Read Hmong Njua 1 Xwmtxheej Vaajntxwv 29 Bible Online

1 Xwmtxheej Vaajntxwv 29 - Hmong Njua bible

1 Xwmtxheej Vaajntxwv 29

¹Vaajntxwv Daviv has rua cov pejxeem kws tuaj sis sau ua ke ntawd has tas: “Kuv tug tub Xalumoos yog ib tug kws Vaajtswv tau xaiv lawm, tabsis nwg tseem hluas hab tsi tau paub txhij txhua. Qhov kws yuav ua nuav yog teg num kws tseemceeb heev, rua qhov tsi yog ua lub loog rua tuabneeg nyob, tabsis yog ua lub tuamtsev rua tug TSWV kws yog Vaajtswv nyob.

²Kuv muab sab siv zug npaaj txhua yaam khoom ua lub Tuamtsev: kub, nyaj, tooj, hlau, ntoo cab, hlaws, pobzeb muaj nqes, pobzeb xobna, pobzeb tawv hab ntau yaam pobzeb tseemceeb lug ua tug TSWV lub Tuamtsev.

³Dlua le ntawd, kuv tseem muab ntau tshaaj ntawd lug ua lub Tuamtsev kws dlawbhuv, kuv tau muab tej nyaj tej kub kws yog kuv tug coj lug ntxiv rua, vim kuv hlub Vaajtswv lub Tuamtsev heev.

⁴Kuv muab cov tseem kub yog ib puas kaum tsib taas hab cov tseem nyaj yog ob puas rau caum tsib taas coj lug ua tej saw dlai rua huv lub Tuamtsev tej phaab ntsaa

⁵hab txhua yaam khoom siv yog cov tuabneeg nchuav nyaj nchuav kub ua, muab kub nchuav ua tej khoom siv kws yog kub, hab muaj nyaj nchuav ua tej khoom siv kws yog nyaj. Yog le ntawd, nub nuav puas muaj leejtwg muaj lub sab dlawb sab zoo xaav coj khoom tuaj fij rua tug TSWV lawm hab?”

⁶Cov thawjcoj ntawm tej cuab kwvtij, cov numtswv ntawm tej xeem, cov thawj tubrog, hab cov tuav ntaub ntawv saib vaajntxwv tej khoom txhaj txaus sab hlo coj

⁷tej khoom nuav tuaj ua lub Tuamtsev: ib puas cuaj caum taas kub, peb puas yim caum taas nyaj, rau pua xyaa caum tsib taas tooj hab peb txheeb xyaa pua tsib caug taas hlau.

⁸Yog leejtwg muaj tej hlaws pobzeb muaj nqes ca le coj tej ntawd tuaj tso rua huv lub txhaab nyaj huv lub Tuamtsev, muab cob rua Nkesoos tug xeebntxwv Yehiyees kws yog xeem Levis ua tug saib.

⁹Cov pejxeem txaus sab coj puab tej khoom tuaj pub rua tug TSWV ntawm lub sab dlawb paug, hab puab zoo sab qhov kws puab tau coj khoom ntau heev tuaj pub rua Vaajtswv. Hab Vaajntxwv Daviv los kuj zoo sab kawg le.

¹⁰Vaajntxwv Daviv qhuas tug TSWV taabmeeg cov pejxeem suavdlawg kws tuaj sis sau ua ke ntawd. Nwg has tas, “Tug TSWV kws yog peb yawmkoob Yakhauj tug Vaajtswv, thov txhawb nqaa koj lub npe moog ibtxhis tsi kawg!

¹¹Tug TSWV, koj yog tug kws muaj zug nchaav, muaj fwjchim, muaj tshwjchim ci ntsaa ab, yog tug kws zoo kawg nkaus hab yog tug nyob moog ibtxhis. Txhua yaam kws nyob sau nruab ntug hab huv nplajteb nuav puavleej yog koj le, hab koj yog tug vaajntxwv kws kaav txhua tug huv tuabsi.

¹²Kev muaj txag npluanuj hab lub koob meej puavleej yog koj pub; koj yog tug kaav txhua tsaav yaam lug ntawm koj lub fwjchim; hab koj yog tug muaj peevxwm muab koob meej hab fwjchim tau rua txhua tug.

¹³Peb tug Vaajtswv, nwgnuav peb thov ua koj tsaug, peb thov txhawb nqaa hab qhuas koj lub npe kws muaj tshwjchim luj kawg nkaus.

¹⁴“Kuv tsaav tuabneeg hab kuv yeej muab tsi tau ib yaam dlaabtsi pub rua koj le, rua qhov tej ntawd puavleej yog koj le, peb tsuas muab tej kws yog koj le rov rua koj xwb.

¹⁵Tug TSWV, koj tub paub lawm has tas, peb yog tuabneeg thojnaam kws tsiv ib qho rua ib qho zoo le tej tuabneeg kws ua luas qhev hab zoo le tej tuabneeg txawv tebchaws, ib yaam le thaus peb cov yawmkoob tau ua lug lawm. Peb txujsa zoo le tug dluab ntxoov ntxoo kws dlua moog zuj zug, hab peb dlha tsi dlhau txujkev tuag le.

¹⁶Tug TSWV kws yog peb tug Vaajtswv, taagnrho tej nyaj kws peb nqaa tuaj ua lub Tuamtsev kws yog qhov chaw pehawm koj lub npe kws dlawbhuv; tej nyaj txag nuav puavleej yog koj le xwb.

¹⁷Kuv paub has tas, koj sim peb txhua tug lub sab hab koj txaus sab rua cov pejxeem kws muaj lub sab npuab koj. Kuv muaj lub sab dlawb sab zoo hab muab lub sab npuab koj, kuv txhaj zoo sab muab tej khoom nuav fij rua koj, kuv pum koj tsaav tuabneeg kws tuaj sis sau rua ntawm nuav puavleej zoo sab coj puab tej khoom tuaj rua koj huv tuabsi.

¹⁸Tug TSWV kws yog peb yawmkoob Anplahaas, Ixaj hab Yakhauj tug Vaajtswv, thov koj ceev tej lug nuav rua huv koj tsaav tuabneeg lub sab moog ibtxhis, hab thov tswj kuas puab ua lub sab ncaaj rua koj.

¹⁹Thov pub rua kuv tug tub Xalumoos muaj lub sab puv npo koj tej lug saamfwm, ua lawv le koj tej kevcai hab rau sab ntso muab tej kws kuv tub npaaj txhij nuav lawm ua kuas tau lub Tuamtsev.”

²⁰Daviv saamfwm rua cov pejxeem has tas, “Ca le qhuas tug TSWV kws yog mej tug Vaajtswv los mas!” Ces taagnrho cov pejxeem kws tuaj sis sau ua ke ntawd txhaj ua tug TSWV kws yog puab cov yawmkoob tug Vaajtswv tsaug, hab txhua tug nyo hau pehawm qhuas tug TSWV hab vaajntxwv.

²¹Ces nub tom qaab ntawd puab txawm tua tsaj fij rua tug TSWV, hab muab tej tsaj ntawd faib rua cov pejxeem coj moog noj. Dlua le ntawd, puab tseem muab tau ib txheeb tug txiv nyuj, ib txheeb tug laug yaaj, hab ib txheeb tug mivnyuas yaaj lug tua fij ntxiv kws yog muab coj moog hlawv rua sau lub thaaj. Hab puab tseem coj tej cawv txiv maab tuaj fij rua Vaajtswv huv tuabsi.

²²Yog le ntawd, nub ntawd puab txhaj noj hab haus muaj kev zoo sab heev taabmeeg tug TSWV. Zag nuav yog zag ob kws puab tsaa Xalumoos ua Vaajntxwv kws yog muaj tug povthawj Xadaus ua puab tug thawjcoj, tuav tug TSWV lub npe txhawb meejthawj rua Xalumoos.

²³Ces Xalumoos tau ua vaajntxwv nyob sau lub zwmtxwv hloov nwg txiv Daviv chaw lawv le tug TSWV tau has tseg rua nwg lawm. Xalumoos tau ua vaajntxwv hab taagnrho lub tebchaws Yixalayees fwm nwg heev.

²⁴Taagnrho cov numtswv, cov tubrog hab Vaajntxwv Daviv cov tub puavleej coglug yuav ua ncaaj nceeg rua Vaajntxwv Xalumoos.

²⁵Ces tug TSWV ua kuas tsaav tuabneeg Yixalayees paub fwm Xalumoos, hab Vaajtswv pub rua nwg muaj fwjchim luj dlua lwm tug vaajntxwv kws tau kaav tebchaws Yixalayees yaav taag lug lawm.

²⁶Yexais tug tub Daviv ua vaajntxwv kaav tsaav tebchaws Yixalayees

²⁷tau plaub caug xyoo. Nwg kaav nyob huv Henploos tau xyaa xyoo hab kaav nyob huv lub nroog Yeluxalees tau peb caug peb xyoo.

²⁸Daviv tuag thaus nwg laug heev lawm, nwg npluanuj, luas fwm nwg, hab nwg tug tub Xalumoos ua vaajntxwv hloov nwg chaw.

²⁹Zaaj kws has txug Vaajntxwv Daviv lub neej thaus pib lug txug thaus xaus puavleej muab sau ca rua huv Xamuyees tug kws cev Vaajtswv lug phoo ntawv, hab sau rua huv tug povthawj Nathaas phoo ntawv xwmtxheej hab muab sau rua huv Nkas tug kws cev Vaajtswv lug phoo ntawv,

³⁰Tej ntaub ntawv ntawd, qha txug Daviv kev tswjfwm zoo le caag, nwg muaj fwjchim npaum le caag hab taagnrho tej xwmtxheej kws tshwm rua nwg, rua lub tebchaws Yixalayees hab rua cov tebchaws kws nyob puagncig nwg lub tebchaws.