Read Hmong Njua 1 Xwmtxheej Vaajntxwv 13 Bible Online

1 Xwmtxheej Vaajntxwv 13 - Hmong Njua bible

1 Xwmtxheej Vaajntxwv 13

¹Vaajntxwv Daviv tau saablaaj nrug cov thawj tubrog kws saib pawg txheeb, pawg pua hab tsoom thawjcoj.

²Ces nwg txawm tshaajtawm rua cov Yixalayees has tas, “Yog mej pum zoo hab yog tug TSWV kws yog peb tug Vaajtswv pum zoo, peb ca le tso tuabneeg moog hu peb cov tuabneeg kws nyob thoob plawg huv tebchaws Yixalayees nuav, cov povthawj hab cov Levis kws nyob huv puab tej nroog, kuas tuaj koom nrug peb ntawm nuav.

³Hab peb yuavtsum moog kwv Vaajtswv lub Phijxaab rov lug rua peb, vim thaus Xa-ules tseem ua vaajntxwv peb muab tso tseg lawm.”

⁴Cov pejxeem suavdlawg pum zoo ua lawv le tej lug kws Daviv has ntawd hab txaus sab kawg le.

⁵Yog le ntawd, Daviv txhaj sau taagnrho cov Yixalayees pib kag nraag Sihaules kws yog cov Iziv tug nrimteb moog txug ndlua peg lub Dlawm Hamas, kuas moog kwv lub Phijxaab kws ntim Vaajtswv tej lug cog tseg huv Kili-as Ye-alees lug tso rua huv lub nroog Yeluxalees.

⁶Ces Daviv hab cov Yixalayees txhaj moog rua huv lub nroog Npa-alas, moog rua ntawm lub nroog Kili-as Ye-alees huv xeev Yudas hab kwv Vaajtswv lub Phijxaab kws muaj tug TSWV lub npe nyob ntawm lub zwmtxwv huv qaab ob tug qhelunpees ob saab qaab tis lug.

⁷Puab txhaj tsaws lub Phijxaab kws ntim Vaajtswv tej lug cog tseg huv Anpinadas lub tsev lug tso rua huv ib lub tsheb nyuj tshab, ces Uxahas hab Ahi-aus obtug ua ob tug tsaav lub tsheb ntawd.

⁸Daviv hab cov pejxeem dlha zoo sab kawg puab tug zug qhuas Vaajtswv. Puab txhaj le hu nkauj, tshuab raaj, ntaus nkauj nogncaas, npuaj nruag hab tshuab xyu ua Vaajtswv tsaug taug kev lug.

⁹Thaus puab lug txug rua ntawm lub tshaav ntaus nplej ntawm Khidoos, nkawm txiv nyuj txawm dlawm qaug, Uxahas txhaj cev loo teg moog tuav nkaus lub Phijxaab kws ntim Vaajtswv tej lug cog tseg.

¹⁰Tug TSWV txawm chim hab npautawg rua Uxahas hab muab nwg tua tuag, vim qhov kws nwg cev teg moog tuav lub Phijxaab ntawd,

¹¹txhaj muab qhov chaw ntawd tis npe hu ua Peles Uxahas, txij thaus ntawd lug txug naj nub nua. Daviv chim heev rua qhov tug TSWV chim hab rau txim rua Uxahas.

¹²Nub ntawd Daviv ntshai Vaajtswv heev nwg txhaj nug has tas, “Kuv yuav ua le caag kwv tau Vaajtswv lub Phijxaab nuav nrug kuv moog?”

¹³Yog le ntawd, Daviv txhaj tsi coj lub Phijxaab ntawd nrug Daviv lug rua huv lub nroog Yeluxalees. Tabsis nwg muab tso tseg rua huv ib tug txivneej hu ua Aunpes Edoos lub tsev, Aunpes Edoos yog cov tuabneeg kws nyob huv lub nroog Nkas.

¹⁴Vaajtswv lub Phijxaab txhaj nyob tau peb hlis rua huv Aunpes Edoos tsev, tug TSWV foom koob moov rua nwg tsev tuabneeg hab txhua yaam kws nwg muaj.