Read Hmong Njua 1 Xwmtxheej Vaajntxwv 18 Bible Online

1 Xwmtxheej Vaajntxwv 18 - Hmong Njua bible

1 Xwmtxheej Vaajntxwv 18

¹Tau ib ntus tom qaab nuav, Vaajntxwv Daviv moog ua rog rua cov Filitees dlua ib zag ntxiv hab nwg tua yeej puab. Nwg txhaj txeeb tau lub nroog Nkas hab tej zog kws nyob ibncig lub nroog luj ntawm cov Filitees teg lug.

²Hab nwg tseem moog tua yeej cov Mau-am huv tuabsi, cov tuabneeg Mau-am txhaj tau ua nwg qhev hab them se rua nwg.

³Daviv tseem moog tua yeej cov Xilias tug Vaajntxwv Hadadexes kws kaav lub xeev Xaunpas kws nyob ze rua ntawm cheebtsaam Hamas, rua qhov Hadadexes xaav ua tug kaav taagnrho cheebtsaam ntawm tug dlej Efalates saab peg.

⁴Daviv nteg tau Hadadexes ib txheeb lub tsheb neeg ua rog, xyaa txheeb leej tubrog caij neeg, hab neeg nkaum txheeb leej tubrog moog kutaw. Nwg muab cov neeg ntawd ibtxha txu leeg rawg, nwg tsuas tseg kuas txaus nkaus hai ib puas lub tsheb xwb.

⁵Thaus cov Xilias kws nyob huv lub nroog Damaxes xaa ib cov tubrog tuaj paab Vaajntxwv Hadadexes huv lub nroog Xaunpas, tabsis paab tubrog ntawd raug Daviv puab muab tua tuag lawm neeg nkaum ob txheeb leej.

⁶Ces Daviv txhaj moog tsuam yeej rua huv cov Xilias lub nroog Damaxes hab cov Xilias tau ua Daviv qhev hab them se rua nwg. Tug TSWV pub rua Daviv tua yeej rog txhua qhov chaw kws Daviv moog txug huv tuabsi.

⁷Daviv tseem txeeb tau Hadadexes cov tubrog tej thaiv nav ntaaj kws muab kub ua hab muab nqaa huv tuabsi lug rua huv lub nroog Yeluxalees lawm.

⁸Daviv tseem coj tau tej tooj dlaag ntau heev huv lub nroog Tinpehas hab lub nroog Kunes kws Hadadexes kaav lug. (Tom qaab nuav Xalumoos txhaj muab cov tooj dlaag ntawd lug ua lub rhawv dlej, ob tug ncej hab tej twj taig kws siv huv lub Tuamtsev.)

⁹Thaus Vaajntxwv Tau-is kws kaav lub nroog Hamas nov has tas, Daviv moog tua yeej taagnrho Hadadexes cov tubrog lawm.

¹⁰Nwg txhaj tso nwg tug tub Yaulaas moog hawm Vaajntxwv Daviv, hab qhuas tej kws Daviv tua yeej Vaajntxwv Hadadexes, tug kws kaav lub xeev Xaunpas kws tau ua rog ntau zag rua Tau-is lug lawm. Yaulaas txhaj coj kub, nyaj hab tooj ntau heev tuaj pub rua Daviv.

¹¹Vaajntxwv Daviv muab tej nyaj, tej kub kws nwg moog tua yeej cov Edoos, cov Mau-am, cov Filitees hab cov Amalej kws nwg nqaa lug ntawd coj tuaj fij rua Vaajtswv.

¹²Anpisais kws nwg nam hu ua Xeluyas, tau moog tua yeej cov Edoos kws nyob huv lub Haav Ntsev, hab muab puab tua tuag taag lawm kaum yim txheeb leej.

¹³Nwg txhaj ua tau ib lub yeej rua nwg cov tubrog nyob huv tebchaws Edoos; hab taagnrho cov tuabneeg Edoos puavleej tau ua Daviv qhev. Tug TSWV pub rua Daviv tua yeej rog txhua qhov chaw kws Daviv moog txug huv tuabsi.

¹⁴Daviv kaav taagnrho cov Yixalayees; hab nwg muaj kev tswjfwm ncaaj nceeg rua nwg tsaav tuabneeg.

¹⁵Xeluyas tug tub Yau-am kws yog Anpisais tug tijlaug ua tug thawj tubrog; Ahilus tug tub Yehausafas ua tug teev ntawv;

¹⁶Ahitus tug tub Xadaus hab Ahimelej tug tub Anpiyathas, ua ob tug povthawj; hab Xelayas ua tug teev ntawv;

¹⁷Yehauyadas tug tub Npenayas ua tug thawj saib cov tubrog kws zuv Daviv; hab Vaajntxwv Daviv cov tub puavleej yog cov numtswv qeb sab ntawm Daviv xubndlag.