Read Hmong Njua 2 Vaajntxwv 13 Bible Online

2 Vaajntxwv 13 - Hmong Njua bible

2 Vaajntxwv 13

¹Thaus Ahaxiyas tug tub Yau-as ua vaajntxwv kaav lub tebchaws Yudas tau neeg nkaum peb xyoos lawm, Yehus tug tub Yehau-ahas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau kaum xyaa xyoo.

²Yehau-ahas ua txhum rua tug TSWV ib yaam le Vaajntxwv Yelaunpau-aas kws yog Nenpas tug tub ua, nwg tau coj cov Yixalayees moog ua txhum.

³Yog le ntawd tug TSWV txhaj chim heev rua cov Yixalayees, hab ca Vaajntxwv Haxayees kws kaav tebchaws Xilias hab nwg tug tub Npeehadas tuaj tua yeej cov Yixalayees hab tswjfwm cov Yixalayees tau ntev loo.

⁴Ces Yehau-ahas txhaj thov tug TSWV, tug TSWV txaus sab hab teb nwg tej lug thov, vim tug TSWV pum has tas, tug vaajntxwv kws kaav tebchaws Xilias tau tsimtxom cov Yixalayees heev.

⁵Tug TSWV pub cov Yixalayees muaj ib tug thawjcoj lug tso kuas puab dlim ntawm cov Xilias, yog le ntawd cov Yixalayees txhaj tau rov moog nyob huv puab tej vaaj tse kaaj sab lug ib yaam le yaav taag lug.

⁶Tabsis puab tseem pheej ua tej kev txhum kws Vaajntxwv Yelaunpau-aas tsev tuabneeg coj cov Yixalayees moog ua tsi tso tseg le; hab tug mlom Aselas tseem nyob huv lub nroog Xamalis.

⁷Yehau-ahas cov tubrog tsuas tshuav tsib caug leej tubrog caij neeg, kaum lub tsheb neeg, hab kaum txheeb leej tubrog moog kutaw lawm xwb, rua qhov tug vaajntxwv kws kaav tebchaws Xilias tuaj muab ibtxha tua tuag taag, hab puab muab tsuj ib yaam le tsuj tej moov aav.

⁸Dlua le lwm yaam kws Yehau-ahas ua hab tej kws nwg muaj peevxwm ua tau puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

⁹Yehau-ahas tuag hab luas coj nwg moog log rua huv lub nroog Xamalis, hab nwg tug tub Yehau-as ua vaajntxwv hloov nwg chaw.

¹⁰Thaus Yau-as ua vaajntxwv kaav tebchaws Yudas tau peb caug xyaa xyoo lawm, Yehau-ahas tug tub Yehau-as maam le ua vaajntxwv kaav tebchaws Yixalayees, hab nwg nyob huv lub nroog Xamalis kaav tau kaum rau xyoo.

¹¹Yehau-as los ua txhum rua tug TSWV ib yaam le Yelaunpau-aas kws yog Nenpas tug tub ua, nwg tau coj cov Yixalayees moog ua txhum.

¹²Dlua le lwm yaam kws Yehau-as ua, hab taagnrho tej kws nwg muaj peevxwm ua rog rua Vaajntxwv Amaxiyas kws kaav tebchaws Yudas, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

¹³Yehau-as tuag hab luas muab nwg coj moog log rua ntawm cov vaajntxwv lub toj ntxaas huv lub nroog Xamalis, hab nwg tug tub Yelaunpau-aas ua vaajntxwv hloov nwg chaw.

¹⁴Thaus Elisas kws yog tug cev Vaajtswv lug mob yuav tuag, Vaajntxwv Yehau-as kws kaav tebchaws Yixalayees tuaj saib Elisas. Yehau-as quaj has tas, “Kuv txiv! Kuv txiv! Koj yog cov Yixalayees tug Cawmseej kws luj kawg nkaus!”

¹⁵Elisas has rua Yehau-as has tas, “Koj ca le moog nqaa ib raab neevnti hab ib cov xub tuaj.” Yehau-as txawm moog nqaa tuaj,

¹⁶hab Elisas has rua Yehau-as kuas muab xub nruab rua raab neevnti hab nqug tua. vaajntxwv txawm ua le ntawd, hab Elisas muab nwg txhais teg tso rua sau vaajntxwv txhais teg.

¹⁷Elisas kuas vaajntxwv qheb lub qhovrais kws tig moog rua peg tebchaws Xilias hab Elisas has tas, “Ca le tua raab neevnti moog rua tebchaws Xilias!” Thaus kws vaajntxwv tua raab neevnti lawm, Elisas has rua vaajntxwv has tas, “Koj yog xibxub kws tug TSWV yuav siv moog tua kuas yeej lub tebchaws Xilias. Koj yuav moog tua cov Xilias peg lub nroog Afes moog txug nub kws koj yeej puab lawm.”

¹⁸Elisas has kuas vaajntxwv muab dlua ib cov xub lug nplawm huv aav. Vaajntxwv txawm muab cov xub nplawm peb nplawg rua huv aav, hab tso plhuav tseg.

¹⁹Elisas npautawg heev, nwg txhaj has rua vaajntxwv has tas, “Tsimnyog koj nplawm tsib rau nplawm rua huv aav, koj txhaj yuav yeej hlo cov Xilias, tabsis koj tsuas nplawm peb nplawg xwb, yog le ntawd, koj yuav moog tua yeej cov Xilias peb zag xwb.”

²⁰Elisas tuag hab luas coj nwg moog log. Txij thaus ntawd lug, cov Mau-am ib paab rog tubsaab pheej naj xyoo tuaj tua lub tebchaws Yixalayees.

²¹Muaj ib zag cov Yixalayees taabtom kwv ib tug tuag moog log. Thaus puab pum cov Mau-am paab rog tubsaab ntawd tuaj, puab txawm muab tug tuag pov rhees rua huv Elisas lub qhov ntxaa, hab puab nyag taug nyag tsiv lawm. Thaus tug tuag poob moog raug Elisas cov pobtxhaa, ces tug tuag txawm rov caj sa tuaj hab sawv tseeg nreg nreeg.

²²Ntu kws Vaajntxwv Yehau-as kaav lub tebchaws Yixalayees, tug Vaajntxwv Haxayees kws kaav lub tebchaws Xilias tsimtxom cov Yixalayees kawg le,

²³tabsis tug TSWV hlub hab taabncuab cov Yixalayees heev. Nwg tsi xaav kuas puab raug kev puamtsuaj, nwg txhaj paab puab, rua qhov nwg tau coglug tseg rua Anplahaas, Ixaj hab Yakhauj lawm. Tug TSWV tseem ncu ntsoov nwg tsaav tuabneeg tsi tso puab tseg le.

²⁴Thaus Vaajntxwv Haxayees kws kaav tebchaws Xilias tuag lawm, nwg tug tub Npeehadas ua vaajntxwv hloov nwg chaw.

²⁵Vaajntxwv Yehau-as kws kaav lub tebchaws Yixalayees txhaj moog tua yeej Npeehadas peb zag, hab rov moog txeeb tau tej nroog kws Npeehadas txeeb tau thaus kws Yehau-as txiv tseem ua vaajntxwv kaav lub tebchaws Yixalayees ntawd rov qaab lug huv tuabsi lawm.