Read Hmong Njua 1 Xwmtxheej Vaajntxwv 20 Bible Online

1 Xwmtxheej Vaajntxwv 20 - Hmong Njua bible

1 Xwmtxheej Vaajntxwv 20

¹Thaus txug lub caij nplooj ntoos hlaav kws yog lub sijhawm cov Vaajntxwv pheej tawm moog tua rog, Yau-am txawm coj cov tubrog tawm moog tua cov Amoos lub tebchaws, hab lug puav lub nroog Lanpas. Tabsis Vaajntxwv Daviv tseem nyob huv lub nroog Yeluxalees. Puab moog puav lub nroog Lanpas, hab muab lub nroog ntawd tua puamtsuaj taag huv tuabsi lawm.

²Cov Amoos tug mlom Maules muaj ib lub mom kub nyaav kwvyees le xyaa caum tsib choj. Muaj ib lub hlaws dlai rua sau lub mom ntawd, Daviv txhaj dlaws lub hlaws ntawd lug dlai rua sau nwg lub mom kub. Hab nwg tseem nqaa tej khoom kws puab fuab tau huv lub nroog ntawd ntau heev lug hab.

³Daviv coj cov tuabneeg kws nyob huv lub nroog ntawd lug, hab nwg muab kaw, muab hlau hab muab taus rua puab, yuam kuas puab moog ua num. Daviv ua le nuav rua cov Amoos txhua lub nroog. Ces Daviv hab nwg cov tubrog txawm rov lug tsev rua huv lub nroog Yeluxalees lawm.

⁴Tau tsi ntev lug tom qaab nuav, rov muaj kev ua rog nrug cov Filitees ib zag ntxiv ntawm lub nroog Nkexes; ces Xinpekhais kws nyob huv nroog Husas txhaj tua tau Xipais kws yog caajceg ntawm cov tuabneeg luj heev ntawd; txhaj ua rua cov tuabneeg Filitees swb hlo lawm.

⁵Tom qaab nuav rov qaab ua rog nrug cov Filitees dlua ib zag ntxiv, ces Yais tug tub Ehanas txhaj tua tau Lamis kws yog Nkauli-am tug kwv kws tuaj huv lub nroog Khas tuaj tuag kag, Lamis muaj ib tug muv lub vug dlaav ib yaam le lub nqog ntus ntaub.

⁶Dlhau ntawd lug rov ua rog dlua ib zag ntxiv nyob ntawm lub nroog Nkas. Nyob rua huv muaj ib tug tuabneeg luj heev, nwg ib saab teg twg muaj rau tug ntivteg hab ib saab kutaw twg muaj rau tug ntivtaw. Hab nwg yog caajceg ntawm cov tuabneeg kws luj heev.

⁷Nwg tau tuam mom cov Yixalayees, ces Daviv tug tijlaug Samas tug tub Yaunathaas txhaj muab nwg tua tuag lawm.

⁸Peb tug tuabneeg kws raug Daviv hab nwg cov tuabneeg tua tuag ntawd, puavleej yog xeebntxwv ntawm cov tuabneeg luj kws ibtxwm nyob huv lub nroog Nkas.