Read Hmong Njua 2 Vaajntxwv 21 Bible Online

2 Vaajntxwv 21 - Hmong Njua bible

2 Vaajntxwv 21

¹Manaxes ua vaajntxwv kaav lub tebchaws Yudas thaus nwg noobnyoog muaj kaum ob xyoos, hab nwg nyob huv lub nroog Yeluxalees kaav tau tsib caug tsib xyoos. Nwg nam hu ua Hexinpas.

²Manaxes ua txhum rua tug TSWV, nwg ua kev phem kev qas ib yaam le cov tuabneeg kws tug TSWV muab ntab tawm huv lub tebchaws moog ua ntej nwg tsaav tuabneeg lug nyob lawm.

³Manaxes rov txhim khu tej chaw teev dlaab kws nwg txiv Hexekiyas muab rhuav taag lawm. Nwg ua ntau lub thaaj teev tug mlom Npa-aas hab puab tug mlom quaspuj Aselas, ib yaam le Vaajntxwv Ahaj kws kaav lub tebchaws Yixalayees ua. Manaxes tseem pe tej nubqub hab.

⁴Manaxes ua tau ntau lub thaaj teev dlaab rua huv lub Tuamtsev, muab teeb rua ntawm qhov chaw kws tug TSWV has tas, tsimnyog ca ua qhov chaw rua suavdlawg pehawm nwg.

⁵Manaxes ua tau ntau lub thaaj rua ntawm ob lub tshaav puam ntawm lub Tuamtsev ua qhov chaw pe tej nubqub.

⁶Manaxes muab nwg tug tub tua hlawv fij. Nwg ua khawvkoob, ua yeegsiv, saib teg hab saib yaig. Manaxes ua txhum luj heev rua tug TSWV, tug TSWV txhaj chim rua nwg.

⁷Nwg muab tug mlom quaspuj Aselas lug teeb rua huv lub Tuamtsev ntawm qhov chaw kws tug TSWV has rua Daviv hab Daviv tug tub Xalumoos has tas, “Lub Tuamtsev huv lub nroog Yeluxalees nuav, yog qhov chaw kws kuv xaiv tawm ntawm kaum ob xeem Yixalyees lug ua qhov chaw rua suavdlawg tuaj pehawm kuv.

⁸Yog cov Yixalyees noog kuv lug hab ua lawv le kuv tej kevcai kws kuv tug tubkhai Mauxes muab rua puab lawm, kuv yuav tsi pub kuas puab raug ntab tawm huv lub tebchaws kws kuv muab rua puab cov yawmkoob lawm.”

⁹Tabsis cov Yudas tsi noog tug TSWV lug, Manaxes txhaj coj puab moog ua txhum luj tshaaj cov tuabneeg kws tug TSWV muab ntab tawm huv lub tebchaws moog ua ntej nwg tsaav tuabneeg lug nyob.

¹⁰Tug TSWV has rua cov tubkhai kws yog cov cevlug has tas,

¹¹“Vaajntxwv Manaxes ua kev phem kev qas luj tshaaj cov tuabneeg Kana-aas ua; qhov kws nwg puab tej mlom ntawd, ua rua nwg coj cov Yudas moog ua txhum.

¹²Yog le ntawd, tug TSWV kws yog cov Yixalayees tug Vaajtswv has tas, kuv Yuav tso kev puamtsuaj lug raug lub nroog Yeluxalees hab cov Yudas, kuas txhua tug kws nov tej xwm nuav yuav xaav tsi thoob le.

¹³Kuv yuav rau txim rua lub nroog Yeluxalees ib yaam le kuv ua rua lub nroog Xamalis, hab ib yaam le kuv ua rua Vaajntxwv Ahaj kws kaav lub tebchaws Yixalayees hab nwg cov xeebntxwv. Kuv yuav cheb lub nroog Yeluxalees hab cov tuabneeg kws nyob huv kuas dlu lug moog ib yaam le lub phaaj kws muab ntxuav taag hab muab so khwb ca.

¹⁴Kuv yuav tso cov tuabneeg kws seem ntawd tseg, muab puab cob rua puab tej yeebncuab, kuas tua yeej puab hab txeeb tau puab lub tebchaws.

¹⁵Kuv yuav ua le nuav rua kuv tsaav tuabneeg, rua qhov puab ua txhum rua kuv hab ua rua kuv chim, txij thaus kuv coj puab cov yawmkoob tawm nraag tebchaws Iziv lug txug naj nub nua.”

¹⁶Manaxes tua cov tuabneeg kws tsi muaj txim coob leej, ua rua ntshaav ndlwg puv nkaus tej kev huv lub nroog Yeluxalees; nwg ua tej kev txhum nuav ntxiv rua tej kws nwg coj cov Yudas moog pe mlom, hab ua txhum rua tug TSWV.

¹⁷Dlua le lwm yaam kws Manaxes ua hab tej kev txhum kws nwg ua, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

¹⁸Manaxes tuag hab luas coj nwg moog log rua huv nwg lub loog kws yog lub vaaj Uxas, hab nwg tug tub Amoos ua vaajntxwv hloov nwg chaw.

¹⁹Thaus Amoos ua vaajntxwv kaav lub tebchaws Yudas nwg noobnyoog muaj neeg nkaum ob xyoos, hab nwg nyob huv lub nroog Yeluxalees kaav tau ob xyoos, nwg nam hu ua Mesulemes hab yog Halus kws nyob huv lub nroog Yaunpas tug ntxhais.

²⁰Amoos ua txhum rua tug TSWV ib yaam le nwg txiv Manaxes ua ntaag.

²¹Nwg xyum ua lawv le nwg txiv tug yaam ntxwv, hab nwg pe tej mlom kws nwg txiv pe.

²²Amoos tso tug TSWV kws yog nwg cov yawmkoob tug Vaajtswv tseg, hab tsi ua lawv le tug TSWV tej lug saamfwm.

²³Amoos cov numtswv ntxeev sab rua nwg hab muab nwg tua tuag rua huv nwg lub loog.

²⁴Tabsis cov Yudas muab cov tuabneeg kws tua Amoos, tua tuag taag hab tsaa Amoos tug tub Yauxiyas ua vaajntxwv hloov nwg chaw.

²⁵Dlua le lwm yaam kws Amoos ua, puavleej muab sau ca rua huv phoo ntawv keebkwm kws teev cov Yudas tej vaajntxwv lub neej lawm.

²⁶Luas coj Amoos moog log rua ntawm lub toj ntxaas huv lub vaaj Uxas, hab nwg tug tub Yauxiyas ua vaajntxwv hloov nwg chaw.