Read Hmong Njua 2 Vaajntxwv 19 Bible Online

2 Vaajntxwv 19 - Hmong Njua bible

2 Vaajntxwv 19

¹Thaus Vaajntxwv Hexekiyas nov tej lug ntawd, nwg nyuaj sab heev, nwg dlua rhe nwg lub tsho hab muab ntaub tsaaj lug naav, hab moog rua huv tug TSWV lub Tuamtsev.

²Nwg khaiv Eliyakees kws yog tug saib lub loog, Senpenas kws yog tug teev ntawv hab cov povthawj ob peb leeg kuas moog cuag tug cev Vaajtswv lug Yaxayas kws yog Amauxes tug tub. Puab puavleej naav ntaub tsaaj huv tuabsi.

³Vaajntxwv kuas puab moog has rua Yaxayas has tas, “Nub nua yog nub kws peb raug kev txomnyem, peb taabtom raug txim hab poob ntsejmuag. Peb zoo ib yaam le tug quaspuj kws nwg tsi muaj zug yug nwg tug mivnyuas.

⁴Tug vaajntxwv kws kaav lub tebchaws Axilias khaiv nwg ib tug thawj tubrog tuaj thuam Vaajtswv tug kws muaj sa nyob. Thov tug TSWV kws yog koj tug Vaajtswv leeg paub hab rau txim rua cov tuabneeg kws tuaj thuam nwg ntawd. Yog le ntawd, koj ca le thov Vaajtswv paab peb cov kws tseem seem nyob nuav.”

⁵Thaus Yaxayas nov tej lug kws Vaajntxwv Hexekiyas has lawm,

⁶nwg txhaj kuas puab rov moog has rua vaajntxwv has tas, “Tug TSWV kuas koj tsi xob nyuaj sab rua tug vaajntxwv kws kaav lub tebchaws Axilias tej lug thuam kws has tas, tug TSWV paab tsi tau koj.

⁷Tug TSWV yuav ua kuas tug vaajntxwv kws kaav lub tebchaws Axilias nov lug foob lug cua, ces nwg yuav rov moog rua peg nwg lub tebchaws, hab tug TSWV yuav ua kuas luas muab nwg tua rua peg nwg lub tebchaws.”

⁸Cov Axilias tug thawj tubrog paub has tas, vaajntxwv tawm huv lub nroog Lakhis moog tua lub nroog Linas kws nyob tsi dleb ntawd; nwg txawm moog nrug vaajntxwv saablaaj.

⁹Cov Axilias tug vaajntxwv nov has tas, Vaajntxwv Tihakas kws kaav lub tebchaws Sudaas, coj ib paab tubrog Iziv tuaj tua nwg lawm. Nwg txawm khaiv tuabneeg moog has rua Vaajntxwv Hexekiyas kws kaav lub tebchaws Yudas

¹⁰has tas, “Tsi xob ca tug Vaajtswv kws koj ca sab rua ntxag tau koj has tas, koj yuav tsi poob rua kuv txhais teg le.

¹¹Nyaj koj nov tej kws cov Axilias tug vaajntxwv tau ua rua tej tebchaws kws nwg xaav muab ua kuas puamtsuaj ntawd lawm. Koj xaav has tas, koj yuav dlim nua los?

¹²Kuv cov yawmkoob tub ua rua lub nroog Nkauxaas, Halaas, Lexes puamtsuaj taag, hab tua cov tuabneeg Npethedees kws nyob huv lub nroog Telaxes tuag taag, hab yeej tsi muaj ib tug vaajtswv nyob qhov twg lug paab cov tuabneeg ntawd dlim le.

¹³Cov vaajntxwv kws kaav lub nroog Hamas, lub nroog Alepas, lub nroog Xefavais, lub nroog Henas hab Ivas dlua twg taag lawm?”

¹⁴Vaajntxwv Hexekiyas txais tsaab ntawv ntawm cov xaa ntawv tuaj lug nyeem. Nwg coj tsaab ntawv moog rua huv lub Tuamtsev hab muab nthuav rua ntawm tug TSWV xubndlag,

¹⁵hab thov has tas, “Tug TSWV kws yog cov Yixalayees tug Vaajtswv, koj nyob sau koj lub zwmtxwv ntawm ob tug qhelunpees kis nruab nraab, koj tuab leeg xwb txhaj yog tug Vaajtswv kws kaav taagnrho tej tebchaws huv nplajteb nuav. Koj yog tug kws tsim lub ntuj hab lub nplajteb.

¹⁶Tug TSWV, thov koj tsaa qhovmuag saib tej xwm kws lug raug peb. Thov leeg paub tej lug kws Xenakhelis thuam koj kws yog Vaajtswv tug muaj sa nyob.

¹⁷Tug TSWV, peb paub has tas cov Axilias cov vaajntxwv tau tua ntau tsaav tuabneeg hab rhuav puab tej tebchaws puamtsuaj taag nyob qhuav nkuag ca,

¹⁸hab muab puab tej mlom kws tsi yog vaajtswv hlawv povtseg taag, tej vaajtswv ntawd yog luas muab pobzeb hab muab ntoo txua xwb.

¹⁹Tug TSWV kws yog peb tug Vaajtswv, nwgnuav thov koj paab peb kuas dlim ntawm cov Axilias txhais teg, txhua tsaav tuabneeg kws nyob huv nplajteb txhaj yuav paub has tas, tsuas yog koj tuab leeg xwb txhaj yog tug TSWV kws yog Vaajtswv.”

²⁰Tom qaab ntawd Yaxayas xaa xuv moog has rua Vaajntxwv Hexekiyas paub has tas tug TSWV tub nov vaajntxwv tej lug thov lawm,

²¹tug TSWV has tas, “Xenakhelis, lub nroog Yeluxalees yuav luag koj plig hab nyos koj.

²²Koj puas paub has tas, koj saib tsi taug hab thuam leejtwg? Tub yog koj saib tsi taug hab tsi fwm kuv kws yog cov Yixalayees tug Vaajtswv kws dlawbhuv ntaag!

²³Koj khaiv koj cov tuabneeg xaa xuv tuaj has khaav ntxhas rua kuv tas, koj cov tubrog caij tsheb neeg moog txeeb tau tej roob sab huv tebchaws Lenpanoos. Koj khaav has tas koj muab cov ntoo cab kws sab tshaaj hab cov ntoo thuv kws zoo nkauj sau ntuv huv tuabsi povtseg, hab koj moog txug huv lub plawv zoov nujtxeeg kws dleb heev.

²⁴Koj khaav has tas, koj tau moog khawb qhov tshij hab haus tej dlej huv luas tej tebchaws hab coj koj cov tubrog moog tsuj tug Dlej Niles nraag tebchaws Iziv nqhuab hlo.

²⁵“Koj tsi tau nov has tas kuv tub npaaj tej nuav ntev lug lawm nua los? Nwgnuav kuv ua lawv le kuv tau has tseg. Kuv pub koj muaj fwjchim rhuav tej nroog kws luas txhim ntsaa yeej khov kho ntawd qaug taag.

²⁶Cov tuabneeg kws nyob huv tej nroog ntawd, tsi muaj zug le, puab ntshai heev ua ib ce tshee nyo. Puab zoo ib yaam le tej nroj tsuag kws tuaj huv tej teb lossis ib yaam le tej yub nroj kws tuaj sau tej ruv tsev kws raug cov cua kub saab nubtuaj tuaj ntsawj ua rua tej nplooj qhuav nkig nkuav.

²⁷“Tabsis kuv paub koj lub sab taag lawm, txawm yog koj yuav ua ib yaam dlaabtsi hab yuav moog qhov twg los kuv yeej paub huv tuabsi. Kuv paub has tas koj chim heev.

²⁸Kuv nov has tas, koj chim rua kuv hab khaavtheeb heev, yog le ntawd kuv yuav muab nqailauj lug nqai koj qhovntswg hab muab fwm looj thawb lug saam koj qhovncauj, hab caab koj taug txujkev kws koj tuaj rov qaab.”

²⁹Ces Yaxayas has rua Vaajntxwv Hexekiyas has tas, “Tej xwm kws yuav muaj tshwm lug yog le nuav: Xyoo nuav hab lwm xyoo, koj hab koj cov pejxeem yuav tau noj tej qoobloo kws tsi yog mej cog, tabsis xaab xyoo mej yuav cog hab yuav tau sau. Mej yuav tau cog txiv maab hab tau noj tej txiv maab ntawd.

³⁰Cov Yudas kws seem nyob huv lub tebchaws yuav zoo ib yaam le tsob ntoo kws tej caag ntsa aav tub tub hab yuav tawg paaj txi txiv;

³¹rua qhov tug TSWV npaaj sab ca cov tuabneeg kws nyob huv lub nroog Yeluxalees hab sau lub Roob Xi-oos ua cov kws seem ntawd.

³²“Tug TSWV has txug tug vaajntxwv kws kaav lub tebchaws Axilias le nuav: ‘Nwg yuav tsi tau tuaj rua huv lub nroog nuav lossis tua tsi tau ib nee tuaj le. Cov tubrog kws muaj dlaim thaiv nav ntaaj, yuav tuaj tsi tau ze lub nroog nuav, hab yuav khawb tsi tau aav meem kuas nce tau rua huv lub nroog.

³³Nwg yuav taug txujkev kws nwg tuaj rov moog tsev, nwg yuav tsi tau lug rua huv lub nroog nuav. Kuv yog tug TSWV kws has le ntawd.

³⁴Kuv yuav tiv thaiv hab tsomkwm lub nroog nuav, kuas kuv txhaj tau ntsejmuag hab kuas muaj lawv le tej lug kws kuv tau cog tseg rua kuv tug tubkhai Daviv lawm.’ ”

³⁵Mo ntawd tug TSWV ib tug timtswv lug tua cov tubrog Axilias huv puab lub yeej tuag ib puas yim caum tsib txheeb leej. Thaus kaaj ntug puab cov tubrog tuag pawg lug ca xwb.

³⁶Xenakhelis kws yog tug vaajntxwv kaav lub tebchaws Axilias txhaj le thim nwg cov tubrog rov moog rua peg lub nroog Nineves lawm.

³⁷Muaj ib nub, thaus nwg taabtom moog pe nwg tug mlom Nilaus huv lub tsev teev mlom, ces nwg ob tug tub kws yog Alameles hab Salexes txawm nqaa ntaaj moog muab nwg tua tuag, hab obtug tsiv moog rua tebchaws Alalaj lawm. Nwg tug tub kws hu ua Exahadoos txhaj ua vaajntxwv hloov nwg chaw.