Read Hmong Njua 1 Vaajntxwv 8 Bible Online

1 Vaajntxwv 8 - Hmong Njua bible

1 Vaajntxwv 8

¹Tom qaab ntawd, Vaajntxwv Xalumoos hu taagnrho cov Yixalayees txhua tug thawjcoj ntawm txhua xeem hab txhua cuab kwvtij tuaj cuag nwg rua huv lub nroog Yeluxalees, kuas puab moog kwv lub Phijxaab kws ntim Vaajtswv tej lug cog tseg huv lub nroog Xi-oos kws yog Daviv lub nroog, lug tso rua huv lub Tuamtsev.

²Puab tuaj sis sau rua thaus ua kevcai nyob Tsev Pheebsuab kws yog lub hlis Ethanees.

³Thaus cov thawjcoj tuaj txoos ua ke txhij lawm, cov povthawj txawm tsaws lub Phijxaab kws ntim Vaajtswv tej lug cog tseg hab kwv

⁴lug rua huv lub Tuamtsev. Cov Levis hab cov povthawj muab tug TSWV lub Tsevntaub hab tej khoom siv kwv huv tuabsi lug ca rua huv lub Tuamtsev.

⁵Vaajntxwv Xalumoos hab cov pejxeem tuaj sis sau ua ke rua ntawm lub Phijxaab kws ntim Vaajtswv tej lug cog tseg, hab muab yaaj muab nyuj ntau kawg nkaus suav tsi txheeb lug tua fij rua tug TSWV.

⁶Ces cov povthawj txhaj kwv lub Phijxaab kws ntim Vaajtswv tej lug cog tseg moog rua huv lub Tuamtsev hab muab tso rua huv Chaav Dlawbhuv Kawg nkaus, huv qaab ob tug qhelunpees ob phob tis.

⁷Ob tug qhelunpees ntawd, nthuav tis npug lub Phijxaab hab obtug laag ntoo kws kwv lub Phijxaab.

⁸Yog leejtwg sawv ncaaj saab nraag Chaav Dlawbhuv Kawg nkaus saib moog rua huv, nwg yeej pum ob tug tw laag, tabsis yog tuaj lwm qhov saib moog, yeej tsi pum le. (Naj nub nua ob tug laag ntoo ntawd tseem nyob.)

⁹Yeej tsi muaj lwm yaam nyob huv lub Phijxaab ntawd, tsuas muaj ob dlaim txag zeb kws Mauxes muab ntim rua huv thaus nyob tom Roob Xinais; ob dlaim txag zeb ntawd yog sau Vaajtswv tej lug cog tseg kws nwg sau rua cov Yixalayees, thaus puab taug kev nraag tebchaws Iziv lug.

¹⁰Thaus cov povthawj tawm huv lub Tuamtsev lug, ces taamsim ntawd txawm ca le muaj ib tauv fuab lug roog tsaus nti sau lub Tuamtsev,

¹¹cov povthawj tsi muaj cuabkaav rov moog rua huv lub Tuamtsev le, rua qhov tug TSWV tug tshwjchim ci ntsaa ab rua huv Vaajtswv qhov chaw nyob.

¹²Vaajntxwv Xalumoos thov Vaajtswv le nuav: “Tug TSWV, koj yog tug kws tsim lub nub rua sau nruab ntug, txawm le ntawd los koj yeej pum zoo nyob huv tauv fuab kws tuab hab tsaus nti;

¹³Nwgnuav kuv tub ua tau lub Tuamtsev kws zoo heev rua koj lawm, yog qhov chaw rua koj nyob moog ibtxhis tsi kawg le.”

¹⁴Thaus cov pejxeem tseem sawv qhov ntawd, Vaajntxwv Xalumoos tig xubndlag lug rua ntawm puab, hab nwg thov Vaajtswv foom koob moov rua puab.

¹⁵Nwg has tas, “Ca le qhuas tug TSWV kws yog cov Yixalayees tug Vaajtswv! Nwg yeej ua lawv le tej kws nwg tau coglug tseg rua kuv txiv Daviv has tas,

¹⁶‘Suav txij thaus kuv coj kuv tsaav tuabneeg tawm nraag tebchaws Iziv lug, kuv tsi tau xaiv ib lub nroog twg huv tsaav tuabneeg Yixalayees txhua xeem lug ua lub Tuamtsev ua qhov chaw pehawm kuv le. Tabsis Daviv, kuv tau xaiv koj lug ua tug kaav kuv tsaav tuabneeg.’ ”

¹⁷Xalumoos has ntxiv tas, “Kuv txiv Daviv yeej npaaj yuav ua lub Tuamtsev kuas tau qhov chaw pehawm tug TSWV kws yog cov Yixalayees tug Vaajtswv,

¹⁸tabsis tug TSWV has rua Daviv has tas, ‘Qhov kws koj xaav ua ib lub tuamtsev rua kuv ntawd, yeej yog ib qhov zoo heev,

¹⁹tabsis koj tsi yog tug kws yuav ua lub Tuamtsev rua kuv. Koj tug tub kws koj yug yog tug kws yuav ua lub Tuamtsev rua kuv.’

²⁰“Nwgnuav tug TSWV tub ua lawv le tej lug kws nwg cog tseg lawm. Kuv txhaj tau lug ua cov Yixalayees tug vaajntxwv hloov kuv txiv chaw, hab kuv tau lug ua lub Tuamtsev ua qhov chaw pehawm tug TSWV kws yog cov Yixalayees tug Vaajtswv.

²¹Kuv tseem tau ua ib qhov chaw rua huv lub Tuamtsev lug rau lub Phijxaab kws ntim ob dlaim txag zeb kws nwg sau nwg tej lug cog tseg rua peb cov yawmkoob thaus nwg coj puab nraag tebchaws Iziv lug.”

²²Xalumoos moog sawv taabmeeg cov pejxeem suavdlawg rua ntawm hauv ntej lub thaaj fij, nwg tsaa nwg ob txhais teg

²³hab thov has tas, “Tug TSWV kws yog cov Yixalayees tug Vaajtswv, yeej tsi muaj dlua lwm tug vaajtswv nyob sau ntuj lossis huv nplajteb nuav zoo le koj! Koj yeej ua lawv le koj tej lug cog tseg rua koj tsaav tuabneeg hab hlub puab thaus puab noog koj lug kawg sab kawg ntsws.

²⁴Koj tau ua lawv le tej lug kws koj cog tseg rua kuv txiv Daviv; mas nub nua muaj tav taag lawv le koj txhua lu lug lawm tag.

²⁵Tug TSWV kws yog cov Yixalayees tug Vaajtswv, nwgnuav kuv thov kuas koj ua lawv le lwm lu lug kws koj tau cog tseg rua kuv txiv has tas, koj yuav ca nwg cov xeebntxwv ua vaajntxwv kaav cov Yixalayees moog le, yog puab ua tuab zoo noog koj tej lug ib yaam le nwg noog koj tej lug.

²⁶Yog le ntawd, cov Yixalayees tug Vaajtswv, thov kuas txhua yaam muaj tseeb lawv le tej lug kws koj tau cog tseg rua kuv txiv Daviv kws yog koj tug tubkhai lawm!”

²⁷“Tabsis Vaajtswv, koj yuav ua le caag nyob huv nplajteb nuav? Lub ntuj luj hab dlaav npaum le ntawd, tub tsi txaus koj nyob. Yog le ntawd, lub Tuamtsev kws kuv ua nuav yuav ua caag txaus koj nyob?

²⁸Tug TSWV kws yog kuv tug Vaajtswv, kuv yog koj tug tubkhai. Thov koj noog hab teb kuv tej lug kws nub nua kuv thov koj.

²⁹Thov koj tsaa qhovmuag saib lub Tuamtsev nuav nruab nub mo ntuj. Qhov nuav yog qhov chaw kws koj xaiv lug rua suavdlawg tuaj pehawm koj. Thaus kuv tig xubndlag tuaj rua lub Tuamtsev nuav thov koj, thov koj noog kuv tej lug thov.

³⁰Thaus kuv hab koj tsaav tuabneeg tig xubndlag tuaj rua ntawm qhov chaw nuav thov koj, koj nyob huv koj lub tsev sau ntuj noog peb tej lug thov hab zaam txim rua peb.

³¹“Thaus muaj ib tug tuabneeg twg raug lam has tas nwg ua txhum rua tej kwvtij zej zog, hab coj nwg tuaj tsaa teg twv ntawm koj lub thaaj fij huv lub Tuamtsev nuav has tas nwg yeej yog tuabneeg ncaaj nceeg tag,

³²tug TSWV, koj yog tug nyob sau ntuj, thov koj noog hab txav txim rua koj ob tug tubkhai. Ca le rau txim rua tug kws ua txhum lawv le nwg tau ua, hab thov koj tso tug kws tsi muaj txim.

³³“Thaus koj tsaav tuabneeg Yixalayees swb puab tej yeebncuab, vim puab tau ua txhum rua koj; tabsis yog puab tig rov lug cuag koj hab puab tuaj rua huv lub Tuamtsev nuav, leeg puab tej kev txhum thov koj zaam txim,

³⁴koj nyob sau ntuj, thov koj noog puab tej lug thov. Thov zaam txim rua koj tsaav tuabneeg tej kev txhum hab coj puab rov lug rua huv lub tebchaws kws koj tub muab pub rua puab cov yawmkoob lawm.

³⁵“Thaus koj tsi tso naag lug, vim koj tsaav tuabneeg tau ua txhum rua koj, tabsis yog puab leeg txim hab tig xubndlag tuaj rua ntawm lub Tuamtsev nuav thov koj,

³⁶thaus ntawd thov koj tug kws nyob sau ntuj noog puab tej lug thov. Thov koj zaam txim rua vaajntxwv hab cov pejxeem Yixalayees, hab qha puab kuas paub ua lub neej ncaaj nceeg, ces tug TSWV, thov koj tso naag lug rua lub tebchaws kws koj tau muab pub rua koj tsaav tuabneeg ua puab tug moog le lawm.

³⁷“Yog lub tebchaws muaj kev tshaib kev nqhes lossis muaj kaab mob kis lossis tej qoobloo raug puamtsuaj vim muaj cua dlaaj cua dlub nplawm lossis muaj kooj txomfaav noj lossis thaus koj tsaav tuabneeg raug puab cov yeebncuab tawmtsaam lossis thaus puab raug mob lossis muaj mob muaj nkeeg,

³⁸thov koj noog puab tej lug thov. Yog koj tsaav tuabneeg Yixalayees leejtwg muaj kev nyuaj sab ntxhuv plawv, hab tsaa teg tuaj rua ntawm lub Tuamtsev nuav thov koj,

³⁹thov koj noog puab tej lug thov. Thov koj teb puab tej lug thov ntawm koj lub chaw nyob sau ntuj tuaj, thov koj zaam txim rua puab hab paab puab. Tsuas yog koj tuab leeg xwb txhaj paub txug tuabneeg lub sab xaav. Thov koj ua rua txhua tug lawv le nwg teg num,

⁴⁰mas koj tsaav tuabneeg txhaj le yuav fwm koj moog taag puab tam neej nyob huv lub tebchaws kws koj muab pub rua peb cov yawmkoob lawm.

⁴¹“Thaus ib tug tuabneeg txawv tebchaws kws nyob dleb, nov txug koj lub koob meej hab tej txujci tseemceeb kws koj tau ua paab koj tsaav tuabneeg dlhau lug lawm tuaj thov koj huv lub Tuamtsev nuav,

⁴²

⁴³thov koj noog nwg tej lug thov. Koj nyob sau ntuj kws yog koj qhov chaw nyob, thov koj noog nwg hab ua lawv le nwg tej lug thov, kuas txhua tsaav tuabneeg kws nyob huv nplajteb nuav txhaj yuav paub koj hab noog koj lug, ib yaam le koj tsaav tuabneeg Yixalayees noog koj lug. Ces puab txhaj yuav paub has tas, kuv ua lub Tuamtsev nuav lug ua qhov chaw pehawm koj.

⁴⁴“Thaus koj has kuas koj tsaav tuabneeg moog tua puab cov yeebncuab, txawm yog puab nyob qhov twg thov koj los tsuav yog puab tig xubndlag tuaj rua huv lub nroog kws koj xaiv tseg hab lub Tuamtsev kws kuv ua rua koj nuav lawm,

⁴⁵koj nyob sau ntuj, thov koj noog puab tej lug thov hab paab kuas puab muaj yeej.

⁴⁶“Tsi muaj ib tug tuabneeg twg kws tsi tau ua txhum le, yog thaus twg koj tsaav tuabneeg ua txhum rua koj, koj chim rua puab hab ca puab cov yeebncuab tua yeej puab hab nteg puab coj moog rua lwm lub tebchaws. Txawm yog lub tebchaws ntawd nyob dleb hab ze

⁴⁷los thov koj noog koj tsaav tuabneeg tej lug thov. Yog puab nyob huv lub tebchaws ntawd, leeg puab tej kev txhum hab tej kev phem kev qas kws puab tau ua lug lawm, tug TSWV, thov koj noog puab tej lug thov.

⁴⁸Nyob huv lub tebchaws ntawd, yog puab rov lug muab sab npuab koj tag tag, leeg puab tej kev txhum hab tig xubndlag tuaj rua huv lub tebchaws kws koj muab pub rua peb cov yawmkoob, lub nroog kws koj xaiv tseg hab lub Tuamtsev kws kuv ua rua koj lawm,

⁴⁹thov koj noog puab tej lug thov. Koj nyob ntawm koj lub chaw sau ntuj noog puab thov hab hlub puab,

⁵⁰zaam puab tej kev txhum kws puab ntxeev sab rua koj, hab tshoov puab cov yeebncuab sab kuas ua lub sab zoo rua puab.

⁵¹Puab yog koj tsaav tuabneeg kws koj coj tawm nraag tebchaws Iziv qhov kws zoo ib yaam le lub cubtawg kws cig tsi paub tuag le lug.

⁵²“Tug TSWV kws kaav ib puas tsaav yaam, thov koj naj nub tsaa qhovmuag saib hab hlub koj tsaav tuabneeg Yixalayees hab puab tug vaajntxwv. Thaus twg puab tsaa ncauj thov koj paab puab, thov koj noog puab tej lug thov.

⁵³Rua qhov koj yeej xaiv puab tawm ntawm txhua tsaav tuabneeg huv qaab ntuj nuav lug ua koj tsaav tuabneeg, ib yaam le koj tau has rua koj tug tubkhai Mauxes thaus koj coj peb cov yawmkoob tawm nraag tebchaws Iziv lug.”

⁵⁴Tom qaab kws Xalumoos thov tug TSWV taag lawm, nwg txawm sawv ntawm lub thaaj hauv ntej, qhov chaw kws nwg txhus caug hab tsaa teg rua sau ntuj.

⁵⁵Nwg tsaa ncauj thov Vaajtswv nrov nrov foom koob moov rua cov pejxeem kws tuaj sis sau rua ntawd has tas,

⁵⁶“Ua tug TSWV tsaug, nwg yog tug kws pub nwg tsaav tuabneeg tau nyob kaaj sab lug, ib yaam le nwg tau coglug tseg lawm. Nwg yeej ua lawv le txhua yaam lug cog tseg kws nwg kuas nwg tug tubkhai Mauxes qha rua peb lawm.

⁵⁷Thov tug TSWV kws yog peb tug Vaajtswv nrug peb nyob ib yaam le nwg nrug peb cov yawmkoob nyob; thov nwg tsi xob tso peb tseg;

⁵⁸thov tug TSWV tshoov peb sab kuas peb noog nwg lug, peb txhaj yuav ua tau peb lub neej hum nwg sab hab coj tau lawv le nwg tej kevcai, hab nwg tej lug saamfwm kws nwg tau qha tseg rua peb cov yawmkoob lawm.

⁵⁹Thov tug TSWV kws yog peb tug Vaajtswv ncu ntsoov tej lug kws kuv thov txhua zag. Thov nwg taabncuab nwg tsaav tuabneeg Yixalayees hab puab tug vaajntxwv, lawv le tej kws puab naj nub xaav yuav xaav tau.

⁶⁰Kuas txhua tsaav tuabneeg kws nyob huv nplajteb nuav paub has tas, tug TSWV tuab leeg xwb txhaj yog Vaajtswv, yeej tsi muaj dlua lwm tug Vaajtswv nyob qhov twg le lawm.

⁶¹Thov mej cov kws yog nwg tsaav tuabneeg, ca le muab sab npuab tug TSWV kws yog peb tug Vaajtswv, hab coj lawv le nwg tej kevcai, hab nwg tej lug saamfwm ib yaam le mej ua naj nub nua.”

⁶²Ces Vaajntxwv Xalumoos hab cov pejxeem txawm muab tsaj tua fij rua tug TSWV.

⁶³Nwg muab neeg nkaum ob txheeb tug nyuj, hab ib puas neeg nkaum txheeb tug yaaj tua fij ua kev sis raug zoo. Yog le ntawd, vaajntxwv hab cov pejxeem txhaj le muab lub Tuamtsev fij rua Vaajtswv.

⁶⁴Nub ntawd, Vaajntxwv muab thaaj aav huv plawv lub tshaav puam kws nyob ntawm lub Tuamtsev hauv ntej ua kevcai ntxuav kuas huv, muab tej tsaj tua hlawv fij taagnrho, muab tej qoobloo fij hab muab tej paavywj tsaj hlawv fij rua Vaajtswv ua kev sis raug zoo. Nwg ua le ntawd, rua qhov lub thaaj tooj miv heev tsi txaus hlawv tej khoom fij ntawd.

⁶⁵Vaajntxwv Xalumoos hab cov pejxeem Yixalayees ua kevcai nyob Tsev Pheebsuab hab noj haus rua ntawm lub Tuamtsev tau xyaa nub. Tej tuabneeg tuaj coob kawg le, tuaj peg lub dlawm Hamas hab nraag nrimteb Iziv tuaj huv tuabsi.

⁶⁶Nub yim Xalumoos maam tso puab rov moog vaaj moog tsev. Puab txhua tug puavleej ua nwg tsaug hab zoo sab hlo moog tsev, vim tej koob moov kws tug TSWV pub rua nwg tug tubkhai Daviv hab rua nwg tsaav tuabneeg Yixalayees.