuv moog tua lub nroog Lamaus los tsi tsimnyog moog?” Mikayas teb has tas, “Meb ca le moog tua los mas! Meb yeej yuav tua yeej xwb. Tug TSWV yuav paab kuas meb yeej.”

¹⁶Tabsis Ahaj teb has tas, “Kuv tub yeej has rua koj ntau zag lawm has tas, thaus twg koj tuav tug TSWV lub npe qha ib zaaj dlaabtsi rua kuv, koj yuavtsum qha kuas tseeb xwb nua ne! Kuv tseem yuav has pistsawg zag rua koj hab?”

¹⁷Mikayas teb has tas, “Kuv tub pum cov tubrog Yixalayees tawg tsiv ri sua sau tej ncov roob ib yaam le paab yaaj kws tsi muaj tug tswv yug lawm. Hab Tug TSWV has tas, ‘Cov tuabneeg nuav tsi muaj tug thawjcoj lawm, ca le tso puab rov moog tsev ywj sab los mas.’ ”

¹⁸Ahaj has rua Yehausafas has tas, “Kuv tub qha rua koj lawm has tas, ‘Nwg yeej tsi cev ib zaaj lug zoo rua kuv le puas yog? Nwg yeej ibtxwm cev tej lug phem rua kuv nkaus xwb!’ ”

¹⁹Mikayas has ntxiv has tas: “Koj ca le noog tug TSWV lug! Kuv pum tug TSWV nyob sau nwg lub zwmtxwv kws nyob sau ntuj, hab nwg cov timtswv sawv ntawm nwg ob saab.

²⁰Tug TSWV nug has tas, ‘Leejtwg txhaj yuav ntxag tau Ahaj kuas nwg moog raug tua tuag rua huv lub nroog Lamaus?’ Muaj ib cov timtswv has ib yaam, hab muaj dlua lwm cov has dlua lwm yaam lawm,

²¹Ces muaj ib tug ntsujplig txaav zog lug rua ntawm tug TSWV xubndlag hab has rua tug TSWV tas, ‘Kuv yog tug kws yuav moog ntxag Ahaj ntaag.’

²²Tug TSWV nug has tas, ‘Koj yuav ntxag le caag tau?’ Tug ntsujplig ntawd teb has tas, ‘Kuv yuav moog tshoov Ahaj cov cevlug sab kuas puab qha tej lug dlaag rua nwg.’ Tug TSWV txhaj has rua nwg tas, ‘Koj ca le moog ntxag nwg. Nwg yeej yuav ntseeg koj zaaj xwb.’ ”

²³Mikayas txawm xaus lug has tas: “Yeej muaj le nuav tag. Tug TSWV ua kuas koj cov cevlug tuaj dlaag koj. Tabsis Mikayas yog tug qha tseeb has tas koj yuav raug kev puamtsuaj xwb txhaj taag.”

²⁴Ces Xedekiyas kws yog tug cev Vaajtswv lug txawm sawv tseeg moog xuas tawg ncuav rua Mikayas saab plhu, hab nug has tas, “Thaus twg tug TSWV tug ntsujplig tub tso kuv tseg hab moog has rua koj le ko lawm?”

²⁵Mikayas teb has tas, “Koj yeej paub thaus koj tsiv moog nkaum huv ib chaav tsev?”

²⁶Vaajntxwv Ahaj has rua nwg cov numtswv ib tug has tas, “Ca le nteg Mikayas coj moog rua tug tswv nroog Amoos hab vaajntxwv tug tub Yau-as.

²⁷Has kuas obtug coj nwg moog kaw rua huv tsev lojcuj, muab mov qhuav hab dlej rua nwg noj nwg haus moog txug thaus kuv rov qaab lug kaaj sab lug tsi muaj dlaabtsi maam le tso nwg.”

²⁸Mikayas txhaj twv has tas, “Yog koj tseem tau rov qaab lug kaaj sab lug, ces tej lug kws kuv has rua koj ntawd yeej tsi yog tug TSWV has rua kuv le!” Hab nwg has ntxiv tas, “Thov mej txhua tug nrug nov tej lug kws kuv has nuav.”

²⁹Ces cov Yixalayees tug Vaajntxwv Ahaj hab cov Yudas tug Vaajntxwv Yehausafas txawm txhij tubrog moog tua lub nroog Lamaus huv lub xeev Nkile-as.

³⁰Ahaj has rua Yehausafas has tas, “Thaus peb moog rua huv tshaav rog, kuv yuav naav dlua lwm cev rig tsho lawm, tabsis koj naav koj cev rig tsho vaajntxwv los tau.” Yog le ntawd, cov Yixalayees tug vaajntxwv txhaj naav dlua lwm cev rig tsho moog rua huv tshaav rog, tsi pub kuas leejtwg paub nwg le.

³¹Cov Xilias tug vaajntxwv txhaj has rua nwg peb caug ob tug thawj tubrog tsaav tsheb neeg kuas tsi xob tua ib tug twg le, tua cov Yixalayees tug vaajntxwv tuab leeg nkaus xwb.

³²Yog le ntawd, thaus puab pum Vaajntxwv Yehausafas, puab txhaj xaav has tas nwg yog cov Yixalayees tug vaajntxwv, ces puab txhaj moog caum nwg tua. Tabsis thaus nwg qw,

³³puab txhaj paub has tas, nwg tsi yog cov Yixalayees tug vaajntxwv, puab txhaj tso tseg tsi caum nwg tua ntxiv lawm.

³⁴Tabsis muaj ib tug tubrog Xilias, laam nqug nwg raab neevnti tua moog na has ua cav xibxub ca le yaa moog raug kag Vaajntxwv Ahaj lub tsho hlau kis nruab nraab tshaab plawg rua huv nwg lub cev lawm. Nwg txawm quaj qw rua nwg tug tsaav tsheb neeg has tas, “Kuv raug mob lawm lauj!, Ca le lem tsheb neeg rov qaab hab coj kuv tawm huv tshaav rog nuav moog!”

³⁵Thaus ntawd muaj kev sis tua nyaav heev, Vaajntxwv Ahaj tseem txheem taug sawv huv nwg lub tsheb neeg saib cov Xilias nrug puab sis tua. Nwg cov ntshaav tawm lug meem mag rua huv nwg lub tsheb neeg, ces thaus nub poob qho nwg txawm tu sav nrho tuag lawm.

³⁶Thaus nub yuav laug poob qho txawm muaj ib lub suab lug has rua cov tubrog Yixalayees has tas, “Mej txhua tug ca le rov qaab moog rua huv mej lub tebchaws hab mej lub nroog!”

³⁷Vaajntxwv Ahaj raug luas tua tuag, hab puab coj nwg lub cev rov lug paam hab muab nwg log rua huv lub nroog Xamalis.

³⁸Puab txawm coj nwg lub tsheb neeg moog ntxuav rua ntawm lub paag dlej huv lub nroog Xamalis, dlev tuaj yaim nwg cov ntshaav hab cov namndlav tuaj dlaa dlej qhov ntawd, lawv le tug TSWV tau has tseg lawm tas yuav muaj le ntawd.

³⁹Dlua le lwm yaam kws Vaajntxwv Ahaj ua taag lug nwg lub loog kws nwg muab kaug ntxhw xov hab tej nroog kws nwg tsim tseg, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

⁴⁰Thaus nwg tuag lawm, nwg tug tub Ahaxiyas txhaj ua vaajntxwv hloov nwg chaw.

⁴¹Thaus Ahaj ua vaajntxwv kaav lub tebchaws Yixalayees tau plaub xyoos lawm, Axas tug tub Yehausafas maam le ua vaajntxwv kaav lub tebchaws Yudas,

⁴²thaus nwg noobnyoog muaj peb caug tsib xyoos hab nwg nyob huv lub nroog Yeluxalees kaav tau neeg nkaum tsib xyoos. Nwg nam hu ua Axunpas hab yog Silehis tug ntxhais.

⁴³Yehausafas ua zoo ib yaam le nwg txiv Axas, nwg coj ncaaj nceeg taabmeeg tug TSWV; tabsis nwg tsi muab tej chaw teev dlaab rhuav povtseg le hab. Cov pejxeem tseem pheej moog fij khoom hab hlawv moov tshuaj tsw qaab rua sau tej chaw ntawd tsi tseg le.

⁴⁴Yehausafas nrug cov Yixalayees tug vaajntxwv ua phoojywg zoo kawg le.

⁴⁵Dlua le lwm yaam kws Yehausafas ua taag lug, nwg lub peevxwm, nwg tej txujci hab nwg tej kev ntaus rog, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

⁴⁶Yehausafas muab cov txivndlav kws tu tej thaaj pe dlaab kws seem nyob thaus nwg txiv Axas tam, Ntab tawm moog huv tuabsi lawm.

⁴⁷Thaus ntawd lub tebchaws Edoos tsi muaj vaajntxwv kaav; cov Yudas tug vaajntxwv txhaj tsaa ib tug sawv cev cov pejxeem lug ua tug saib puab xwb.

⁴⁸Yehausafas txua tau ib cov nkoj rua huv havtxwv, siv moog thauj kub tim tebchaws Aufiles lug; tabsis cov nkoj ntawd tawg taag rua huv Exi-oosnkenpes lawm, mas puab yeej tsi tau tsaav cov nkoj ntawd le.

⁴⁹Cov Yixalayees tug Vaajntxwv Ahaxiyas, tso nwg cov tuabneeg tuaj nrug Yehausafas cov tuabneeg nkuam nkoj, tabsis Yehausafas tsi kaam leeg yuav cov tuabneeg ntawd.

⁵⁰Yehausafas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog, hab nwg tug tub Yehaulaas ua vaajntxwv hloov nwg chaw.

⁵¹Thaus Vaajntxwv Yehausafas ua vaajntxwv kaav lub tebchaws Yudas tau kaum xyaa xyoo lawm, Ahaj tug tub Ahaxiyas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau ob xyoos.

⁵²Nwg ua txhum rua tug TSWV ib yaam le nwg txiv Ahaj hab nwg nam Yexenpees, hab nwg coj lawv le Vaajntxwv Yelaunpau-aas tug yaam ntxwv, nwg yog tug kws coj cov Yixalayees moog ua txhum ntaag.

⁵³Ahaxiyas pe Npa-aas ib yaam le nwg txiv tau pe lug lawm. Nwg ua rua tug TSWV kws yog cov Yixalayees tug Vaajtswv chim kawg nkaus le.