Read Hmong Njua 1 Xwmtxheej Vaajntxwv 26 Bible Online

1 Xwmtxheej Vaajntxwv 26 - Hmong Njua bible

1 Xwmtxheej Vaajntxwv 26

¹Ntawm nuav yog teg num zuv lub Tuamtsev kws muab cob rua cov Levis: Kauhas caajceg yog Kaules tug tub Meselemiyas kws yog Axafes tug xeebntxwv.

²Meselemiyas muaj xyaa tug tub: Xakhaliyas yog tug tub hlub, Yedi-ales yog tug ob, Xenpadiyas yog tug peb, Yathaniyees yog tug plaub,

³Elames yog tug tsib, Yehauhanas yog tug rau hab Elihaunais yog tug xyaa.

⁴Vim Vaajtswv foom koob moov rua Aunpes Edoos, nwg txhaj muaj yim tug tub: Semayas yog tug tub hlub, Yehauxanpas yog tug ob, Yau-am yog tug peb, Xakhas yog tug plaub, Nethanees yog tug tsib,

⁵Amiyees yog tug rau, Ixakhas yog tug xyaa hab Pe-ulethais yog tug yim.

⁶Hab Aunpes Edoos tug tub hlub Semayas, kuj muaj ntau tug tub hab puab puavleej ua cov tswjfwm puab txiv tsev tuabneeg, vim puab yog cov kws muaj peevxwm tshaaj plawg le.

⁷Semayas muaj rau tug tub: Authenis, Lefayees, Aunpes, Elexanpas, Elihus hab Xemakhiyas. Paab kwvtij nuav Elihus hab Xemakhiyas sab tawv tshaaj cov huv tuabsi.

⁸Rau caum ob leeg txivneej kws muaj zug khov kho hab muaj peevxwm ua tau teg num nuav mas puavleej yog Aunpes Edoos cov tub hab cov xeebntxwv xwb.

⁹Meselemiyas cov tub hab nwg cov kwvtij kws muaj peevxwm heev, yog kaum yim leej.

¹⁰Hauxas kws yog Melalis caajceg, nwg muaj plaub tug tub: Simelis yog tug thawjcoj, (txawm yog nwg tsi yog tug tub hlub los nwg txiv ca le tsaa nwg ua tug thawjcoj),

¹¹Hilekiyas yog tug ob, Tenpaliyas yog tug peb hab Xakhaliyas yog tug plaub; taagnrho Hauxas cov tub hab nwg cov kwvtij muaj kaum peb leeg, puab puavleej moog ua cov zuv lub Tuamtsev.

¹²Muab cov kws zuv tej roojvaag faib ua tej paab, lawv le puab tej tsev tuabneeg, hab muab lub luag num huv lub Tuamtsev cob rua puab ua, ib yaam le puab cov kwvtij kws tub ua num huv tug TSWV lub Tuamtsev lawm.

¹³Txhua yim tuabneeg, tsi has coob los tsawg, puavleej tau moog rhu ntawv saib tau zuv lub roojvaag twg.

¹⁴Selemiyas rhu ntawv tau rua lub roojvaag kws nyob saab nubtuaj, hab nwg tug tub Xakhaliyas kws yog ib tug tuavxaam kws muaj tswvyim zoo, rhu ntawv tau rua lub roojvaag kws nyob saab qaumteb.

¹⁵Aunpes Edoos rhu ntawv tau rua lub roojvaag saab qaabteb, hab nwg cov tub rhu ntawv tau ua cov saib tej txhaab rau khoom.

¹⁶Supees hab Hauxas obtug rhu ntawv tau rua lub roojvaag saab nubpoob hab lub roojvaag Salekhes kws nyob saab qaum kev. Puab sis faib zuv, nyag zuv muaj nyag sijhawm.

¹⁷Saab nubtuaj ib nub twg yog rau leej zuv saab qaumteb ib nub twg yog plaub leeg zuv saab qaabteb ib nub twg yog plaub leeg zuv, hab ib nub twg plaub leeg zuv cov txhaab rau khoom, ib lub txhaab twg ob leeg,

¹⁸hab tog qaab khaav saab nubpoob muaj plaub leeg zuv ntawm txujkev hab ob leeg zuv ntawm qaab khaav.

¹⁹Tej nuav yog lub luag num kws zuv cov roojvaag hab muab cob rua Kauhas hab Melalis cov xeebntxwv.

²⁰Puab lwm paab kwvtij Levis kws yog cov saib tej txhaab nyaj huv Vaajtswv lub Tuamtsev hab tej txhaab rau tej khoom kws luas coj tuaj fij rua Vaajtswv.

²¹Ladas kws yog Nkesoos ib tug tub, nwg yog yawmkoob ntawm ob peb tsev tuabneeg kws muab faib ua tej paab lawm, hab suav nwg tug tub Yehiyees tsev tuabneeg huv tuabsi nrug.

²²Yehi-ees ob tug tub, Xethaas hab Yau-ees, ua ob tug kws saib lub txhaab nyaj hab tej txhaab rau khoom huv tug TSWV lub Tuamtsev.

²³Faib num txhua nrho rua Amelas, Ixehas, Henploos hab Uxis, puab cov xeebntxwv ua.

²⁴Senpuyees kws yog Mauxes tug tub Nkesoos tug xeebntxwv, ua tug thawj saib cov numtswv kws zuv lub txhaab nyaj.

²⁵Nkesoos tug kwv Eli-exes nwg txheeb Selaumaus. Eli-exes yog Lehanpiyas txiv, Lehanpiyas yog Yesiyas txiv, Yesaiyas yog Yaulaas txiv, Yaulaas yog Xikhalis txiv, Xikhalis yog Selaumis txiv.

²⁶Selaumaus hab nwg cov kwvtij ua cov saib taagnrho tej txhaab rau khoom kws Vaajntxwv Daviv cov thawjcoj ntawm tej cuab kwvtij, cov numtswv kws saib pawg txheeb hab saib pawg pua, hab cov thawj tubrog tau coj tuaj fij pub rua Vaajtswv.

²⁷Puab muab tej khoom kws puab moog tua rog yeej hab txeeb tau huv tshaav rog lug coj moog fij rua huv tug TSWV lub Tuamtsev ca tau siv.

²⁸Selaumaus hab nwg tsev tuabneeg ua cov saib tej khoom kws muab fij tau siv rua huv tug TSWV lub Tuamtsev, hab tej kws thaus tug povthawj Xamuyees, Kises tug tub Xa-ules, Neles tug tub Aneles, hab Xeluyas tug tub Yau-am tub muab fij lawm.

²⁹Ixahales cov xeebntxwv: Khenaniyas hab nwg cov tub puavleej muab tsaa ua cov numtswv kws tuav ntaub ntawv hab tu plaub ntug rua cov pejxeem Yixalayees.

³⁰Henploos cov xeebntxwv: Haxanpiyas hab nwg cov kwvtij muaj ib txheeb xyaa pua leej, puavleej yog cov txivneej kws muaj peevxwm, hab tsaa puab ua cov tswjfwm cov Yixalayees kws nyob ntawm tug dlej Yauladees saab nubpoob hab ua num rua tug TSWV hab vaajntxwv.

³¹Yeliyas yog tug thawjcoj ntawm Henploos cov xeebntxwv. (Thaus Daviv ua vaajntxwv tau plaub caug xyoo ntawd, txhaj tau tshawb nrhav Henploos cov xeebntxwv, hab pum tsev tuabneeg nuav tseem muaj cov ua tubrog kws sab tawv heev nyob huv lub nroog Yaxelas huv xeev Nkile-as.)

³²Vaajntxwv Daviv xaiv tau neeg nkaum xyaa txheeb leej kws muaj sab tawv heev ntawm Yeliyas tsev tuabneeg lug, hab tsaa puab ua cov saib taagnrho phaab kev ua ntaub ntawv ntawm saab kev ntseeg hab kev tswjfwm ntawm cov pejxeem Yixalayees kws nyob ntawm tug dlej Yauladees saab nubtuaj kws yog cov Lunpees, cov Khas hab ib nraab xeem Manaxes.