Read Hmong Njua 2 Vaajntxwv 23 Bible Online

2 Vaajntxwv 23 - Hmong Njua bible

2 Vaajntxwv 23

¹Vaajntxwv Yauxiyas kuas cov Yudas tej thawjcoj hab cov tuabneeg kws nyob huv lub nroog Yeluxalees tuaj cuag nwg,

²hab puab ua ke moog rua huv lub Tuamtsev, tsi has cov povthawj, cov cevlug hab taagnrho cov pejxeem, tug muaj tug npluag los moog huv tuabsi. Vaajntxwv nyeem taagnrho phoo ntawv coglug kws nrhav tau huv lub Tuamtsev rua suavdlawg noog.

³Vaajntxwv sawv ib saab ntawm tug ncej kws cov vaajntxwv ibtxwm sawv coglug rua tug TSWV has tas yuav fwm nwg, ua lawv le nwg tej kevcai hab tej lug saamfwm kuas kawg sab kawg ntsws, hab ua kuas tau lawv le tej lug cog tseg kws sau rua huv phoo ntawv nuav. Cov pejxeem puavleej leeg lug hab has tas, puab yuav coj lawv le tej lug cog tseg ntawd.

⁴Tom qaab ntawd, Yauxiyas kuas tug Povthawj Hlub Hilekiyas, cov povthawj yau, hab cov kws zuv lub roojvaag kws moog rua huv lub Tuamtsev moog nqaa txhua yaam kws luas siv teev Npa-aas teev tug mlom quaspuj Aselas hab teev tej nubqub tawm huv lub Tuamtsev moog povtseg. Vaajntxwv muab tej ntawd coj moog hlawv rua nrau ntug nroog kws ze lub Haav Kiloos, hab nwg kuas puab yawm tej tshauv ntawd coj moog pov rua peg lub nroog Npethees.

⁵Nwg muab cov povthawj kws cov Yudas tej vaajntxwv tsaa lug tua tsaj hlawv txi dlaab rua sau tej thaaj huv cov Yudas tej nroog hab tej chaw kws ze lub nroog Yeluxalees, hab taagnrho cov povthawj kws tua tsaj fij rua Npa-aas, fij rua lub nub, fij lub hli hab tej nubqub sau nruab ntug ntab tawm huv tuabsi moog lawm.

⁶Nwg tshem tug mlom quaspuj Aselas tawm huv lub Tuamtsev moog rua saab nrau ntug nroog, muab hlawv rua huv lub Haav Kiloos, hab muab tsoo ua moov mog mog nphoo rua cov tuabneeg txomnyem tej ntxaa.

⁷Nwg rhuav cov namndlav txivndlav tej chaw huv lub Tuamtsev. (Yog qhov chaw kws cov quaspuj tuaj ntus tsho rua cov tuabneeg naav moog pe tug mlom quaspuj Aselas.)

⁸Nwg coj cov povthawj kws nyob huv cov Yudas tej nroog lug nyob huv lub nroog Yeluxalees, hab nwg moog thoob plawg txhua qhov, muab tej thaaj kws cov povthawj tua tsaj hlawv txi dlaab rhuav povtseg huv tuabsi. Nwg rhuav tej thaaj kws luas teev tej dlaab tshis kws nyob ze ntawm lub roojvaag kws yog tug tswv nroog Yausuas ua rua ntawm txujkev kws moog rua huv lub nroog.

⁹Cov povthawj nuav, noj tau tej ncuav tsi xyaw keeb kws luas nqaa tuaj rua lwm cov povthawj, tabsis puab tsi muaj feem moog ua num huv lub Tuamtsev.

¹⁰Vaajntxwv Yauxiyas tseem rhuav lub chaw teev dlaab kws hu ua Taufes huv lub Haav Hinoos, kuas suavdlawg txhaj tsi tau chaw coj puab tej tub tej ntxhais tuaj tua hlawv fij rua tug mlom Maulej lawm.

¹¹Nwg muab cov neeg kws cov Yudas tej vaajntxwv muab fij rua lub nub lawm tso moog, hab muab tej tsheb neeg kws puab caij tuaj pe lub nub hlawv povtseg. (Puab tso tej neeg hab tej tsheb neeg ntawd rua huv lub tshaav puam ntawm lub Tuamtsev, ze lub roojvaag kws nyob tsi dleb ntawm tug nom Nathaas Melej lub tsev.)

¹²Vaajntxwv Yauxiyas rhuav tej thaaj kws cov Yudas tej vaajntxwv ua rua sau Vaajntxwv Ahas lub loog, hab nwg tseem muab tej thaaj kws Vaajntxwv Manaxes ua rua huv ob lub tshaav puam ntawm lub Tuamtsev tsoo tawg ntsoog ntxawg hab coj moog pov rua ntawm lub Haav Kiloos.

¹³Yauxiyas rhuav tej thaaj kws Vaajntxwv Xalumoos ua rua ntawm lub nroog Yeluxalees saab nubtuaj, hab ua rua ntawm lub Roob Txiv Ntoo Roj saab qaabteb kws yog tej chaw pe cov Xidoos tug mlom quaspuj Atates, cov Mau-am tug mlom Khemus, hab cov Amoos tug mlom Maulej.

¹⁴Vaajntxwv Yauxiyas muab tej ncej zeb tsoo tawg taag, ntuv tug mlom quaspuj Aselas povtseg, hab nwg muab tej pobtxhaa tuabneeg coj moog pov rua tej chaw ntawd.

¹⁵Yauxiyas muab lub chaw teev dlaab kws Nenpas tug tub kws yog Vaajntxwv Yelaunpau-aas ua rua huv lub nroog Npethees rhuav povtseg huv tuabsi; Yelaunpau-aas yog tug kws coj cov Yixalayees moog ua txhum. Yauxiyas muab lub thaaj tsoo tawg taag; Phoo Henplais has tas, muab lub thaaj hlawv. hab nwg tseem muab tug mlom quaspuj Aselas hlawv kub nyab taag.

¹⁶Tom qaab ntawd, Yauxiyas saib pum ib cov ntxaa nyob sau lub pov roob; nwg txawm kuas luas moog khawb cov pobtxhaa tuabneeg ntawd lug hlawv rua sau lub thaaj. Nwg ua le nuav kuas lub thaaj tsi huv, lawv le tug cev Vaajtswv lug has tseg thaus Vaajntxwv Yelaunpau-aas sawv ntawm lub thaaj ib saab, nub kws puab ua rooj noj rooj haus. Vaajntxwv Yauxiyas tig moog saib pum tug cev Vaajtswv lug kws qha tej xwm nuav lub ntxaa.

¹⁷Yauxiyas nug has tas, “Lub ntxaa ntawd yog leejtwg lub?” Cov tuabneeg huv Npethees teb has tas, “Yog ib tug cev Vaajtswv lug kws tuaj nraag tebchaws Yudas tuaj lub ntxaa, nwg yog tug kws tuaj qha ua ntej has txug tej kws koj tau ua rua lub thaaj nuav.”

¹⁸Yauxiyas has tas, “Ca nwg nyob nwg, tsi xob khawb tug cev Vaajtswv lug ntawd cov pobtxhaa tawm.” Yog le ntawd, luas txhaj tsi khawb tug cev Vaajtswv lug ntawd cov pobtxhaa, hab tug cev Vaajtswv lug kws nyob peg lub nroog Xamalis cov pobtxhaa.

¹⁹Vaajntxwv Yauxiyas rhuav taagnrho tej chaw teev dlaab kws cov Yixalayees tej vaajntxwv ua tseg rua huv txhua lub nroog thoob plawg tebchaws Yixalayees. Tej kws cov Yixalayees tej vaajntxwv ua ntawd, ua rua tug TSWV chim heev rua puab. Yauxiyas rhuav tej thaaj ntawd ib yaam le nwg rhuav tej kws nyob huv lub nroog Npethees.

²⁰Nwg tua cov povthawj kws teev dlaab rua sau tej thaaj kws puab teev dlaab, hab muab puab tej pobtxhaa moog hlawv rua sau txhua lub thaaj, ces nwg txawm rov lug rua nraag lub nroog Yeluxalees lawm.

²¹Vaajntxwv Yauxiyas has rua cov pejxeem has tas, “Mej ca le ua Kevcai Hlaa Dlhau lawv le tej lug kws sau rua huv phoo ntawv coglug, tug TSWV kws yog mej tug Vaajtswv txhaj tau koob meej.”

²²Txij thaus muaj cov thawjtswj ua cov kaav tsaav tuabneeg Yixalayees lug txug thaus cov Yixalayees hab cov Yudas muaj vaajntxwv, yeej tsi tau muaj leejtwg ua Kevcai Hlaa Dlhau luj npaum le zag nuav.

²³Yauxiyas tub ua vaajntxwv tau kaum yim xyoos lawm, maam rov muaj ua Kevcai Hlaa Dlhau huv lub nroog Yeluxalees.

²⁴Vaajntxwv Yauxiyas ntab cov Yudas kws txawj saib yaig hab saib teg tawm moog, hab tshem tej thaaj xwmkaab, tej mlom hab txhua yaam cuabyeej kws siv teev dlaab tawm huv lub nroog Yeluxalees hab thoob plawg lub tebchaws Yudas moog povtseg, txhaj lawv le tej kevcai kws sau rua huv phoo ntawv kws tug Povthawj Hlub Hilekiyas pum nyob huv lub Tuamtsev.

²⁵Tej vaajntxwv kws xub kaav ua ntej Yauxiyas, tsi muaj ib tug kws ua zoo npaum le Yauxiyas. Nwg ua tug TSWV teg num kawg sab kawg ntsws, kawg dlaag zug, hab ua lawv le Mauxes tej kevcai; txij thaus ntawd lug tsi muaj ib tug vaajntxwv ua zoo npaum le nwg lawm.

²⁶Txawm le ntawd los tug TSWV tseem chim rua cov Yudas, vim tej kws Vaajntxwv Manaxes ua, hab naj nub nua los tug TSWV txujkev chim tseem tsi tau xaam moog taag.

²⁷Tug TSWV has tas, “Kuv yuav ua rua cov Yudas ib yaam le kuv tau ua rua cov Yixalayees lawm. Kuv yuav ntab kuas cov Yudas tawm ntawm kuv moog, ib yaam le kuv tau ntab cov Yixalayees, hab kuv yuav muab lub nroog Yeluxalees kws kuv xaiv ca, hab lub Tuamtsev kws kuv has tas yog lub chaw rua suavdlawg tuaj pehawm kuv tso povtseg.”

²⁸Dlua le lwm yaam kws Vaajntxwv Yauxiyas ua, puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

²⁹Tam kws Yauxiyas ua vaajntxwv kaav lub tebchaws Yudas, Falaus Nekaus kws Yog cov Iziv tug vaajntxwv coj tubrog tuaj paab tug vaajntxwv kws kaav lub tebchaws Axilias tua rog peg tug Dlej Efalates. Vaajntxwv Yauxiyas txawm tuaj zuv kev tua Falaus Nekaus ntawm Menkidaus, Yauxiyas txhaj raug tua tuag rua huv tshaav rog lawm.

³⁰Nwg cov tubrog txhaj muab nwg tsaws rua sau tsheb neeg thauj rov lug rua huv lub nroog Yeluxalees, hab coj nwg moog log rua ntawm cov vaajntxwv lub toj ntxaas. Cov Yudas txhaj le tsaa Yauxiyas tug tub Yehau-ahas ua vaajntxwv hloov nwg chaw.

³¹Thaus Yehau-ahas ua vaajntxwv kaav lub tebchaws Yudas nwg noobnyoog muaj neeg nkaum peb xyoos, hab nwg nyob huv lub nroog Yeluxalees kaav tau peb hlis. Nwg nam hu ua Hamutas hab yog Yelemis kws nyob huv lub nroog Linas tug ntxhais.

³²Yehau-ahas ua txhum rua tug TSWV, hab nwg ua phem ua qas ib yaam le nwg cov yawmkoob ua.

³³Nwg kev tswjfwm tebchaws xaus rua thaus Falaus Nekaus kws yog cov Iziv tug vaajntxwv nteg nwg moog kaw rua huv lub nroog Lilas huv tebchaws Hamas, hab kuas cov Yudas them xyaa txheeb tsib puas choj nyaj hab xyaa caum tsib choj kub rua nwg.

³⁴Falaus Nekaus tsaa Yauxiyas tug tub Eliyakees ua vaajntxwv kaav lub tebchaws Yudas hloov nwg txiv Yauxiyas chaw, hab muab Eliyakees hloov npe hu ua Yehauyakees. Vaajntxwv Nekaus coj Yehau-ahas moog rua nraag tebchaws Iziv, hab nwg tuag rua nraag lawm.

³⁵Vaajntxwv Yehauyakees sau se ntawm cov pejxeem kuas tau nyaj hab kub lug txwm nkaus le Falaus kws yog cov Iziv tug vaajntxwv kuas puab them.

³⁶Thaus Yehauyakees ua vaajntxwv kaav lub tebchaws Yudas nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau kaum ib xyoos. Nwg nam hu ua Xenpidas, hab yog Padayas kws nyob huv lub nroog Lumas tug ntxhais.

³⁷Yehauyakees ua txhum rua tug TSWV, hab ua phem ua qas ib yaam le nwg cov yawmkoob ua.