Read Hmong Njua 1 Vaajntxwv 7 Bible Online

1 Vaajntxwv 7 - Hmong Njua bible

1 Vaajntxwv 7

¹Xalumoos tseem ua tau ib lub loog rua nwg, hab nwg siv sijhawm kaum peb xyoos ua lub loog ntawd txhaj le tav.

²Nwg ua ib chaav tsev hu ua Chaav Tsev Haav Zoov Lenpanoos, ntev ib puas tshim hab sab peb caug tshim. Chaav tsev ntawd muaj peb leej ncej ntoo thuv, ib leej yog kaum tsib tug ncej kws puavleej muab cov nqaaj ntoo thuv dlhos rua sau cov hauv ncej ntawd. Nwg muab cov txag ntoo thuv ntsa ua qaab nthaab, ntsa thoob plawg moog rua tom chaav rau khoom huv tuabsi, hab muab cov ncej ntawd txheem paab.

⁴Ib saab phaab ntsaa twg muaj peb leej qhovrais.

⁵Cov ncej qhovrooj hab cov qhovrais puavleej ua plaub faab, hab peb leej qhovrais ntawm txhua saab phaab ntsaa puavleej nyob sis ncaag zog.

⁶Chaav kws txhus cov ncej zeb ntev tsib caug tshim hab dlaav peb caug tshim. Chaav ntawd muaj ib lub hauvmum hab muaj cov ncej zeb txheem paab.

⁷Chaav ntawm lub zwmtxwv, hu ua chaav txav txim, yog chaav kws Xalumoos txav plaub ntug, chaav ntawd nwg muab cov txag ntoo thuv xov huv taw ntsaa moog nto plawg rua sau qaab nthaab.

⁸Muaj dlua ib ceg tsev nyob rua saab tom qaab chaav txav plaub ntug yog chaav kws Xalumoos nyob. Chaav ntawd ua zoo ib yaam le lwm chaav hab. Xalumoos tseem ua dlua ib lub tsev zoo ib yaam le lub ntawd rua nwg tug quaspuj kws yog cov Iziv tug vaajntxwv tug ntxhais nyob hab.

⁹Taagnrho tej chaav tsev ntawd, hab chaav luj kws tu plaub ntug puavleej muab tej txag zeb xov huv taw ntsaa moog nto plawg rua sau hauvmuag tsev. Cov pobzeb ntawd, luas yeej ntsuag hum hab txav tom chaw khawb pobzeb lawm, luas muab kaw kaw saab huv hab saab nrau huv tuabsi.

¹⁰Tej plaag tsev los yog muab tej dlaim txag zeb dlaav heev kws txaug tom chaw khawb pobzeb lug pua, muaj tej dlaim ntev yim tshim hab muaj tej dlaim ntev kaum tshim.

¹¹Luas tseem muab dlua ib cov txag zeb kws ntsuag txav tau hum lawm hab ib cov txag ntoo thuv kws zoo heev lug pua tshooj rua sau cov plaag tsev ntawd.

¹²Chaav huv lub loog, chaav huv plawv lub Tuamtsev, hab chaav kws ua kev moog rua huv lub Tuamtsev cov phaab ntsaa ib txheej yog txag ntoo thuv hab peb txheej yog txag zeb.

¹³Vaajntxwv Xalumoos tso tuabneeg moog hu ib tug txivneej npe hu ua Hulaas huv lub nroog Tiles tuaj cuag nwg. Hulaas yog ib tug kws nchuav tooj.

¹⁴Hulaas txiv yog tuabneeg Tiles, nwg txiv tuag ntxuv lawm; Hulaas nam yog tuabneeg Nafetalis, Hulaas yog ib tug tuabneeg muaj tswvyim hab txawj nchuav tooj heev. Nwg tau leeg Vaajntxwv Xalumoos tej lug caw hab tuaj ua teg num nchuav tooj.

¹⁵Hulaas nchuav tau ob tug ncej tooj zoo ib yaam nkaus, ib tug twg sab kaum yim tshim, hab qhov luj yog kaum ob tshim.

¹⁶Hab nwg tseem nchuav tau ob lub hau dlhos rua sau ob tug hauv ncej, ib lub hau twg sab tsib tshim.

¹⁷Nwg nchuav ob txuj saw tooj dlai rua sau ob tug hauv ncej.

¹⁸Hab muab tooj nchuav ua ob tshaam tswb zoo le txiv ntsab pobkws dlai rua sau hab.

¹⁹Ob lub hau ntawd zoo ib yaam le tej paaj lilis, sab plaub tshim,

²⁰hab muab dlhos rua sau ob tug hauv ncej nrug ob txuj saw tooj. Ib tshaam tswb twg muaj ob puas lub dlai puagncig rua lub hau, hab ib tug ncej twg dlai ob tshaam tswb.

²¹Hulaas muab ob tug ncej tooj ntawd txhus rua ntawm hauv ntej kws yuav moog rua huv lub Tuamtsev: Tug ncej saab nraag hu ua Yakhees, hab tug ncej saab peg hu ua Npau-am

²²Cov paaj tooj lilis ntawd muab dlai rua sau ob tug hauv ncej tooj. Ces teg num kws Hulaas nchuav ob tug ncej tooj tav le ntawd.

²³Hulaas muab tooj nchuav tau ib lub rhawv kheej kheej, sab tsib tshim, saab npoo nuav rua saab npoo tid muaj kaum tshim, hab lub cheeb muaj peb caug tshim.

²⁴Nwg muab tooj nchuav ua ob lub thi lug thi puagncig lub ncauj rhawv saab nrau; ob lub thi ntawd nchuav nrug lub rhawv.

²⁵muab lub rhawv ntawd txawb rua sau kaum ob tug nyuj tooj kws tig taubhau rua saab nrau, peb tug nyuj twg tig taubhau rua ib saab.

²⁶Lub rhawv ntawd tug npoo tuab le peb nti thoob plawg, tug ntug zoo le tej npoo khob, nwg muab zaaj ntug nrau zaig txaij nraug zeeg nthuav zoo le lub paaj lilis. Lub rhawv ntawd, ntim tau kwvyees le ob txheeb thoob dlej.

²⁷Hulaas tseem nchuav tau kaum lub tsheb tooj; ib lub twg ntev plaub tshim, dlaav plaub tshim hab sab peb tshim.

²⁸Puab txua ib cov taab ua plaub faab ntsa rua

²⁹kws yog muab txaug ua tej dluab tsuv ntxhuav, tej dluab nyuj hab ua dluab qhelunpees rua sau cov txag ntawd; hab sau cov taab, cov txag kws has nuav, nyob sau hab huv qaab tej dluab tsuv ntxhuav, tej dluab nyuj, mas muab txaug ua qaabqwj txaij nraug zeeg rua.

³⁰Ib lub tsheb twg muaj plaub lub lug tooj hab ob tug nqaaj puavleej muaj ncej txheem plaub ceg kaum; cov ncej ntawd muab txaug ua qaabqwj txaij raug zeeg thoob plawg.

³¹Sau lub ncauj rhawv ua lub kheej kheej. Txij ndlua ntawm lub npoo tsheb rua sau, sab ib tshim hab tog kws dlhos rua huv lub tsheb ntev ib dlus. Hab muab lub ncauj zaig thoob plawg.

³²Cov lug sab ib tshim hab ib dlus; hab cov lug ntawd puavleej nyob huv qaab cov txag. Hab cov nqaaj yeej muab ntsa rua cov tsheb ua ke le lawm.

³³Cov lug zoo ib yaam le tej lug tsheb neeg; cov nqaaj, cov thi, cov kauj hab cov khwb lug, puavleej yog muab tooj nchuav ua.

³⁴Ib lub tsheb twg muaj plaub tug ncej txheem huv qaab plaub ceg kaum tuaj kws yog muab ntsa rua ntawm lub tsheb.

³⁵Txhua lub tsheb, muaj ib tug ntug nkhaus quas vog ncig thoob plawg sab ib dlus; cov ntug hab cov txag puavleej muab ntsa rua ntawm lub tsheb.

³⁶Cov ncej hab cov txag muab txaug ua dluab qhelunpees, dluab tsuv ntxhuav, dluab toovlaaj rua txhua qhov kws seem chaw, hab muab txaug txaij raug zeeg thoob plawg.

³⁷Tej kws has taag nuav yog has txug qhov kws ua cov tsheb ntawd zoo le caag; cov tsheb nuav nchuav zoo ib yaam, luj sis luag hab sab sis txig.

³⁸Hulaas tseem nchuav dlua kaum lub rhawv tooj, ib lub rhawv rua ib lub tsheb. Ib lub rhawv twg lub nrog muaj plaub tshim hab ntim tau tsib caug thoob dlej.

³⁹Nwg muab tsib lub coj moog teeb rua ntawm lub Tuamtsev saab qaabteb, hab muab tsib lub coj moog teeb rua ntawm lub Tuamtsev saab qaumteb; lub rhawv tooj luj muab teeb rua tom ceg kaum saab nubtuaj qaabteb.

⁴⁰Hulaas tseem nchuav tau ib cov laujkaub, ib cov dluav, hab taig phab. Nwg teg num kws nwg ua rua Vaajntxwv Xalumoos huv lub Tuamtsev tav taag lawm. Tej nuav yog nwg ua: 1 ob tug ncej tooj, ob lub hau kws dlhos rua sau ob tug ncej. Cov saw kws dlai rua sau ob lub hau ncej Plaub puas lub tswb kws dlai rua ob txuj saw, ib tshaam muaj ib puas lub dlai rua sau ob lub hau ncej kaum lub tsheb tooj kaum lub rhawv tooj ib lub rhawv tooj luj kaum ob tug nyuj tooj txheem lub rhawv Cov laujkaub. Cov dluav hab Cov taig phab. Taagnrho tej cuabyeej kws siv rua huv lub Tuamtsev nuav, puavleej yog Hulaas ua rua Vaajntxwv Xalumoos tau siv huv lub Tuamtsev, txhua yaam yog tooj dlaag kws muab txhuam ci dlaaj nrhuv xwb.

⁴¹

⁴²

⁴³

⁴⁴

⁴⁵

⁴⁶Vaajntxwv ua tej nuav huv lub Haav Yauladees kws nyob ntu nruab nraab ntawm Xukaus hab Xalethaas.

⁴⁷Xalumoos tsi tau muab tej cuabyeej nuav luj saib nyaav pistsawg, rua qhov ntau dlhau lawm. Yog le ntawd, cov tooj kws muab ua tej cuabyeej ntawd nyaav npaum le caag los tsi muaj leejtwg paub le.

⁴⁸Xalumoos tseem muaj ib cov rooj tog kub rua huv lub Tuamtsev le nraag qaab nuav: Lub thaaj, lub rooj rau ncuav fij rua tug TSWV,

⁴⁹Kaum tug ncej teeb kws txawb rua huv Chaav Dlawbhuv Kawg nkaus hauv ntej, tsib lub txawb rua saab peg hab tsib lub txawb rua saab nraag; tej paaj, tej teeb hab tej caj,

⁵⁰tej khob, tej txab txav teebxeeb, tej ntim, tej taig rau tshuaj tsw qaab, hab cov laujkaub rau ncaig tawg; hab cov ntsa laag qhovrooj rua Chaav Dlawbhuv, hab rua chaav saab nrau lub Tuamtsev nuav. Taagnrho tej khoom siv nuav puavleej yog muab kub nchuav xwb.

⁵¹Thaus Vaajntxwv Xalumoos ua lub Tuamtsev txhua yaam tav taag lawm, nwg muab taagnrho tej nyaj, tej kub hab tej khoom kws nwg txiv Daviv muab fij rua Vaajtswv lawm, coj moog ca rua huv tej chaav rau khoom huv lub Tuamtsev.