Read Hmong Njua 2 Vaajntxwv 12 Bible Online

2 Vaajntxwv 12 - Hmong Njua bible

2 Vaajntxwv 12

¹Thaus Yehus ua vaajntxwv kaav lub tebchaws Yixalayees tau xyaa xyoo lawm, Yau-as maam le ua vaajntxwv kaav lub tebchaws Yudas, hab nwg nyob huv lub nroog Yeluxalees kaav tau plaub caug xyoo. Nwg nam hu ua Xinpiyas kws nyob huv lub nroog Npesenpas.

²Yau-as ua lawv le tug TSWV lub sab nyam moog taag nwg lub neej, rua qhov yog tug povthawj Yehauyadas cob qha nwg.

³Txawm le ntawd los nwg tsi muab tej chaw teev dlaab rhuav povtseg. Cov tuabneeg txhaj pheej moog tua tsaj fij hab hlawv moov tshuaj tsw qaab rua ntawm tej chaw ntawd.

⁴Yau-as has rua cov povthawj has tas, “Mej ca le khaws tej nyaj kws cov pejxeem coj tuaj fij rua huv lub Tuamtsev, tsi has cov nyaj kws puab coj tuaj fij theej txhoj lawv le kevcai hab cov nyaj kws puab muaj lub sab dlawb paug coj tuaj fij.

⁵Txhua tug povthawj, yuav tau khaws tej nyaj kws cov tuabneeg kws nwg ua num rua coj tuaj fij, hab muab tej nyaj ntawd siv khu lub Tuamtsev tej qhov kws puag lawm.”

⁶Yau-as tub ua vaajntxwv kaav tebchaws tau neeg nkaum peb xyoos lawm, tabsis cov povthawj tseem tsi tau khu lub Tuamtsev le.

⁷Yog le ntawd, nwg txhaj hu tug povthawj Yehauyadas hab cov povthawj tuaj cuag nwg. Nwg has rua puab tas, “Vim le caag mej tseem tsi tau khu lub Tuamtsev le? Txij nub nua moog mej tsi xob muab tej nyaj kws cov tuabneeg coj tuaj fij khaws ca lawm; tabsis ca le muab cov nyaj ntawd rua lwm tug coj moog khu lub Tuamtsev kuas tav!”

⁸Cov povthawj txhaj pum zoo ua lawv le Yau-as has, hab pum zoo has tas ca puab tsi xob ua cov khu lub Tuamtsev.

⁹Tug povthawj Yehauyadas muab ib lub thawv tho qhov sau lub hau, hab coj moog txawb rua ntawm lub thaaj saab xis, ntawm lub qhovrooj kws moog rua huv lub Tuamtsev. Cov povthawj kws ua num ntawm qhovrooj muab tej nyaj kws cov tuabneeg tuaj pehawm Vaajtswv coj tuaj fij tso rua huv lub thawv ntawd.

¹⁰Thaus cov nyaj puv lub thawv lawm, vaajntxwv tug teev ntawv hab tug Povthawj Hlub tuaj muab cov nyaj ntawd suav hab muab ntim rua huv naab.

¹¹Thaus obtug suav tej nyaj ntawd taag, obtug muab teev tseg, hab muab cob rua tug thawj kws saib cov khu lub Tuamtsev coj moog them rua cov txua ntoo, cov ua tsev,

¹²cov txhim phaab ntsaa, cov txaug pobzeb, coj moog yuav ntoo, yuav pobzeb, hab muab yuav tej yaam kws cheemtsum siv.

¹³Txawm le ntawd los puab tsi muab tej nyaj ntawd them rua cov kws nchuav khob, taig, raaj xyu, tej cuabyeej siv rua tej teeb lossis lwm yaam kws muab nyaj muab kub ua.

¹⁴Cov nyaj ntawd muab them rua cov kws khu lub Tuamtsev hab yuav tej khoom kws khu lub Tuamtsev xwb.

¹⁵Cov kws Yehauyadas hab vaajntxwv tug teev ntawv muab nyaj rua coj moog them cov tuabneeg ua num, puab ua ncaaj heev. Yog le ntawd obtug txhaj tsi kuas puab muab tej ntawv teev nyaj lug.

¹⁶Tej nyaj kws cov tuabneeg coj tuaj fij theej txhoj hab coj tuaj fij dlaws txim, tsi xob muab tso rua huv lub thawv, rua qhov cov nyaj ntawd yog cov povthawj tug.

¹⁷Thaus lub sijhawm ntawd Vaajntxwv Haxayees kws kaav tebchaws Xilias tuaj tua hab txeeb tau lub nroog Nkathas, hab nwg moog tua lub nroog Yeluxalees.

¹⁸Vaajntxwv Yau-as kws kaav tebchaws Yudas, muab taagnrho tej khoom fij kws nwg yawmkoob Yehausafas, Yehaulaas hab nwg txiv Ahaxiyas muab fij rua tug TSWV lawm, ntxiv rua nwg tej khoom hab tej nyaj tej kub huv lub Tuamtsev hab huv lub loog coj moog pub rua Vaajntxwv Haxayees, Haxayees txhaj thim nwg cov tubrog rov qaab tsi tua lub nroog Yeluxalees lawm.

¹⁹Dlua le lwm yaam kws Vaajntxwv Yau-as ua, puavleej muab sau ca rua huv phoo ntawv keebkwm kws teev cov Yudas tej vaajntxwv lub neej lawm.

²⁰Vaajntxwv Yau-as ob tug numtswv kws yog Sime-as tug tub Yauxakas hab Saumes tug tub Yehauxanpas ntxeev sab rua Yau-as hab muab nwg tua rua huv lub tsev Milus ntawm lub nroog Yeluxalees saab nubtuaj kws yog txujkev moog rua nraag lub nroog Xilas. Luas coj Yau-as moog log rua ntawm cov vaajntxwv lub toj ntxaas huv Daviv lub nroog, hab nwg tug tub Amaxiyas ua vaajntxwv hloov nwg chaw.