Read Hmong Njua 1 Xwmtxheej Vaajntxwv 17 Bible Online

1 Xwmtxheej Vaajntxwv 17 - Hmong Njua bible

1 Xwmtxheej Vaajntxwv 17

¹Thaus Vaajntxwv Daviv lug nyob huv nwg lub loog lawm. Muaj ib nub nwg txawm xaa xuv moog rua Nathaas kws yog tug cev Vaajtswv lug has tas, “Nwgnuav kuv nyob huv lub tsev kws muab ntoo cab ua lawm, tabsis lub Phijxaab kws ntim Vaajtswv tej lug cog tseg tseem nyob huv lub tsevntaub xwb!”

²Nathaas txhaj has rua Daviv has tas, “Koj ca le ua txhua yaam lawv le koj lub sab xaav, vim Vaajtswv yeej nrug nraim koj.”

³Tabsis mo ntawd Vaajtswv lug has rua Nathaas has tas,

⁴“Koj ca le moog has rua kuv tug tubkhai Daviv has tas, tej lug nuav yog kuv has rua nwg, ‘Koj tsi yog tug kws yuav ua lub Tuamtsev rua kuv nyob.

⁵Txij thaus kuv coj cov tuabneeg Yixalayees tawm nraag tebchaws Iziv lug txug taamsim nuav, kuv yeej ibtxwm tsi tau nyob huv lub Tuamtsev le; kuv tsuas nyob huv lub tsevntaub kws tshais ib qho moog rua ib qho xwb.

⁶Thaus kuv tseem nrug cov Yixalayees taug kev tsiv moog rua nuav rua u, kuv tsi tau taij cov thawjcoj kws kuv tsaa ntawd has tas, vim le caag mej tsi muab ntoo cab lug ua lub tuamtsev rua kuv nyob?’

⁷“Yog le ntawd, koj ca le moog has rua kuv tug tubkhai Daviv has tas kuv yog tug TSWV, tug kws muaj fwjchim luj kawg nkaus, kuv has tej lug nuav rua nwg ntaag, ‘Kuv tau coj koj tawm huv paab yaaj kws nyob tom tshaav zaub lug hab tsaa koj ua tug kaav kuv tsaav tuabneeg Yixalayees;

⁸Kuv tsomkwm koj txhua txuj hauv kev kws koj moog, kuv tau txuv koj cov yeebncuab taabmeeg koj; hab kuv yuav tsaa koj ua ib tug thawjcoj kws muaj koob meej tshaaj plawg nyob huv qaab ntuj nuav.

⁹Kuv yuav xaiv ib thaaj chaw rua kuv tsaav tuabneeg Yixalayees nyob, hab yuav coj puab moog nyob huv qhov chaw ntawd, kuas puab txhaj tsi raug kev txomnyem, hab cov tuabneeg limham txhaj yuav tsi tuaj tsimtxom puab ntxiv le yaav taag lug,

¹⁰hab txij le thaus kws kuv pib tsaa muaj cov thawjtswj lug kaav kuv tsaav tuabneeg Yixalayees; hab kuv txuv koj cov yeebncuab kuas puamtsuaj taag. Dlua le ntawd kuv qha rua koj paub has tas, tug TSWV yuav pub kuas koj caajceg fuamvaam coob heev.

¹¹Thaus koj tuag yuav coj koj moog log nrug koj cov yawmkoob, kuv yuav tsaa koj cov tub ib tug lug ua vaajntxwv, hab kuv yuav txhim khu kuas nwg lub tebchaws ruaj khov.

¹²Nwg yuav ua lub tuamtsev rua kuv, hab kuv yuav txhawb kuas nwg lub zwmtxwv nyob moog ibtxhis.

¹³Kuv yuav ua nwg txiv, hab nwg yuav tau ua kuv tug tub; kuv yuav tsi tshem kuv txujkev hlub tawm ntawm nwg le kws kuv tau tshem tawm ntawm Xa-ules, kuas koj txhaj tau ua vaajntxwv.

¹⁴Tabsis kuv yuav tsaa nwg ua tug saib kuv tsaav tuabneeg hab kuv lub tebchaws moog ibtxhis, hab nwg lub zwmtxwv yuav nyob moog ibtxhis tsi paub kawg le.’ ”

¹⁵Nathaas txhaj has txhua yaam lawv le Vaajtswv tau qha ntawd rua Vaajntxwv Daviv noog.

¹⁶Ces Vaajntxwv Daviv txhaj moog rua huv lub Tsevntaub hab nyob taabmeeg tug TSWV thov has tas, “Tug TSWV kws yog Vaajtswv, kuv yog leejtwg hab kuv tsev tuabneeg tseemceeb npaum le caag, koj txhaj coj peb lug txug naj nub nua?

¹⁷Txawm yog koj tub ua ntau yaam pub rua kuv lawm los koj tseem coglug tseg rua kuv tej xeebntxwv yaav tom ntej ntev moog tsi kawg le; hab tug TSWV kws yog Vaajtswv, koj tseem txhawb kuv zoo le kuv yog tug tuabneeg kws muaj meejmom sab.

¹⁸Tseem tshuav dlaabtsi kws kuv yuav thov ntxiv hab? Koj yeej paub kuv zoo, hab koj muab kuv kws yog koj tug tubkhai saib rau nqe kawg le.

¹⁹Tug TSWV, vim kuv yog koj tug tubkhai, koj txhaj le ua ntau yaam rua kuv lawv le koj sab nyam, hab ua rua kuv paub ntau yaam tseemceeb txug yaav tom ntej.

²⁰Tug TSWV, yeej tsi muaj lwm tug zoo npaum le koj; peb tsuas paub koj tuab leeg xwb txhaj yog Vaajtswv.

²¹Tsi muaj ib tsaav tuabneeg twg nyob huv nplajteb nuav zoo npaum le koj tsaav tuabneeg Yixalayees, cov kws koj tau cawm dlim ntawm txujkev ua qhev lug ua koj tsaav tuabneeg. Yaam tseemceeb hab zoo tshaaj plawg kws koj tau ua rua puab nuav nrov nchaa moog thoob plawg huv nplajteb nuav lawm. Koj tau cawm koj tsaav tuabneeg dlim nraag tebchaws Iziv lug, hab muab lwm tsaav tuabneeg ntab tawm taabmeeg koj tsaav tuabneeg.

²²Koj tau xaiv tsaav tuabneeg Yixalayees lug ua koj tsaav tuabneeg moog ibtxhis, hab koj yog tug TSWV, koj yeej yog puab tug Vaajtswv tag.

²³“Tug TSWV, nwgnuav thov kuas tej lug kws koj cog tseg rua koj tug tubkhai hab nwg cov xeebntxwv nyob moog ibtxhis, hab thov ua kuas tav lawv le koj tau has tseg lawm.

²⁴Koj lub koob lub npe yuav nrov nchaa moo lug, hab noobneej yuav qhuas koj moog ibtxhis has tas, ‘Tug TSWV kws muaj fwjchim luj kawg nkaus yog tug Vaajtswv kws kaav cov Yixalayees.’ Hab koj yuav pub kuas koj tug tubkhai Daviv caajceg nyob ruaj khov ntawm koj xubndlag moog ibtxhis.

²⁵Kuv tug Vaajtswv, vim koj tau qha txhua yaam nuav rua kuv kws yog koj tug tubkhai, hab koj tau has tas, koj yuav tsaa kuv cov xeebntxwv lug ua vaajntxwv, kuv txhaj muaj lub sab kub lug thov koj.

²⁶Tug TSWV, koj yeej yog Vaajtswv tag, hab koj tau coglug zoo kawg nkaus rua kuv kws yog koj tug tubkhai.

²⁷Kuv thov koj foom koob moov rua kuv cov xeebntxwv kuas puab muaj lub sab npuab koj moog ibtxhis. Tug TSWV, tej koob moov kws koj foom rua puab hab koj tej koob moov ntawd yuav nrug puab nyob moog ibtxhis tsi kawg le.”