Read Hmong Njua 1 Xwmtxheej Vaajntxwv 19 Bible Online

1 Xwmtxheej Vaajntxwv 19 - Hmong Njua bible

1 Xwmtxheej Vaajntxwv 19

¹Tom qaab kws Vaajntxwv Nahases kws kaav cov Amoos tuag lawm, nwg tug tub Hanoos ua vaajntxwv hloov nwg chaw.

²Vaajntxwv Daviv has tas, “Kuv yuav tau muab sab npuab hab ua phoojywg zoo rua Nahases tug tub Hanoos, vim nwg txiv Nahases tau ua phoojywg zoo heev rua kuv lug lawm.” Yog le ntawd, Daviv txhaj tso ib cov tuabneeg moog nplig nwg sab, vim hlub tshua txug nwg txiv. Thaus Daviv cov tuabneeg moog txug huv tebchaws Amoos, puab txawm moog cuag Vaajntxwv Hanoos hab nplig nwg sab,

³tabsis cov Amoos tej thawjcoj txawm has rua Vaajntxwv Hanoos has tas, “Koj xaav has tas Daviv tso cov tuabneeg nuav tuaj nplig koj sab, vim nwg fwm koj txiv nuav los? Tsi yog le ntawd! Nwg tso puab tuaj soj saib thoob plawg lub tebchaws nuav, kuas nwg txhaj tuaj tua yeej lub tebchaws nuav xwb!”

⁴Hanoos txhaj muab Daviv cov tuabneeg chais fwjtxwv, muab puab tej tsho ntev txav txug ndlua ntawm pobtw, hab nwg muab puab ntab rov lug.

⁵Puab txaj muag heev rov qaab lug tsev. Thaus Daviv nov tej xwmtxheej nuav, nwg txhaj khaiv tuabneeg moog has rua puab tas, “Mej lug nyob tuabywv huv lub nroog Yelikaus moog txug thaus mej tej fwjtxwv tuaj ntev le qub lawm, mej maam lug tsev.”

⁶Ces Vaajntxwv Hanoos hab cov Amoos paub has tas, puab ua rua Daviv chim lawm mas Daviv yuav ua yeebncuab rua puab. Yog le ntawd, puab txhaj muab yuav laug plaub taas nyaj moog ndlav tau ib cov tsheb neeg hab tubrog tsaav tsheb neeg, peg tebchaws Mexuputamias hab cov Xilias kws nyob huv lub xeev Ma-akas hab Xaunpas tuaj.

⁷Mas peb caug ob txheeb lub tsheb neeg kws puab ndlav, hab cov Ma-akas tug vaajntxwv nrug nwg cov tubrog tuaj tsuam yeej ze rua ntawm Medenpas. Hab cov Amoos moog tsuam yeej thoob plawg rua huv puab tej nroog npaaj nroog tog sis tua lawm xwb.

⁸Thaus Daviv nov tej xwmtxheej nuav, nwg txawm tso Yau-am hab taagnrho cov tubrog kws muaj zug heev tawm moog.

⁹Cov Amoos txawm tawm tuaj nyob puv nkaus rua ntawm puab tej chaw sis tua kws yuav moog rua huv lub nroog Lanpas kws yog puab lub tuamceeb nroog, hab cov vaajntxwv kws tuaj paab puab los tuaj nyob taagnrho rua ntawm tej roob mojsaab.

¹⁰Yau-am pum cov yeebncuab tej tubrog kws tuaj tua nwg sawv nplawg nta tom hauv ntej hab tom qaab. Yog le ntawd nwg txhaj xaiv cov tubrog Yixalayees kws txawj tua rog heev, hab tso puab moog nyob txum chaw tim ntsej tim muag cov Xilias.

¹¹Nwg muab nwg cov tubrog kws seem rua nwg tug kwv Anpisais ua tug coj, Anpisais coj puab moog nyob txum chaw tim ntsej tim muag cov Amoos.

¹²Yau-am has rua nwg tug kwv tas, “Yog thaus twg koj pum cov Xilias tua yeej kuv, ces koj ca le lug paab kuv, hab yog cov Amoos tua yeej koj, ces kuv lug paab koj.

¹³Cuab zug khov kho hab ua sab tawv qhawv xwb! Ca le nqeg teg tua tag tag pub rua peb cov tuabneeg hab peb tug Vaajtswv lub nroog. Hab thov kuas tug TSWV ua lawv le nwg pum zoo.”

¹⁴Yog le ntawd, Yau-am hab nwg cov tuabneeg txhaj naam zog moog tua cov Xilias, ces cov Xilias ca le tawg tsiv ri sua lawm.

¹⁵Thaus cov Amoos pum cov Xilias tawg tsiv ri sua, ces puab txawm tsiv tsi tiv tua Anpisais puab, hab tsiv rov qaab moog rua huv nroog taag le lawm. Ces Yau-am puab txawm rov lug rua huv lub nroog Yeluxalees.

¹⁶Tabsis thaus cov Xilias pum has tas, puab tua tsi yeej cov Yixalayees lawm, puab txhaj tso tuabneeg moog coj cov tubrog Xilias kws nyob huv lub xeev ntawm tug dlej Efalates saab nubtuaj, hab coj puab tuaj cob rua Saunpas kws yog Vaajntxwv Hadadexes kws kaav lub xeev Xaunpas tug thawj tubrog saib.

¹⁷Thaus Daviv nov tej nuav, nwg txawm txhij cov tubrog Yixalayees moog sis sau ua ke hab hlaa tug dlej Yauladees rua saab tim u, hab puab moog nyob txum chaw tim ntsej tim muag cov Xilias. Ces puab txawm nqeg teg sis tua,

¹⁸hab cov Yixalayees muab cov Xilias tej tubrog caum tawg ri sua rov qaab lawm. Daviv hab nwg cov tuabneeg tua cov tubrog Xilias tsaav tsheb neeg tuag lawm xyaa txheeb leej hab cov tubrog moog kutaw tuag lawm plaub caug txheeb leej. Hab puab tseem tua tau cov Xilias tug thawj tubrog Saunpas lawm hab.

¹⁹Thaus cov vaajntxwv kws tuaj Hadadexes tog paub tas puab swb cov Yixalayees lawm, puab txawm cog phoojywg nrug Daviv, hab zoo sab ca Daviv ua tug tswjfwm puab.

²⁰Yog le ntawd, cov Xilias txhaj tu sab nrho tsi kaam paab cov Amoos ib zag ntxiv le lawm.