Read Hmong Njua 2 Vaajntxwv 10 Bible Online

2 Vaajntxwv 10 - Hmong Njua bible

2 Vaajntxwv 10

¹Vaajtswv Ahaj muaj xyaa caum leej tub xeebntxwv nyob huv lub nroog Xamalis. Yehus sau ib tsaab ntawv hab muab theej xaa moog rua cov numtswv, cov thawj kws coj cov pejxeem hab cov kws saib Ahaj cov tub xeebntxwv huv lub nroog. Cov lug huv tsaab ntawv has le nuav:

²“Mej cov kws saib Vaajntxwv cov tub xeebntxwv, mej muaj tej tsheb neeg, tej neeg, tej cuabyeej ua rog hab tej nroog kws muaj ntsaa yeej thaiv khov kho. Thaus mej tau txais tsaab ntawv nuav lawm,

³mej ca le xaiv vaajntxwv cov tub xeebntxwv ib tug kws tsimnyog tshaaj plawg, hab tsaa nwg ua vaajntxwv tiv thaiv nwg yawmkoob tsev tuabneeg.”

⁴Cov numtswv huv lub nroog Xamalis ntshai kawg le. Puab has tas, “Peb yuav ua le caag tua yeej Yehus?” Txawm yog Vaajntxwv Yaulaas hab Vaajntxwv Ahaxiyas los tub tua tsi yeej Yehus.

⁵Yog le ntawd, tug nom kws saib lub loog hab tug nom kws saib lub nroog, cov thawjcoj hab cov kws saib cov pejxeem txhaj xaa xuv moog has rua Yehus le nuav: “Peb yog koj cov tubkhai, peb ua lawv le koj has. Tabsis peb yuav tsi tsaa leejtwg ua vaajntxwv; thov koj ua lawv le koj pum zoo.”

⁶Yehus sau dlua ib tsaab ntawv moog has rua puab tas, “Yog mej tuaj kuv tog hab txaus sab ua lawv le kuv has, pigkig taav lub sijhawm nuav, mej nqaa kuas tau Vaajntxwv Ahaj cov tub xeebntxwv cov taubhau tuaj rua kuv huv lub nroog Yexelees nuav.” Cov numtswv kws saib cov pejxeem huv lub nroog Xamalis, yog cov kws tu hab cob qha Vaajntxwv Ahaj xyaa caum leej tub xeebntxwv ntawd.

⁷Thaus cov numtswv huv lub nroog Xamalis tau txais Yehus tsaab ntawv lawm, puab txawm muab Ahaj xyaa caum leej tub xeebntxwv txav cejdlaab hab muab cov taubhau ntim rua huv ib cov tawb xaa moog rua Yehus huv lub nroog Yexelees.

⁸Thaus muaj tuabneeg moog qha rua Yehus paub has tas, puab coj Ahaj cov tub xeebntxwv cov taubhau tuaj txug lawm, Yehus txawm has kuas puab coj moog tso ua ob pawg rua ntawm roojvaag nroog, ca nyob ntawd moog txug nub tom qaab thaus sawv ntxuv.

⁹Thaus sawv ntxuv, Yehus moog txug ntawm roojvaag, nwg has rua cov tuabneeg kws nyob ntawd tas, “Kuv yog tug kws ntxeev sab rua Vaajntxwv Yaulaas, hab muab nwg tua, mej tsi yog cov kws ris lub txim ntawd, tabsis leejtwg yog tug kws tua cov tuabneeg nuav?

¹⁰Qhov nuav ua qha rua peb paub has tas, txhua yaam kws tug TSWV has txug Ahaj cov tub xeebntxwv yeej muaj tseeb tag. Tug TSWV ua lawv le nwg tau has rua Eliyas kws yog nwg tug cev Vaajtswv lug lawm.”

¹¹Yehus lojxov tua Ahaj cov kwvtij, cov numtswv, cov phoojywg hab cov povthawj kws nyob huv lub nroog Yexelees tuag taag tsi seem ib tug le.

¹²Yehus tawm huv lub nroog Yexelees moog rua huv lub nroog Xamalis. Thaus nwg moog txug ntawm qhov chaw kws hu ua “Cov Yug Yaaj Lub Yeej”

¹³Nwg ntsib cov Yudas tug Vaajntxwv Ahaxiyas cov kwvtij, nwg nug puab has tas, “Mej yog leejtwg cov tuabneeg?” Puab teb has tas, “Peb yog Ahaxiyas cov kwvtij. Peb yuav moog hawm Vaajntxwv cov tub xeebntxwv hab nam vaajntxwv Yexenpees kws nyob huv lub nroog Yexelees.”

¹⁴Ces Yehus has rua nwg cov tubrog has tas, “Ca le nteg puab!” Cov tubrog txawm vij kag puab hab muab puab tua tuag taag ze rua ntawm lub qhov tshij Npethes Ekes. Puab cov ntawd muaj plaub caug ob leeg, puab puavleej raug tua tuag taag tsi seem ib tug le.

¹⁵Thaus Yehus sawv kev qhov ntawd moog, nwg txawm moog ntsib Yaunadas kws yog Lekhas tug tub. Yehus has rua Yaunadas has tas, “Koj hab kuv puas ua tau ib lub sab tag?” Yaunadas teb has tas, “Kuv ua tau.” Yehus has tas, “Wb tuav teg.” Obtug txawm sis tuav teg, hab Yehus nqug Yaunadas rua sau tsheb neeg,

¹⁶hab has tas, “Nrug kuv moog, koj txhaj le pum has tas, kuv yeej muab sab npuab tug TSWV tag.” Ces obtug txawm caij tsheb neeg moog rua huv lub nroog Xamalis.

¹⁷Thaus obtug moog txug huv lub nroog, Yehus txawm muab Ahaj cov kwvtij tua tuag taag tsi tseg ib tug le. Tej xwm nuav muaj lawv le tug TSWV tau has tseg rua Eliyas lawm.

¹⁸Yehus hu taagnrho cov tuabneeg kws nyob huv lub nroog Xamalis tuaj ua ke hab has rua puab tas, “Vaajntxwv Ahaj tsuas pe Npa-aas mivntsiv xwb, tabsis kuv yuav pe Npa-aas heev dlua ntawd hab.

¹⁹Yehus hu cov cev Npa-aas lug, cov coj Npa-aas kevcai hab cov povthawj kws teev Npaa-aas taagnrho tuaj sis sau ua ke. Txhua tug yuavtsum tuaj tsi zaam rua leejtwg le; rua qhov kuv yuav fij khoom ntau heev rua Npa-aas. Yog leejtwg tsi tuaj, kuv yuav muab tug ntawd tua povtseg!” (Qhov kws Yehus ua le ntawd yog nwg xaav ntxag kuas cov tuabneeg kws pe Npa-aas tuaj hab muab puab tua povtseg huv tuabsi.)

²⁰Yehus has tas, “Ca le teem ib nub rua suavdlawg tuaj pe Npa-aas.” Ces puab txawm tshaajtawm rua suavdlawg,

²¹hab Yehus xaa xuv moog thoob plawg lub tebchaws Yixalayees. Txhua tug kws pe Npa-aas puavleej tuaj taagnrho tsi seem ib tug le. Puab suavdlawg moog rua huv lub tsev teev Npa-aas, puv nkaus saab tim nuav rua saab tim u.

²²Yehus has rua tug povthawj kws saib cov tsho ntev, kuas muab cov tsho lug rua cov tuabneeg kws pe Npa-aas naav.

²³Tom qaab ntawd, Yehus nrug Lekhas tug tub Yaunadas moog rua huv lub tsev teev Npa-aas hab has rua cov tuabneeg kws tuaj nyob huv has tas, “Tsuas yog pub cov tuabneeg kws pe Npa-aas tuaj nyob huv nuav xwb, tsi pub cov kws pehawm tug TSWV tuaj rua huv nuav le.”

²⁴Yehus hab Yaunadas txawm moog hlawv khoom fij rua Npa-aas. Yehus tub npaaj tau yim caum leej tubrog nyob saab nrau zoov lub tsev teev Npa-aas tog hab has rua puab tas, “Mej yuavtsum muab cov tuabneeg nuav tua kuas tuag taag huv tuabsi; yog mej leejtwg ca puab cov ntawd ib tug dlim, mas yuav muab nwg tua theej tug kws dlim lawm chaw!”

²⁵Thaus Yehus muab khoom hlawv fij taagnrho, nwg txawm has rua cov faajxwm hab cov tubrog has tas, “Mej ca le moog rua huv hab muab puab tua huv tuabsi! Tsi pub ib tug dlim le!” Ces cov tubrog txawm rhu ntaaj hab moog muab cov tuabneeg ntawd tua tuag taag rua huv tsev, hab muab hai moog pov rua saab nrau. Ces puab txawm moog rua chaav huv plawv lub tsev teev Npa-aas.

²⁶hab muab tej ncej zeb Npa-aas nqaa tawm rua saab nrau hab muab hlawv.

²⁷Puab muab tej ncej zeb Npa-aas hab lub tsev teev Npa-aas rhuav puamtsuaj taag, ua chaw rua tuabneeg moog tawm rooj lug txug naj nub nua.

²⁸Yehus ua le ntawd txhaj tshem tau cov tuabneeg kws pe Npa-aas huv lub tebchaws Yixalayees tawm moog.

²⁹Tabsis Yehus tseem ua txhum ib yaam le Vaajntxwv Yelaunpau-aas kws yog Nenpas tug tub ua hab. Nwg coj cov Yixalayees moog pe ob tug mlom mivnyuas nyuj kws Yelaunpau-aas muab kub nchuav ua rua huv lub nroog Npethees hab huv lub nroog Daas.

³⁰Tug TSWV has rua Yehus has tas, “Koj tau ua rua Ahaj cov tub xeebntxwv lawv le kuv kuas koj ua lawm. Yog le ntawd kuv coglug rua koj has tas, koj cov xeebntxwv yuav tau ua vaajntxwv kaav tebchaws Yixalayees moog txug plaub tam.”

³¹Tabsis Yehus tsi ua lawv tug TSWV kws yog cov Yixalayees tug Vaajtswv txuj kevcai kuas kawg sab kawg ntsws; nwg ua ib yaam le Yelaunpau-aas ua, nwg txhaj coj cov Yixalayees moog ua txhum.

³²Txij thaus ntawd lug, tug TSWV txawm ua rua cov Yixalayees lub tebchaws nqaim zuj zug. Vaajntxwv Haxayees kws kaav tebchaws Xilias tuaj txeeb tau cov Yixalayees lub tebchaws taagnrho,

³³txij ndlua ntawm tug Dlej Yauladees saab nubtuaj moog rua saab qaabteb, ti nkaus rua ntawm lub nroog Alu-es ntawm tug Dlej Alenoos, losloov cheebtsaam Nkile-as hab Npasaas kws xeem Khas, xeem Lunpees hab xeem Manaxes saab Nubtuaj nyob huv tuabsi.

³⁴Dlua le lwm yaam kws Yehus ua, hab tej kws nwg muaj peevxwm ua tau, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

³⁵Yehus tuag hab luas muab nwg log rua huv lub nroog Xamalis, hab nwg tug tub Yehau-ahas ua vaajntxwv hloov nwg chaw.

³⁶Yehus ua vaajntxwv kaav tebchaws Yixalayees, hab nwg nyob huv lub nroog Xamalis kaav tau neeg nkaum yim xyoos.