Read Hmong Njua 2 Vaajntxwv 22 Bible Online

2 Vaajntxwv 22 - Hmong Njua bible

2 Vaajntxwv 22

¹Yauxiyas ua vaajntxwv kaav lub tebchaws Yudas thaus nwg noobnyoog muaj yim xyoo, hab nwg nyob huv lub nroog Yeluxalees kaav tau peb caug ib xyoos. Nwg nam hu ua Yedidas hab yog Adayas kws nyob huv lub nroog Npauxekas tug ntxhais.

²Yauxiyas ua lub neej lawv le tug TSWV lub sab nyam, nwg ua lawv le Vaajtswv tej kevcai, ib yaam le nwg yawmkoob kws yog Vaajntxwv Daviv ua.

³Thaus Yauxiyas ua vaajntxwv tau kaum yim xyoo, nwg khaiv nwg tug teev ntawv Safas kws yog Axaliyas tug tub hab yog Mesulas tug xeebntxwv moog rua huv lub Tuamtsev, nwg has rua Axaliyas has tas,

⁴“Koj moog cuag tug Povthawj Hlub Hilekiyas hab kuas nwg qha tej nyaj kws cov povthawj sau tau thaus cov pejxeem coj tuaj tso rua huv lub Tuamtsev saib tau pistsawg.

⁵Koj kuas nwg muab cov nyaj ntawd coj moog rua cov kws saib cov tuabneeg kws khu lub Tuamtsev. Puab txhaj tau nyaj

⁶them rua cov tuabneeg txua ntoo, cov ua tsev, cov txhim phaab ntsaa, yuav ntoo hab yuav pobzeb lug khu lub Tuamtsev.

⁷Cov kws saib cov ua num, puab yog tuabneeg ncaaj, txhaj tsi kuas puab muab tej ntawv teev tej nyaj kws puab siv lug.”

⁸Safas coj vaajntxwv cov lug moog has rua Hilekiyas, Hilekiyas qha rua Safas has tas, “Kuv pum phoo ntawv kevcai nuav nyob huv tug TSWV lub Tuamtsev.” Hilekiyas txawm muab phoo ntawv rua Safas nyeem.

⁹Safas rov lug qha rua vaajntxwv has tas, “Koj cov tubkhai tub muab cov nyaj huv lub Tuamtsev cob rua cov kws saib cov tuabneeg kws khu lub Tuamtsev lawm.”

¹⁰Safas has ntxiv tas, “Phoo ntawv nuav yog Hilekiyas muab rua kuv.” Ces Safas txawm muab nyeem rua vaajntxwv noog.

¹¹Thaus vaajntxwv nov tej lug huv phoo ntawv kevcai ntawd, vaajntxwv nyuaj sab heev hab dlua rhe nwg lub tsho,

¹²hab has rua tug Povthawj Hilekiyas, Safas tug tub Ahikas, Mikayas tug tub Anpaus, tug teev ntawv Safas hab Axayas kws yog tug tu vaajntxwv le nuav:

¹³“Mej ca le paab kuv hab paab cov Yudas moog nug tug TSWV txug tej lug huv phoo ntawv nuav saib qha le caag. Tog tug TSWV chim heev rua peb los tub yog peb cov yawmkoob tsi ua lawv le tej lug kws sau rua huv phoo ntawv nuav.”

¹⁴Hilekiyas, Ahikas, Anpaus, Safas hab Axayas txawm moog cuag ib tug quaspuj hu ua Hulidas kws yog ib tug cev Vaajtswv lug nyob huv lub nroog Yeluxalees ntawm ceg kaum kws luas ua tshab. (Hulidas tug quasyawg hu ua Saloos kws yog Tivas tug tub hab yog Hahas tug xeebntxwv, nwg yog tug saib cov tsho ntev huv lub Tuamtsev). Puab pav tej lug ntawd rua Hulidas noog.

¹⁵Nwg kuas puab rov moog cuag vaajntxwv

¹⁶hab has rua vaajntxwv has tas, tug TSWV has le nuav: “Kuv yuav rau txim rua lub nroog Yeluxalees hab cov tuabneeg kws nyob huv lub nroog lawv le tej lug kws sau tseg rua huv phoo ntawv kws vaajntxwv nyeem ntawd.

¹⁷Puab tau tso kuv tseg hab moog tua tsaj fij rua lwm tsaav tuabneeg tej vaajtswv, kuv txhaj chim rua tej kws puab ua, hab kuv chim rua lub nroog Yeluxalees, kuv tej kev chim yuav tsi xaam moog sai.

¹⁸Kuv yog tug TSWV kws yog cov Yixalayees tug Vaajtswv, kuv has le nuav rua vaajntxwv: Thaus koj nov tej lug huv phoo ntawv nuav taag lawm,

¹⁹koj leeg koj tej kev txhum hab txu fwjchim taabmeeg kuv, koj quaj tu sab hab dlua rhe koj lub tsho, thaus koj paub has tas, kuv yuav rau txim rua lub nroog Yeluxalees hab cov tuabneeg huv tuabsi. Kuv yuav ua kuas lub nroog puamtsuaj taag, thaus luas pum luas yuav ntshai heev, hab luas yuav tuav lub nroog nuav lub npe foom tsi zoo. Tabsis vim kuv tub nov koj tej lug thov lawm,

²⁰kuv yuav tog kuas koj tuag tsaiv kuv maam le rau txim rua lub nroog Yeluxalees. Kuv yuav ca koj tuag kaaj sab lug.” Puab coj tej lug ntawd moog pav rua Vaajntxwv Yauxiyas noog.