Read Hmong Njua 2 Vaajntxwv 11 Bible Online

2 Vaajntxwv 11 - Hmong Njua bible

2 Vaajntxwv 11

¹Thaus Athaliyas nov has tas, nwg tug tub kws yog Vaajntxwv Ahaxiyas raug tua tuag lawm. Nwg txawm saamfwm kuas luas muab Vaajntxwv Ahaxiyas tsev tuabneeg tua kuas tuag taag huv tuabsi.

²Tsuas yog Ahaxiyas tug tub Yau-as txhaj tsiv dlim xwb. Yau-as los tub yuav laug raug tua tuag nrug lwm tug, tabsis muaj nwg tug pujnyaaj Yehausenpas kws yog Vaajntxwv Yehaulaas tug ntxhais hab yog Ahaxiyas tug muam coj Yau-as hab tug ntxhais qhev kws tu Yau-as moog zais rua ib chaav huv lub Tuamtsev, kuas Athaliyas tsi xob pum nwg, yog le ntawd, Yau-as txhaj tsi raug tua.

³Yehausenpas tu hab zais Yau-as huv lub Tuamtsev tau rau lub xyoos thaus kws Athaliyas ua puj vaajntxwv kaav tebchaws ntawd.

⁴Tabsis xyoo xyaa, tug povthawj Yehauyadas txhaj xaa xuv moog rua tug thawj tubrog kws saib cov tubrog kws nrug nraim vaajntxwv hab cov zuv lub loog tuaj rua huv lub Tuamtsev, nwg kuas puab coglug hab ua lawv le nwg has. Nwg qha Vaajntxwv Ahaxiyas tug tub Yau-as rua puab

⁵hab kuas puab ua le nuav: “Nub Xanpataus mej tuaj ua num, mej cov tuabneeg ib feem peb zuv lub loog;

⁶ib feem peb zuv ntawm lub roojvaag Xules, hab dlua le ib feem peb zuv ntawm lub roojvaag kws nyob tom qaab paab ntawd.

⁷Ob paab kws tsi ua num nub Xanpataus, yuavtsum tuaj nyob huv lub Tuamtsev zuv vaajntxwv.

⁸Mej yuavtsum tuav rawv ntaaj ntawm teg zuv Vaajntxwv Yau-as hab nrug nraim nwg txhua qhov kws nwg moog. Yog leejtwg txaav lug ze, mej ca le muab tug ntawd tua povtseg.”

⁹Tug thawj tubrog ua lawv le Yehauyadas has hab hu cov tubrog lug cuag nwg, tsi has cov kws ua num nub Xanpataus hab cov kws tsi ua.

¹⁰Yehauyadas muab Vaajntxwv Daviv cov muv hab cov thaiv nav ntaaj kws muab khaws ca rua huv lub Tuamtsev rua tug thawj tubrog,

¹¹hab tug thawj tubrog txawm kuas cov tubrog tuav rawv ntaaj moog sawv thoob plawg ntawm hauv ntej lub Tuamtsev tiv thaiv vaajntxwv.

¹²Ces Yehauyadas txawm coj Yau-as tawm lug, muab lub mom kub rua nwg ntoo hab muab Vaajtswv phoo kevcai cob rua Yau-as; puab muab roj laub rua Yau-as taubhau tsaa nwg ua vaajntxwv; puab suavdlawg npuaj teg hab qw has tas, “Thov kuas Vaajntxwv muaj sa nyob ntev!”

¹³Puj Vaajntxwv Athaliyas nov cov tubrog hab cov pejxeem qw, ces nwg txawm dlha ceev nrooj tuaj rua ntawm lub Tuamtsev kws suavdlawg tuaj sis sau.

¹⁴Puj vaajntxwv pum tug vaajntxwv kws puab tsaa sawv ntawm lub Tuamtsev tug ncej qhovrooj lawv le kevcai tsaa vaajntxwv. Cov numtswv, cov tshuab raaj tshuab xyu hab cov pejxeem sawv ncig vaajntxwv, puab qw hab tshuab raaj tshuab xyu zoo sab kawg le. Athaliyas nyuaj sab heev, nwg dlua rhe nwg cev khaub dluag hab qw has tas, “Ntxeev sab! Ntxeev sab!”

¹⁵Yehauyadas tsi xaav kuas luas tua Athaliyas rua ntawm lub Tuamtsev, nwg txhaj has rua cov thawj tubrog has tas: “Coj Athaliyas tawm lawv kis nruab nraab ntawm ob paab tubrog nuav moog, yog leejtwg lug paab nwg, ces mej ca le muab tug ntawd tua.”

¹⁶Cov tubrog txawm nteg Athaliyas hab coj nwg moog rua ntawm lub Roojvaag Neeg kws yuav moog rua huv lub loog, hab puab muab nwg tua rua ntawd.

¹⁷Tug povthawj Yehauyadas kuas Vaajntxwv Yau-as hab cov pejxeem suavdlawg coglug rua tug TSWV has tas, puab yuav ua tug TSWV tsaav tuabneeg; hab nwg kuas Vaajntxwv hab cov pejxeem sis coglug ib yaam nkaus.

¹⁸Ces cov tuabneeg txawm moog rua tom lub tsev teev Npa-aas hab muab lub tsev rhuav puamtsuaj taag; puab muab tej thaaj hab tej mlom tsoo tawg taag, hab muab tug povthawj Matas kws teev Npa-aas tua rua ntawm hauv ntej cov thaaj. Yehauyadas tso ib paab tubrog zuv ntawm lub Tuamtsev,

¹⁹ces Yehauyadas, cov numtswv, cov tubrog kws nrug nraim vaajntxwv hab cov tubrog kws zuv lub loog, txawm coj vaajntxwv tawm huv lub Tuamtsev moog rua huv lub loog, hab cov pejxeem suavdlawg lawv nwg qaab. Yau-as moog ntawm lub Roojvaag Faajxwm moog rua huv lub loog hab moog nyob sau lub zwmtxwv.

²⁰Cov pejxeem suavdlawg zoo sab kawg nkaus, hab lub nroog nyob ntsag tu, rua qhov tub muab Athaliyas tua tuag rua ntawm lub loog lawm.

²¹Yau-as ua vaajntxwv kaav tebchaws Yudas thaus nwg noobnyoog muaj xyaa xyoo.