Read Hmong Njua 2 Vaajntxwv 15 Bible Online

2 Vaajntxwv 15 - Hmong Njua bible

2 Vaajntxwv 15

¹Thaus Yelaunpau-aas ua vaajntxwv kaav lub tebchaws Yixalayees tau neeg nkaum xyaa xyoo lawm, Amaxiyas tug tub Uxiyas maam le ua vaajntxwv kaav lub tebchaws Yudas

²thaus nwg noobnyoog muaj kaum rau xyoo, hab nwg nyob huv lub nroog Yeluxalees kaav tau tsib caug ob xyoos, nwg nam hu ua Yekauliyas kws nyob huv lub nroog Yeluxalees.

³Uxiyas ua lub neej lawv le tug TSWV lub sab nyam, ib yaam le nwg txiv Amaxiyas.

⁴Tabsis nwg tsi muab tej chaw teev dlaab rhuav povtseg, tej tuabneeg txhaj pheej moog tua tsaj fij hab hlawv moov tshuaj tsw qaab rua ntawm tej chaw teev dlaab ntawd.

⁵Tug TSWV ua rua Uxiyas mob ruas moog taag nwg simneej le. Nwg nyob nwg ib lub tsev rua ib qho, nwg tso txhua yaam num tseg hab nwg tug tub Yauthaas ua tug tswjfwm lub tebchaws.

⁶Dlua le lwm yaam kws Uxiyas ua, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

⁷Uxiyas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog, hab nwg tug tub Yauthaas ua vaajntxwv hloov nwg chaw.

⁸Thaus Uxiyas ua vaajntxwv kaav lub tebchaws Yudas tau peb caug yim xyoo lawm, Yelaunpau-aas tug tub Xakhaliyas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau rau hlis.

⁹Xakhaliyas ua txhum rua tug TSWV ib yaam le nwg cov yawmkoob. Nwg ua phem ua qas ib yaam le Vaajntxwv Yelaunpau-aas kws yog Nenpas tug tub kws coj cov Yixalayees moog ua txhum.

¹⁰Yanpes tug tub Salumes txhaj ntxeev sab rua Vaajntxwv Xakhaliyas hab muab nwg tua tuag rua huv lub nroog Inpele-as, hab Salumes txawm ua vaajntxwv hloov Xakhaliyas chaw.

¹¹Dlua le lwm yaam kws Xakhaliyas ua, puavleej muab sau ca rua huv phoo ntawv keebkwm kws teev cov Yixalyees tej vaajntxwv lub neej lawm.

¹²Ua le ntawd, txhaj tav lawv le tug TSWV tau has rua Vaajntxwv Yehus lawm has tas: “Koj cov xeebntxwv yuav tau ua vaajntxwv kaav lub tebchaws Yixalayees moog txug plaub tam.”

¹³Thaus Uxiyas ua vaajntxwv kaav lub tebchaws Yudas tau peb caug cuaj xyoos lawm, Yanpes tug tub Salumes maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau ib hlis.

¹⁴Nkadis tug tub Menahees tuaj nraag lub nroog Tilexas tuaj rua huv lub nroog Xamalis hab muab Salumes tua, hab nwg ua vaajntxwv hloov Salumes chaw.

¹⁵Dlua le lwm yaam kws Salumes ua, hab qhov kws nwg ntxeev sab ua phem, puavleej muab sau ca rua huv phoo ntawv keebkwm kws teev cov Yixalyees tej vaajntxwv lub neej lawm.

¹⁶Thaus Menahees tuaj huv lub nroog Tilexas tuaj, nwg tua cov tuabneeg huv lub nroog Tapuas hab cov tuabneeg kws nyob cheebtsaam ibncig lub nroog ntawd puamtsuaj taag, rua qhov cov tuabneeg huv lub nroog tsi kaam zwm rua nwg. Nwg tseem muab cov quaspuj kws taabtom suab mivnyuas phais plaab huv tuabsi.

¹⁷Thaus Uxiyas ua vaajntxwv kaav lub tebchaws Yudas tau peb caug cuaj xyoos lawm, Nkadis tug tub Menahees maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau kaum xyoo.

¹⁸Manahees ua txhum rua tug TSWV, nwg ua phem ua qas ib yaam le Vaajntxwv Yelaunpau-aas kws yog Nenpas tug tub kws coj cov Yixalayees moog ua txhum taag nwg simneej.

¹⁹Tilas Pilexes kws yog tug vaajntxwv kaav lub tebchaws Axilias tau tuaj tua cov Yixalayees, Menahees muab tau peb caug yim taas nyaj rua Tilas Pilexes, thov nwg paab Menahees kuas muaj cuabkaav tswj tau lub tebchaws nyob ruaj khov.

²⁰Menahees tau tej nyaj ntawd lug ntawm cov Yixalayees kws npluanuj, nwg yuam kuas puab ib tug muab tsib caug dlaim nyaj rua nwg coj moog rua Tilas Pilexes; yog le ntawd, Tilas Pilexes txhaj rov qaab moog rua peg nwg lub tebchaws lawm.

²¹Dlua le lwm yaam kws Menahees ua, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²²Menahees tuag hab luas coj nwg moog log, hab nwg tug tub Pekahiyas ua vaajntxwv hloov nwg chaw.

²³Thaus Uxiyas ua vaajntxwv kaav lub tebchaws Yudas tau tsib caug xyoo lawm, Menahees tug tub Pekahiyas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau ob xyoos.

²⁴Pekahiyas ua txhum rua tug TSWV, nwg ua phem ua qas ib yaam le Vaajntxwv Yelaunpau-aas kws yog Nenpas tug tub kws coj cov Yixalayees moog ua txhum.

²⁵Pekahiyas ib tug tubrog kws hu ua Pekas, nwg yog Lemaliyas tug tub txawm ntxeev sab rua nwg hab coj tau tsib caug leej tubrog huv lub nroog Nkile-as tuaj muab Pekahiyas tua tuag rua huv chaav faajxwm ntawm lub loog huv lub nroog Xamalis, ces Pekas txawm ua vaajntxwv hloov Pekahiyas chaw.

²⁶Dlua le lwm yaam kws Pekahiyas ua, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

²⁷Thaus Uxiyas ua vaajnxtwv kaav lub tebchaws Yudas tau tsib caug ob xyoos lawm, Lemaliyas tug tub Pekas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau neeg nkaum xyoo.

²⁸Pekas ua txhum rua tug TSWV, nwg ua phem ua qas ib yaam le Vaajntxwv Yelaunpau-aas kws yog Nenpas tug tub kws coj cov Yixalayees moog ua txhum.

²⁹Ntu kws Pekas ua vaajntxwv kaav lub tebchaws, Vaajntxwv Tikelas Pilexes kws kaav lub tebchaws Axilias tuaj txeeb tau lub nroog Iyoos, Anpees Npethes Ma-akas, Yanau-as, Kedes, Haxus hab cheebtsaam Nkile-as, Kalilais hab Nathalis. Hab nteg tau cov tuabneeg coj moog rua peg tebchaws Axilias lawm.

³⁰Thaus Uxiyas tug tub Yauthaas ua vaajntxwv kaav lub tebchaws Yudas tau neeg nkaum xyoo, Elas tug tub Hauseyas ntxeev sab muab Vaajntxwv Pekas tua tuag, hab nwg ua vaajntxwv hloov Pekas chaw.

³¹Dlua le lwm yaam kws Pekas ua, puavleej muab sau ca rua huv phoo ntawv keebkwm kws teev cov Yixalayees cov vaajntxwv lub neej lawm.

³²Thaus Lemaliyas tug tub Pekas ua vaajntxwv kaav lub tebchaws Yixalayees tau ob xyoos lawm, Uxiyas tug tub Yauthaas maam le ua vaajntxwv kaav lub tebchaws Yudas

³³thaus nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau kaum rau xyoo. Nwg nam hu ua Yelusas kws yog Xadaus tug ntxhais.

³⁴Yauthaas ua lub neej lawv le tug TSWV lub sab nyam, ib yaam le nwg txiv Uxiyas ua.

³⁵Tabsis nwg tsi muab tej chaw teev dlaab rhuav povtseg, tej tuabneeg txhaj pheej moog tua tsaj fij hab hlawv moov tshuaj tsw qaab rua ntawm tej chaw teev dlaab ntawd. Yauthaas yog tug kws ua lub Roojvaag Qaumteb ntawm lub Tuamtsev.

³⁶Dlua le lwm yaam kws Yauthaas ua, puavleej muab sau ca rua huv phoo ntawv keebkwm kws teev cov Yudas tej vaajntxwv lub neej lawm.

³⁷Ntu kws Yauthaas ua vaajntxwv kaav lub tebchaws, yog thawj zag kws tug TSWV ca Vaajntxwv Lexees kws kaav lub tebchaws Xilias hab Vaajntxwv Pekas kws kaav lub tebchaws Yixalayees tuaj tua cov Yudas.

³⁸Yauthaas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog. Hab nwg tug tub Ahas ua vaajntxwv hloov nwg chaw.