Read Hmong Njua 1 Xwmtxheej Vaajntxwv 16 Bible Online

1 Xwmtxheej Vaajntxwv 16 - Hmong Njua bible

1 Xwmtxheej Vaajntxwv 16

¹Puab moog kwv Vaajtswv lub Phijxaab lug, hab coj lug tso rua huv lub tsevntaub kws Daviv npaaj tseg rua lub phijxaab ntawd; puab txhaj muab tsaj tua hlawv fij hab fij khoom ua kev sis raug zoo rua Vaajtswv.

²Thaus kws Daviv hlawv khoom fij hab fij khoom ua kev sis raug zoo taag lawm, nwg txhaj tuav tug TSWV lub npe foom koob moov rua cov pejxeem,

³hab nwg muab tej zaub mov ntawd faib taagnrho rua puab. Nwg faib rua cov Yixalayees txhua tug, tsi has quaspuj lossis txivneej ib leeg ib lub ncuav, ib dlaim nqaj, hab mivntsiv txiv maab qhuav.

⁴Daviv tsaa cov Levis qee leej ua cov coj kev pehawm tug TSWV kws yog cov Yixalayees tug Vaajtswv, puab nyob rua ntawm lub Phijxaab hauv ntej ua tug TSWV tsaug hab hu nkauj qhuas nwg.

⁵Tsaa Axafes ua tug thawjcoj hab cov paab yog Xakhaliyas, Ye-iyees, Semelamaus, Yehiyees, Matithiyas, Eli-as, Npenayas, Aunpes Edoos hab Ye-ees. Puab yog cov ntaus nkauj nogncaas; Axafes yog tug npuaj lub nruag,

⁶Npenayas hab Yahaxiyees yog ob tug povthawj kws tshuab raaj tshuab xyu ntawm Vaajtswv lub Phijxaab hauv ntej txhua zag.

⁷Ces nub ntawd yog thawj nub kws Daviv tsaa Axafes hab cov Levis lug ua cov hu nkauj hab ua tug TSWV tsaug ntaag.

⁸Ca le txhawb nqaa hab ua tug TSWV tsaug ca le qha nwg teg num kws luj kawg nkaus; qha tej kws nwg tub ua tav taag lug lawm rua txhua lub tebchaws paub.

⁹Hu nkauj txhawb nqaa qhuas tug TSWV; qha tej txujci tseemceeb kws nwg ua taag lug lawm rua suavdlawg.

¹⁰Ca le zoo sab kws peb yog nwg tug; txhua tug ca le zoo sab pehawm nwg.

¹¹Ca le moog nrhav tug TSWV kws muaj zug luj zug nchaav; hab pehawm nwg tsi tseg tsi tu le.

¹²Ncu ntsoov tej txujci tseemceeb kws nwg tau ua taag lug lawm, tej kev txav txim kws nwg muab cob rua mej,

¹³Yakhauj cov xeebntxwv, mej yog Vaajtswv cov tubkhai. Yixalayees cov xeebntxwv kws Vaajtswv xaiv tseg lawm!

¹⁴Tug TSWV kws yog peb tug Vaajtswv; nwg cov lug saamfwm muaj nyob thoob plawg huv nplajteb nuav.

¹⁵Yuavtsum ncu ntsoov Vaajtswv tej lug cog tseg moog ibtxhis, tej lug ntawd nwg saamfwm rua ntau txheeb ntau vaam tam tuabneeg.

¹⁶Yog cov lug kws Vaajtswv cog tseg rua Anplahaas hab nwg cog tseg rua Ixaj lawm,

¹⁷Tug TSWV tau coglug tseg rua Yakhauj, yog cov lug cog tseg kws nyob moog ibtxhis

¹⁸has tas, “Kuv yuav muab lub tebchaws Kana-aas pub rua koj, ua koj tug moog ibtxhis le.”

¹⁹Thaus puab tseem tsi tau muaj coob puab yuav moog ua qhua nyob huv lub tebchaws ntawd,

²⁰moog ib lub tebchaws rua ib lub tebchaws, moog ib lub nroog rua ib lub nroog,

²¹tabsis Vaajtswv tsi pub leejtwg tsimtxom puab, nwg tiv thaiv puab, nwg txhaj tau txwv ntau tug vaajntxwv

²²has tas, “Tsi xob kov cov tuabneeg kws kuv xaiv, tsi xob ua rua kuv cov cevlug raug mob.”

²³Taagnrho lub qaab ntuj nuav, ca le hu nkauj ua tug TSWV tsaug! qha nwg txujkev cawm dlim ib nub dlhau rua ib nub.

²⁴Tshaajtawm nwg lub fwjchim kws ci ntsaa ab rua txhua tsaav tuabneeg, hab nwg teg num kws zoo kawg nkaus rua txhua tug tuabneeg.

²⁵Tug TSWV yog tug luj tshaaj plawg, tsimnyog txhawb nqaa nwg rua qhov sab, hab nwg yog tug txaus ntshai tshaaj tej timtswv huv tuabsi.

²⁶Txhua tsaav tuabneeg tej vaajtswv puavleej yog mlom xwb; tabsis tug TSWV yog tug kws tsim lub ntuj.

²⁷Fwvxyeej hab tshwjchim ci ntsaa ab puagncig nwg, lub fwjchim hab kev zoo sab puv nkaus huv nwg qhov chaw nyob.

²⁸Txhua tug tuabneeg huv nplajteb nuav, ca le qhuas tug TSWV, qhuas nwg tug tshwjchim hab tug zug kws luj kawg nkaus.

²⁹Qhuas tug TSWV kws muaj tshwjchim luj kawg nkaus lub npe; nqaa tej khoom fij hab tuaj cuag nwg huv nwg lub Tuamtsev naav tej rig tsho dlawbhuv moog pehawm tug TSWV xwb.

³⁰Taagnrho lub nplajteb ca le ntshai ua ib ce tshee nyo, lub nplajteb nyob ruaj khov kho hab tsi txaav le.

³¹Nplajteb hab lub ntuj, ca le zoo sab! Ca puab has rua txhua tsaav tuabneeg has tas, “Tug TSWV yog Vaajntxwv.”

³²Ca havtxwv hab txhua tsaav yaam huv havtxwv nyooj zoo sab; Ca taj nraag, hab txhua tsaav yaam huv tej taj nraag zoo sab los mas!

³³Tej ntoo kws nyob huv haav zoov yuav hu nkauj zoo sab ntawm tug TSWV xubndlag, thaus nwg nqeg lug txav txim rua lub nplajteb.

³⁴Ca le ua tug TSWV tsaug, vim nwg yog tug zoo tshaaj plawg; nwg txujkev hlub nyob ruaj khov moog ibtxhis tsi kawg.

³⁵Ca le has rua Vaajtswv has tas: “Vaajtswv, peb tug Cawmseej, thov paab kuas peb dlim, hab thov qaws peb lug ua ke, cawm peb kuas dlim ntawm txhua tsaav tuabneeg, peb txhaj tau ua koj tsaug hab qhuas koj lub npe kws dlawbhuv.

³⁶Thov qhuas tug TSWV kws yog cov Yixalayees tug Vaajtswv! Thov qhuas nwg taamsim nuav hab moog ibtxhis tsi kawg.” Ces taagnrho cov pejxeem has tas, “Amees” hab ua tug TSWV tsaug.

³⁷Yog le ntawd, Vaajntxwv Daviv txhaj tsaa Axafes hab nwg cov kwvtij Levis nyob ntawm lub Phijxaab kws ntim Vaajtswv tej lug cog tseg. Puab txhaj ua cov coj kev pehawm Vaajtswv ntawm lub Phijxaab hauv ntej txhua nub.

³⁸Dlua le ntawd Daviv tseem tso Yeduthoos tug tub Aunpes Edoos hab nwg cov kwvtij rau caum yim leej ua cov paab puab hab. Aunpes Edoos hab Yeduthoos ua ob tug zuv qhovrooj.

³⁹Daviv muab tug povthawj Xadaus hab Xadaus cov kwvtij kws yog cov povthawj, ua cov saib kev pehawm tug TSWV ntawm qhov chaw kws pehawm Vaajtswv huv lub nroog Nkinpe-oos,

⁴⁰hab puab muab khoom fij moog hlawv rua sau lub thaaj fij rua tug TSWV txhua taagkig sawv ntxuv hab thaus yaav tsaus ntuj, lawv le txuj kevcai kws tug TSWV sau tseg ca rua cov Yixalayees lawm.

⁴¹Cov kws nrug puab nyob yog: Hemaas, Yeduthoos hab muaj ibtxha yog cov kws xaiv ca hu nkauj qhuas tug TSWV kws muaj txujkev hlub moog ibtxhis.

⁴²Hemaas hab Yeduthoos, yog ob tug saib cov raaj xyu, cov nruag npuaj hab lwm yaam nkauj nogncaas kws ntaus nrug suab hu nkauj qhuas tug TSWV. Tsaa Yeduthoos tsev tuabneeg txhua tug ua cov zuv tej roojvaag.

⁴³Ces cov pejxeem txawm rov moog tsev lawm, Daviv rov qaab lug tsev hab lug foom koob moov rua nwg tsev tuabneeg.