Read Hmong Njua 2 Vaajntxwv 14 Bible Online

2 Vaajntxwv 14 - Hmong Njua bible

2 Vaajntxwv 14

¹Thaus Yehau-ahas tug tub Yehau-as ua vaajntxwv kaav lub tebchaws Yixalayees tau ob xyoos lawm, Yau-as tug tub Amaxiyas maam le ua vaajntxwv kaav lub tebchaws Yudas

²thaus nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau neeg nkaum cuaj xyoos. Nwg nam hu ua Yehau-adees kws nyob huv lub nroog Yeluxalees.

³Amaxiyas ua lub neej lawv le tug TSWV sab nyam, nwg tsi ua le nwg yawmkoob kws yog Vaajntxwv Daviv ua, tabsis nwg ua le nwg txiv Yau-as ua.

⁴Nwg tsi muab tej chaw teev dlaab rhuav povtseg, cov tuabneeg txhaj pheej moog tua tsaj fij hab hlawv moov tshuaj tsw qaab rua ntawm tej chaw teev dlaab ntawd.

⁵Thaus Amaxiyas kaav lub tebchaws nyob ruaj lawm, nwg muab ob tug nom kws tua nwg txiv kws yog Vaajntxwv Yau-as tua povtseg.

⁶Txawm le ntawd los nwg tsi tua obtug cov mivnyuas, nwg ua le ntawd txhaj lawv le tug TSWV tej lug saamfwm rua huv phoo ntawv kevcai kws Mauxes sau tseg has tas, “Tsi xob muab nam txiv tua vim mivnyuas tej kev txhum, hab tsi xob muab tej mivnyuas tua vim nam txiv tej kev txhum; tug twg ua txhum tsuas tua tug ntawd xwb.”

⁷Amaxiyas tua cov tubrog Edoos tuag kaum txheeb leej rua huv lub Haav Ntsev; nwg moog tua hab txeeb tau lub nroog Xelas hab muab lub nroog ntawd tis dlua npe hu ua Yauthees, luas tseem hu lub npe ntawd lug txug naj nub nua.

⁸Amaxiyas txawm tso tuabneeg moog has kuas Vaajntxwv Yehau-as kws kaav lub tebchaws Yixalayees tuaj nrug nwg sis tua.

⁹Tabsis Vaajntxwv Yehau-as tso tuabneeg moog has rua Amaxiyas has tas, “Muaj ib zag ib tsob ntoo xuavpaug kws nyob peg Roob Lenpanoos tso xuv tuaj rua tsob ntoo cab has tas, ‘Muab koj tug ntxhais rua kuv tug tub yuav ua quaspuj.’ Tabsis txawm muaj ib tug tsaj qus lug muab tsob ntoo xuavpaug ntawd tsuj kag rua huv aav lawm.

¹⁰Amaxiyas, nwgnuav koj khaavtheeb qhov kws koj tua yeej cov Edoos ua rua koj nto npe, koj ca le txaus sab hab nyob tuabywv huv tsev. Vim le caag koj yuav nrhav teebmeem rua koj hab koj cov pejxeem kuas puamtsuaj?”

¹¹Tabsis Amaxiyas tsi noog Vaajntxwv Yehau-as tej lug le, Yehau-as txhaj coj nwg cov tubrog tuaj tua Amaxiyas ntawm lub nroog Npethes Semes huv tebchaws Yudas.

¹²Amaxiyas cov tubrog swb hab tsiv taag rov qaab moog tsev lawm.

¹³Yehau-as nteg tau Amaxiyas, hab Yehau-as ncaaj nraim moog tua lub nroog Yeluxalees, puab tsoo lub nroog tug ntsaa yeej ntawm lub Roojvaag Efalayees moog ti nkaus rua lub Roojvaag Ceg kaum ntev le ib puas dlaaj pob taag.

¹⁴Yehau-as coj tej nyaj hab tej kub, tej cuabyeej huv lub Tuamtsev hab txhua yaam muaj nqes huv lub loog kws nwg tshawb tau nrug cov tuabneeg kws nwg nteg tau moog rua peg lub nroog Xamalis lawm. Yehau-as tseem coj cov tuabneeg kws nwg nteg tau nrug nwg moog hab.

¹⁵Dlua le lwm yaam kws Yehau-as ua hab taagnrho tej kws nwg muaj peevxwm tua yeej tug Vaajntxwv Amaxiyas kws kaav lub tebchaws Yudas, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

¹⁶Yehau-as tuag hab luas coj nwg moog log rua ntawm cov vaajntxwv lub toj ntxaas huv lub nroog Xamalis, hab nwg tug tub Yelaunpau-aas ua vaajntxwv hloov nwg chaw.

¹⁷Thaus Vaajntxwv Yehau-as kws kaav lub tebchaws Yixalayees tuag lawm, Vaajntxwv Amaxiyas kws kaav lub tebchaws Yudas tseem ua neej nyob tau kaum tsib xyoos ntxiv nwg maam le tuag.

¹⁸Dlua le lwm yaam kws Amaxiyas ua puavleej muab sau ca rua huv phoo ntawv keebkwm kws teev cov Yudas tej vaajntxwv lub neej lawm.

¹⁹Muaj ib paab tuabneeg nyob huv lub nroog Yeluxalees ntxeev sab yuav muab Amaxiyas tua povtseg, nwg txhaj tsiv moog rua huv lub nroog Lakhis, tabsis nwg cov yeebncuab caum qaab moog muab nwg tua tuag rua huv lub nroog ntawd lawm.

²⁰Luas txhaj muab neeg thauj nwg rov lug rua huv Yeluxalees hab muab nwg log rua ntawm cov vaajntxwv lub toj ntxaas huv Daviv lub nroog.

²¹Ces cov Yudas txhaj muab lub mom kub rua Amaxiyas tug tub Uxiyas kws noobnyoog muaj kaum rau xyoo ntoo, hab tsaa nwg ua vaajntxwv hloov nwg txiv chaw.

²²Uxiyas moog txeeb tau lub nroog Elas hab rov txhim khu lub nroog ntawd dlua tshab, tom qaab kws nwg txiv Amaxiyas tuag lawm.

²³Thaus Yau-as tug tub Amaxiyas ua vaajntxwv kaav lub tebchaws Yudas tau kaum tsib xyoos lawm, Yehau-as tug tub Yelaunpau-aas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau plaub caug ib xyoos.

²⁴Yelaunpau-aas ua txhum rua tug TSWV hab ua phem ua qas ib yaam le nwg yawmkoob Yelaunpau-aas kws yog Nenpas tug tub kws coj cov Yixalayees moog ua txhum.

²⁵Yelaunpau-aas rov moog txeeb tau cov Yixalayees cheebtsaam aav, txij ndlua ntawm lub Dlawm Hamas kws nyob saab qaumteb moog txug ndlua nraag Havtxwv Tuag kws nyob saab qaabteb lawv le tug TSWV kws yog cov Yixalyees tug Vaajtswv tau has rua nwg tug tubkhai Yaunas kws yog tug cev Vaajtswv lug hab yog Amitais tug tub kws nyob huv lub nroog Nkathas Hefeles lawm.

²⁶Tug TSWV pum cov Yixalayees raug kev txomnyem heev; tsi muaj tug paab puab le.

²⁷Tug TSWV tsi xaav kuas cov Yixalayees puamtsuaj huv lub qaab ntuj nuav moog, yog le ntawd, nwg txhaj khaiv Vaajntxwv Yelaunpau-aas kws yog Yau-as tug tub ua tug cawm cov Yixalayees kuas dlim.

²⁸Dlua le lwm yaam kws Yelaunpau-aas ua, tej kws nwg muaj peevxwm tua rog, hab txeeb tau lub nroog Damaxes hab lub nroog Hamas rov rua cov Yixalayees, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²⁹Yelaunpau-aas tuag hab luas coj nwg moog log rua ntawm cov vaajntxwv lub toj ntxaas, hab nwg tug tub Xakhaliyas ua vaajntxwv hloov nwg chaw.