Read Hmong Njua 2 Vaajntxwv 24 Bible Online

2 Vaajntxwv 24 - Hmong Njua bible

2 Vaajntxwv 24

¹Thaus kws Yehauyakees ua vaajntxwv, Vaajntxwv Nenpukajnexales kws kaav lub tebchaws Npanpiloos tuaj tua lub tebchaws Yudas, hab Yehauyakees zwm rua Nenpukajnexales tau peb xyoos; tabsis tom qaab ntawd Yehauyakees tau ntxeev sab rua Nenpukajnexales.

²Tug TSWV tso cov Npanpiloos, cov Xilias, cov Mau-am hab cov Amoos tuaj tua Yehauyakees hab rhuav lub tebchaws Yudas puamtsuaj taag lawv le tug TSWV tau has rua nwg cov tubkhai kws yog cov cev Vaajtswv lug has tas nwg yuav ua le ntawd.

³Tej nuav muaj lawv le tug TSWV tej lug kws has tas, nwg yuav muab cov Yudas ntab tawm ntawm nwg moog, vim tej kev txhum kws Vaajntxwv Manaxes ua,

⁴hab tua cov tuabneeg kws tsi muaj txim. Tug TSWV yeej zaam tsi tau lub txim kws Manaxes tua tuabneeg ntawd le.

⁵Txhua yaam kws Yehauyakees ua puavleej muab sau ca rua huv phoo ntawv keebkwm kws teev cov Yudas cov vaajntxwv lub neej lawm.

⁶Yehauyakees tuag, hab nwg tug tub Yehauyakhees ua vaajntxwv hloov nwg chaw.

⁷Tug vaajntxwv kws kaav lub tebchaws Iziv hab nwg cov tubrog tawm tsi tau huv tebchaws Iziv moog rua qhov twg le, rua qhov tug vaajntxwv kws kaav lub tebchaws Npanpiloos tuaj txeeb tau hab kaav taagnrho cheebtsaam kws yog cov Iziv tug, txij ndlua ntawm tug Dlej Efalates moog ti nkaus rua ntawm cov Iziv tug nrimteb saab qaumteb.

⁸Thaus Yehauyakhees ua vaajntxwv kaav lub tebchaws Yudas nwg noobnyoog muaj kaum yim xyoo, hab nwg nyob huv lub nroog Yeluxalees kaav tau peb hlis. Nwg nam hu ua Nehusetas hab yog Enathaas kws nyob huv lub nroog Yeluxalees tug ntxhais.

⁹Nwg u txhum rua tug TSWV, hab ua phem ua qas ib yaam le nwg txiv ua.

¹⁰Lub sijhawm ntawd Vaajntxwv Nenpukajnexales kws kaav lub tebchaws Npanpiloos cov thawj tubrog tau coj tubrog tuaj vij lub nroog Yeluxalees.

¹¹Thaus kws cov tubrog taabtom vij lub nroog, Vaajntxwv Nenpukajnexales kws kaav lub tebchaws Npanpiloos txawm tuaj txug huv lub nroog Yeluxalees;

¹²ces Vaajntxwv Yehauyakhees hab nwg nam, nwg cov tub, nwg cov numtswv hab cov kws ua num huv lub loog, txhaj zwm rua cov Npanpiloos. Nenpukajnexales ua vaajntxwv kaav lub tebchaws Npanpiloos tau yim xyoo rua thaus kws nwg nteg Yehauyakhees,

¹³hab nwg nqaa tej khoom tseemceeb huv lub Tuamtsev hab huv lub loog moog rua tebchaws Npanpiloos lawv le tug TSWV tau has tseg lawm has tas, Nenpukajnexales yuav tuaj tsoo hab nqaa taagnrho tej khoom tseemceeb kws Vaajntxwv Xalumoos muab kub ua rua huv lub Tuamtsev moog.

¹⁴Nwg coj cov tuabneeg huv lub nroog Yeluxalees, vaajntxwv tsev tuabneeg hab cov thawjcoj moog huv tuabsi, xaam taagnrho muaj kaum txheeb leej. Dlua le ntawd nwg tseem coj cov tuabneeg kws muaj tswvyim ua txhua yaam num, hab cov kws tooj kws hlau moog huv tuabsi. Nwg tsuas tseg cov tuabneeg pluag nyob huv lub tebchaws Yudas xwb.

¹⁵Nenpukajnexales coj Vaajntxwv Yehauyakhees, nwg nam, nwg cov quaspuj, nwg cov numtswv hab cov Yudas tej thawjcoj moog rua tim tebchaws Npanpiloos lawm.

¹⁶Cov tuabneeg tseemceeb kws Nenpukajnexales coj moog rua tebchaws Npanpiloos muaj xyaa txheeb leej, hab ib txheeb leej cov kws muaj tswvyim ua txhua yaam num, losloov cov kws tooj kws hlau huv tuabsi, cov nuav puavleej yog cov khov kho hab ua taug tubrog xwb.

¹⁷Nenpukajnexales tsaa Yehauyakhees tug txiv ntxawm Mataniyas ua vaajntxwv kaav lub tebchaws Yudas, hab muab Mataniyas hloov npe hu ua Xedekiyas.

¹⁸Thaus Xedekiyas ua vaajntxwv kaav lub tebchaws Yudas nwg noobnyoog muaj neeg nkaum ib xyoos, hab nwg nyob huv lub nroog Yeluxalees kaav tau kaum ib xyoos. Nwg nam hu ua Hamutas hab yog Yelemis kws nyob huv lub nroog Linas tug ntxhais.

¹⁹Vaajntxwv Xedekiyas ua txhum rua tug TSWV, ib yaam le Vaajntxwv Yehauyakhees ua.

²⁰Tug TSWV chim heev rua cov tuabneeg kws nyob huv lub nroog Yeluxalees hab huv tebchaws Yudas, nwg txhaj muab puab ntab tawm ntawm nwg moog lawm.