Read Hmong Njua 2 Vaajntxwv 6 Bible Online

2 Vaajntxwv 6 - Hmong Njua bible

2 Vaajntxwv 6

¹Muaj ib nub cov cev Vaajtswv lug kws Elisas saib ntawd txawm ywg rua Elisas has tas, “Lub chaw kws peb nyob nuav nqaim heev tsi txaus peb nyob.

²Thov ca peb moog txav ntoo nraag ntug dlej Yauladees lug ua dlua ib lub chaw rua peb nyob.” Elisas teb has tas, “Mej ca le moog.”

³Puab cov ntawd muaj ib tug yum kuas Elisas nrug puab moog, ces Elisas txhaj nrug puab moog.

⁴hab puab txawm ua ke moog. Thaus puab moog txug ntawm ntug dlej Yauladees, puab suavdlawg txawm pib ntuv ntoo.

⁵Thaus puab taabtom ntuv ntoo, muaj ib tug raab taus txawm hle hlo poob rua huv dlej lawm. Nwg hu Elisas has tas, “Tug tswv, kuv yuav ua le caag? Rua qhov raab taus ntawd yog kuv qev tuaj xwb.”

⁶Elisas nug nwg has tas, “Raab taus poob rua qhov twg lawm?” Nwg txawm qha qhov chaw kws raab taus poob rua Elisas. Elisas txav tau ib yaav ntoo hab muab pov rua ntawm qhov chaw kws raab taus poob, ces raab taus txawm ntaab tuaj.

⁷Elisas has tas, “Koj ca le moog muab raab taus lug.” Ces tug ntawd txhaj cev teg moog muab raab taus lug.

⁸Thaus tug vaajntxwv kws kaav tebchaws Xilias tuaj tua cov Yixalayees. Nwg nrug nwg cov thawj tubrog saablaaj hab xaiv ib thaaj chaw rua nwg tsuam yeej.

⁹Tabsis Elisas tub tso tuabneeg moog qha rua cov Yixalayees tug vaajntxwv, kuas ceevfaaj tsi xob moog ze qhov chaw ntawd, rua qhov cov Xilias tub tuaj zuv kev lawm.

¹⁰Yog le ntawd, cov Yixalayees tug vaajntxwv txhaj ceebtoom kuas nwg cov tubrog kws nyob thaaj tsaam ntawd ceevfaaj. Elisas ceebtoom rua vaajntxwv le ntawd ob peb zag ntxiv.

¹¹Qhov nuav ua rua cov Xilias tug vaajntxwv ntxhuv sab heev; nwg txhaj nug nwg cov thawj tubrog has tas, “Mej cov ko, leejtwg tuaj cov Yixalayees tug vaajntxwv tog?”

¹²Cov thawj tubrog muaj ib tug teb has tas, “Vaajntxwv, peb cov nuav yeej tsi muaj leejtwg tuaj cov Yixalayees tug vaajntxwv tog le. Tej nuav yog Elisas kws yog tug cev Vaajtswv qha rua cov Yixalayees tug vaajntxwv paub xwb. Txawm yog koj has tuabywv huv txaaj xwb los nwg yeej paub hab muab qha rua nwg tug vaajntxwv huv tuabsi.”

¹³Cov Xilias tug vaajntxwv txhaj has tas, “Mej ca le moog nrhav saib nwg nyob qhov twg, kuv yuav khaiv tuabneeg moog nteg nwg lug.” Muaj tuabneeg qha rua vaajntxwv paub has tas, Elisas nyob huv Dauthaas,

¹⁴nwg txhaj txhij ib paab tubrog coob heev nrug neeg hab tsheb neeg. Puab moog txug nraag thaus ib taag mo, hab vij kag lub nroog.

¹⁵Thaus kaaj ntug Elisas tug tubkhai tawm moog ncig nrau zoov, nwg pum cov tubrog Xilias, hab puab tej neeg hab tsheb neeg vij taagnrho lub nroog. Nwg txhaj dlha rov lug cuag Elisas hab has tas, “Tug tswv, zag nuav ces peb yuav tsi dlim le lauj! Rua qhov luas tuaj vij peb taag lawm. Peb yuav ua le caag?”

¹⁶Elisas teb has tas, “Tsi xob ntshai. Peb tog muaj coob dlua puab tog.”

¹⁷Elisas thov Vaajtswv has tas, “Tug TSWV, thov koj qheb nwg lub qhovmuag kuas nwg pum.” Tug TSWV teb Elisas tej lug thov, ces Elisas tug tubkhai txhaj pum tej neeg fuab cua hab tsheb neeg nplaim tawg nyob puv toj roob hauv peg puagncig Elisas.

¹⁸Thaus cov tubrog Xilias taabtom dlha lug puav nteg Elisas, Elisas thov Vaajtswv has tas, “Tug TSWV thov koj ua kuas cov tuabneeg nuav qhovmuag faam.” Tug TSWV txawm ua lawv le Elisas tej lug thov.

¹⁹Elisas moog rua ntawm puab hab has tas, “Mej tuaj yuam kev lawm; lub nroog nuav tsi yog lub kws mej tuaj nrhav. Ca le caum kuv qaab, kuv yuav coj mej moog rua ntawm tug txivneej kws mej tuaj nrhav.” Elisas txawm coj puab moog rua huv lub nroog Xamalis.

²⁰Thaus puab moog txug huv lub nroog Xamalis, Elisas thov Vaajtswv has tas, “Tug TSWV thov koj qheb puab qhovmuag kuas puab rov pum kev.” Tug TSWV teb Elisas tej lug thov; thaus tug TSWV ua rua puab rov pum kev, ua cav puab nyob huv plawv nroog Xamalis lawm.

²¹Thaus cov Yixalayees tug vaajntxwv pum puab, nwg has rua Elisas has tas, “Tug tswv, ca kuv muab puab tua, ca kuv muab puab tua los?”

²²Elisas teb has tas, “Koj tsi xob tua puab, txawm yog tej tubrog kws koj nteg tau lug los koj tsi xob muab tua, koj ca le muab mov rua puab noj, muab dlej rua puab haus hab tso puab rov qaab moog rua puab tug vaajntxwv.”

²³Yog le ntawd, cov Yixalayees tug vaajntxwv txhaj ua ib rooj noj haus luj rua puab noj; thaus puab noj taag lawm, vaajntxwv txawm tso puab rov qaab moog rua cov Xilias tug vaajntxwv. Txij thaus ntawd lug cov Xilias txhaj tsi tuaj txeeb cov Yixalayees lub tebchaws le lawm.

²⁴Tau ib ntus tom qaab nuav, Vaajntxwv Npeehadas kws kaav tebchaws Xilias txhij taagnrho nwg cov tubrog tuaj vij lub nroog Xamalis tua cov Yixalayees.

²⁵Vim luas puav lub nroog le ntawd, cov tuabneeg kws nyob huv lub nroog Xamalis txhaj tshaib nqhes heev, luas muag ib lub taubhau neeg luav twg yog yim caum dlaim nyaj hab luas muag ob laag quav nquab twg yog tsib dlaim nyaj.

²⁶Thaus cov Yixalayees tug vaajntxwv taug sau tug ntsaa loog, txawm muaj ib tug quaspuj quaj rua vaajntxwv has tas, “Vaajntxwv, thov koj paab kuv lauj.”

²⁷Vaajntxwv teb has tas, “Yog tug TSWV tsi paab koj, kuv yuav muab dlaabtsi rua koj. Kuv muaj moov nplej hab cawv txiv maab los?

²⁸Koj muaj kev nyuaj sab dlaabtsi?” Tug quaspuj ntawd teb has tas, “Tau ob peb nub lug lawm, tug quaspuj nuav has rua kuv tas, kuas muab kuv tug tub tua rua wb noj, nub tom qaab maam le muab nwg tug tub tua rua wb noj.

²⁹Yog le ntawd, kuv txawm muab kuv tug tub tua rua wb noj lawm. Nub tom qaab kuv has rua nwg tas, muab koj tug tub tua rua wb noj, tabsis nwg muab nwg tug tub zais lawm.”

³⁰Thaus vaajntxwv nov le ntawd, nwg dlua rhe nwg lub tsho ntev, cov tuabneeg kws nyob ze ntawm tug ntsaa loog pum Vaajntxwv txheej rig tsho ntaub tsaaj kws naav tuaj huv qaab.

³¹Vaajntxwv has tas, “Yog nub nua Elisas tsi raug txav cejdlaab, thov Vaajtswv muab kuv tua kuas tuag.”

³²Vaajntxwv txawm khaiv ib tug tuabneeg moog nteg Elisas. Thaus ntawd Elisas tseem nrug cov txwjlaug kws tuaj saib nwg nyob huv tsev. Tabsis thaus tug tuabneeg kws ua vaajntxwv ntej tuaj tsi tau txug, Elisas txawm has rua cov txwjlaug tas, “Tug tuabneeg tua tuabneeg khaiv ib tug tuabneeg tuaj tua kuv lawm! Thaus nwg tuaj txug, ca le kaw qhovrooj tsi xob pub nwg lug tsev, rua qhov vaajntxwv lawv nwg qaab tuaj hab.”

³³Thaus Elisas tseem taabtom has le ntawd, Vaajntxwv txawm tuaj txug ndlua hab has tas, “Tej kev txomnyem kws lug raug peb nuav, yog tug TSWV tso lug! Kuv tseem yuav tog tug TSWV dlaabtsi hab?”