Read Hmong Njua 2 Vaajntxwv 5 Bible Online

2 Vaajntxwv 5 - Hmong Njua bible

2 Vaajntxwv 5

¹Na-amaas kws yog cov Xilias tug thawj tubrog kws muaj meejmom sab hab vaajntxwv fwm heev. Tug TSWV pub cov Xilias ntaus yeej rog vim muaj Na-amaas. Nwg yog ib tug thawj tubrog kws txawj tua rog hab sab tawv heev, tabsis nwg mob ruas.

²Muaj ib zag thaus cov Xilias tuaj tua cov Yixalayees, puab nteg tau cov Yixalayees ib tug ntxhais coj lug tu Na-amaas tug quaspuj.

³Muaj ib nub tug ntxhais ntawd has rua Na-amaas tug quaspuj has tas, “Kuv xaav kuas kuv tug tswv moog cuag tug cev Vaajtswv lug kws nyob nraag tebchaws Xamalis! Tug cev Vaajtswv lug ntawd yuav khu tau Na-amaas tug mob ruas zoo.”

⁴Thaus Na-amaas nov le ntawd, nwg txawm moog cuag vaajntxwv hab has rua vaajntxwv lawv le tug ntxhais ntawd qha.

⁵Vaajntxwv has rua Na-amaas has tas, “Koj moog cuag cov Yixalayees tug vaajntxwv hab muab tsaab ntawv nuav rua nwg.” Na-amaas txhaj moog hab thauj peb caug txheeb dlaim nyaj, rau txheeb dlaim kub hab kaum cev rig tsho nrug nwg moog.

⁶Tsaab ntawv kws nwg nqaa moog has le nuav: “Tug nuav, yog Na-amaas kws yog kuv tug thawj tubrog, kuv xaav thov koj paab khu nwg tug mob kuas zoo.”

⁷Thaus cov Yixalayees tug vaajntxwv nyeem tsaab ntawv ntawd taag, nwg txawm dlua rhe nwg lub tsho hab has tas, “Kuv yog Vaajtswv tug kws muaj fwjchim ua tau kuas tuabneeg tuag hab tuabneeg caj los? Ua le caag tug vaajntxwv kws kaav tebchaws Xilias txhaj kuas kuv khu tug mob ruas nuav? Yog nwg xaav tuaj nrhav plaub rua kuv xwb!”

⁸Thaus Elisas kws yog tug cev Vaajtswv lug nov tej xwm nuav, nwg has moog rua vaajntxwv has tas, “Vim le caag koj nyuaj sab ua luaj? Ca le kuas tug txivneej ntawd lug cuag kuv, kuv yuav qha rua nwg paub has tas, nyob huv tebchaws Yixalayees nuav muaj ib tug cev Vaajtswv lug!”

⁹Yog le ntawd, Na-amaas, nwg cov neeg hab tej tsheb neeg txhaj lug nreg rua ntawm Elisas lub qhovrooj.

¹⁰Elisas kuas nwg tug tubkhai moog has rua Na-amaas has tas, “Koj ca le moog raus xyaa zag huv tug Dlej Yauladees, ces koj tej ruas yuav zoo.”

¹¹Tabsis Na-amaas npautawg heev, nwg tig hlo rov qaab hab ywg has tas, “Kuv xaav has tas, nwg yuav tawm tuaj cuag kuv, hab tsaa teg rua sau kuv tej mob, thov tug TSWV kws yog nwg tug Vaajtswv khu kuv!

¹²Tug Dlej Anpanas hab Fapas kws nyob peg Damaxes tseem huv dlua tej dlej kws nyob huv tebchaws Yixalayees nuav, yog kuv rov moog raus tej dlej kws nyob peg los kuv yeej yuav zoo!”

¹³Nwg cov tubkhai moog has rua nwg has tas, “Tug tswv, txawm yog tug cev Vaajtswv lug kuas koj ua tej yaam nyuaj los koj yuav tau ua lawv le nwg has. Vim le caag nwgnuav koj tsi moog raus dlej lawv le nwg has, kuas koj tej ruas zoo?”

¹⁴Yog le ntawd, Na-amaas txhaj le nqeg moog raus huv tug Dlej Yauladees xyaa zag lawv le Elisas has, Na-amaas tej ruas txawm zoo dlu lug hab nwg lub cev mog nyoos ib yaam le tug mivnyuas mog.

¹⁵Na-amaas hab nwg cov tubkhai rov lug cuag Elisas hab has tas, “Nwgnuav kuv paub has tas tsi muaj dlua lwm tug vaajtswv, tsuas yog cov Yixalayees tug Vaajtswv xwb, yog le ntawd, thov koj ca le txais tej khoom kws kuv coj tuaj pub rua koj nuav.”

¹⁶Elisas teb has tas, “Kuv coglug rua tug TSWV kws muaj sa nyob, tug kws kuv ua nwg teg num has tas, kuv yuav tsi yuav tej khoom ko.” Na-amaas txhob Elisas heev, tabsis nwg tsi kaam yuav le.

¹⁷Na-amaas has tas, “Yog koj tsi kaam yuav kuv tej khoom pub nuav le, thov ca kuv khawb aav kuas txaus ob tug neeg zaag thauj moog tsev, txij nuav moog kuv yuav tsi muab khoom lossis tua tsaj hlawv fij rua lwm tug vaajtswv le. Tsuas fij rua tug TSWV tuab leeg xwb.

¹⁸Yog le ntawd, kuv ca sab has tas tug TSWV yuav zaam txim rua kuv, thaus kuv tug vaajntxwv coj kuv nrug nwg moog pe tug mlom Limoos kws yog cov Xilias tug vaajtswv tom lub tsev teev mlom. Kuv ca sab has tas tug TSWV yeej yuav zaam kuv lub txim.”

¹⁹Elisas has tas, “Koj ca le moog kaaj sab lug.” Ces Na-amaas txawm moog lawm. Na-amaas nyavnyuas moog dlhau lawm xwb,

²⁰Elisas tug tubkhai Nkehaxis txawm xaav has tas, “Ua caag kuv tug tswv ca le tso Na-amaas moog tsi kuas nwg them ib yaam dlaabtsi le. Tub tsimnyog nwg yuav tej khoom kws tug tuabneeg Xilias muab rua nwg ntawd. Muaj tug TSWV kws muaj sa nyob pum, kuv yuav caum Na-amaas qaab moog thov nwg muab ib ob yaam rua kuv.”

²¹Ces Nkehaxis txawm caum Na-amaas qaab moog. Thaus Na-amaas pum Nkehaxis dlha caum nwg qaab tuaj, nwg nqeg sau nwg lub tsheb neeg lug, hab nug has tas, “Puas yog muaj xwm dlaabtsi?”

²²Nkehaxis teb has tas, “Tsi muaj dlaabtsi. Tsuas yog kuv tug tswv kuas kuv caum koj qaab tuaj has rua koj tas, ‘Muaj ob tug cev Vaajtswv lug nyob peg laaj roob Efalayees nyavnyuas tuaj txug, kuv tug tswv xaav kuas koj muab peb txheeb dlaim nyaj hab ob cev rig tsho moog rua obtug.’ ”

²³Na-amaas teb has tas, “Kuv yuav muab rau txheeb dlaim nyaj rua koj nqaa moog rua nwg.” Na-amaas txhob kuas yuav hab muab cov nyaj ntawd ntim rua huv ob lub naab hab muab ob cev rig tsho rua nwg ob tug tubkhai kwv ua Nkehaxis ntej.

²⁴Thaus puab lug txug rua sau lub laaj roob kws Elisas nyob, Nkehaxis txawm muab ob naab nyaj moog ca rua huv tsev, ces nwg txawm kuas Na-amaas obtug tubkhai rov moog lawm.

²⁵Thaus Nkehaxis moog rua huv tsev, Elisas nug has tas, “Nkehaxis, puastaab koj moog dlaabtsi lug?” Nkehaxis teb has tas, “Tug tswv, kuv tsi tau moog qhov twg le.”

²⁶Tabsis Elisas has rua Nkehaxis has tas, “Thaus kws Na-amaas nqeg sau lub tsheb neeg lug cuag koj, kuv lub sab tsi nrug koj nyob tod los? Nwgnuav tsi tau yog sijhawm yuav luas tej nyaj, tej rig tsho, tej vaaj txiv maab, tej txiv ntoo roj, tej yaaj tej tshis, tej nyuj lossis luas tej tubkhai.

²⁷Nwgnuav Na-amaas tej ruas yuav lug lu koj, hab koj tej xeebntxwv moog ibtxhis le!” Thaus Nkehaxis tawm moog lawm, nwg txawm mob ruas thoob plawg ib ce dlawb paug ib yaam le te.