Read Hmong Njua 2 Vaajntxwv 18 Bible Online

2 Vaajntxwv 18 - Hmong Njua bible

2 Vaajntxwv 18

¹Thaus Elas tug tub Hauseyas ua vaajntxwv kaav lub tebchaws Yixalayees tau peb xyoos lawm, Ahas tug tub Hexekiyas maam le ua vaajntxwv kaav lub tebchaws Yudas

²thaus nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau neeg nkaum cuaj xyoos. Nwg nam yog Xakhaliyas tug ntxhais Anpiyas.

³Hexekiyas ua lub neej lawv le tug TSWV lub sab nyam, ib yaam le nwg yawmkoob kws yog Vaajntxwv Daviv ua.

⁴Hexekiyas rhuav tej chaw teev dlaab, tsoo tej ncej zeb hab tug mlom quaspuj Aselas povtseg. Nwg tseem muab tug naab tooj Nehutaas kws Mauxes nchuav tsoo tawg taag povtseg hab. Cov Yixalayees pheej hlawv moov tshuaj tsw qaab fij rua tug naab tooj ntawd lug txug thaus lub sijhawm ntawd le.

⁵Hexekiyas ca sab rua tug TSWV kws yog cov Yixalayees tug Vaajtswv heev; cov vaajntxwv kws kaav lub tebchaws Yudas, tsi has cov kws kaav ua ntej nwg lossis tom qaab nwg, tsi muaj ib tug ca sab rua tug TSWV npaum le Hexekiyas,

⁶Hexekiyas muab sab npuab tug TSWV, noog nwg lug hab coj lawv le tej kevcai kws nwg muab cob rua Mauxes lawm.

⁷Tug TSWV nrug nraim Hexekiyas, hab txhua yaam kws nwg ua puavleej ua tau tav. Nwg ntxeev sab hab tsi kaam zwm rua tug vaajntxwv kws kaav lub tebchaws Axilias.

⁸Nwg tua yeej cov Filitees kws nyob txhua qhov, tsi has tej zog luj zog miv lossis tej nroog luj nroog miv, losloov lub nroog Nkaxas hab cheebtsaam kws nyob ibncig ntawd huv tuabsi.

⁹Thaus Hexekiyas ua vaajntxwv kaav lub tebchaws Yudas tau plaub xyoos, hab Hauseyas ua vaajntxwv kaav lub tebchaws Yixalayees tau xyaa xyoo, ces Vaajntxwv Samanexes kws kaav lub tebchaws Axilias txawm tuaj rua huv tebchaws Yixalayees hab vij lub nroog Xamalis.

¹⁰Samanexes vij lub nroog Xamalis tau peb xyoos, nwg maam le txeeb tau; thaus kws Hexekiyas kaav lub tebchaws Yudas tau rau xyoo hab Hauseyas kaav lub tebchaws Yixalayees tau cuaj xyoos.

¹¹Tug vaajntxwv kws kaav lub tebchaws Axilias txawm nteg cov Yixalyees coj moog rua peg tebchaws Axilias lawm. Nwg coj cov Yixalayees ibtxha moog nyob huv lub nroog Halas, ibtxha moog nyob ze ntawm tug Dlej Hanpules huv cheebtsaam Nkauxaas hab ibtxha moog nyob huv cov Medias tej nroog.

¹²Luas txeeb tau lub nroog Xamalis, rua qhov cov Yixalayees tsi noog tug TSWV kws yog puab tug Vaajtswv lug, puab tsi ua lawv le tej lug cog tseg hab tej kevcai kws tug TSWV muab cob rua nwg tug tubkhai Mauxes kuas muab qha rua puab lawm.

¹³Thaus Hexekiyas ua vaajntxwv kaav lub tebchaws Yudas tau kaum plaub xyoos, Vaajntxwv Xenakhelis kws kaav lub tebchaws Axilias txawm tuaj tua cov Yudas tej nroog kws muaj ntsaa yeej thaiv khov kho.

¹⁴Hexekiyas txhaj xaa xuv moog rua Xenakhelis huv lub nroog Lakhis has tas, “Kuv tau ua txhum lawm, thov koj ca le thim tubrog rov qaab; koj xaav kuas kuv them nyaj npaum le caag rua koj, kuv yuav them npaum ntawm.” Vaajntxwv txhaj teb has tas, kuas Hexekiyas xaa kaum taas nyaj hab ib taas kub tuaj.

¹⁵Yog le ntawd, Hexekiyas txhaj muab taagnrho tej nyaj huv Vaajtswv lub Tuamtsev hab huv vaajntxwv lub loog;

¹⁶hab nwg tev cov kub kws vuam rua lub Tuamtsev tej qhovrooj, hab tej ncej qhovrooj huv tuabsi nqaa moog rua Xenakhelis.

¹⁷Tug vaajntxwv kws kaav lub tebchaws Axilias txhaj tso nwg peb tug thawj tubrog coj ib paab tubrog coob heev huv lub nroog Lakhis tuaj tua Hexekiyas huv lub nroog Yeluxalees. Thaus puab tuaj txug ntawm lub nroog Yeluxalees, puab tsuam yeej rua huv txujkev ntawm qhov chaw ntus ntaub kws npuas tug kwj dleg kws ndlwg ntawm lub paag dlej saab peg lug.

¹⁸Ces puab khaiv tuabneeg moog has rua Vaajntxwv Hexekiyas, Hexekiyas tso peb tug numtswv moog cuag puab; peb tug numtswv ntawd yog: Hilekiyas tug tub Eliyakees kws yog tug saib lub loog, Senpenas kws yog tug teev ntawv hab Axafes tug tub Yau-as kws yog tug ceev tej ntaub ntawv.

¹⁹Cov thawj tubrog Axilias muaj ib tug has rua peb tug numtswv ntawd has tas, “Vaajntxwv xaav paub saib dlaabtsi ua rua Vaajntxwv Hexekiyas pheej ca sab?”

²⁰Nwg has tas, “Mej xaav has tas, lub ncauj has, ces txawm yuav kovyeej ib yaam le ib paab tubrog tuaj tua nua los? Leejtwg yuav paab mej tawmtsaam cov Axilias?

²¹Mej xaav has tas cov Iziv yuav paab mej, tabsis cov Iziv tsuas zoo ib yaam le tug lojkov kws muab ua paas nreg xwb, nwg yuav luv hab chob mej teg. Falaus kws yog cov Iziv tug vaajntxwv yuav zoo ib yaam le ntawd rua txhua tug tuabneeg kws ca sab rua nwg.”

²²Cov Axilias tug thawj tubrog has ntxiv tas, “Tej zag mej yuav has rua kuv tas, mej ca sab rua tug TSWV kws yog mej tug Vaajtswv? Tub yog Hexekiyas muab tej chaw hab tej thaaj fij rhuav, thaus nwg has kuas cov Yudas hab cov pejxeem kws nyob huv lub nroog Yeluxalees moog pehawm tug TSWV ntawm lub thaaj fij huv lub nroog Yeluxalees xwb?

²³Kuv tuav kuv tug vaajntxwv lub npe has rua mej tas, yog mej nrhav tau tuabneeg, kuv yuav muab ob txheeb tug neeg rua mej caij.

²⁴Mej tub kov tsi yeej kuv tug vaajntxwv kws kaav lub tebchaws Axilias tug thawj tubrog kws coj paab nyuas tubrog tsawg tsawg nuav, ua caag mej tseem yuav kuas cov Iziv coj tsheb neeg hab tubrog caij neeg tuaj paab mej!

²⁵Mej xaav has tas, kuv tuaj tua hab rhuav mej lub tebchaws, tug TSWV tsi paab kuv nua los? Tub yog tug TSWV kuas kuv tuaj tua hab rhuav mej lub tebchaws ntaag.”

²⁶Ces Eliyakees, Senpenas hab Yau-as txhaj teb tug thawj tubrog ntawd has tas, “Koj tsi xob has lug Henplais, koj has lug Alamais los peb yeej paub hab, rua qhov cov pejxeem kws nyob sau tej ntsaa yeej, puavleej nov tej lug kws koj has.”

²⁷Tug thawj tubrog ntawd teb le nuav: “Mej xaav has tas, kuv tug vaajntxwv khaiv kuv tuaj has tej lug nuav rua mej hab mej tug vaajntxwv xwb nua los? Kuv has rua cov pejxeem kws nyob sau tug ntsaa yeej huv tuabsi, rua qhov puab yuav noj puab tej quav hab haus puab tej zig ib yaam le mej hab ntaag.”

²⁸Ces cov Axilias tug thawj tubrog sawv tseeg qw ua lug Henplais has tas, “Mej suavdlawg ca le noog tug vaajntxwv kws kaav lub tebchaws Axilias tej lug!

²⁹Nwg has tas, mej tsi xob ca Hexekiyas ntxag tau mej, nwg yeej yuav paab tsi tau mej le.

³⁰Tsi xob ca Hexekiyas ntxag tau mej kuas ca sab rua tug TSWV. Tsi xob xaav has tas tug TSWV yuav cawm kuas mej dlim hab tsi pub lub nroog nuav poob rua cov Axilias tug vaajntxwv txhais teg,

³¹tsi xob noog Hexekiyas lug. Cov Axilias tug vaajntxwv kuas mej ca le zwm rua nwg. Nwg yuav pub rua mej tau noj tej txiv maab hab txiv ncuav pas huv mej tej vaaj, hab tau haus tej dlej huv mej tej qhov tshij

³²moog txug nub kws vaajntxwv coj mej moog nyob huv lub tebchaws kws zoo ib yaam le mej lub. Lub tebchaws ntawd muaj txiv maab ua cawv, muaj nplej ua ncuav; muaj txiv ntoo roj ua roj hab muaj zib ntaab. Yog mej ua lawv le nwg has, mej yuav tau ua neej nyob tsi tuag. Mej tsi xob ca Hexekiyas ntxag kuas mej ntseeg has tas, tug TSWV yuav cawm kuas mej dlim.

³³Puas muaj ib tsaav tuabneeg twg kws puab tug vaajtswv cawm tau puab dlim ntawm cov Axilias tug vaajntxwv lub fwjchim?

³⁴Cov Hamas, cov Alepas, cov Xefavais, cov Henas hab cov Ivas tej vaajtswv nyob qhov twg lawm? Tej vaajtswv ntawd puas cawm tau lub nroog Xamalis?

³⁵Mej ca le qha rua kuv saib, tej tebchaws ntawd tej vaajtswv puas cawm tau puab dlim ntawm cov Axilias tug vaajntxwv txhais teg? Ua le caag mej xaav has tas, tug TSWV yuav cawm tau lub nroog Yeluxalees nuav dlim ntawm kuv txhais teg?”

³⁶Cov pejxeem nyob ntsag tu tsi has ib lu lug le, rua qhov Vaajntxwv Hexekiyas tsi pub puab teb.

³⁷Eliyakees, Senpenas hab Yau-as nyuaj sab heev, puab txawm muab puab tej tsho dlua hab moog pav tej lug kws cov Axilias tug thawj tubrog has ntawd rua Vaajntxwv Hexekiyas noog.