Read Hmong Njua 1 Xwmtxheej Vaajntxwv 28 Bible Online

1 Xwmtxheej Vaajntxwv 28 - Hmong Njua bible

1 Xwmtxheej Vaajntxwv 28

¹Vaajntxwv Daviv has rua cov Yixalayees cov numtswv kuas moog sis sau rua huv lub nroog Yeluxalees. Yog le ntawd, cov numtswv ntawm txhua xeem, cov numtswv kws tuav ntaub ntawv kws ua num rua lub tebchaws, cov thawjcoj ntawm txhua xeem, cov thawj saib tej khoom hab tej tsaj txhu kws yog vaajntxwv hab nwg cov tub tug, nrug cov numtswv huv lub loog, cov thawj tubrog, hab cov tuabneeg tseemceeb tuaj sis sau huv tuabsi rua huv lub nroog Yeluxalees.

²Daviv lug sawv taabmeeg puab hab has tas: “Cov kwvtij, mej ca le noog kuv has. Kuv xaav ua ib lub tsev kws nyob moog le rau lub Phijxaab kws ntim Vaajtswv tej lug cog tseg hab ua tug TSWV kws yog peb tug Vaajtswv qhov chaw tag taw. Kuv tau npaaj txhua yaam tav taag, yuav ua ib lub Tuamtsev lug txhawb nqaa Vaajtswv,

³tabsis Vaajtswv tsi pub kuv ua lub tuamtsev ntawd, vim kuv yog ib tug tubrog hab kuv tau tua tuabneeg coob leej ntau tug tuag lawm.

⁴Tug TSWV kws yog cov Yixalayees tug Vaajtswv, xaiv kuv hab kuv cov xeebntxwv ua vaajntxwv kaav tebchaws Yixalayees moog ibtxhis le. Vaajtswv yeej xaiv xeem Yudas lug ua cov thawjcoj hab xaiv kuv txiv tsev tuabneeg, kuv txiv cov tub, Vaajtswv txaus sab rua kuv hab tsaa kuv ua vaajntxwv kaav tebchaws Yixalayees.

⁵Vaajtswv pub rua kuv muaj tub coob, taagnrho kuv cov tub, Vaajtswv tau xaiv Xalumoos lug ua tug kaav cov Yixalayees huv tug TSWV lub nroog.

⁶“Tug TSWV has rua kuv tas, ‘Koj tug tub Xalumoos yog tug kws yuav ua kuv lub Tuamtsev. Kuv tub xaiv nwg lug ua kuv tug tub lawm, hab kuv yuav yog nwg txiv.

⁷Kuv yuav pub kuas nwg lub tebchaws nyob ruaj khov moog ibtxhis, yog nwg fwm hab coj lub neej lawv le kuv tej lug saamfwm hab tej kevcai kws nwg coj naj nub nua.’

⁸“Yog le ntawd, cov Yixalayees kws yog tug TSWV tsaav tuabneeg, kuv qha ntxiv rua mej taabmeeg tug TSWV hab mej suavdlawg kuas mej yuavtsum fwm hab ceev tug TSWV kws yog peb tug Vaajtswv tej lug kws tau saamfwm rua peb lawm, kuas mej txhaj yuav tau lub tebchaws aav zoo tshaaj plawg nuav lug ua mej tug, mej txhaj yuav tuav tau lub tebchaws nuav ca ua mej cov mivnyuas tug moog ibtxhis.”

⁹Hab nwg has rua Xalumoos has tas, “Kuv tug tub, kuv qha ntxiv rua koj, koj yuavtsum paub koj txiv tug Vaajtswv hab ua nwg teg num kuas kawg koj lub sab hab tsi xob ua ob lub sab. Nwg paub txhua yaam kws peb xaav hab txhua yaam kws peb npaaj sab ua lawm. Yog koj moog cuag nwg, nwg yuav zoo sab txais yuav koj; tabsis yog koj tsiv tawm ntawm nwg, nwg yuav tso koj tseg moog ibtxhis le.

¹⁰Koj yuavtsum paub has tas, tug TSWV tau xaiv koj kuas ua nwg lub Tuamtsev kws yog qhov chaw dlawbhuv. Nwgnuav koj ca le nqeg teg ua, hab muab lub sab xyivfaab hlo ua.”

¹¹Ces Daviv muab tug qauv kws yuav ua lub Tuamtsev, tej chaav rau khoom, tej chaav tsev txheej sau, chaav Dlawbhuv Kawg Nkaus kws yog qhov chaw zaam txim, cob huv tuabsi rua nwg tug tub Xalumoos,

¹²hab nwg muab tug qauv kws nwg xaav tseg yuav ua lub tshaav puam hab tej chaav kws nyob puagncig tug TSWV lub tsev, tej txhaab kws rau Vaajtswv lub Tuamtsev tej cuabyeej, hab tej txhaab kws rau tej khoom kws luas coj tuaj fij pub rua tug TSWV rua Xalumoos;

¹³Daviv tseem muab nwg tug qauv kws tsaa cov povthawj hab cov Levis lug tuav puab lub luag num, ua tej num huv tug TSWV lub Tuamtsev, hab saib txhua yaam khoom huv tug TSWV lub Tuamtsev lug cob rua Xalumoos.

¹⁴Nwg qha kuas yuavtsum muab kub npaum le caag coj moog nchuav txhaj txaus ua tej khoom siv kws yog muab kub ua, hab muab nyaj npaum le caag coj moog nchuav txhaj txaus ua tej khoom siv kws yog muab nyaj ua.

¹⁵Cov kub yog coj moog nchuav ua cov ncej txawb teeb hab cov teeb, cov kub puavleej coj moog ua cov ncej txawb teeb hab cov teeb kub, cov nyaj coj moog ua cov ncej txawb teeb hab cov teeb nyaj, lawv le tej teeb kws ua lug siv ntawd,

¹⁶ua tej rooj nyaj hab tej rooj kub kws rau tej ncuav kws luas coj tuaj fij rua Vaajtswv,

¹⁷hab Daviv qha kuas muab kub npaum le caag nchuav ua dlav rawg, taig phab hab khob; muab nyaj hab kub npaum le caag lug ua tej twj taig,

¹⁸hab muab kub npaum le caag ua lub thaaj kws hlawv moov tshuaj tsw qaab hab ua lub tsheb rau ob tug qhelunpees kws nthuav tis npug rawv sau tug TSWV lub Phijxaab.

¹⁹Vaajntxwv Daviv has tas, “Txhua yaam kws nyob huv dlaim qauv nuav yeej sau lawv le tej lug kws tug TSWV muab cob rua kuv lawm ntaag.”

²⁰Vaajntxwv Daviv has rua nwg tug tub Xalumoos has tas, “Koj ca le ua sab tawv qhawv tsi xob ntshai hab xyivfaab hlo. Pib ua num hab tsi xob pub ib yaam dlaabtsi taabkaum koj le. Tug TSWV kws yog Vaajtswv tug kuv pehawm, nwg yuav paab koj. Nwg yuav tsi tso koj tseg, tabsis nwg yuav nrug koj moog txug thaus kws koj ua nwg lub Tuamtsev tav lawm.

²¹Ca le muab cov povthawj hab cov Levis faib ua tej paab ua txhua teg num huv lub Tuamtsev. Cov txivneej kws txawj txhua yaam yuav zoo sab tuaj paab koj, cov pejxeem hab puab tej thawjcoj yuav noog koj lug.”