Read Hmong Njua 2 Vaajntxwv 9 Bible Online

2 Vaajntxwv 9 - Hmong Njua bible

2 Vaajntxwv 9

¹Elisas kws yog tug cev Vaajtswv lug hu ib tug hluas kws cev Vaajtswv lug lug hab has rua nwg has tas, “Koj ca le tu cev hab nqaa fwj roj nuav moog rua huv lub nroog Lamaus huv cheebtsaam Nkile-as.

²Thaus koj moog txug, koj nrhav kuas tau Yehausafas tug tub Yehus kws yog Nimesis tug xeebntxwv. Koj coj nwg moog rua ib chaav tsev kws dleb ntawm nwg cov phoojywg,

³hab muab roj laub rua sau nwg taubhau hab has le nuav: ‘Tug TSWV has tas, kuv tsaa koj ua vaajntxwv kaav lub tebchaws Yixalayees.’ Thaus koj has le ntawd taag, ces koj ca le tawm ceev nrooj tsiv.”

⁴Tug hluas kws cev Vaajtswv lug txawm moog rua huv lub nroog Lamaus.

⁵Thaus nwg moog txug, cov thawj tubrog taabtom tuaj saablaaj ua ke, ces nwg has tas, “Tug tswv, kuv muaj lug yuav has rua koj.” Yehus teb has tas, “Koj has peb cov nuav leejtwg?” Nwg teb has tas, “Kuv has koj ntaag.”

⁶Ces obtug txawm moog rua huv ib chaav tsev, tug hluas kws cev Vaajtswv lug txhaj muab roj laub rua Yehus taubhau hab has tas, “Tug TSWV kws yog cov Yixalayees tug Vaajtswv has le nuav tas: ‘Kuv tsaa koj ua vaajntxwv kaav lub tebchaws Yixalayees.

⁷Koj ca le moog muab Ahaj tug tub Yaulaas kws yog koj tug vaajntxwv tua povtseg, kuv txhaj pauj tau qhov kws Yexenpees tua kuv cov cev Vaajtswv lug hab cov tubkhai.

⁸Yuavtsum muab Ahaj tsev tuabneeg hab nwg tej xeebntxwv tua kuas tuag taag; kuv yuav muab txhua tug txivneej huv nwg tsev tuabneeg, tsi has tug laug tug hluas tua kuas tu noob huv tuabsi.

⁹Kuv yuav ua rua Ahaj tsev tuabneeg ib yaam le kuv ua rua cov Yixalayees tug Vaajntxwv Yelaunpau-aas tsev tuabneeg, hab ib yaam le kuv ua rua cov Yixalayees tug Vaajntxwv Npa-asas tsev tuabneeg.

¹⁰Yuav tsi muaj leejtwg muab Yexenpees log; tej dlev huv cheebtsaam Yexelees yuav tuaj noj nwg lub cev.’ ” Thaus tug hluas kws cev Vaajtswv lug has le ntawd taag, nwg txawm tawm ceev nrooj huv chaav tsev ntawd moog lawm.

¹¹Yehus rov lug rua ntawm nwg cov phoojywg. Muaj ib tug nug nwg has tas, “Puas muaj xwm dlaabtsi? Tug tuabneeg vwm ntawd tuaj has dlaabtsi rua koj?” Yehus teb has tas, “Mej suavdlawg yeej paub has tas nwg tuaj has dlaabtsi lawm.”

¹²Puab teb has tas, “Peb yeej tsi paub le, koj ca le qha rua peb saib nwg has le caag.” Nwg qha kuv has tas, “Tug TSWV has le nuav: ‘Kuv tsaa koj ua vaajntxwv kaav lub tebchaws Yixalayees.’ ”

¹³Taamsim ntawd, puab txawm hle puab cov tsho ntev lug pua rua ntawm theem ntaiv rua Yehus sawv sau. Puab tshuab raaj tshuab xyu qw has tas, “Yehus yog vaajntxwv lawm!”

¹⁴Yog le ntawd, Yehus txhaj ntxeev sab rua Vaajntxwv Yaulaas kws tseem khu mob nyob huv lub nroog Yexelees. Nwg raug mob thaus nwg moog tua cov Xilias tug Vaajntxwv Haxayees huv lub nroog Lamaus. Yehus has rua nwg cov phoojywg has tas, “Yog mej tuaj kuv tog, mej tsi xob pub leejtwg tawm huv lub nroog Lamaus nuav moog taug xaiv rua huv lub nroog Yexelees le.”

¹⁶Yehus txawm caij tsheb neeg moog rua huv lub nroog Yexelees, rua qhov Yaulaas tseem khu mob nyob huv. Cov Yudas tug Vaajntxwv Ahaxiyas los tuaj saib Yaulaas rua huv lub nroog ntawd hab.

¹⁷Tug tubrog faajxwm sau lub chaw tsomfaaj huv lub nroog Yexelees pum Yehus hab nwg cov tuabneeg tuaj. Nwg txhaj qw has tas, “Kuv pum muaj ib paab tubrog tuaj!” Yaulaas teb has tas, “Ca le khaiv ib tug tubrog caij neeg moog saib puab tuaj ua zoo lossis ua phem!”

¹⁸Tug tubrog ntawd caij neeg moog nug Yehus has tas, “Vaajntxwv xaav paub has tas saib koj tuaj ua zoo lossis tuaj ua phem?” Yehus teb has tas, “Tsi txug koj cig tsug! Ca le lawv kuv qaab moog!” Tug faajxwm sau lub chaw tsomfaaj has tas, “Tug tubrog tub moog txug ntawm puab lawm, tabsis nwg tsi rov qaab lug le.”

¹⁹Vaajntxwv khaiv dlua ib tug tubrog moog, nwg moog nug Yehus ib yaam le qub. Yehus rov teb has tas, “Tsi txug koj cig tsug! Ca le lawv kuv qaab moog.”

²⁰Tug faajxwm sau lub chaw tsomfaaj rov has dlua has tas, “Nwg moog txug ntawm puab, tabsis nwg tsi rov lug le hab. Tug kws tsaav tsheb neeg, tsaav vwm ntsuav le Yehus kws yog Nimesis tug xeebntxwv ntaag.”

²¹Vaajntxwv Yaulaas has tas, “Ca le npaaj kuv lub tsheb neeg rua kuv! Puab txhaj coj vaajntxwv lub tsheb neeg lug.” Ces cov Yixalayees tug Vaajntxwv Yaulaas hab cov Yudas tug Vaajntxwv Ahaxiyas nyag txawm caij nyag lub tsheb neeg moog ntsib Yehus ntawm Nanpaus thaaj teb.

²²Thaus Yaulaas pum Yehus, nwg nug Yehus has tas, “Yehus, koj tuaj ua zoo lossis tuaj ua phem?” Yehus teb has tas, “Yog thaus twg peb tseem muaj kev teev tej dlaab hab pe tej mlom kws koj nam Yexenpees coj lug, peb yuav ua le caag ua tau zoo?”

²³Ces Yaulaas txawm nqug nwg lub tsheb neeg tig hlo rov qaab, hab qw has tas, “Ahaxiyas! Puab ntxeev sab lawm!”

²⁴Yehus siv taagnrho nwg tug zug nqug raab neevnti tua xibxub vug moog raug Yaulaas nrausqaum to ntshua moog raug nwg lub plawv, ces Yaulaas qaug ntawg tuag kag rua huv nwg lub tsheb neeg.

²⁵Yehus has rua tug tubrog Npidekas kws nrug nraim nwg has tas, “Ca le coj Yaulaas moog pov rua huv Nanpaus thaaj teb. Nyaj koj tseem ncu tau thaus koj hab kuv caij neeg ua Vaajntxwv Ahaj kws yog Yaulaas txiv qaab, tug TSWV tau has txug Ahaj tej kev txhum le nuav:

²⁶‘Naag mo, kuv pum tug kws tua Nanpaus hab nwg cov tub huv thaaj teb nuav. Kuv coglug has tas, kuv yuav rau txim rua koj huv thaaj teb nuav hab.’ Yehus txhaj kuas nwg tug tubrog muab Yaulaas pov rua huv Nanpaus thaaj teb, lawv le tug TSWV tau has tseg lawm.”

²⁷Vaajntxwv Ahaxiyas pum ntsoov tej xwm ntawd, nwg txhaj tsaav nwg lub tsheb neeg tsiv moog rua huv lub nroog Npethes Hankas, rua qhov Yehus caum nwg tua. Yehus has rua nwg cov tubrog has tas, “Tua tug ntawd hab!” Ces cov tubrog txawm muab muv nkaug Ahaxiyas thaus nwg taabtom tsaav nwg lub tsheb neeg tsiv moog rua huv lub nroog Nkules kws nyob ze rua ntawm lub nroog Inpelas. Tabsis nwg moog txug rua huv lub nroog Menkidaus, nwg maam le tuag.

²⁸Nwg cov numtswv muab tsheb neeg thauj nwg rov lug rua huv lub nroog Yeluxalees hab muab nwg log rua ntawm cov vaajntxwv lub toj ntxaas huv Daviv lub nroog.

²⁹Ahaxiyas ua vaajntxwv kaav tebchaws Yudas thaus kws Ahaj tug tub Yaulaas ua vaajntxwv kaav tebchaws Yixalayees tau kaum ib xyoos lawm.

³⁰Thaus Yehus tuaj txug huv lub nroog Yexelees, Yexenpees tub paub tej xwm ntawd lawm, ces nwg txawm muab tshuaj foo nwg tawv muag, ntsis nwg cov plaubhau hab tuaj ntawm qhovrais xauj rua saab nrau.

³¹Thaus Yehus tuaj txug ntawm roojvaag, Yexenpees txawm qw has tas, “Ximelis, koj tub tua koj tug vaajntxwv lawm! Koj tseem tuaj dlaabtsi ntawm nuav?”

³²Yehus txawm tsaa qhovmuag saib pum ob peb tug numtswv xauj ntawm qhovrais tuaj rua nwg, Yehus has tas, “Leejtwg tuaj kuv tog?”

³³hab Yehus has rua puab tas, “Mej ca le muab Yexenpees pov lug!” Puab txawm muab Yexenpees pov lug ntsawm huv aav ua rua ntshaav txaws moog lu tej phaab ntsaa hab tej neeg taag. Yehus txawm tsaav tsheb neeg lug tsuj kag Yexenpees lub cev

³⁴moog noj hab haus huv lub loog. Yehus has tas, “Mej ca le coj nam puj ntawd moog log, rua qhov nwg yog vaajntxwv ib tug ntxhais hab.”

³⁵Tabsis thaus cov tuabneeg ntawd tawm moog muab Yexenpees log, puab tsuas pum tshuav lub txhaa taubhau, hab tej txhaa teg taw lawm xwb.

³⁶Thaus puab rov lug qha rua Yehus, Yehus has tas, “Qhov nuav yeej muaj lawv le tug TSWV tau has tseg rua nwg tug tubkhai Eliyas has tas: ‘Cov dlev kws nyob huv thaaj tsaam Yexelees yuav tuaj noj Yexenpees lub cev.

³⁷Yexenpees tej pobtxhaa kws seem nyob ri sua ib yaam le tej quav tsaj, hab tsi muaj Leejtwg paub has tas yog Yexenpees tej pobtxhaa le.’ ”