Read Hmong Njua 1 Xwmtxheej Vaajntxwv 22 Bible Online

1 Xwmtxheej Vaajntxwv 22 - Hmong Njua bible

1 Xwmtxheej Vaajntxwv 22

¹Ces Daviv has tas, “Ntawm nuav yog qhov chaw kws yuav ua tug TSWV kws yog Vaajtswv lub Tuamtsev rua. Ntawm nuav yog lub thaaj kws cov Yixalayees tuaj hlawv tej khoom fij rua sau ntaag.”

²Vaajntxwv Daviv has rua cov tuabneeg txawv tebchaws kws nyob huv tebchaws Yixalayees kuas tuaj sis sau ua ke, nwg yuav faib num rua puab ua. Ibtxha moog txaug pobzeb lug ua lub Tuamtsev.

³Daviv npaaj hlau ntau heev tseg rua puab ntaus ua ntsa hlau hab ntaus ua tej pluaj hlau yuam cov txag ntoo ua dlaim kaw roojvaag, hab muab tooj ntau heev tsi muaj leejtwg luj tau le.

⁴Tseem muaj cov tuabneeg Tiles hab cov tuabneeg Xidoos txav ntoo cab tuaj rua Daviv ntau kawg le hab.

⁵Daviv xaav has tas, “Lub Tuamtsev kws kuv tug tub Xalumoos yuav ua rua tug TSWV ntawd, yuav zoo nkauj heev hab nto moo heev nyob huv lub nplajteb nuav. Tabsis kuv tug tub tseem hluas heev hab tsi tau paub hlo le.” Yog le ntawd kuv yuavtsum npaaj tej khoom kws ua lub Tuamtsev nuav kuas txhij rua nwg.

⁶Daviv has rua nwg tug tub Xalumoos hab saamfwm kuas nwg yuavtsum ua lub tuamtsev rua tug TSWV kws yog cov Yixalayees tug Vaajtswv.

⁷Daviv has rua Xalumoos has tas, “Mivtub, kuv xaav ua ib lub tuamtsev lug ua chaw qhuas tug TSWV kws yog kuv tug Vaajtswv.

⁸Tabsis tug TSWV has rua kuv tas, ‘Koj tau ua rog ntau zag lug lawm hab tau tua tuabneeg coob tug tuag lawm; koj yuav tsi tau ua lub Tuamtsev rua kuv, vim koj tau tua tuabneeg coob tug tuag taabmeeg kuv.

⁹Koj yuav muaj ib tug tub; nwg yuav kaav lub tebchaws nyob thaajyeeb lug. Kuv yuav pub nwg muaj kev thaajyeeb, nwg cov yeebncuab yuav tsi tuaj tua nwg, nwg lub npe yuav hu ua Xalumoos, hab kuv yuav pub rua nwg tam, kuas lub tebchaws Yixalayees muaj kev thaajyeeb hab nyob ntsag tu.

¹⁰Nwg yuav ua lub Tuamtsev rua kuv lub npe. Nwg yuav ua kuv tug tub, hab kuv yuav ua nwg txiv. Nwg caajceg yuav ua vaajntxwv kaav tsaav tuabneeg Yixalayees moog ibtxhis.’ ”

¹¹Daviv rov has dlua ib zag ntxiv tas: “Mivtub, nwgnuav thov tug TSWV kws yog koj tug Vaajtswv nrug nraim koj, hab thov nwg ua lawv le nwg tej lug cog tseg, kuas koj muaj peevxwm ua tau lub Tuamtsev rua nwg.

¹²Hab thov tug TSWV kws yog koj tug Vaajtswv pub kev txawj ntse hab tswvyim rua koj, kuas koj txhaj txawj tswjfwm tsaav tuabneeg Yixalayees lawv le nwg txuj kevcai.

¹³Yog koj coj lawv le tej kevcai kws tug TSWV muab cob rua Mauxes kuas qha rua cov Yixalayees, koj lub neej txhaj yuav muaj kev vaammeej. Ca le npaaj khov kho hab ua sab tawv qhawv, hab tsi xob ntshai ib yaam dlaabtsi le.

¹⁴Kuv muaj lub sab kub lug yuav ua lub Tuamtsev, kuv tub muab tau le plaub taas kub hab plaub caug taas nyaj coj lug ca ua lub Tuamtsev ntawd lawm; tej tooj hab hlau kws kuv npaaj los kuj ntau heev suav tsi txheeb le. Dlua le ntawd, kuv tub npaaj ntoo hab pobzeb tav log tseg lawm, tabsis koj yuavtsum npaaj ntxiv hab.

¹⁵Koj muaj cov tuabneeg kws txawj ua num coob heev: cov kws txawj txaug pobzeb, ntaus hlau, txua ntoo hab cov kws txawj ua txhua yaam coob heev suav tsi txheeb, puab puavleej txawj

¹⁶nchuav kub, nchuav nyaj, nchuav tooj hab ntaus hlau. Ca le nqeg teg ua. Thov tug TSWV nrug nraim koj.”

¹⁷Daviv saamfwm rua cov Yixalayees cov thawjcoj kuas tuaj paab nwg tug tub Xalumoos.

¹⁸Nwg has tas, “Tug TSWV kws yog mej tug Vaajtswv yuav nrug mej hab nwg pub kuas muaj kev thaajyeeb nyob puagncig mej. Nwg tub pub rua kuv tua yeej cov tuabneeg kws ibtxwm nyob huv lub tebchaws nuav, hab puab tub tau lug ua mej qhev hab ua tug TSWV qhev lawm.

¹⁹Nwgnuav mej ca le txhawb nqaa tug TSWV kws yog mej tug Vaajtswv kuas kawg mej lub sab lub ntsws. Ca le pib ua lub Tuamtsev, mej txhaj yuav muaj qhov chaw lug rau lub Phijxaab kws ntim Vaajtswv tej lug cog tseg hab coj Vaajtswv tej khoom tseemceeb moog tso rua huv lub Tuamtsev kws ua pub rua tug TSWV lub npe.”