Read Hmong Njua 1 Xwmtxheej Vaajntxwv 14 Bible Online

1 Xwmtxheej Vaajntxwv 14 - Hmong Njua bible

1 Xwmtxheej Vaajntxwv 14

¹Vaajntxwv Hilaas kws kaav lub nroog Tiles tau tso ib tug tuabneeg kws saib phaab kev laag luam tuaj cuag Daviv; nwg txhaj muab tej ntoo cab pub rua Daviv, hab tso nwg tej tuabneeg txawj txua ntoo moog ua Daviv lub loog huv tuabsi.

²Daviv paub has tas, yog tug TSWV tsaa nwg ua vaajntxwv kaav tsaav tuabneeg Yixalayees, hab ua kuas nwg lub tebchaws muaj kev vaammeej, vim tug TSWV taabncuab txug nwg tsaav tuabneeg Yixalayees.

³Nyob huv lub nroog Yeluxalees, Daviv yuav ntau tug quaspuj ntxiv, nwg txhaj muaj tub hab muaj ntxhais coob.

⁴Daviv cov mivnyuas kws yug huv lub nroog Yeluxalees muaj lawv le nuav: Samuas, Saunpas, Nathaas, Xalumoos,

⁵Ihas, Elisuas, Epeles,

⁶Naunkas, Nefes, Yafias,

⁷Elisamas, Npeeli-adas, hab Elifeles.

⁸Thaus cov Filitees nov has tas, Daviv ua vaajntxwv kaav tebchaws Yixalayees lawm, ces puab cov tubrog txawm tuaj puav nteg Daviv; thaus Daviv nov le ntawd nwg txhaj tawm moog nrug cov Filitees sis tua.

⁹Thaus cov Filitees tuaj txug rua huv lub Haav Lefayees, puab txawm pib fuab noj fuab haus huv.

¹⁰Daviv nug Vaajtswv has tas, “Koj puas pum zoo ca kuv moog tua cov Filitees? Koj puas muab puab cob rua kuv teg?” Tug TSWV teb Daviv has tas, “Koj ca le moog tua! Kuv yuav muab puab cob rua koj teg.”

¹¹Ces Daviv moog rua huv lub nroog Npa-aas Pelaxees, hab tua yeej cov Filitees lawm; Daviv has tas, “Vaajtswv tau siv kuv ob txhais teg tsoo cov yeebncuab tawg ri sua moog ib yaam le dlej kuav.” Yog le ntawd, txhaj muab qhov chaw ntawd tis npe hu ua Npa-aas Pelaxees.

¹²Thaus cov Filitees tsiv lawm hab tso puab tej mlom tseg, Daviv txhaj khaiv nwg cov tubrog moog sau lug hlawv povtseg.

¹³Thaus cov Filitees rov moog txug huv lub Haav Lefayees, puab rov moog fuab noj fuab haus dlua ntxiv.

¹⁴Daviv rov nug Vaajtswv dlua, Vaajtswv teb has tas, “Tsi xob moog tua puab nraag, tabsis ca le moog puav hab npaaj tua puab rua lwm qhov chaw kws nyob ze rua ntawm cov ntoo zaub kaab.

¹⁵Thaus koj nov tej suab tuabneeg moog kev sau cov ntsis ntoo zaub kaab, koj ca le nqeg teg tua thaus ntawd ntaag, vim kuv tub ua koj ntej moog tua cov tubrog Filitees lawm.”

¹⁶Daviv ua lawv le Vaajtswv tau saamfwm rua nwg, ces puab txhaj muab cov tubrog Filitees lawv huv Nkinpe-oos moog txug ndlua huv Nkexes.

¹⁷Daviv lub koob meej nrov nchaa moo lug moog thoob plawg txhua lub tebchaws, hab tug TSWV ua rua txhua tsaav tuabneeg ntshai hab fwm Daviv heev.