Read Hmong Njua 1 Xwmtxheej Vaajntxwv 10 Bible Online

1 Xwmtxheej Vaajntxwv 10 - Hmong Njua bible

1 Xwmtxheej Vaajntxwv 10

¹Cov Filitees tuaj tua cov Yixalayees sau lub roob Nkinpau-as. Cov Yixalayees tuag coob heev rua sau, cov kws seem tuag nyag tsiv nyag moog lawm, Xa-ules hab nwg cov tub los tsiv taag lawm hab.

²Tabsis cov Filitees caum nteg tau puab hab muab Xa-ules peb tug tub kws yog Yaunathaas, Anpinadas, hab Makhisuas tua tuag taag.

³Muaj kev sis tua nyaav heev puagncig Xa-ules hab yeebncuab txhaj tua xub neevnti tuaj raug Xa-ules saab kawg le, ua rua nwg raug mob saab heev.

⁴Xa-ules txhaj has rua tug tub hluas kws nqaa nwg cov cuabyeej ua rog tas, “Ca le rhu koj raab ntaaj lug tua kuv kuas tuag, sub cov Filitees kws tsi ua kevcai txav txhaj tsi khaav has tas yog puab tua kuv tuag.” Tabsis tug tub hluas ntawd ntshai heev tsi muaj cuabkaav ua le Xa-ules has. Xa-ules txhaj rhu hlo Xa-ules raab ntaaj lug cuab hab qhau hlo nwg lub cev moog npuj raab ntaaj.

⁵Thaus tug tub hluas ntawd pum has tas, Xa-ules tuag lawm, nwg txawm rhu nwg raab ntaaj lug cuab hab qhau cev moog npuj raab ntaaj chob nwg tuag nrug Xa-ules lawm hab.

⁶Yog le ntawd, Xa-ules hab nwg peb tug tub txhaj tuag ua ke, txij thaus ntawd lug Xa-ules cov xeebntxwv tsi muaj ib tug tau lug kaav tebchaws le lawm.

⁷Thaus cov Yixalayees kws nyob huv lub Haav Yexelees nov has tas, cov tubrog tsiv taag, Xa-ules hab nwg peb tug tub los raug tua tuag taag lawm, suavdlawg muab puab tej nroog tso povtseg hab tsiv tawm lawm, cov Filitees txhaj tuaj nyob huv puab tej nroog.

⁸Ces nub tom qaab cov Filitees maam moog tshawb cov tubrog Yixalayees kws tuag tej khoom, puab pum Xa-ules hab nwg peb tug tub tuag rua sau lub roob Nkinpau-as.

⁹Puab txav Xa-ules lub taubhau, hle nwg cev tsoog tsho tooj hab nwg tej cuabyeej ua rog nqaa moog, hab khaiv tuabneeg xaa xuv moog thoob plawg tebchaws Filitees, xaa xuv zoo moog rua puab tej mlom hab puab tej tuabneeg paub txhij txhua.

¹⁰Puab nqaa Xa-ules cov cuabyeej ua rog moog tso huv puab ib lub tuamtsev, hab muab Xa-ules lub taubhau moog dlai rua sau lub tuamtsev kws puab teev puab tug vaajtswv Dankoos.

¹¹Thaus cov tuabneeg kws nyob ntawm lub nroog Yanpes huv Nkinpe-as, nov tej kws cov Filitees ua rua Xa-ules ntawd,

¹²cov tuabneeg kws sab tawv txhaj moog kwv Xa-ules hab nwg peb tug tub lug rua huv lub nroog Yanpes. Puab txhaj coj Xa-ules hab nwg peb tug tub moog log rua ntawm qaab tsob ntoo qheb hab puab ua kevcai yoo mov tau xyaa nub.

¹³Xa-ules tuag vim nwg tsi muab sab npuab tug TSWV. Nwg tsi coj lawv le tug TSWV tej lug saamfwm; nwg moog cuag tej txivneeb txivyaig, kuas cov tuabneeg tuag lawm tej plig lug qha nwg,

¹⁴nwg tsi moog cuag tug TSWV le. Yog le ntawd, tug TSWV txhaj muab nwg tua povtseg hab muab lub tebchaws cob rua Yexais tug tub Daviv lawm.