Read Hmong Njua 1 Vaajntxwv 4 Bible Online

1 Vaajntxwv 4 - Hmong Njua bible

1 Vaajntxwv 4

¹Xalumoos ua Vaajntxwv kaav lub tebchaws Yixalayees,

²hab cov nuav yog nwg cov numtswv: Tug povthawj yog Axaliyas tug tub Xadaus

³Ob tug teev ntawv yog Sisas ob tug tub, Elihaules hab Ahiyas tug saib tej ntaub ntawv yog Ahilus tug tub Yehausafas

⁴Tug thawj tubrog yog Yehauyadas tug tub Npenayas. Ob tug povthawj yog Xadaus hab Anpiyathas

⁵Tug thawj ntawm cov tswv xeev yog Nathaas tug tub Axaliyas Vaajntxwv tug tuavxaam yog Nathaas tug tub Xanpus kws yog tug povthawj.

⁶Tug kws saib cov tubkhai huv lub loog yog Ahisas Tug kws saib cov ua num yog Anpidas tug tub Adaunilaas.

⁷Xalumoos tsaa kaum ob leeg txivneej lug ua tswv xeev kaav cov Yixalayees txhua lub xeev. Puab yog cov coj zaub mov huv tej cheebtsaam tuaj rua vaajntxwv hab nwg tsev tuabneeg noj. Ib tug tswv xeev coj zaub mov tuaj rua vaajntxwv tsev tuabneeg ib xyoos twg ib zag.

⁸Ntawm nuav moog yog kaum ob tug tswv xeev ntawd cov npe hab tej cheebtsaam kws puab saib: Npehus: saib saablaaj roob Efalayees

⁹Npedekes: saib lub nroog Makaxes, Sa-anpimes, Npethes Semes, Eloos hab Npethes Hanas

¹⁰Npehexes: saib lub nroog Alunpus, Xukaus hab taagnrho cheebtsaam Hefeles

¹¹Npenanpinadas: (tug kws yuav Xalumoos tug ntxhais Tafas) saib taagnrho cheebtsaam Daules

¹²Ahilus tug tub Npa-anas: saib lub nroog Tanas, Menkidaus, hab taagnrho cheebtsaam kws nyob ze Npethes Se-as, hab ze rua ntawm lub nroog Xalethaas saab qaabteb ntawm lub nroog Yexelees, moog txug ndlua rua tim lub nroog Anpees Mehulas hab tim lub nroog Yaumees

¹³Npenkenpes: saib lub nroog Lamaus huv lub cheebtsaam Nkile-as hab cov zog kws nyob huv lub cheebtsaam Nkile-as kws yog Manaxes tug tub Yais tug xeebntxwv tug, hab cheebtsaam Ankunpes huv lub xeev Npasaas, taagnrho rau caum lub nroog luj kws muaj ntsaa yeej thaiv khov kho, hab muaj tej nqaaj roojvaag tooj

¹⁴Idaus tug tub Ahinadas: saib cheebtsaam Mahana-ees

¹⁵Ahima-as (tug kws yuav Xalumoos tug ntxhais Npasemas;) saib cheebtsaam Nafetalis

¹⁶Husais tug tub Npa-anas: saib cheebtsaam Aseles hab lub nroog Npe-alaus

¹⁷Palu-as tug tub Yehausafas: saib cheebtsaam kws cov Ixakhas nyob

¹⁸Elas tug tub Sime-is: saib cheebtsaam kws cov Npeenyamees nyob

¹⁹Ulis tug tub Nkenpeles: saib lub cheebtsaam Nkile-as kws cov Amaules tug Vaajntxwv Xihoos kaav hab lub xeev Npasaas kws Vaajntxwv Aunkas kaav. Dlua le kaum ob tug tswv xeev nuav lawm, tseem muaj ib tug thawj kws saib taagnrho lub tebchaws hab.

²⁰Cov Yudas hab cov Yixalayees fuamvaam coob ib yaam le tej xuabzeb nraag ntug havtxwv; puab muaj noj muaj haus hab muaj kev zoo sab kawg le.

²¹Xalumoos kaav taagnrho cov tebchaws kws nyob ibncig ze ntawd, txij ndlua ntawm tug Dlej Efalates moog txug rua tim tebchaws Filitees, hab moog txug rua nraag tug nrimteb tebchaws Iziv. Puab puavleej them se rua Xalumoos hab ua nwg qhev moog taag nwg tam neej ntawm le.

²²Tej zaub mov kws Xalumoos xaav tau txhua nub, yog ib puas tsib caug tawb moov nplej, hab peb puas tawb zaub;

²³kaum tug nyuj rog rog kws fwb huv nkuaj, neeg nkaum tug nyuj kws tso rua huv tshaav zaub hab ib puas tug yaaj; dlua le ntawd, tseem muaj maum muaslwj, kauv, phaws muaslwj hab qab sis.

²⁴Xalumoos kaav taagnrho cov tebchaws kws nyob saab nubpoob, txij ndlua ntawm tug Dlej Efalates moog txug rua ntawm lub nroog Nkaxas. Taagnrho cov vaajntxwv kws nyob saab nubpoob ntawm tug Dlej Efalates puavleej coj khoom tuaj rua Xalumoos, hab nwg moog cog kev phoojywg nrug tej tebchaws nruab ze taagnrho.

²⁵Txij le Xalumoos tam, cov Yudas hab cov Yixalayees ua neej nyob kaaj sab lug, txhua yim nyag txhaj cog muaj nyag txiv maab hab txiv ncuav pas.

²⁶Xalumoos muaj plaub caug txheeb lub nkuaj neeg kaw nwg cov neeg hai tsheb hab muaj kaum ob txheeb tug tubrog caij neeg.

²⁷Xalumoos kaum ob tug tswv xeev, ib tug twg raug ua num rua nwg ib lub hlis, yog muab tej zaub mov kws vaajntxwv Xalumoos xaav tau coj tuaj rua nwg, kuas cov tuabneeg kws nyob huv lub loog tau noj; puab muab txhua yaam kws Xalumoos xaav tau tuaj rua nwg.

²⁸Hab txhua tug tswv xeev puavleej coj puab tej nplej hab quavnyaab npleg pub neeg tuaj rua ntawm qhov chaw kws ca tej ntawd, rua cov neeg hai tsheb hab cov neeg kws siv ua lwm yaam num tau noj.

²⁹Vaajtswv pub rua Xalumoos muaj tswvyim hab kev txawj ntse tub heev ntsuag tsi tau hab ntau ib yaam le tej xuabzeb nraag ntug havtxwv.

³⁰Xalumoos ntse tshaaj cov tub txawg tub ntse kws nyob saab nubtuaj lossis tej tub txawg tub ntse kws nyob nraag tebchaws Iziv lawm hab.

³¹Nwg ntse tshaaj lwm tug txivneej huv tuabsi: ntse tshaaj Ethas kws yog tuabneeg Exelas, Hemaas, Kakaus hab Dadas kws yog Mahaules cov tub, hab Xalumoos lub koob meej nrov nchaa moo lug moog thoob plawg tej tebchaws kws nyob puagncig ntawd.

³²Nwg sau tau peb txheeb zaaj paajlug, hab ib txheeb tsib zaaj nkauj.

³³Nwg has txug tej ntoo hab tej nroj tsuag, tej ntoo cab peg Roob Lenpanoos, hab tej nroj hixauv kws tuaj ntawm tej ntsaa yeej; nwg has txug tej tsaj, tej noog, tej kaab hab tej ntseg huv tuabsi.

³⁴Taagnrho tej vaajntxwv kws nyob huv nplajteb nuav puavleej nov Xalumoos tej tswvyim hab xaa puab cov tuabneeg tuaj noog Xalumoos pav nwg tej kev txawj ntse.