Read Hmong Njua 2 Vaajntxwv 17 Bible Online

2 Vaajntxwv 17 - Hmong Njua bible

2 Vaajntxwv 17

¹Thaus Ahas ua vaajntxwv kaav lub tebchaws Yudas tau kaum ob xyoos lawm, Elas tug tub Hauseyas maam le ua vaajntxwv kaav lub tebchaws Yixalayees, hab nwg nyob huv lub nroog Xamalis kaav tau cuaj xyoos.

²Hauseyas ua txhum rua tug TSWV, tabsis nwg tsi ua txhum luj npaum le cov vaajntxwv kws kaav lub tebchaws Yixalayees ua ntej nwg.

³Thaus Vaajntxwv Samanexes kws kaav lub tebchaws Axilias tuaj tua Hauseyas; Hauseyas txhaj zwm rua Samanexes hab naj xyoo them se rua nwg.

⁴Tabsis tau tsi ntev tom qaab nuav, Hauseyas khaiv tuabneeg moog thov Vaajntxwv Xaus kws kaav lub tebchaws Iziv tuaj paab nwg, kuas nwg tsi tau naj xyoo them se rua Vaajntxwv Samanexes kws kaav lub tebchaws Axilias. Thaus Samanexes paub le ntawd, nwg txhaj nteg Hauseyas moog kaw rua huv tsev lojcuj.

⁵Samanexes tuaj tua cov Yixalayees hab vij lub nroog Xamalis tau peb xyoos

⁶txwm nkaus rua xyoo cuaj kws Hauseyas ua vaajntxwv kaav lub tebchaws Yixalayees, ces cov Axilias tug vaajntxwv txhaj txeeb tau lub nroog Xamalis hab nteg cov Yixalayees moog rua peg tebchaws Axilias lawm. Nwg coj cov Yixalayees ntawd ibtxha moog nyob rua huv lub nroog Halas, ibtxha moog nyob ze rua ntawm tug Dlej Hanpaules huv cheebtsaam Nkauxaas, hab ibtxha moog nyob rua huv cov Medias tej nroog.

⁷Luas txeeb tau lub nroog Xamalis, vim cov Yixalayees ua txhum rua tug TSWV kws yog puab tug Vaajtswv kws tso puab dlim ntawm Falaus kws yog cov Iziv tug vaajntxwv hab coj puab tawm nraag tebchaws Iziv lug. Cov Yixalayees pheej moog pe lwm tsaav tuabneeg tej vaajtswv,

⁸hab ua lawv le cov tuabneeg kws tug TSWV muab ntab tawm ntawm nwg tsaav tuabneeg moog lawm tej kevcai, hab coj tej kevcai kws cov Yixalayees tej vaajntxwv tau rhawv tseg.

⁹Cov Yixalayees ua tej kws tug TSWV kws yog puab tug Vaajtswv tsi nyam, puab ua tej chaw teev dlaab hab teev mlom txhua nrho rua huv puab tej nroog, tsi has nroog luj nroog miv, hab huv puab tej zog huv tuabsi.

¹⁰Puab txhus tej ncej zeb hab puab tug mlom quaspuj Aselas rua sau tej pov roob, hab huv tej qaab ntoos kws muaj nplooj ntxoov quas nyog,

¹¹hab puab hlawv moov tshuaj tsw qaab rua sau tej thaaj teev dlaab ib yaam le cov tuabneeg kws tug TSWV muab ntab tawm huv lub tebchaws moog lawm. Puab ua rua tug TSWV chim, vim puab ua kev phem kev qas

¹²hab tsi noog tug TSWV tej lug saamfwm kuas tsi xob pe mlom.

¹³Yaav taag lug, tug TSWV khaiv nwg cov tubkhai hab nwg cov cevlug moog ntuag cov Yixalayees hab cov Yudas has tas, “Mej ca le tso plhuav mej tej kev phem kev qas tseg, lug coj hab ua lawv le kuv tej lug saamfwm hab tej kevcai kws kuv muab rua mej cov yawmkoob kws kuv kuas kuv cov cevlug muab qha rua mej.”

¹⁴Tabsis puab tsi noog lug; puab tawv ncauj ib yaam le puab cov yawmkoob kws tsi ca sab rua tug TSWV kws yog puab tug Vaajtswv.

¹⁵Puab tsi ua lawv le tug TSWV tej lug qha hab puab tsi quavntsej tug TSWV tej lug cog tseg rua puab cov yawmkoob, hab tsi khaws nwg tej lug kws nwg qhuab ntuag puab le. Puab moog pe tej mlom kws tsi muaj qaabhau, hab puab ca le moog ua dlog ua dlig tsi muaj qaabhau le lawm. Puab ua lawv le lwm tsaav tuabneeg kws nyob puagncig puab tej kevcai kws tug TSWV txwv tsi pub puab ua.

¹⁶Puab ua txhum rua tug TSWV kws yog puab tug Vaajtswv tej kevcai, puab muab kub nchuav ua ob tug mlom nyuj, hab ib tug mlom quaspuj Aselas rua puab pe; puab tseem pe tej nubqub sau nruab ntug hab pe tug mlom Npa-aas huv tuabsi.

¹⁷Puab muab puab tej tub hab tej ntxhais tua hlawv txi dlaab; puab moog saib teg, saib yaig hab puab txhobtxwm moog ua kev phem kev qas taabmeeg tug TSWV, txhaj ua rua tug TSWV chim rua puab.

¹⁸Yog le ntawd, tug TSWV txhaj chim heev rua cov Yixalayees, hab muab puab ntab tawm ntawm nwg moog, tug TSWV tsuas tseg cov Yudas xwb.

¹⁹Txawm yog cov Yudas los puab tsi ua lawv le tug TSWV kws yog puab tug Vaajtswv tej kevcai le hab; puab ua lawv le tej kevcai kws cov Yixalayees xyum ntawm lwm tsaav tuabneeg lug.

²⁰Tug TSWV muab taagnrho Yixalayees cov xeebntxwv tso povtseg huv tuabsi, nwg rau txim rua puab hab muab puab cob rua cov yeebncuab kws ua nruj ua tsiv txhais teg moog txug thaus tug TSWV ntab puab tawm ntawm nwg moog.

²¹Thaus tug TSWV muab cov Yixalayees cais tawm ntawm cov Yudas moog lawm, cov Yixalayees txawm moog tsaa Nenpas tug tub Yelaunpau-aas ua vaajntxwv kaav puab. Yelaunpau-aas txhaj ua rua cov Yixalayees tso tug TSWV tseg, hab coj puab moog ua kev txhum luj kawg nkaus.

²²Puab txawm ua txhum ib yaam le Yelaunpau-aas hab puab pheej ua tej kev txhum kws nwg ua ntawd

²³moog txug thaus tug TSWV muab puab ntab tawm ntawm nwg moog, lawv le cov cevlug kws yog nwg cov tubkhai tau qha tseg lawm. Yog le ntawd, luas txhaj tuaj nteg cov Yixalayees coj moog rua peg tebchaws Axilias, hab puab tseem nyob peg lug txug naj nub nua.

²⁴Tug vaajntxwv kws kaav lub tebchaws Axilias coj cov tuabneeg kws nyob huv lub nroog Kus, Ivas, Hamas hab Xefavais kws nyob huv tebchaws Npanpiloos tuaj nyob huv cov Yixalayees tej zej zog, hab tej nroog huv Xamalis, hloov cov Yixalayees kws luas nteg coj moog rua lwm tebchaws lawm.

²⁵Thaus puab nyavnyuas tuaj nyob, puab tsi pehawm tug TSWV, tug TSWV txhaj tso tsuv ntxhuav lug tum puab tuag ibtxha lawm.

²⁶Tug vaajntxwv kws kaav lub tebchaws Axilias nov has tas cov tuabneeg kws nwg tso moog nyob nraag lub nroog Xamalis tsi paub tug vaajtswv kws kaav lub tebchaws ntawd txuj kevcai, tug vaajtswv ntawd txhaj tso tsuv ntxhuav lug tum puab.

²⁷Vaajntxwv txhaj has tas, “Ca le xaa cov povthawj kws peb nteg lug nuav ib tug rov qaab moog nyob nraag hab tsaa nwg ua tug qha tug vaajtswv kws kaav lub tebchaws ntawd tej kevcai rua puab.”

²⁸Yog le ntawd, cov povthawj kws cov Axilias nteg tau huv lub nroog Xamalis lug ib tug txhaj tau rov moog nyob huv lub nroog Npethees, hab qha tug TSWV txuj kevcai rua puab kuas puab paub pehawm tug TSWV.

²⁹Tabsis cov tuabneeg kws nyob huv lub nroog Xamalis tseem pheej puab mlom rua puab pe lawv le puab ibtxwm ua, hab puab coj tej mlom ntawd moog tso rua ntawm tej chaw kws cov Yixalyees ua tseg lawm. Puab cov ntawd nyag puab nyag mlom rua huv tej nroog kws puab nyob:

³⁰cov Npanpiloos puab tug mlom Xukaus Npenaus; cov Kus puab tug mlom Nenkas; cov Hamas puab tug mlom Asimas;

³¹cov Ivas puab tug mlom Nihas hab tug mlom Tatas, hab cov Xefavais muab puab cov mivnyuas tua hlawv txi rua tug mlom Alamelej hab tug mlom Anameles.

³²Tabsis puab tseem pehawm tug TSWV, hab tsaa puab cov tuabneeg ua povthawj moog nyob rua huv tej tsev teev dlaab, hab muab suavdlawg tej khoom fij rua dlaab.

³³Yog le ntawd, puab txhaj pehawm tug TSWV hab teev puab tej vaajtswv lawv le txuj kevcai kws puab coj peg puab lub tebchaws.

³⁴Naj nub nua, puab tseem coj puab txuj qub kevcai. Puab tsi pehawm tug TSWV lossis tsi ua lawv le tej kevcai kws tug TSWV muab rua Yakhauj tug kws muaj dlua ib lub npe hu ua Yixalayees cov xeebntxwv lawm.

³⁵Tug TSWV coglug hab saamfwm rua puab has tas, “Mej tsi xob pe luas tej vaajtswv, tsi xob hawm lossis tu lossis tua tsaj fij rua tej vaajtswv ntawd.

³⁶Mej ca le noog kuv lug, rua qhov kuv yog tug TSWV kws muaj zug hab muaj fwjchim coj mej tawm nraag tebchaws Iziv lug, mej yuavtsum pehawm hab tua tsaj fij rua kuv xwb.

³⁷Mej yuavtsum ua lawv le kuv tej kevcai hab tej lug kws kuv sau tseg rua mej lawm. Mej tsi xob pe lwm tsaav tuabneeg tej vaajtswv,

³⁸mej yuavtsum ncu ntsoov tej lug kws kuv cog tseg rua mej, hab tsi xob pe lwm tsaav tuabneeg tej vaajtswv.

³⁹Kuv yog tug TSWV kws yog mej tug Vaajtswv, mej yuavtsum noog kuv lug, kuv txhaj yuav cawm mej kuas dlim ntawm mej cov yeebncuab txhais teg.”

⁴⁰Tabsis cov tuabneeg ntawd tsi noog tug TSWV lug, puab tseem pheej ua lawv le puab tej qub kevcai xwb.

⁴¹Yog le ntawd, puab txhaj pehawm tug TSWV hab pe puab tej mlom huv tuabsi; naj nub nua los puab tej xeebntxwv tseem pheej ua ib yaam le ntawd.