Read Hmong Njua 1 Vaajntxwv 5 Bible Online

1 Vaajntxwv 5 - Hmong Njua bible

1 Vaajntxwv 5

¹Vaajntxwv Hilaas kws kaav lub nroog Tiles yeej ibtxwm nrug Daviv ua phoojywg, thaus nwg nov has tas Xalumoos tau ua vaajntxwv hloov nwg txiv Daviv chaw lawm, Hilaas txhaj tso ib cov numtswv tuaj cuag Xalumoos.

²Xalumoos txhaj xaa xuv rov moog rua Hilaas has tas:

³“Koj yeej paub kuv txiv Daviv ibtxwm ua rog rua nwg cov yeebncuab kws nyob huv tej tebchaws puagncig nwg, mas nwg txhaj tsi muaj cuabkaav ua lub Tuamtsev ua qhov chaw pehawm tug TSWV kws yog nwg tug Vaajtswv moog txug thaus tug TSWV pub nwg ntaus yeej taagnrho nwg cov yeebncuab lawm.

⁴Tabsis nwgnuav tug TSWV kws yog kuv tug Vaajtswv pub rua kuv lub tebchaws nyob thaajyeeb thoob plawg txhua phaab huv tuabsi. Kuv tsi muaj yeebncuab hab tsi muaj kev sis ntaus sis tua kws txaus ntshai lawm.

⁵Tug TSWV coglug tseg rua kuv txiv Daviv has tas, ‘Koj tug tub kws kuv yuav tsaa ua vaajntxwv hloov koj chaw, nwg yog tug kws yuav ua lub Tuamtsev rua kuv.’ Yog le ntawd, nwgnuav kuv txhaj npaaj ua lub Tuamtsev, kuas tau qhov chaw pehawm tug TSWV kws yog kuv tug Vaajtswv.

⁶Yog le ntawd, thov koj cov tuabneeg moog txav cov ntoo cab peg Roob Lenpanoos xaa tuaj rua kuv. Kuv cov tuabneeg yuav nrug puab ua num ua ke, hab kuv yuav them nqe rua koj cov tuabneeg lawv le koj pum zoo. Koj yeej paub has tas, kuv cov tuabneeg yeej ibtxwm tsi txawj ntuv ntoo le koj cov.”

⁷Thaus Hilaas tau nov Xalumoos cov lug nuav lawm, nwg txaus sab heev, Hilaas has tas, “Nub nua ua tug TSWV tsaug, rua qhov nwg pub Daviv muaj ib tug tub ntse heev lug ua vaajntxwv hloov nwg chaw kaav tsaav tuabneeg kws coob tshaaj plawg lawm!”

⁸Ces Hilaas txawm xaa xuv rov moog rua Xalumoos has tas, “Kuv tau txais koj cov lug lawm, kuv zoo sab ua lawv le koj tej lug thov. Kuv yuav muab cov ntoo cab hab ntoo thuv tuaj pub rua koj.

⁹Kuv cov tuabneeg yuav hai cov ntoo sau roob Lenpanoos moog rua nraag havtxwv hab yuav muab paav ua tej kheev nkuam lawv ntug dlej tuaj kuas txug qhov chaw kws koj tau teem tseg. Kuv cov tuabneeg maam muab dlaws, muab teeb ua ke, hab muab cob rua koj cov tuabneeg. Ces thov koj xaa zaub mov tuaj pub kuv cov tuabneeg noj xwb tau lawm.”

¹⁰Hilaas txhaj le xaa ntoo cab hab ntoo thuv tuaj rua Xalumoos lawv le nwg xaav tau,

¹¹hab ib xyoos twg Xalumoos xaa ib puas txheeb tawb nplej, hab xaa cov roj txiv ntoo kws tsi xyaw lwm yaam le, ib puas kaum txheeb thoob moog rua Hilaas cov tuabneeg tau noj.

¹²Tug TSWV pub tswvyim rua Xalumoos lawv le tug TSWV tau coglug tseg lawm. Hilaas hab Xalumoos muaj kev sis raug zoo heev, obtug txhaj le coglug ua phoojywg.

¹³Vaajntxwv Xalumoos sau tau peb caug txheeb leej txivneej nyob thoob plawg huv tebchaws Yixalayees tuaj ua tub zug.

¹⁴hab nwg tsaa Adaunilaas ua tug saib cov tub zug ntawd. Nwg muab puab faib ua peb paab, ib paab kaum txheeb leej, hab muab puab sis hloov ua num, ib paab moog ua num peg roob Lenpanoos ib hlis hab rov lug tsev ob hlis.

¹⁵Xalumoos tseem muaj dlua yim caum txheeb leej txivneej ua num txaug pobzeb peg laaj roob hab xyaa caum txheeb leej txivneej ua cov nqaa pobzeb,

¹⁶hab nwg tsaa peb txheeb peb puas leej ua cov saib hab qha puab ua num.

¹⁷Vaajntxwv Xalumoos saamfwm kuas puab yuavtsum txav tej dlaim txag zeb luj hab zoo nkauj lug pua lub plaag Tuamtsev.

¹⁸Xalumoos hab Hilaas cov tub zug hab cov tuabneeg kws nyob huv lub nroog Npenpas sis paab nroog txaug pobzeb hab txav ntoo lug ua lub Tuamtsev.