Read Hmong Njua 2 Vaajntxwv 16 Bible Online

2 Vaajntxwv 16 - Hmong Njua bible

2 Vaajntxwv 16

¹Thaus Lemaliyas tug tub Pekas ua vaajntxwv kaav lub tebchaws Yixalayees tau kaum xyaa xyoo lawm, Yauthaas tug tub Ahas maam le ua vaajntxwv kaav lub tebchaws Yudas

²thaus nwg noobnyoog muaj neeg nkaum xyoo, hab nwg nyob huv lub nroog Yeluxalees kaav tau kaum rau xyoo. Nwg tsi ua lub neej zoo ib yaam le nwg yawmkoob kws yog Vaajntxwv Daviv ua; hab nwg tsi ua lawv le tug TSWV kws yog nwg tug Vaajtswv lub sab nyam,

³nwg ua lub neej lawv le cov Yixalyees tej vaajntxwv ua. Nwg muab nwg tug tub tua hlawv fij rua tej mlom. Nwg ua phem ua qas ib yaam le cov tuabneeg kws tug TSWV muab ntab tawm huv lub tebchaws ua ntej kws cov Yixalyees lug nyob.

⁴Ahas tua tsaj fij hab hlawv moov tshuaj tsw qaab rua ntawm tej chaw teev dlaab sau tej pov roob hab huv tej qaab ntoos.

⁵Vaajntxwv Lexees kws kaav tebchaws Xilias hab Vaajntxwv Pekas kws kaav lub tebchaws Yixalayees txawm tuaj vij tua lub nroog Yeluxalees, tabsis obtug tua tsi yeej Ahas.

⁶(Thaus lub sijhawm ntawd, tug vaajntxwv kws kaav lub tebchaws Edoos rov tuaj tua yeej hab kaav lub nroog Elas, nwg txhaj muab cov Yudas ntab tawm huv lub nroog ntawd moog. Cov Edoos txawm lug nyob huv lub nroog Elas txug naj nub nua).

⁷Ahas khaiv tuabneeg moog has rua Vaajntxwv Tikelas Pilexes kws kaav lub tebchaws Axilias has tas, “Kuv kws yog koj tug tubkhai, thov koj tuaj paab kuv kuas dlim ntawm tug vaajntxwv kws kaav lub tebchaws Xilias hab tug vaajntxwv kws kaav lub tebchaws Yixalayees kws tuaj tua kuv.”

⁸Ahas muab tej nyaj tej kub huv lub Tuamtsev hab huv lub loog, coj moog pub rua Vaajntxwv Tilas Pilexes.

⁹Tilas Pilexes txaus sab paab Ahas, nwg txhaj coj nwg cov tubrog tuaj tua hab txeeb lub nroog Damaxes, nteg cov tuabneeg coj moog rua huv Kis hab muab Vaajntxwv Lexees tua.

¹⁰Thaus Vaajntxwv Ahas moog cuag Vaajntxwv Tikelas Pilexes huv lub nroog Damaxes, nwg pum ib lub thaaj fij, nwg txawm xaa xuv rov lug qha rua tug povthawj Uliyas has txug qhov kws luas ua lub thaaj ntawd txhua yaam le caag rua Uliyas.

¹¹Yog le ntawd, Uliyas txhaj ua ib lub thaaj zoo ib yaam le lub kws Ahas pum ntawd. Uliyas tub txua tau lub thaaj ntawd lawm, Ahas maam lug txug.

¹²Thaus Ahas rov peg lub nroog Damaxes lug txug, nwg pum lub thaaj tub tav lawm,

¹³yog le ntawd, nwg txhaj tua tsaj hab muab nplej rua sau lub thaaj hlawv fij, muab cawv txiv maab hab ntshaav laub rua sau lub thaaj fij ua kev sis raug zoo.

¹⁴Ahas muab lub thaaj tooj kws nyob ntawm lub thaaj kws ua tshab hab lub Tuamtsev kis nruab nraab tshem moog tso rua ntawm nwg lub thaaj kws ua tshab saab peg. Lub thaaj tooj ntawd tub muab fij rua tug TSWV lawm.

¹⁵Vaajntxwv Ahas has rua Uliyas has tas, “Koj siv kuv lub thaaj luj nuav hlawv tej khoom kws vaajntxwv hab cov pejxeem coj tuaj fij thaus sawv ntxuv hab thaus yuav tsaus ntuj, tsi has tej tsaj lossis tej nplej, hab tej cawv txiv maab kws cov pejxeem coj tuaj fij. Muab cov tsaj tua hlawv fij, muab cov ntshaav laub rua sau lub thaaj, tabsis tseg lub thaaj tooj rua kuv tau moog nug tug TSWV.”

¹⁶Uliyas ua lawv le Vaajntxwv saamfwm rua nwg lawm.

¹⁷Vaajntxwv Ahas muab cov yag tooj kws siv huv lub Tuamtsev kws txawb rua sau cov tsheb tooj txav, hab muab tshem tawm. Hab nwg tseem muab lub rhawv tooj kws txawb rua sau kaum ob tug nyuj tooj tsaws moog txawb rua ntawm qhov chaw kws luas muab txag zeb pua.

¹⁸Ahas xaav ua kuas hum Vaajntxwv Tilas Pilexes kws kaav lub tebchaws Axilias sab xwb, nwg txhaj muab chaav kws luas ua txuas rua ntawm lub loog lauj povtseg hab nwg thaiv txujkev kws vaajntxwv moog rua huv lub Tuamtsev.

¹⁹Dlua le lwm yaam kws Vaajntxwv Ahas ua, puavleej muab sau ca rua huv phoo ntawv keebkwm kws teev cov Yudas tej vaajntxwv lub neej lawm.

²⁰Ahas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog, hab nwg tug tub Hexekiyas ua vaajntxwv hloov nwg chaw.