Read Hmong Njua 2 Vaajntxwv 8 Bible Online

2 Vaajntxwv 8 - Hmong Njua bible

2 Vaajntxwv 8

¹Elisas has rua tug quaspuj kws nyob huv lub nroog Sunees kws Elisas tsaa nwg tug tub kws tuag lawm rov muaj sa has tas, “Koj ca le coj koj tsev tuabneeg moog nyob rua lwm qhov, tug TSWV yuav ua kuas lub tebchaws nuav muaj kev tshaib nqhes hab yuav tsi muaj naag lug xyaa lub xyoo.”

²Tug quaspuj ntawd ua lawv Elisas has, nwg txhaj coj nwg tsev tuabneeg tsiv moog nyob rua tebchaws Filitees tau xyaa xyoo.

³Thaus dlhau xyaa lub xyoo lawm, nwg rov lug rua huv tebchaws Yixalayees, hab nwg moog thov vaajntxwv kuas muab nwg lub tsev hab dlaim teb rov qaab rua nwg.

⁴Nwg moog pum vaajntxwv taabtom nrug Nkehaxis kws yog Elisas tug tubkhai thaam; rua qhov vaajntxwv xaav paub tej txujci tseemceeb kws Elisas ua.

⁵Thaus kws Nkehaxis taabtom qha zaaj kws Elisas tsaa tau tug tuabneeg tuag rov caj sa rua vaajntxwv noog, tug quaspuj ntawd txawm lug thov kuas vaajntxwv muab nwg lub tsev hab dlaim teb rov rua nwg. Ces Nkehaxis has rua vaajntxwv has tas, “Vaajntxwv, tug quaspuj nuav yog tug kws Elisas tsaa nwg tug tub kws tuag lawm rov caj sa ntaag.”

⁶Vaajntxwv nug tug quaspuj ntawd, hab nwg qha rua vaajntxwv lawv le Nkehaxis has, ces vaajntxwv txawm hu ib tug numtswv lug hab kuas nwg moog muab tug quaspuj ntawd lub tsev, dlaim teb hab taagnrho tej nyaj kws puab muag tej qoob huv nwg dlaim teb ntawm xyaa lub xyoo kws nwg moog nyob rua lwm qhov lawm rov rua nwg.

⁷Elisas moog rua huv lub nroog Damaxes thaus Vaajntxwv Npeehadas kws kaav tebchaws Xilias taabtom mob. Thaus vaajntxwv nov has tas, Elisas tuaj txug rua huv lub nroog,

⁸vaajntxwv has rua Haxayees kws yog nwg cov numtswv ib tug has tas, “Koj coj ib cov khoom moog pub rua Elisas kws yog tug cev Vaajtswv lug hab thov nwg nug tug TSWV saib kuv tug mob yuav zoo los tsi zoo.”

⁹Yog le ntawd, Haxayees txhaj muab txhua yaam kws zoo tshaaj plawg kws puab ua tau huv lub nroog Damaxes nog rua plaub caug tug ntxhuav thauj moog pub rua Elisas. Thaus Haxayees moog ntsib Elisas, nwg has rua Elisas has tas, “Koj tug tubkhai kws yog Vaajntxwv Npeehadas tau khaiv kuv tuaj nug koj saib nwg tug mob yuav zoo los tsi zoo?”

¹⁰Elisas teb has tas, “Tug TSWV tub qha rua kuv lawm has tas nwg yuav tuag, tabsis koj rov moog has rua nwg has tas nwg tug mob yuav zoo.”

¹¹Elisas ntsejmuag ntshaus ntsho saib ntsoov Haxayees, ua rua Haxayees ntsejmuag lab taag. Taamsim ntawd Elisas txawm quaj ua kua muag poob dlawb vog.

¹²Haxayees nug Elisas has tas, “Tug tswv, ua le caag koj txhaj quaj?” “Elisas teb has tas, ‘Rua qhov kuv tub paub tej kev phem kws koj yuav ua rua cov tuabneeg Yixalayees lawm. Koj yuav hlawv puab tej chaw faajxwm, muab ntaaj tua puab tej tub hluas, muab puab tej mivnyuas ntsawm rua huv aav kuas tuag, hab muab puab tej quaspuj kws suab mivnyuas phais.’ ”

¹³Haxayees teb has tas, “Kuv kws yog koj tug tubkhai kws tsi tseemceeb dlaabtsi, kuv tsuas zoo le tug dlev xwb, kuv puas yuav ua tau le ntawd?” Elisas teb has tas, “Tug TSWV tub qha rua kuv lawm has tas, koj yuav tau ua vaajntxwv kaav lub tebchaws Xilias.”

¹⁴Haxayees rov lug cuag Npeehadas, Vaajntxwv nug Haxayees has tas, “Elisas has le caag?” Haxayees teb has tas, “Nwg has rua kuv tas, koj tug mob yuav zoo xwb.”

¹⁵Tabsis nub tom qaab, Haxayees txawm muab ib dlaim choj moog raus dlej lug npug vaajntxwv ntsejmuag, vaajntxwv txawm tuag lawm. Ces Haxayees txawm ua vaajntxwv hloov Npeehadas chaw kaav lub tebchaws Xilias.

¹⁶Thaus Ahaj tug tub Yaulaas ua vaajntxwv kaav lub tebchaws Yixalayees tau tsib xyoos lawm, Yehausafas tug tub Yehaulaas maam le ua vaajntxwv kaav lub tebchaws Yudas

¹⁷thaus nwg noobnyoog muaj peb caug ob xyoos hab nwg nyob huv lub nroog Yeluxalees kaav tau yim xyoo.

¹⁸Yehaulaas tug quaspuj yog Ahaj tug ntxhais, Yehaulaas ua lub neej lawv le Ahaj tsev tuabneeg, nwg ua kev phem kev qas ib yaam le cov Yixalayees tej vaajntxwv. Nwg ua txhum rua tug TSWV,

¹⁹tabsis tug TSWV tsi xaav rhuav kuas cov Yudas puamtsuaj, rua qhov tug TSWV tau coglug rua nwg tug tubkhai Daviv lawm has tas, Daviv cov xeebntxwv yuav tau ua vaajntxwv moog ibtxhis le.

²⁰Ntu kws Yehaulaas kaav lub tebchaws, cov Edoos tau ntxeev sab rua cov Yudas hab ua ib lub tebchaws kws tsi zwm rua leejtwg.

²¹Yog le ntawd Yehaulaas txhaj coj taagnrho nwg tej tsheb neeg ua rog moog rua huv Xailes, ces cov tubrog Edoos txawm tuaj vij puab qhov ntawd. Thaus ib taag mo nwg hab nwg cov thawj tubrog kws caij tsheb neeg txawm faib ua tej paab hab nrhav kev tsiv, ces nwg cov tubrog txhaj tsiv ua saab ua sua moog tsev taag lawm.

²²Txij thaus ntawd lug cov Edoos txhaj ua ib lub tebchaws kws tsi zwm rua cov Yudas lawm. Thaus ntawd lub nroog Linas los ntxeev sab rua cov Yudas hab.

²³Dlua le lwm yaam kws Yehaulaas ua, puavleej muab sau tseg rua huv phoo tawv keebkwm kws teev cov Yudas cov vaajntxwv lub neej lawm.

²⁴Yehaulaas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog, hab nwg tug tub Ahaxiyas ua vaajntxwv hloov nwg chaw.

²⁵Thaus Ahaj tug tub Yaulaas ua vaajntxwv kaav lub tebchaws Yixalayees tau kaum ob xyoos lawm, Yehaulaas tug tub Ahaxiyas maam le ua vaajntxwv kaav lub tebchaws Yudas

²⁶thaus nwg noobnyoog muaj neeg nkaum ob xyoos hab nwg nyob huv lub nroog Yeluxalees kaav tau ib xyoos. Nwg nam hu ua Athaliyas, yog Ahaj tug ntxhais hab yog cov Yixalayees tug vaajntxwv Aumelis tug ntxhais xeebntxwv.

²⁷Ahaxiyas ua txhum rua tug TSWV ib yaam le Ahaj tsev tuabneeg ua, rua qhov nwg yog Vaajntxwv Ahaj caajceg.

²⁸Vaajntxwv Ahaxiyas hab cov Yixalayees tug vaajntxwv Yaulaas sis koom moog tua Vaajntxwv Haxayees kws kaav tebchaws Xilias. Thaus cov tubrog sis tua ntawm lub nroog Lamaus huv cheebtsaam Nkile-as, Yaulaas txhaj raug mob.

²⁹Yaulaas txhaj lug khu mob huv lub nroog Yexelees, hab Ahaxiyas txhaj moog saib Yaulaas.