Read Hmong Njua 1 Xwmtxheej Vaajntxwv 11 Bible Online

1 Xwmtxheej Vaajntxwv 11 - Hmong Njua bible

1 Xwmtxheej Vaajntxwv 11

¹Taagnrho cov tuabneeg Yixalayees txhaj tuaj cuag Daviv rua huv lub nroog Henploos, hab has rua nwg tas, “Peb suavdlawg puavleej yog koj roj ntshaa hab nqaj tawv.

²Yaav taag lug txawm yog Xa-ules yog peb tug vaajntxwv los koj yeej yog tug kws coj cov Yixalayees moog tua rog xwb hab tug TSWV kws yog koj tug Vaajtswv coglug rua koj, kuas koj yuavtsum ua tug coj nwg tsaav tuabneeg hab ua tug kaav puab.”

³Yog le ntawd, cov Yixalayees cov thawjcoj tuaj cuag Vaajntxwv Daviv huv lub nroog Henploos. Daviv tau coglug nrug puab, puab muab roj laub rua nwg taubhau hab tsaa nwg ua vaajntxwv kaav tebchaws Yixalayees lawv le tug TSWV tau coglug rua Xamuyees lawm.

⁴Vaajntxwv Daviv hab taagnrho cov Yixalayees txhaj moog tua lub nroog Yeluxalees. Puab yeej paub has tas, cov Yenpus yog cov kws nyob huv, hab cov Yenpus yog cov kws yeej ibtxwm nyob huv lub nroog ntawd.

⁵Cov Yenpus has rua Daviv has tas, “Koj yuav txeem tsi tau lug rua huv nuav ib zag le.” Tabsis Daviv tub moog txeeb tau lub chaw faajxwm sau roob Xi-oos lawm, hab muab qhov chaw ntawd hu ua “Daviv lub nroog.”

⁶Daviv has tas, “Tug tuabneeg twg yog tug xub tua yeej cov tuabneeg Yenpus tug ntawd yuav tau ua tug thawj tubrog.” Ces Yeluyas tug tub Yau-am txawm ua tug coj puab moog ntaus npluav rog ntawd, nwg txhaj tau ua tug thawj tubrog.

⁷Vim Daviv tau moog nyob sau qhov chaw faajxwm ntawd, hab muab qhov chaw ntawd tis npe hu ua “Daviv lub nroog.”

⁸Nwg txhim khu lub nroog ntawd dlua tshab, pib kag ntawm Milus kws nyob saab nubtuaj moog txug ndlua ntawm taw roob, hab Yau-am muab tej qhov kws puag lawm khu dlua tshab.

⁹Daviv muaj fwjchim heev zuj zug tuaj, rua qhov tug TSWV kws muaj fwjchim luj kawg nkaus nrug nraim nwg.

¹⁰Ntawm nuav yog Daviv cov tubrog kws nto moo tej npe, hab taagnrho cov Yixalayees kws tuaj paab kuas Daviv tau ua vaajntxwv lawv le tug TSWV tau coglug tseg, hab txhawb kuas nwg lub tebchaws ruaj khov.

¹¹Thawj tug yog Yasaunpe-aas kws yog cuab Hakhemoos ua tug thawj ntawm “Peb Leeg” nwg muab nwg raab muv nrug peb puas tug tubrog sis nkaug hab nwg muab puab tua tuag taag rua huv tshaav rog.

¹²Tug ntxiv moog kws nto moo tshaaj ntawm “Peb Leeg” nuav yog Daudaus tug tub Ele-axas kws yog cuab Ahaus.

¹³Nwg tuaj Daviv tog nyob huv lub tshaav rog Pas Damees tua cov Filitees. Thaus kws cov Yixalayees taabtom tsiv cov Filitees, nwg nyob huv ib thaaj teb npleg.

¹⁴Yog le Ntawd, nwg hab nwg cov tuabneeg txhaj sawv nreg nroog huv thaaj teb tua cov Filitees. Tug TSWV pub rua nwg muaj yeej luj kawg nkaus le.

¹⁵Muaj ib nub peb leeg thawjcoj ntawm peb caug leej txhaj coj cov tubrog moog cuag Daviv rua nraag lub roob zeb kws Daviv nkaum ze rua ntawm lub Qhov Tsua Adulaas, thaus kws cov Filitees tuaj tsuam yeej rua huv lub Haav Lefayees.

¹⁶Lub sijhawm ntawd Daviv nyob sau lub ncov roob kws muaj ntsaa yeej thaiv khov kho, hab cov Filitees kaav hlo huv lub nroog Npelehees.

¹⁷Daviv ncu tsev heev nwg txhaj seev has tas, “Yuav ua le caag kuv txhaj khaiv tau ib tug tuabneeg moog cug cov dlej huv lub qhov tshij ntawm lub roojvaag nroog Npelehees lug rua kuv haus ne!”

¹⁸Ces peb tug tubrog kws nto moo tshaaj ntawd txhaj dlha ceev heev moog phua plhawv cov Filitees lub yeej, moog cug cov dlej huv lub qhov tshij kws nyob ntawm lub roojvaag nroog Npelehees, hab nqaa lug rua Daviv. Tabsis Daviv tsi kaam haus cov dlej ntawd; nwg muab laub fij rua tug TSWV,

¹⁹Daviv has tas, “Thov kuv tug Vaajtswv txwv tsi xob pub kuv haus cov dlej nuav! Puas tsimnyog kuv haus cov ntshaav kws yog cov tuabneeg nuav txujsa? Vim puab muab puab txujsa moog pauv txhaj nqaa tau cov dlej nuav lug.” Nwg txhaj tsi kaam haus cov dlej ntawd. Tej nuav tub yog peb tug tubrog kws muaj cuabkaav ntawd moog nqaa tau lug.

²⁰Yau-am tug kwv Anpisais yog tug thawjcoj ntawm “Peb caug Leej Kws Nto moo.” Nwg tuav rawv nwg raab muv nrug peb puas leej tubrog sis tua hab nwg muab puab tua tuag taag huv tuabsi. Ces nwg txhaj yog tug kws nto moo tshaaj ntawm “Peb Leeg” ntawd.

²¹Nwg yog tug nto moo tshaaj ntawm “Peb caug Leej” hab nwg tau ua puab tug thawjcoj, tabsis nwg tseem nto moo tsi npaum le “Peb Leeg” ntawd hab.

²²Yehauyadas tug tub Npeenayas kws nyob huv lub nroog Kaxees tuaj, nwg yog ib tug tubrog kws nto moo heev; nwg muaj sab tawv ua tau ntau yaam tseemceeb, nwg tua ob tug tubrog Mau-am kws ua tau kawg nkaus ntawd tuag huv tuabsi lawm. Muaj ib nub kws lug dlaus hlub heev los nwg tseem nqeg moog tua tau ib tug tsuv ntxhuav huv qhov aav lug hab.

²³Nwg tseem tua ib tug tuabneeg Iziv kws yog ib tug txivneej luj hab sab tsib tshim, nwg yog tug tubrog kws nqaa rawv ib raab muv luj heev. Tabsis Npeenayas nqaa raab qws ntoo moog ntaus nwg hab txeeb hlo tau nwg raab muv ntawm nwg teg lug nkaug kag nwg tuag lawm.

²⁴Npeenayas yog ib tug kws muaj lub sab tawv heev ua tau tej nuav, nwg yog ib tug ntawm “Peb caug Leej.”

²⁵Nwg yog ib tug kws nto moo heev ntawm “Peb caug Leej,” tabsis tseem tsi nto moo npaum le “Peb Leeg” ntawd hab. Daviv txhaj tsaa nwg ua tug thawj saib cov tubrog kws nrug nraim Daviv.

²⁶Cov nuav yog lwm paab tubrog kws nto moo heev: Axahees kws yog Yau-am tug kwv, [Daudaus tug tub Ehanas kws nyob huv] Npelehees tuaj Saamaus kws nyob huv Halaus tuaj Helexas kws yog tuabneeg Peles Ikes tug tub Ilas kws nyob huv Tekau-as tuaj Anpi-exes kws nyob huv Anathaus tuaj Xinpekhais kws yog tuabneeg Husas Ilais kws yog tuabneeg Ahaus Mahalais kws nyob huv Netaufas tuaj Npa-anas tug tub Heles kws nyob huv Netaufas tuaj Linpais tug tub Ithais kws nyob huv lub nroog Nkinpe-as huv xeev Npeenyamees tuaj Npeenayas kws nyob huv Pilathoos tuaj Hulais kws nyob huv cov haav kws ze cheebtsaam Nka-as tuaj Anpiyees kws nyob huv Alenpas Axemaves kws nyob huv Npahulus tuaj Eliyanpas kws tuaj huv Sa-anpoos tuaj Hasees kws yog tuabneeg Nkixoos Sakees tug tub Yaunathaas kws yog tuabneeg Halales Xakhas tug tub Ahi-as kws tuaj huv Halas tuaj; Ules tug tub Elifas Hefeles k(...)