Read Hmong Njua 2 Vaajntxwv 20 Bible Online

2 Vaajntxwv 20 - Hmong Njua bible

2 Vaajntxwv 20

¹Thaus ntawd Vaajntxwv Hexekiyas mob nyaav heev hab yuav tuag. Ces Yaxayas kws yog tug cev Vaajtswv lug kws yog Amauxes tug tub, txawm tuaj saib Hexekiyas hab has rua nwg tas, “Tug TSWV has tas, ‘Koj ca le npaaj txhua yaam kuas txhij rua lub tebchaws, rua qhov koj yuav tsi zoo. Koj yeej yuav tuag xwb.’ ”

²Ces Hexekiyas txawm tig xubndlag rua tim phaab ntsaa hab thov has tas,

³“Tug TSWV, thov koj ncu has tas, kuv ua koj teg num ntawm lub sab ncaaj nceeg, muab sab npuab koj, hab ua txhua yaam lawv le koj xaav kuas kuv ua.” Ces Hexekiyas txawm quaj tu sab heev.

⁴Thaus Yaxayas tseem moog tsi tau dlhau lub tshaav puam ntawm vaajntxwv lub loog, tug TSWV txawm has kuas Yaxayas

⁵rov moog has rua Hexekiyas tug kws kaav tug TSWV tsaav tuabneeg hab has rua nwg tas, “Kuv yog tug TSWV kws yog koj yawmkoob Daviv tug Vaajtswv, kuv nov koj tej lug thov hab pum koj tej kua muag lawm, kuv yuav khu koj kuas zoo, peb nub sau nuav koj yuav tau moog rua huv kuv lub Tuamtsev.

⁶Kuv yuav ntxiv noobnyoog kaum tsib xyoos rua koj. Kuv yuav paab koj hab lub nroog Yeluxalees nuav kuas dlim ntawm cov Axilias tug vaajntxwv txhais teg. Kuv yuav tsomkwm lub nroog nuav, kuas kuv txhaj tau ntsejmuag, hab kuas muaj lawv le tej lug kws kuv tau cog tseg rua kuv tug tubkhai Daviv lawm.”

⁷Yaxayas kuas vaajntxwv cov tubkhai muab txiv ncuav pas tsoo qhwv vaajntxwv lub rwj, ces nwg yuav zoo.

⁸Vaajntxwv Hexekiyas nug has tas, “Puas yuav muaj dlaabtsi ua cim qha rua kuv paub has tas, tug TSWV yuav khu kuv hab peb nub sau nuav kuv yuav tau moog rua huv tug TSWV lub Tuamtsev?”

⁹Yaxayas teb has tas, “Tug TSWV yuav ua ib qho cim qha rua koj paub has tas, nwg yuav ua lawv le nwg tau coglug tseg lawm. Koj xaav kuas tug TSWV ua rua tug dluab ntawm tug ntaiv nce moog kaum qeb lossis nqeg lug kaum qeb?”

¹⁰Hexekiyas teb has tas, “Kuj yoojyim ca tug dluab nce moog kaum qeb, tabsis kuv thov tug TSWV ua kuas tug dluab nqeg rov lug kaum qeb.”

¹¹Yaxayas thov tug TSWV, hab tug TSWV ua rua tug dluab ntawm tug ntaiv Cov tuabneeg kws txawj ntse saab kev tshawb tej yaam kws tshwmsim yaav taag lug has tas, tug ntaiv kws has huv nqai nuav, yog ua tshwjxeeb lug qha txug lub sijhawm. kws Vaajntxwv Ahas ua, nqeg rov lug kaum qeb.

¹²Thaus ntawd Npaladaas tug tub Melaudas Npaladaas kws ua vaajntxwv kaav lub tebchaws Npanpiloos nov has tas Vaajntxwv Hexekiyas mob, nwg txhaj sau ib tsaab ntawv hab xaa ib cov khoom tuaj pub rua Hexekiyas.

¹³Hexekiyas tog txais puab hab coj puab moog ncig saib nwg tej txhaab nyaj txhaab kub, tej txumlom, tej roj tsw qaab hab nwg tej cuabyeej ua rog. Tsi tshuav ib yaam dlaabtsi huv nwg tej txhaab lossis huv nwg lub tebchaws kws nwg tsi tau coj puab moog saib le.

¹⁴Ces Yaxayas kws yog tug cev Vaajtswv lug tuaj cuag Vaajntxwv Hexekiyas hab nug nwg has tas, “Cov tuabneeg ntawd tuaj qhov twg tuaj hab puab has dlaabtsi rua koj?” Hexekiyas teb has tas, “Puab tuaj tim tebchaws Npanpiloos kws dleb heev tuaj.”

¹⁵Yaxayas nug has tas, “Puab pum dlaabtsi huv koj lub loog?” Hexekiyas teb has tas, “Puab pum txhua yaam huv tuabsi, tsi tshuav ib yaam nyob huv tej txhaab kws kuv tsi tau qha rua puab le.”

¹⁶Yaxayas has rua vaajntxwv has tas, “Tug TSWV kws muaj fwjchim luj kawg nkaus has tas,

¹⁷muaj ib nub txhua yaam kws nyob huv koj lub loog, hab txhua yaam kws koj cov yawmkoob khwv tseg thaus u lug txug rua naj nub nua, yuav raug luas coj moog rua tim tebchaws Npanpiloos, yuav tsi tshuav ib yaam dlaabtsi le.

¹⁸Koj cov tub xeebntxwv ibtxha yuav raug luas nteg coj moog, hab muab saam ca ua num huv tug vaajntxwv kws kaav lub tebchaws Npanpiloos lub loog.”

¹⁹Vaajntxwv Hexekiyas txawm xaav has tas, thaus kws nwg tseem ua neej nyob, lub tebchaws yuav muaj kev thaajyeeb hab nyob tso sab lug, nwg txhaj teb has tas, “Cov lug kws tug TSWV kuas koj has rua kuv yog lug zoo.”

²⁰Dlua le lwm yaam kws Vaajntxwv Hexekiyas ua, tej kws nwg muaj peevxwm ua, tauv tau lub paag dlej hab khawb tug kwj dleg tso dlej lug rua huv lub nroog, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

²¹Hexekiyas tuag hab nwg tug tub Manaxes ua vaajntxwv hloov nwg chaw.