Read Hmong Njua 1 Xwmtxheej Vaajntxwv 15 Bible Online

1 Xwmtxheej Vaajntxwv 15 - Hmong Njua bible

1 Xwmtxheej Vaajntxwv 15

¹Daviv ua tau ib cov tsev rua huv Daviv lub nroog rua nwg nyob. Nwg npaaj tau ib qhov chaw rau lub Phijxaab kws ntim Vaajtswv tej lug cog tseg, hab tsaa ib lub tsevntaub vuv rua.

²Ces Daviv has tas, “Tsuas yog cov Levis xwb txhaj kwv tau lub Phijxaab kws ntim Vaajtswv tej lug cog tseg, rua qhov tug TSWV yeej xaiv puab lug kwv lub phijxaab ntawd hab ua nwg teg num moog ibtxhis le.”

³Yog le ntawd, Daviv txhaj sau taagnrho cov tuabneeg Yixalayees tuaj rua huv Yeluxalees, kuas sis paab moog kwv tug TSWV lub Phijxaab lug tso rua ntawm qhov chaw kws nwg npaaj tseg ca rua lub phijxaab.

⁴Hab Daviv has moog rua Aloos cov xeebntxwv hab cov Levis le nuav:

⁵Cuab Kauhas, Uliyees yog tug thawj, nwg coj nwg cov kwvtij ib puas neeg nkaum leej tuaj;

⁶Cuab Melalis, Axayas yog tug thawj, nwg coj nwg cov kwvtij ob puas neeg nkaum leej tuaj;

⁷Cuab Nkesoos, Yau-ees yog tug thawj, nwg coj nwg cov kwvtij ib puas peb caug leej tuaj;

⁸Cuab Elixafas, Semayas yog tug thawj, nwg coj nwg cov kwvtij ob puas leej tuaj;

⁹Cuab Henploos, Eliyees yog tug thawj, nwg coj nwg cov kwvtij yim caum leej tuaj;

¹⁰hab cuab Uxiyees, Aminadas yog tug thawj, nwg coj nwg cov kwvtij ib puas kaum ob leeg tuaj.

¹¹Daviv hu Xadaus hab Anpiyathas kws yog ob tug povthawj hab Uliyees, Axayas, Yau-ees, Semayas, Eliyees hab Aminadas kws yog cov Levis rau tug thawjcoj lug cuag nwg.

¹²Daviv has rua cov Levis tas, “Mej cov kws yog thawjcoj ntawm xeem Levis. Mej ca le ua kevcai ntxuav mej hab mej cov kwvtij Levis kuas huv, mej txhaj yuav moog kwv tau tug TSWV kws yog cov Yixalayees tug Vaajtswv lub Phijxaab lug tso rua huv qhov chaw kws kuv tub npaaj tseg rua lub phijxaab lawm.

¹³Rua qhov thawj zag mej tsi tuaj paab kwv, tug TSWV kws yog peb tug Vaajtswv txhaj le rau txim rua peb, vim qhov kws peb tsi pehawm nwg kuas tsimnyog le peb yuavtsum ua.”

¹⁴Yog le ntawd, cov povthawj hab cov Levis txhaj ua kevcai ntxuav kuas puab huv hab moog kwv tug TSWV kws yog cov Yixalayees tug Vaajtswv lub Phijxaab lug.

¹⁵Cov Levis txhaj tsaws hlo Vaajtswv lub Phijxaab ob tug laag kwv sau puab xubpwg lawv le tug TSWV tau saamfwm tseg rua Mauxes lawm.

¹⁶Daviv has rua cov thawj kws saib cov Levis, kuas xaiv puab cov kwvtij ua cov hu nkauj hab tshuab raaj, ntaus nkauj nogncaas hab ntaus nruag npuaj, kuas muaj suab nrov dloog dlaj lomzem zoo sab.

¹⁷Cov Levis txhaj xaiv tau Yau-ees tug tub Hemaas hab nwg cov kwvtij Axafes kws yog Npelekhiyas tug tub, hab Kusayas tug tub Ethaas kws yog Melalis tug xeebntxwv.

¹⁸Hab paab ob kws yog puab cov kwvtij, Xakhaliyas, Ya-aziyees, Semilamaus, Yehiyees, Authenis, Eli-as, Npenayas, Ma-axeyas, Matithiyas, Elifelehus hab Mineyas. Cov zuv qhovrooj yog: Aunpes Edoos hab Ye-iyees.

¹⁹Cov coj hu nkauj yog: Hemaas, Axafes, hab Ethaas, puab puavleej npuaj nruag;

²⁰Xakhaliyas, Axiyees, Semilamaus, Yehiyees, Authenis, Eli-as, Ma-axeyas hab Npenayas yog cov ntaus nkauj nogncaas lawv Alamaus ntaag;

²¹tabsis Matithiyas, Elifelehus, Mineyas, Aunpes Edoos, Ye-iyees hab Axaxiyas ntaus tej nkauj nogncaas yau hab tej nkauj nogncaas kws muaj kaum txuj hlua lawv Seminis.

²²Vim Khenaniyas txawj tshuab raaj hab ntaus nkauj nogncaas heev, txhaj xaiv nwg lug ua tug coj cov Levis tshuab raaj hab ntaus nkauj nogncaas.

²³Npelekhiyas hab Ekanas ua ob tug zuv qhovrooj ntawm lub tsevntaub kws tso lub phijxaab.

²⁴Senpaniyas, Yausafas, Nethanees, Amaxais, Xakhaliyas, Npenayas hab Elixes kws yog cov povthawj tshuab tej xyu ntawm Vaajtswv lub Phijxaab hauv ntej. Aunpes Edoos hab Yehiyas yog ob tug zuv qhovrooj ntawm lub phijxaab hab.

²⁵Vaajntxwv Daviv hab cov Yixalayees cov thawj, hab cov thawj tubrog kws saib pawg txheeb txhaj moog kwv tug TSWV lub Phijxaab huv Aunpes Edoos lub tsev lug muaj kev lomzem zoo sab heev.

²⁶Rua qhov Vaajtswv paab cov Levis kws kwv tug TSWV lub Phijxaab kws ntim Vaajtswv tej lug cog tseg ntawd, puab txhaj tua xyaa tug txiv nyuj hab xyaa tug laug yaaj lug ua khoom fij.

²⁷Daviv naav lub tsho ntev kws yog tseem ntaub maag, ib yaam le cov Levis kws kwv lub Phijxaab, cov hu nkauj hab Khenaniyas kws yog tug thawj qha puab hu nkauj hab tshuab raaj ntaus nruag.

²⁸Yog le ntawd, cov Yixalayees txhaj nrug lub Phijxaab ua ke lug rua huv lub nroog Yeluxalees, muaj suab qw zoo sab, tshuab raaj tshuab xyu hab suab nruag npuaj nrov dloog dlaj lug.

²⁹Thaus puab kwv lub Phijxaab kws ntim Vaajtswv tej lug cog tseg lug txug rua huv Daviv lub nroog lawm, Mikhas kws yog Xa-ules tug ntxhais saib ntawm qhovrais moog, nwg pum Vaajntxwv Daviv dlha seev cev hab zoo sab heev; ces nwg txawm luag Daviv hab thuam Daviv huv nwg lub sab.