Read Hmong Njua 2 Vaajntxwv 3 Bible Online

2 Vaajntxwv 3 - Hmong Njua bible

2 Vaajntxwv 3

¹Thaus Yehausafas ua vaajntxwv kaav tebchaws Yudas tau kaum yim xyoo lawm, Ahaj tug tub Yaulaas maam le ua vaajntxwv kaav tebchaws Yixalayees hab nwg nyob huv lub nroog Xamalis kaav tau kaum ob xyoos.

²Yaulaas ua txhum rua tug TSWV, tabsis nwg tsi ua txhum luj npaum le nwg txiv lossis nwg nam Yexenpees; nwg muab tug ncej mlom Npa-aas kws nwg txiv ua lug teev rhuav povtseg.

³Txawm le ntawd los nwg pheej coj cov Yixalayees moog ua txhum tsi tseg, ib yaam le Nenpas tug tub kws yog Vaajntxwv Yelaunpau-aas kws nyob ua ntej nwg lawm ua.

⁴Vaajntxwv Mesas kws kaav tebchaws Mau-am muaj yaaj coob heev, txhua xyoo twg nwg coj ib puas txheeb tug mivnyuas yaaj hab txav ib puas txheeb tug yaaj tej plaub coj tuaj pub rua cov Yixalayees tug vaajntxwv.

⁵Tabsis thaus Vaajntxwv Ahaj kws kaav tebchaws Yixalayees tuag lawm, Mesas txawm ntxeev sab rua cov Yixalayees.

⁶Thaus ntawd Vaajntxwv Yaulaas txawm tawm huv lub nroog Xamalis moog txhij taagnrho nwg cov tubrog tuaj ua ke.

⁷Nwg has moog rua Vaajntxwv Yehausafas kws kaav tebchaws Yudas has tas, “Tug vaajntxwv kws kaav tebchaws Mau-am tau ntxeev sab rua kuv lawm; koj puas paab kuv moog tua nwg?” Vaajntxwv Yehausafas teb has tas, “Kuv txaus sab yuav paab koj. Kuv cov tubrog hab kuv cov neeg los kuj ib yaam le yog koj le.

⁸Peb yuav moog txujkev twg moog tua puab?” Yaulaas teb has tas, “Peb yuav tshuv kev moog rua tom taj suabpuam Edoos tuaj.”

⁹Yog le ntawd, cov Yudas tug vaajntxwv hab cov Edoos tug vaajntxwv txhaj nrug Vaajntxwv Yaulaas moog. Thaus puab moog tau xyaa nub ke, tej dlej kws puab npaaj moog tsi tshuav rua puab cov tubrog lossis puab cov tsaj haus le lawm.

¹⁰Vaajntxwv Yaulaas has tas, “Peb tuag lauj! Tug TSWV muab peb peb leeg nuav cob rua tug vaajntxwv kws kaav tebchaws Mau-am teg lawm.”

¹¹Vaajntxwv Yehausafas nug has tas, “Txawm tsi muaj ib tug cev Vaajtswv lug nyob ntawm nuav paab peb nug tug TSWV le los?” Vaajntxwv Yaulaas ib tug thawj tubrog teb has tas, “Elisas kws yog Safas tug tub nyob ntawm nuav. Nwg yog tug kws paab Eliyas.”

¹²Vaajntxwv Yehausafas has tas, “Elisas yog ib tug cev Vaajtswv lug tseeb.” Yog le ntawd, peb tug vaajntxwv ntawd txhaj moog cuag Elisas.

¹³Elisas has rua tug vaajntxwv kws kaav tebchaws Yixalayees tas, “Vim le caag koj txhaj kuas kuv paab koj? Koj ca le moog nug cov cev Vaajtswv lug kws koj nam hab koj txiv obtug ibtxwm nug.” Yaulaas teb has tas, “Tsi tau, rua qhov tug TSWV muab peb peb tug vaajntxwv nuav cob rua tug vaajntxwv kws kaav tebchaws Mau-am teg lawm.”

¹⁴Elisas teb has tas, “Kuv coglug rua tug TSWV kws muaj sa nyob kws kuv pehawm has tas, yog kuv tsi fwm Vaajntxwv Yehausafas kws kaav tebchaws Yudas kws tuaj paab koj, ces kuv yeej tsi quavntsej koj le.

¹⁵Ca le moog hu ib tug kws txawj ntaus nkauj nogncaas tuaj cuag kuv taamsim nuav.” Thaus tug ntawd tuaj txug, nwg ntaus nwg lub nkauj nogncaas, ces tug TSWV lub fwjchim txawm lug kaav hlo Elisas,

¹⁶hab Elisas has tas, “Tug TSWV has le nuav: ‘Mej ca le khawb lub haav qhuav nuav kuas ua tej lub qhov.

¹⁷Txawm yog nwgnuav mej tsi tau pum naag lug hab tsi nov cua ntsawj le los cov qhov kws mej khawb yuav muaj dlej puv nkaus rua mej, mej tej nyuj tej neeg thauj nraa hab lwm yaam tsaj txhu yuav tau dlej haus nplua mag.’ ”

¹⁸Hab Elisas has ntxiv tas, “Tej nuav yoojyim heev rua tug TSWV ua. Tsi taag le ntawd xwb, nwg tseem yuav pub kuas mej tua yeej cov Mau-am hab.

¹⁹Mej yuav moog tua hab txeeb tau cov Mau-am tej nroog zoo kws muaj ntsaa yeej thaiv khov kho; mej yuav muab puab tej txiv ntoo ntuv, txhub puab tej qhovdlej, hab muab pobzeb pov kuas puv nkaus puab tej teb kws zoo qoob kuas puamtsuaj taag huv tuabsi.”

²⁰Nub tom qaab thaus sawv ntxuv kws yog lub caij hlawv khoom fij, txawm muaj dlej ndlwg peg Edoos lug rua huv lub tebchaws txhua qhov.

²¹Thaus cov Mau-am nov has tas, muaj peb tug vaajntxwv tuaj tua puab, ces txhua tug txivneej kws ua taug rog, tsi has cov laug cov hluas puavleej raug hu kuas moog zuv ntawm tug nrimteb.

²²Nub tom qaab thaus sawv ntxuv, cov Mau-am pum lub nub ci rua cov dlej, ua rua dlej lab ploog ib yaam le ntshaav.

²³Cov Mau-am has tas, “Yog ntshaav los sav! Yeej yog peb tug vaajntxwv kws yog peb cov yeebncuab, cov tubrog rov sis tua tuag ntaag! Peb ca le moog fuab tej khoom huv puab lub yeej!”

²⁴Tabsis thaus puab moog txug ntawm lub yeej, cov Yixalayees txawm sawv pis tseeg lug tua puab, ua rua puab thim hlo rov qaab. Cov tubrog Yixalayees caum qaab moog tua cov Mau-am

²⁵hab rhuav puab tej nroog puamtsuaj taag. Thaus cov Yixalayees lug txug ntawm cov Mau-am tej teb kws zoo qoob, ces cov tubrog Yixalayees txhua tug txawm khaws pobzeb pov puv nkaus tej teb ntawd; txhub puab tej qhovdlej, hab ntuv puab tej txiv ntoo taag dlu lug. Thaus kawg tsuas tshuav lub tuamceeb nroog Kis Heles xwb los tseem muaj dlua ib paab tubrog kws txawj ntaus zeg hlua tuaj vij hab tua lub nroog ntawd.

²⁶Thaus cov Mau-am tug vaajntxwv pum has tas nwg swb lawm, nwg txawm coj xyaa pua leej tubrog kws txawj tua ntaaj nrug nwg pluav ntxhas tsiv kuas dlhau cov yeebncuab moog cuag tug vaajntxwv kws kaav tebchaws Xilias. Tabsis nwg moog tsi dlhau.

²⁷Nwg txhaj muab nwg tug tub hlub kws yuav ua vaajntxwv hloov nwg chaw, tua fij rua cov Mau-am tug mlom sau tug ntsaa yeej kws thaiv lub nroog. Txawm muaj xwm ua rua cov Yixalayees ntshai, puab txhaj tso lub nroog ntawd tseg rov qaab lug rua huv puab lub tebchaws lawm.