Read Hmong Njua 2 Vaajntxwv 4 Bible Online

2 Vaajntxwv 4 - Hmong Njua bible

2 Vaajntxwv 4

¹Muaj ib tug puj ntsuag kws nwg tug quasyawg yog ib tug cev Vaajtswv lug, tuaj cuag Elisas hab has tas, “Kuv tug quasyawg tuag lawm, koj yeej paub has tas nwg fwm Vaajtswv heev, tabsis tug kws peb tshuav nqe yuav tuaj coj kuv ob tug tub moog ua nwg qhev.”

²Elisas nug has tas, “Koj xaav kuas kuv paab dlaabtsi? Qha rua kuv saib, koj muaj dlaabtsi nyob huv tsev?” Tug puj ntsuag ntawd teb has tas, “Kuv tsi muaj dlaabtsi le, tsuas muaj ib hub roj miv miv xwb.”

³Elisas has tas, “Koj moog qev tej tuabneeg zej zog tej hub kws khoom ntau lub lug, tsi xob qev lub puav xwb,

⁴ces koj, hab koj ob tug tub ca le moog rua huv tsev, kaw qhovrooj rua, hab laub roj rua huv cov hub ntawd txhua lub. Thaus lub hub twg puv lawm muab txawb rua ib caag.”

⁵Tug quaspuj ntawd txawm rov moog tsev, nwg hab nwg ob tug tub kaw qhovrooj rua hab muab lub hub roj miv miv lug laub rua huv cov hub kws ob tug tub moog qev lug rua nwg ntawd.

⁶Thaus cov hub puv taag txhua lub lawm leej nam has tas, “Muab dlua ib lub hub lug hab.” Ob tug tub teb has tas, “Taag rua lub ko lawm.” Ces roj txawm tu nrho tsi lug lawm.

⁷Tug quaspuj ntawd txhaj rov moog cuag Elisas kws yog tug cev Vaajtswv lug. Elisas has rua nwg tas, “Koj rov moog tsev muab cov roj ntawd muag, muab cov nyaj ntawd them mej tej nuj nqes, hab cov kws seem yeej yuav txaus mej cov nam tub siv moog yaav tom ntej.”

⁸Muaj ib nub Elisas moog rua huv lub nroog Sunees. Muaj ib tug quaspuj npluanuj nyob huv lub nroog ntawd. Nwg txawm hu Elisas moog noj mov huv nwg tsev. Txij thaus ntawd lug, txhua zag kws Elisas dlua kev tuaj huv lub nroog ntawd, nwg pheej moog su huv tug quaspuj ntawd lub tsev.

⁹Tug quaspuj ntawd has rua nwg tug quasyawg tas, “Kuv paub has tas tug txivneej kws naj zag tuaj huv wb tsev nuav, yog Vaajtswv ib tug tuabneeg kws ncaaj nceeg.

¹⁰Wb ca le txuas ib chaav rua txheej tsev sau, muab txaaj, rooj, tog hab teeb moog tso rua huv chaav ntawd, thaus nwg tuaj saib wb, nwg txhaj tau chaw pw.”

¹¹Muaj ib nub Elisas txawm rov moog rua huv lub nroog Sunees, hab moog pw rua sau nwg chaav tsev ntawd.

¹²Elisas has kuas nwg tug tubkhai Nkehaxis moog hu tug quaspuj ntawd lug. Thaus tug quaspuj ntawd lug txug,

¹³Elisas has rua Nkehaxis has tas, “Koj nug tug quaspuj ntawd saib nwg xaav kuas kuv ua dlaabtsi rua nwg, rua qhov wb pheej tuaj taabkaum nwg, hab nwg tau ua ntau yaam rua wb lawm. Tej zag nwg xaav kuas kuv moog thov vaajntxwv lossis tug thawj tubrog paab nwg ib yaam dlaabtsi.” Tug quaspuj ntawd teb has tas, “Kuv nyob ntawm nuav los kuv kuj nrug luas muaj noj muaj haus hab.”

¹⁴Elisas nug Nkehaxis has tas, “Yog le ntawd kuv yuav paab nwg dlaabtsi txhaj zoo?” Nkehaxis teb has tas, “Qhov tseemceeb mas nwg tsi muaj ib tug mivnyuas le, hab nwg tug quasyawg los laug lawm.”

¹⁵Elisas has tas, “Koj moog has kuas nwg lug ntawm nuav.” Tug quaspuj ntawd txhaj lug sawv ntawm qhovrooj.

¹⁶Elisas has rua nwg tas, “Lwm xyoo lub caij nuav koj yuav tau ib tug mivtub lug puag.” Nwg teb Elisas has tas, “Tug tswv kws yog Vaajtswv tug tuabneeg, koj tsi xob dlaag kuv le ko!”

¹⁷Ces tug quaspuj ntawd txawm xeeb tub, hab xyoo tom qaab nwg txawm yug tau ib tug mivtub lawv le lub caij kws Elisas tau teem ca ntawd tag.

¹⁸Tau ob peb xyoos tom qaab thaus lub caij sau qoob, muaj ib taagkig tug mivtub ntawd txawm moog cuag nwg txiv, rua qhov nwg txiv moog saib cov tubqhe hlais nplej nraag teb lawm.

¹⁹Thaus tug mivtub ntawd moog txug, nwg quaj rua nwg txiv has tas, “Txiv, mob mob kuv taubhau! Mob mob kuv taubhau!” Leej txiv txhaj has rua ib tug tubqhe has tas, “Ca le puag tug mivtub moog rua nwg nam.”

²⁰Tug tubqhe txhaj le puag tug mivtub moog rua leej nam, hab leej nam puag tug mivtub rua ntawm nwg xubndlag moog txug thaus taav su, ces tug mivtub txawm tu sav lawm.

²¹Leej nam puag tug mivtub moog tso rua sau Elisas chaav tsev, hab muab tso rua sau txaaj, nwg tawm lug hab kaw qhovrooj.

²²Nwg hu nwg tug quasyawg has tas, “Koj kuas ib tug tubkhai caab ib tug neeg luav lug rua kuv, kuv maaj yuav moog cuag Elisas kws yog tug cev Vaajtswv lug hab kuv maam le rov lug tsev.”

²³Nwg tug quasyawg nug has tas, “Vim le caag koj txhaj yuav moog nub nua? Nub nua tub tsi yog Nub Xanpataus lossis Nub Hli Xab ne?” Tabsis tug quaspuj teb has tas, “Txawm le ntawd los kuv yuav moog.”

²⁴Nwg has kuas tug tubkhai muab eeb pem rua sau tug neeg luav rua nwg caij, hab nwg has rua tug tubkhai has tas, “Koj ca le caab tug neeg luav nuav moog ceev nrooj, thaus twg kuv kuas su maam le su.”

²⁵Yog le ntawd, nwg txhaj moog rua peg lub Roob Kalemees kws Elisas nyob. Thaus Elisas pum tug quaspuj ntawd tuaj txug tim u, nwg txawm has rua nwg tug tubkhai Nkehaxis has tas, “Koj saib tid saib, tug quaspuj kws nyob huv Sunees taabtom taug kev tuaj txug tid.

²⁶Koj kawgkag ca le moog tog nwg hab nug saib nwg, nwg tug quasyawg hab nwg tug mivtub puas noj qaab nyob zoo?” Nwg teb Nkehaxis has tas, “Peb puavleej noj qaab nyob zoo.”

²⁷Thaus nwg lug txug ntawm Elisas, nwg txawm txhus caug ndlua rua ntawm Elisas xubndlag hab qawm lag Elisas ob txhais kutaw. Nkehaxis txaav zog moog yuav muab nwg nqug tawm, tabsis Elisas has tas, “Koj tsi xob nqug nwg, koj tsi pum has tas, nwg nyuaj sab kawg le los? Tabsis tug TSWV tsi tau qha zaaj nuav rua kuv paub le.”

²⁸Tug quaspuj ntawd has rua Elisas has tas, “Kuv tug tswv, kuv tsi tau taij koj thov Vaajtswv kuas kuv muaj tub, thaus ntawd kuv tub has rua koj has tas, koj tsi xob laam has kuas kuv ca sab nua ne?”

²⁹Elisas has rua Nkehaxis has tas, “Koj ca le nqaa kuv tug paas nreg nuav ceev nrooj moog, koj moog ntsib leejtwg los koj tsi xob hu nwg, hab leejtwg hu koj los koj tsi xob teb. Koj nqaa kuv tug paas nreg ncaaj nraim moog rua huv tsev hab muab tso rua sau tug mivtub lub ntsejmuag.”

³⁰Tabsis tug quaspuj ntawd has rua Elisas has tas, “Kuv coglug rua tug TSWV kws muaj sa nyob hab rua koj has tas, kuv yuav tsi ncaim koj moog qhov twg le.” Ces Elisas hab tug quaspuj ntawd txhaj ua ke lawv Nkehaxis qaab moog.

³¹Nkehaxis dlha ua ntej moog txug hab muab Elisas tug paas nreg tso rua sau tug mivtub lub ntsejmuag, tabsis tsi nov tug mivtub nroo lossis xeev le. Nkehaxis txhaj rov lug qha rua Elisas has tas, “Tug mivtub tseem tsi tau xeev le.”

³²Thaus Elisas moog txug lawm, nwg tuab leeg nce moog rua sau chaav tsev ntawd hab nwg pum tug mivtub tuag xyaab leeg rua sau txaaj.

³³Nwg txawm kaw nkaus qhovrooj hab thov tug TSWV.

³⁴Nwg qhau cev hlo rua sau tug mivtub, qhovncauj npuab qhovncauj, qhovmuag npuab qhovmuag, hab teg npuab teg. Thaus nwg qhau cev hlo rua sau tug mivtub le ntawd, tug mivtub lub cev txawm suv tuaj.

³⁵Elisas sawv ncig moog ncig lug huv chaav tsev ntawd, hab rov qhau cev hlo rua sau tug mivtub dlua ib zag ntxiv. Tug mivtub txawm txhaam xyaa zag hab qheb hlo qhovmuag.

³⁶Elisas has kuas Nkehaxis hu leej nam lug. Thaus leej nam lug txug, Elisas has rua nwg has tas, “Ca le coj koj tug mivtub moog.”

³⁷Leej nam txawm txhus caug ndlua ntawm Elisas kutaw ua ntsejmuag ti nkaus aav, hab puag nwg tug mivtub moog lawm.

³⁸Thaus muaj kev tshaib nqhes thoob lub tebchaws, Elisas rov lug txug huv Nkilenkas. Thaus Elisas taabtom qha ib paab cevlug, nwg txawm has rua nwg tug tubkhai Nkehaxis has tas, “Muab lub laujkaub txawb rua huv qhovcub, hab ua zaub rua cov cev Vaajtswv lug noj.”

³⁹Puab cov ntawd muaj ib tug txawm moog dle txumlom tom teb. Nwg pum ib tsob taub ab qus, ces nwg txawm dle tau ib tsuag lug hab muab hau rua huv laujkaub, puab tub tsi paub has tas yog zaub dlaabtsi.

⁴⁰Puab txawm muab dlaus lug rua suavdlawg noj. Thaus puab noj cov zaub ntawd, puab has rua Elisas has tas, “Xwbfwb, muaj taug tshuaj nyob huv laujkaub zaub nuav!” Ces puab txawm tsi noj.

⁴¹Elisas has kuas puab muab ib cov moov nplej lug rua nwg, nwg txawm muab nphoo rua huv lub laujkaub hab has tas, “Muab dlaus moog rua suavdlawg noj.” Ces cov zaub txawm tsi muaj taug tshuaj lawm.

⁴²Muaj ib zag, ib tug txivneej nyob huv lub zog Npa-aas Salisas tuaj, nwg coj neeg nkaum lub ncuav kws yog muab thawj phaum qeb ua hab ib cov naab nplej tuaj rua Elisas. Elisas kuas nwg tug tubkhai muab faib rua cov cev Vaajtswv lug noj,

⁴³tabsis tug tubkhai teb has tas, “Koj xaav has tas, npaum le nuav ncuav xwb txaus ib puas leej noj nua los?” Elisas teb has tas, “Ca le muab faib rua suavdlawg noj, rua qhov tug TSWV has tas, puab txhua tug yuav noj tsau hab tseem tshuav.”

⁴⁴Ces nwg txawm muab faib rua suavdlawg noj. Puab puavleej tau noj tsau hab tseem seem lawv le tug TSWV has.