Read Hmong Njua 2 Vaajntxwv 1 Bible Online

2 Vaajntxwv 1 - Hmong Njua bible

2 Vaajntxwv 1

¹Thaus Vaajntxwv Ahaj kws kaav tebchaws Yixalayees tuag lawm, cov Mau-am txawm ntxeev sab tawmtsaam cov Yixalayees.

²Vaajntxwv Ahaxiyas kws kaav tebchaws Yixalayees txawm poob sau theem tsev ob lug rua huv plaag tsev kws yog nwg lub loog huv lub nroog Xamalis, ua rua nwg raug mob saab kawg le. Yog le ntawd, nwg txhaj khaiv ib cov tubkhai moog nug cov Filitees tug vaajtswv Npa-aas Xenpus kws nyob huv lub nroog Ekiloos saib qhov kws nwg raug mob ntawd yuav zoo los tsi zoo.

³Tabsis tug TSWV ib tug timtswv lug has rua Eliyas kws yog tug cev Vaajtswv lug kws nyob huv Tinpes, kuas ca le moog cuag Vaajntxwv Ahaxiyas cov tubkhai hab nug has tas, “Vim le caag mej txhaj moog cuag tug vaajtswv Npa-aas Xenpus kws nyob huv lub nroog Ekiloos? Puas yog mej xaav has tas, nyob huv tebchaws Yixalayees tsi muaj Vaajtswv?

⁴Mej moog has rua vaajntxwv has tas, tug TSWV has tas, ‘Qhov kws koj raug mob yuav tsi zoo, koj yuav tuag xwb!’ ” Eliyas txawm moog has lawv le tug TSWV has,

⁵hab cov tubkhai ntawd txhaj rov qaab moog cuag vaajntxwv. Vaajntxwv nug puab has tas, “Vim le caag mej rov qaab lug?”

⁶Puab teb has tas, “Peb moog ntsib ib tug txivneej. Nwg kuas peb lug has rua koj has tas, tug TSWV has tas, ‘Vim le caag koj txhaj khaiv tuabneeg moog nug tug vaajtswv Npa-aas Xenpus kws nyob huv lub nroog Ekiloos? Puas yog koj xaav has tas, nyob huv tebchaws Yixalayees tsi muaj Vaajtswv? Qhov kws koj raug mob yuav tsi zoo, koj yuav tuag xwb.’ ”

⁷Vaajntxwv nug puab has tas, “Tug txivneej ntawd zoo le caag?”

⁸Puab teb has tas, “Nwg naav ib lub tsho luj kws yog muab tawv tsaj xaws, hab sa ib txuj hlaab tawv.” Vaajntxwv teb has tas, “Tug ntawm yog Eliyas ntaag!”

⁹Ces vaajntxwv txawm khaiv ib tug thawj tubrog coj tsib caug leej tubrog moog nteg Eliyas. Tug thawj tubrog moog pum Eliyas nyob quastsawg sau ib lub pov roob, nwg txawm has rua Eliyas has tas, “Vaajtswv tug tuabneeg, vaajntxwv kuas koj ca le nqeg lug.”

¹⁰Eliyas teb has tas, “Yog has tas kuv yog Vaajtswv tug tuabneeg tag, thov kuas suavtawg poob sau ntuj lug kub koj hab koj cov tubrog!” Taamsim ntawd suavtawg txawm poob sau ntuj lug kub tug thawj tubrog hab nwg cov tubrog tuag taag.

¹¹Vaajntxwv khaiv dlua ib tug thawj tubrog coj tsib caug leej tubrog moog nteg Eliyas, nwg has rua Eliyas has tas, “Vaajtswv tug tuabneeg, vaajntxwv kuas koj ca le nqeg lug taamsim nuav!”

¹²Eliyas teb has tas, “Yog has tas, kuv yog Vaajtswv tug tuabneeg tag, thov kuas suavtawg poob sau ntuj lug kub koj hab koj cov tubrog!” Taamsim ntawd suavtawg txawm poob sau ntuj lug kub tug thawj tubrog hab nwg cov tubrog tuag taag.

¹³Vaajntxwv rov khaiv dlua ib tug thawj tubrog coj tsib caug leej tubrog moog. Tug thawj tubrog ntawd nce moog rua sau lub pov roob hab txhus caug ndlua ntawm Eliyas xubndlag, thov has tas, “Vaajtswv tug tuabneeg, thov koj taabncuab kuv hab kuv cov tubrog! Thov koj tseg peb txujsa!

¹⁴Suavtawg tub poob sau ntuj lug kub ob tug thawj tubrog hab obtug cov tubrog kws tuaj ua ntej tuag taag lawm, tabsis thov koj tseg kuv txujsa!”

¹⁵Tug TSWV ib tug timtswv has rua Eliyas has tas, “Koj tsi xob ntshai, ca le nrug nwg moog.” Yog le ntawd, Eliyas txhaj nrug tug thawj tubrog ntawd moog cuag vaajntxwv.

¹⁶Eliyas has rua vaajntxwv has tas, “Tug TSWV has le nuav: ‘Vim koj khaiv tuabneeg moog cuag tug vaajtswv Npa-aas Xenpus kws nyob huv lub nroog Ekiloos, cuag le tsi muaj Vaajtswv nyob huv tebchaws Yixalayees rua koj nug, koj yuav tsi zoo; koj yuav tuag!’ ”

¹⁷Ahaxiyas txawm tuag lawv le tug TSWV tau has rua Eliyas. Ahaxiyas tsi muaj tub, yog le ntawd nwg tug kwv Yaulaas txhaj ua vaajntxwv hloov Ahaxiyas chaw, thaus ntawd Yehausafas tug tub Yehaulaas taabtom ua vaajntxwv kaav lub tebchaws Yudas tau ob xyoos.

¹⁸Dlua le lwm yaam kws vaajntxwv Ahaxiyas ua, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.