Read Hmong Njua 2 Vaajntxwv 25 Bible Online

2 Vaajntxwv 25 - Hmong Njua bible

2 Vaajntxwv 25

¹Xedekiyas ntxeev sab rua Vaajntxwv Nenpukajnexales kws kaav lub tebchaws Npanpiloos. Yog le ntawd, Nenpukajnexales txhaj txhij tubrog tuaj tua lub nroog Yeluxalees, thaus lub kaum hli ntuj, nub xab kaug kws Xedekiyas ua vaajntxwv kaav lub tebchaws Yudas tau cuaj xyoos. Puab tuaj tsuam yeej rua ntawm ntug nroog, hab xov ib txheej ntsaa yeej thaiv puagncig lub nroog Yeluxalees,

²hab vij lub nroog moog txug thaus Xedekiyas ua vaajntxwv tau kaum ib xyoos.

³Xyoo ntawd thaus lub plaub hlis ntuj nub xab cuag, cov pejxeem tsi muaj zaub mov noj hab suavdlawg tshaib plaab heev,

⁴hab tug ntsaa yeej kws thaiv lub nroog raug luas tsoo qee ntu pob taag. Txawm yog cov tubrog Npanpiloos tub vij lub nroog taag lawm los thaus ib taag mo vaajntxwv hab nwg cov tubrog tseem tsiv tawm moog hlaa vaajntxwv lub vaaj, moog rua ntawm lub roojvaag kws nyob kis nruab nraab ntawm ob tug ntsaa yeej moog rua tom lub Haav Yauladees lawm.

⁵Tabsis cov tubrog Npanpiloos caum puab qaab moog nteg tau Vaajntxwv Xedekiyas ntawm lub taj nraag kws ze lub nroog Yelikaus hab nwg cov tubrog tsiv taag tso nwg tseg.

⁶Thaus puab nteg tau Xedekiyas lawm, puab coj nwg lug cob rua Vaajntxwv Nenpukajnexales ntawm lub nroog Lilas huv cheebtsaam Hamas hab Nenpukajnexales txav txim rua Xedekiyas qhov ntawd.

⁷Nenpukajnexales muab Xedekiyas cov tub tua taabmeeg Xedekiyas, hab Nenpukajnexales kuas luas muab Xedekiyas ob lub qhovmuag kaus povtseg, puab muab saw hlau khi nwg coj moog rua tim tebchaws Npanpiloos lawm.

⁸Thaus Nenpukajnexales ua vaajntxwv kaav lub tebchaws Npanpiloos tau kaum cuaj xyoos, xyoo ntawd lub tsib hlis ntuj nub xab xyaa, Nenpuxaladaas kws yog vaajntxwv tug tuavxaam hab yog tug thawj tubrog, txawm coj vaajntxwv cov tubrog tuaj rua huv lub nroog Yeluxalees.

⁹Nwg hlawv tug TSWV lub Tuamtsev, lub loog, cov numtswv tej vaaj tse, hab taagnrho tej tsev huv lub nroog Yeluxalees kub nyab taag huv tuabsi,

¹⁰hab nwg cov tubrog muab tej ntsaa yeej tsoo pob taag.

¹¹Nenpuxaladaas nteg cov tuabneeg kws tseem tshuav nyob huv lub nroog Yeluxalees, cov kws muaj tswvyim ua txhua yaam num hab coj taagnrho cov kws lug thawj cov Npanpiloos moog rua tim tebchaws Npanpiloos lawm.

¹²Tabsis nwg tseg cov tuabneeg pluag kws tsi muaj laj tsi muaj teb nyob rua huv tebchaws Yudas, hab nwg kuas puab ca le moog ua luas tej laj tej teb hab tu luas tej vaaj txiv maab txiv ntoo.

¹³Cov tuabneeg Npanpiloos tsoo ob tug ncej tooj, tej tsheb, hab lub yag tooj kws nyob ntawm lub Tuamtsev, coj moog rua tim tebchaws Npanpiloos lawm.

¹⁴Hab puab sau taagnrho tej dluav yawm tshauv, tej thoob rau tshauv thaus puab tu lub thaaj, tej txab txav teebxeeb, cov phab kws rau ntshaav tsaj, tej taig kws hlawv moov tshuaj tsw qaab, hab tej taig tooj kws siv huv lub Tuamtsev nqaa moog huv tuabsi lawm.

¹⁵Puab coj txhua yaam kws muab nyaj muab kub ua, tsi has tej taig, tej yag kws rau ncaig tawg,

¹⁶hab txhua yaam kws Vaajntxwv Xalumoos muab tooj ua tseg rua huv lub Tuamtsev, tsi has ob tug ncej tooj, cov tsheb, hab lub rhawv tooj luj, tej ntawd nyaav heev tsi muaj ib raab teev kws yuav luj tau le.

¹⁷Ob tug ncej tooj ntawd sis luag zog: ib tug twg sab kaum yim tshim, hab sau ob lub hauv ncej luas ua ob lub paaj sab peb tshim txawb rua sau, luas muab xuv tooj qhab ua saw rig puagncig ob lub hau, hab nchuav ua ob tshaam txiv ntsab pobkws dlai rua sau.

¹⁸Nenpuxaladaas kws yog tug thawj tubrog nteg Xelayas kws yog tug Povthawj Hlub, Xefaniyas kws yog tug povthawj yau hab peb leeg kws tuav num tseemceeb huv lub Tuamtsev,

¹⁹nwg nteg tug thawj tubrog kws saib taagnrho cov tubrog, vaajntxwv tsib tug tuavxaam kws tseem nyob huv lub nroog, tug lwm thawj tubrog kws txheeb cov tubrog tej ntaub ntawv hab rau caum leej tuabneeg tseemceeb kws nyob huv lub nroog.

²⁰Nenpuxaladaas coj puab moog cob rua tug Vaajntxwv kws kaav lub tebchaws Npanpiloos ntawm lub nroog Lilas

²¹huv cheebtsaam Hamas. Vaajntxwv kuas luas muab puab ntaus hab tua rua ntawd. Yog le ntawd, luas txhaj coj cov Yudas moog rua tebchaws Npanpiloos lawm.

²²Vaajntxwv Nenpukajnexales kws kaav lub tebchaws Npanpiloos tsaa Nkedaliyas kws yog Ahikas tug tub hab yog Safas tug xeebntxwv ua nom kaav lub tebchaws Yudas, hab saib cov Yudas kws tsi raug luas nteg moog rua tim tebchaws Npanpiloos.

²³Thaus cov Yudas cov numtswv hab cov tubrog kws tsi kaam moog thawj hab zwm rua cov Npanpiloos nov has tas, tug vaajntxwv kws kaav lub tebchaws Npanpiloos tsaa Nkedaliyas ua nom saib cov Yudas lawm, puab txawm tuaj cuag nwg huv lub nroog Mixepas; cov numtswv ntawd yog Nethaniyas tug tub Yisamayees, Kale-as tug tub Yauhanaas, Xelayas tug tub Tahumes kws nyob huv lub nroog Netaufas, hab Yexaniyas kws nyob huv lub nroog Ma-akas.

²⁴Nkedaliyas has rua puab tas, “Kuv has rua mej has tas, mej tsi xob ntshai cov Npanpiloos tej numtswv. Mej ca le nyob tuabywv huv lub tebchaws nuav, hab ua num rua tug vaajntxwv kws kaav lub tebchaws Npanpiloos, mej txhaj yuav tau nyob kaaj sab lug.”

²⁵Xyoos ntawd, thaus lub xyaa hli ntuj, Yisamayees kws yog Nethaniyas tug tub hab yog Elisamas tug xeebntxwv kws yog caajceg vaajntxwv, txawm coj kaum leej tubrog tuaj tua Nkedaliyas, hab nwg tseem muab cov Yixalayees hab cov Npanpiloos kws nrug Nkedaliyas nyob huv lub nroog Mixepas tua tuag taag huv tuabsi.

²⁶Cov Yixalayees, tsi has cov muaj cov pluag hab cov thawj tubrog txhaj tsiv moog taag rua nraag tebchaws Iziv lawm; vim puab ntshai cov Npanpiloos.

²⁷Xyoo kws Evimeludas pib ua vaajntxwv kaav lub tebchaws Npanpiloos, nwg hlub Vaajntxwv Yehauyakhees kws kaav lub tebchaws Yudas, nwg txhaj tso Yehauyakhees tawm huv tsev lojcuj. Suav txij nub kws luas nteg Yehauyakhees huv tebchaws Yudas moog txug nub kws luas tso nwg tawm huv tsev lojcuj lug, yog tau peb caug xyaa xyoo rua lub kaum ob hli ntuj nub neeg nkaum xyaa.

²⁸Vaajntxwv Evimeludas ua zoo rua Yehauyakhees hab muab nwg saib hlub dlua lwm tug vaajntxwv kws luas nteg moog rua huv tebchaws Npanpiloos.

²⁹Yog le ntawd, luas txhaj muab dlua ib cev rig tsho rua Yehauyakhees naav, hloov cev kws nwg naav nyob huv tsev lojcuj, hab nwg naj nub tau nrug vaajntxwv noj mov sau vaajntxwv lub rooj moog taag nwg simneej.

³⁰Thaus kws Yehauyakhees tseem ua neej nyob, Vaajntxwv Evimeludas kws kaav lub tebchaws Npanpiloos naj nub muab nyaj rua Yehauyakhees yuav noj yuav naav kuas txaus moog txug nub kws taag nwg simneej.